Taa, anarî komo tan wetahcas hara Ixaw Yana komo, tîyanan komo yantoman̂e me cehsom kom ha. Sowtatu yantoman̂e komo mîkyam xatken̂e. 1.000 komo yantoman̂e me xatken̂e anarî komo, 100 komo yantoman̂e me xatken̂e anarî kom hara. N̂examro maywen komo marha tan wetahcasî. Kayaritomo yanme antomano rin̂e me xatken̂e n̂examro, sowtatu komo yantoman̂e me ha. Tîracoi so tko tî xatken̂e ero poko. 24.000 so tî xatken̂e yîraconhîrî, anarî nantomarî komo. Yîraconhîrî xa hara tî xakn̂e 24.000 xa marha tî xatken̂e anarî nantomarî kom hara. Ero wa so xatken̂e ahnoro sowtatu yantoman̂e komo. Anarî nuun̂i po so tî anarî komo xatken̂e cemyarke sowtatu me cehtopo komo poko, anarî nuun̂i po hara anarî komo tî xatken̂e hara ero poko emtaka so hara.

2 Yihcirî nuun̂i po tî Xasobeaw xakn̂e ero pokono komo yantoman̂e me, Sabiciew mumuru ha. Tînantomarî komo yakro tî xatken̂e ero pokono me. 24.000 tî xatken̂e noro nantomarî komo.

3 Perese pen yepamtho tî mîk xakn̂e Xasobeaw. Yihcirî po nuun̂i po tî noro xakn̂e sowtatu yantoman̂e komo yenîn̂e me ero nuun̂i po sowtatu me cehsom komo yenîn̂e me.

4 2-înhîrî nuun̂i po tî Totai xakn̂e sowtatu yantomacho poko hara. Ao pono tî mîk xakn̂e Totai. Noro yakrono me tî xakn̂e Mikroce hara sowtatu yantoman̂e me. 24.000 xa marha tî xatken̂e noro nantomarî kom hara, Totai nantomarî kom ha.

5 3-înhîrî nuun̂i po tî Benaia xakn̂e sowtatu yantomacho poko hara, Xoiata pen mumutho, Kaan yaka cewomsom mumutho ha. Sowtatu yantoman̂e komo yantoman̂e me tî xakn̂e noro ero nuun̂i po. 24.000 xa marha tî xatken̂e sowtatu komo noro nantomarî kom hara.

6 30 komo poyino rma tî mîk xakn̂e Benaia, karitî komo yakrono ha. 30 komo poturme rma tî xakn̂e. Yumumuru marha tî xakn̂e noro yakrono me. Amisabace tî mîk xakn̂e yumumuru yosotî.

7 4-nhîrî nuun̂i po tî Asaew xakn̂e sowtatu komo yantomacho poko hara, Xoabe yakno. Noro xawyaka tî xakn̂e Sebacias Noro mumuru rma. 24.000 xa marha tî xatken̂e yînantomarî kom hara.

8 5-nhîrî nuun̂i po tî Samuce xakn̂e sowtatu yantomacho poko hara, Isira pono ha. 24.000 xa marha tî xatken̂e yînantomarî kom hara.

9 6-înhîrî nuun̂i po tî sowtatu yantomacho poko tî xakn̂e Ira hara, Ikes mumuru, Tekoa pono mumuru ha. 24.000 xa marha tî xatken̂e yînantomarî kom hara.

10 7-nhîrî nuun̂i po tî Eres xakn̂e sowtatu yantomacho poko hara. Perona pono tî mîk xakn̂e Eres, Eprain yepamtho ha. 24.000 xa marha tî xatken̂e yînantomarî kom hara.

11 8-nhîrî nuun̂i po tî Sibekai xakn̂e sowtatu yantomacho poko hara. Usa pono tî mîk xakn̂e Sibekai, Sera pen yepamtho ha. 24.000 xa marha tî xatken̂e yînantomarî kom hara.

12 9-nhîrî nuun̂i po tî Abiese xakn̂e sowtatu yantomacho poko hara. Anatoce pono tî mîk xakn̂e Abiese. Benxamin yepamtho tî mîk xakn̂e. 24.000 xa marha tî xatken̂e yînantomarî kom hara.

13 10-înhîrî nuun̂i po tî Maarai xakn̂e sowtatu yantomacho poko hara. Netopa pono tî mîk xakn̂e, Sera pen yepamtho ha. 24.000 xa marha tî xatken̂e yînantomarî kom hara.

14 11-nhîrî nuun̂i po tî Benaia xakn̂e sowtatu yantomacho poko hara. Piraton pono tî mîk xakn̂e noro, Eprain yepamtho ha. 24.000 xa marha tî xatken̂e yînantomarî kom hara.

15 12-nhîrî nuun̂i po tî Ewtai xakn̂e sowtatu yantomacho poko hara. Netopa pono tî mîk xakn̂e, Ociniew mumuru ha. 24.000 xa marha tî xatken̂e yînantomarî kom hara. Ero wa tî xatken̂e sowtatu raconho yantoman̂e komo.

16 Taa, Ixaw Yana komo yenîn̂e komo tan wetahcas hara, tribu komo yenîn̂e kom ha. Huben yepamtho komo yenîn̂e me tî xakn̂e Eriese, Sikri mumuru. Simeaw yepamtho komo yenîn̂e me tî xakn̂e Sepacias, Maaka mumuru.

