Taa, Kaan mîn metatan yenîn̂e komo yosotî wekatîmyas hara awya so. Tîraconkaxi so marha tî xatken̂e n̂examro. Kore yepamtho komo ka wetahcasî yihcirî me, Asape mumuru tî mîk xakn̂e Kore. Kore mumuru tî xakn̂e hara Meseremias, noro yosotî.

2-3 On wara tî xatken̂e Meseremias mumuru komo yosot hara, potuthîrî yosotî Sakarias, 2-înhîrî yosotî Xeciaew, 3-înhîrî yosotî Sebacias, 4-nhîrî yosotî Xaciniew, 5-nhîrî yosotî Eraw, 6-înhîrî yosotî Xoanan, 7-nhîrî yosotî Erioenai. Ero wara tî xakn̂e n̂examro yosotî.

4-5 On wara tî xatken̂e Obece-Eton mumuru komo yosotî, potuthîrî yosotî Semaias, 2-înhîrî yosotî Xosabace, 3-înhîrî yosotî Xoa, 4-nhîrî yosotî Saka, 5-nhîrî yosotî Natanaew, 6-înhîrî yosotî Amiew, 7-nhîrî yosotî Isaka, 8-nhîrî yosotî Peuretai, ero wara. Obece-Eton wakrekn̂e Kporin komo yumumuru komo ke.

6 Noro parî komo marha tî n̂ewruyatken̂e hara Semaias mumuru komo. Yaana me cehsom komo xa tî mîkyam xatken̂e. Ero ke tporin pen yepamtho yantoman̂e me tî xatken̂e.

7 On wara tî xakn̂e Semaias mumuru komo yosotî, Ocini, Hapaew, Obece, Ewsabace, ero wara. Noro yakno marha tî xakn̂e asakî, Eriu, Semakias, ero wara tî osotî xakn̂e. N̂examro marha tî xatken̂e yaana me cehsom komo cemyawno komo poko.

8 Ero wa tî xatken̂e Obece-Eton mumuru komo, n̂examro yakno komo, n̂examro mumuru komo marha. Karitî komo tî mîkyam xatken̂e kir̂wan̂he cetapickachome. 62 tî mîkyam xatken̂e Obece-Eton yepamtho komo.

9 Yaake marha tî xatken̂e Meseremias mumuru komo, noro yakno komo marha. Yaana me cehsom komo marha tî mîkyam xatken̂e. 18 tî mîkyam xatken̂e.

10 On wara tî xatken̂e Osa mumuru komo. Merari yepamtho tî mîk xakn̂e Oosa. Sinhi tî xakn̂e takno komo yantoman̂e me. Potuthîrî pînî rma tî mîk xakn̂e. Wara rma tumumuru komo poturu warai me tî n̂iir̂akn̂e yîîm.

11 Iwkias tî 2-înhîrî yosotî, Tebarias tî 3-înhîrî yosotî, Sakarias tî 4-nhîrî yosotî, ero wara. 13 tî mîkyam xatken̂e Osa mumuru komo, noro yakno komo marha.

12 N̂examro tî n̂iir̂atken̂e metata yenîn̂e me, n̂examro yantoman̂e komo tî nantometken̂e ero poko. Tîyanan komo wara rma tî xatken̂e Kaan mîn yenîrî pokono me.

13 Men̂ekacho tî nar̂metken̂e xa hara n̂examro yîn̂enîrî ro komo yîhtînotome. Ero an̂enîrî ro komo amoro, ayanan komo yakro, ero an̂enîrî ro kom hara, amoro, ayanan komo yakro, kacho tî nîhtînoyatken̂e men̂ekacho yar̂marî ke. Etîme re tî nîhtînoyatken̂e kar̂pamxan me cehsom komo yemyawno, poritomo me cehsom komo yemyawno marha.

14 Seremias yanme ar̂metaw resce n̂ixan ponan me tî n̂epîrkekn̂e, metata ponan me ha. Ero yinhîrî takî tî Sakarias yanme nar̂metken̂e hara. Seremias mumuru tî mîk xakn̂e Sakarias. Akîhreno rin̂e tî mîk xakn̂e. Noro yanme ar̂mache nohce n̂ixan ponan me tî n̂epîrkekn̂e, metata ponan me.

15 Obece-Eton yanme ar̂metaw suu n̂ixan ponan me tî n̂epîrkekn̂e hara ero yehtome tak noro n̂enîrî me metata hara. Noro mumuru komo tî n̂iir̂atken̂e Kaan mîn yawno mko yîmtotopo yenîn̂e me marha.

16 Supin, Osa komo, n̂examro yanme ar̂metaw oesce n̂ixan ponan me tî n̂epîrkekn̂e, metata ponan me hara. Ero ke ero xakn̂e n̂examro n̂enîrî me. Sarekece metatan ponan me marha tî n̂epîrkekn̂e yîn̂enîrî ro komo me. Îîpî pona kîwtotopo yakan tî mîn xakn̂e ero metata. Xehxa tî xakn̂e enîn̂e, esama yeco po marha tî xakn̂e anarî hara enîn̂e, noro yemtaka hara.

17 Repita komo tî mîkyam xatken̂e. 6 tî xatken̂e kaamo po roro resce n̂ixan yenîn̂e me, 4 makî tî xatken̂e nohce n̂ixan yenîn̂e me ahnoro kaamo po roro, 4 marha tî xatken̂e kaamo po roro suu n̂ixan yenîn̂e me hara. Asakî so tî xatken̂e Kaan mîn yawno mko yîmtotopo yenîn̂e me.

