Taa, Ixaw Yana kayaritomon komo yehtoponho rma tan wekatîmyasî. N̂examro kayaritomon pen tî waihyakn̂e Akabe pen. Noro pen waipuche yumumuthîrî takî tî xakn̂e kayaritomo me hara, Akasias ha. Ero yimaw takî tî Moabe pono komo takî tî n̂etanwekyatken̂e, Akasias yewetîn̂e me exihra takî tî xatken̂e. Ero wa tî xatken̂e Moabe pono komo.

2 Ero yimaw takî tî on wara xakn̂e Akasias, n̂epîrkekn̂e takî tî noro pen cerewre ro mak oko. Tîmîn yai rma tî n̂epîrkekn̂e eporino yai. Amtakpo tî xakn̂e yîmîn yaw, eporino. Twacaye rma tî re mîn xakn̂e amtakpo taraxem ke. Ero ke waaca pen tî n̂etaxikwekekn̂e epîrketaw. Kai ro cepîrkarî ke tî namotoyakn̂e tak. Ero ke tmaywen komo takî tî nan̂ikyakn̂e. On wara tî kekn̂e yîwya so, Ai, etocoko amyamro Ekron pona. Iito tî nai Baaw-Sebube, ponaro iitono komo yehtopo. Noro mtapotarî entatako. On wara kacoko yîwya, Amna kayaritomon nasî okohme okwe. Ahce wa nai amn̂e awya, kar̂pe nai hara, waihya katî? kacoko yîwya, kekn̂e tmaywen komo ya.

3 Ero yimaw rma tko Kporin komo yancun takî tî nîmtapowakn̂e Erias yakro, Cisbi pono yakro. On wara tî kekn̂e yîwya, Ai, Erias, miya etoko Samaria yesamarî yaw. Kayaritomo maywen komo yakro esepotpona etoko. On wara kasko yîwya so, Ahce kacho mîîcetu miya Baaw-Sebube mtapotarî yentax ha? Ponaro xa Ekron pono komo yehtopo mîk okwe. Ahce kacho noro yipu mtapotarî yentaxî mîîcetu kica? Kaan katî exihra nai iito Ixaw Yana komo chew awya so?

4 On wara tî nîîke Kporin komo akayaritomon komo ya awya en̂epeno rirî ke, awomra takî tî mai. Kuywa po masî, ero po rma mîwaiya okwe, nîîke. Ero ke ero wa katatko yîwya, awen̂epen̂enhîrî komo ya, kekn̂e tî yîwya. Ero wa tî kekn̂e ancu yîwya. Ero ke tî cekn̂e Erias.

5 Ero yinhîrî takî tî en̂epexapunhîrî komo n̂etîrametken̂e hara. N̂examro yenîche on wara tî kekn̂e kayaritomo yîwya so, Ahce kacho mîmohcow hara? kekn̂e tî.

6 On wara tî n̂eyukyatken̂e, on wara kan̂e thakwa amna n̂eporî. On wara nîîka amna ya, Etocoko hara akayaritomon komo yaka, awen̂epen̂enhîrî komo yaka. On wara kacoko yîwya, On wara kesî Kporin komo awya, Ahce kacho amaywen komo men̂epew Baaw-Sebube mtapotarî yentaxi, ponaro Ekron pono komo yehtopo mtapotarî yentax ha? Kaan exihra ma nai ke tanî, Ixaw Yana komo chew? Ero wa en̂epeno rirî ke awya yîhtora ro makî tî mai okwe akuywan poi, yiipo masî ero poi. Ero po rma tî mîwaiya okwe, kesî Kporin komo awya, nîîka amna ya, ketken̂e tî kayaritomo ya.

7 On wara tî kekn̂e kayaritomo yîwya so, Ai ha. Onoke warai xa mîk moko ahyaka so ero wa kaxi? kekn̂e tî yîwya so.

8 On wara tî n̂eyukyatken̂e, tîhpoxem xa mîk n̂eexi, taan̂apotuyem marha mîk paaka picho ke, ketken̂e tî. Ai ha, Erias xa mîk ham Cisbi pono, kekn̂e tî kayaritomo.