17 Repita komo yenîn̂e me tî xakn̂e Asabias, Kemuew mumuru. Araw yepamtho yenîn̂e me tî xakn̂e Satoke.

18 Xuta yepamtho komo yenîn̂e me tî xakn̂e Eriu, Tapi yakno. Isaka yepamtho komo yenîn̂e me tî xakn̂e Onhi, Mikaew mumuru.

19 Seburon yepamtho komo yenîn̂e me tî xakn̂e Ismaias, Obacias mumuru. Nahtari yepamtho komo yenîn̂e me tî xakn̂e Xerimoce, Asîriew mumuru.

20 Eprain yepamtho komo yenîn̂e me tî xakn̂e Oseias, Asasias mumuru. Manases yepamtho poyinonho yenîn̂e me tî xakn̂e Xoew, Petaias mumuru.

21 Manases yepamtho komo tî xatken̂e anarî komo hara, poyinonhîrî kom hara, Xireace pono komo reha, n̂examro yenîn̂e me tî xakn̂e Ito, Sakarias mumuru. Benxamin yepamtho komo yenîn̂e me tî xakn̂e Xaasiew, Abin̂e mumuru.

22 Taan yepamtho komo yenîn̂e me tî xakn̂e Asarew, Xeroaw mumuru. Ero wa tî xatken̂e Ixaw Yana yenîn̂e komo, tribu komo yenîn̂e kom ha.

23 Ixaw yepamtho komo tî yukuknomara xakn̂e Tapi 20 cimn̂ipu exihnawno komo ka. On wara tî kekn̂e Kporin komo, Ixaw yepamtho komo wepamnoyas amn̂e mer̂pora ro mak xirko wicakî ro makî, kekn̂e tî. Ero ke tî poritomo pîn komo yukuknomara xakn̂e Tapi.

24 Yukuknomano n̂iir̂akn̂e ha re Xoabe, Seruia mrerî, yukuknomatîkara rma tko tî xakn̂e. Nîrwonakn̂e tko tî Kporin komo Ixaw Yana komo poko yukuknomarî ke. Ero ke katîkara tî xakn̂e Xoabe. Karita yaw marha tî mewrera xatken̂e yukuknomacho, Tapi Yehtoponho, kacho yaw. Ero wa tî xakn̂e.

25 Anarî komo marha wetahcasî kayaritomo mawyen komo, mîn hak pokono komo. Asmapece tî xakn̂e kayaritomo purantan yenîn̂e me, ahce na cepethîkem yenîn̂e me ha. Aciew mumuru tî mîk xakn̂e. Xonatas tî xakn̂e kayaritomo yemyawno mîn yenîn̂e me, Usias mumuru ha. Mararî pono, ewto imo pono, ewtoci pono, sowtatu wacan yawno, ero warai mko yenîn̂e me tî xakn̂e Xonatas, kayaritomo yemyawno yenîn̂e me.

26 Kayaritomo mararîn pomon̂e komo yantoman̂e me tî xakn̂e Esîri, Kerube mumuru.

27 Uupa yatî yenîn̂e me tî xakn̂e Simei, Hamace pono. Uupa yeperîrî yenîn̂e me tî xakn̂e Sabci, Sipma pono. Wooku ciin̂e komo yantoman̂e me marha tî noro xakn̂e, ero yewkukacho komo yenîn̂e me ha.

28 Anarî marha tî xakn̂e, Baaw Anan tî mîk xakn̂e Xete pono ha. Noro tî xakn̂e oripa yepu yenîn̂e me, sikamoro yepu yenîn̂e me marha aporî yecihtawno yenîn̂e me. Xoasî tî xakn̂e asece yenîn̂e me yîmtocho yawno yenîn̂e me.

29 Kayaritomo yok yenîn̂e me tî xakn̂e Sitîrai, Saron pono. Paaka tî n̂een̂akn̂e Saron pono yahn̂e rma, cuupu yahn̂e. Sapace marha tî xakn̂e kayaritomo yok yenîn̂e me hara, paaka yenîn̂e me. Woskara pono yenîn̂e me makî tî mîk xakn̂e. Acirai mumuru tî mîk xakn̂e Sapace.

30 Kameru marha tî xakn̂e kayaritomo yoku. Noro yenîn̂e me tî xakn̂e Obiw, Ismaew yepamtho. Buhu marha tî xakn̂e kayaritomo yoku. Noro yenîn̂e me tî xakn̂e Xecias, Merono pono.

31 Oper̂a yenîn̂e me tî xakn̂e Xasis, Akara pono. Ero wa tî xatken̂e Tapi yemyano yenîn̂e komo, iyok yenîn̂e komo marha.

32 Xonatas tî xakn̂e Tapi yakro cesentaxmu. Tapi tamru tî mîk xakn̂e noro. Yuhnarino yîhtînon̂e tî mîk xakn̂e, karita mewren̂e marha tî. Xeiew tî xakn̂e kayaritomo mumuru komo yakrono me, Akmoni mumuru ha.

33 Aitopew tî xakn̂e kayaritomo yakîhren̂e me. Kayaritomo yakrono ro me tî xakn̂e Usai, Ahka pono.

34 Aitopew waipuche Xoiata takî tî xakn̂e Tapi yakîhren̂e me hara. Benaia mumuru tî mîk xakn̂e Xoiata. Abiata marha tî xakn̂e noro yakîhren̂e me. Tapi sowtatun komo yantoman̂e me tî xakn̂e Xoabe. Ero wa tî xatken̂e Tapi maywen komo, mîn hak pokono komo.