18 Mehxa tî xakn̂e Kaan mîn roron. Oesce n̂ixa xakn̂e. Ero potaw tî xatken̂e 4 enîn̂e komo. Roro po xa tî xakn̂e asakî xa hara enîn̂e komo.

19 Ero wa tî xatken̂e Kaan mîn metatan yenîn̂e komo. Kore yepamtho komo tî mîkyam xatken̂e, Merari yepamtho komo marha. Ero wa tî xatken̂e.

20 On wara marha tî xatken̂e anarî kom hara Repita komo rma, Kaan purantan yîmtotopo yenîn̂e me tî xatken̂e, ahce na tîmxapu yîmtotopo yenîn̂e me marha.

21 Raatan yepamtho komo tî xatken̂e ero pokono me, Xehson pen yepamtho komo tî mîkyam xatken̂e. Tîyanan komo yantoman̂e me tî xakn̂e noro. Xeieri tî mîk xakn̂e noro mumuru yosotî.

22 Asakî tî xakn̂e Xeieri mumuru hara, Setan, Xoew, etakno re. Kaan purantan yen yîmtotopo yenîn̂e me marha tî mîkyam xatken̂e.

23 On wara tî xakn̂e Anhaw yepamtho poyino komo yosot hara, Isa yepamtho poyino komo yosotî, Ebron yepamtho poyino komo yosotî, Usiew yepamtho poyino yosotî. Noro yipu komo tak wetahcasî.

24 Sebuew tî xakn̂e Xehson yepamtho, Moises pen mumutho yepamtho ha. Noro marha tî xakn̂e Kaan purantan yîmtotopo yenîn̂e me.

25 On wara tî xatken̂e noro yanan komo. Eriese mumuru tî xakn̂e Heabias tî osotî. Heabias mumuru tî xakn̂e hara, Xesaias tî osotî. Xesaias mumuru tî xakn̂e hara Xoraw tî osotî. Xoraw mumuru tî xakn̂e hara Sikri tî osotî. Sikri mumuru tî xakn̂e hara Seromice tî osotî. Ero wa tî xatken̂e Sebuew yanan komo.

26 Taa, Seromice tî xakn̂e Kaan ya tîmxapu yîmtotopo yenîn̂e me tîyanan komo yakro. Mîn hakî tî nîmyakn̂e Tapi Kporin komo ya. Ero wa xa marha tî nîmyatken̂e noro re yepamtho me cehsom yantoman̂e komo. Ero wa xa marha nîmyatken̂e sowtatu yantoman̂e kom hara, 1.000 yantoman̂e komo, 100 yantoman̂e komo marha. Ero warai komo tî nîmyatken̂e Kporin komo ya ahce na mko.

27 Ixaw Yana wapatho pen komo yar̂mache emyawnonhîrî komo takî tî nahsîyatken̂e sowtatu komo. Ero raconho tî nîmyatken̂e Kporin komo ya yîmîn yakir̂waman̂e komo yepetho me.

28 Ero warai mko marha tî nîmyakn̂e Samuew, Kaanî n̂enpotho yenîn̂e ro, Sau marha, Kis mumuru, Abine marha, Nee mumuru, Xoabe marha, Seruia mrerî. Ahnoro yînmîthîrî komo tî xakn̂e Seromice n̂enîrî me, iyanan komo n̂enîrî me marha. Ero wa tî xakn̂e.

29 On pokono me tî xatken̂e Xiisa yepamtho hara, Kenaniasî tî xakn̂e Ixaw Yana komo yantoman̂e me, Xerusaren pono pîn komo yantoman̂e me, en̂ekan̂e me marha. Tumumuru komo yakro rma tî ero pokono me xatken̂e.

30 On pokono me tî xakn̂e Asabias hara, Ebron yepamtho ha, Ixaw komo yantoman̂e me tî xakn̂e, Xotaw yeco pono komo yantoman̂e me, oesce n̂ixan komo yantoman̂e me ha. Kporin komo yanme tî enîno n̂iir̂akn̂e, kayaritomo yanme marha. Mer̂pora tî xatken̂e noro yanan komo, 1.700 tî xatken̂e Asabias yakrono komo ero pokono me.

31 Xerias marha tî xakn̂e Ebron yepamtho me. Tîyanan komo yantoman̂e me marha tî xakn̂e noro. Ero wara tî xakn̂e noro yosotî tmewreso iyanan komo yosotî yakro karita yaw. 40 cimn̂ipu exitaw kayaritomo me Tapi yehtoponho ero yimaw tî karita mko n̂een̂atken̂e, Ero yaw tî Xase pono komo yosotî n̂een̂atken̂e, Xireace pono komo yosot ha. Yaana komo mîkyam xatken̂e cemyawno komo poko. Ero ke tî n̂examro xatken̂e ero poko xa marha.

32 Mer̂pora tî xatken̂e Xerias yanan komo, 2.700 tî xatken̂e. Yaana me cehsom marha tî mîkyam xatken̂e cemyawno komo poko. N̂examro tî n̂iir̂akn̂e Tapi Huben yepamtho komo yenîn̂e me, Kace yepamtho komo yenîn̂e me, Manases yepamtho poyinonho komo yenîn̂e me. Kaan yanme ehtopo komo poko akîhreno n̂iir̂akn̂e, kayaritomo mtapotacho yentamexpon̂e me marha. Ero pokono me tî n̂examro n̂iir̂akn̂e Tapi.