9 Ero yinhîrî takî tî sowtatu yantoman̂e n̂en̂epekn̂e kayaritomo Erias yan̂ihso. 50 sowtatu komo tî n̂en̂epekn̂e noro yakro. Ero ke Erias yaka tî cetken̂e. Îh ken̂arî po tî xakn̂e Erias, matîwîn meretwo ceremaxi. On wara tî kekn̂e sowtatu yantoman̂e yîwya, Ai, Kaan yakrono ro amoro, on wara tî nîîke kayaritomo awya, Amok ha, nîîke tî, kekn̂e tî yîwya.

10 On wara tko tî n̂eyukyakn̂e Erias yîmtaka, Kaan yakrono ro me oyexitaw wehto tak mokope kah yai awakn̂itopo, anantomarî komo yakn̂ihtopo marha, kekn̂e tî. Ero ke wehto takî tî n̂epîrkekn̂e oco kah yai. Sowtatu yantoman̂e pen tî nakn̂iyakn̂e 50 pen komo yakro rma okwe.

11 Ero yinhîrî takî tî anarî komo n̂en̂epekn̂e hara kayaritomo. 50 xa marha tî n̂en̂epekn̂e sowtatu komo, antoman̂e komo yakro. Toche so on wara tî kekn̂e n̂examro yantoman̂e Erias ya, Ai, Kaan yakrono ro amoro, on wara tî nîîke kayaritomo awya, Amok ha yohno, nîîke tî, kekn̂e tî yîwya.

12 On wara tko tî n̂eyukyakn̂e Erias, Kaan yakrono ro me oyexitaw wehto tak mokope kah yai awakn̂in̂e komo, anantomarî komo pen yakro rma, kekn̂e tî. Ero ke wehto takî tî n̂epîrkekn̂e xa hara oco kah yai. Sowtatu yantoman̂e pen tî nakn̂iyakn̂e yînantomarî komo yakro rma, 50 pen komo yakro rma okwe.

13 Ero yinhîrî takî tî anarî komo n̂en̂epekn̂e xa hara kayaritomo. 50 xa hara tî n̂en̂epekn̂e sowtatu komo, antoman̂e komo yakro. On wara tko tî xakn̂e noro, n̂examro yantoman̂e, Erias yenîche n̂eremekn̂e takî tî tosokmuru po noro yeepatai. On wara tî kekn̂e yîwya, Ai, Kaan yakrono ro amoro, on wara cma re wîîkes awya, tîpîn̂e cma re ow meen̂asî. Tîpîn̂e marha cma re oyakrono komo meen̂asî. Awanton mak amna.

14 Wehto tî moko sowtatu yantoman̂e pen komo yakn̂in̂e okwe. Asakno roro rma tî nakn̂ipu antoman̂e pen komo, 50 pen komo yakro rma okwe. Wara rma opînîn yaw takî cma re masî, kekn̂e tî.

15 Ero yimaw on wara tî kekn̂e Kporin komo yancun Erias ya, Noro yakro tak etoko. Erasîra tak esko noro pona, kekn̂e tî. Ero ke cekn̂e takî tî Erias noro yakro kayaritomo yaka.

16 On wara tî kekn̂e yîwya, Ai, kayaritomo, on wara men kesî Kporin komo awya, ahce kacho amaywen komo men̂epei Ekron pona Baaw-Sebube mtapotarî yen̂tachome? Kaan katî exihra nay tan, Ixaw Yana komo chew aweronoman̂e? Anarî mtapotarî yenta xe awexirî ke yîhtora ro mak masî kuywa poi. Metîrapoi ero po rma takî tî mîwaiya okwe, kekn̂e tî yîwya. Ero wa tî kekn̂e Erias Akasias ya.

17 Ero ke waihyakn̂e takî tî Akasias pen okwe Kporin komo mtapotachonho yaw roro rma, Erias kekn̂e ero wa kachonho yaw roro. Yumumuthîrî tko tî exihra xakn̂e. Ero ke Xoraw takî tî xakn̂e kayaritomo me Akasias pen yemtaka hara. 2 cimn̂ipu tî xakn̂e kayaritomo me Xeoraw Xosapa yehtoponho, Xuta yepamtho komo kayaritomon yehtoponho ha. Ero yimaw Ixaw Yana komo kayaritomon me n̂ecir̂akn̂e Xoraw.

18 Miya rma nasî Akasias pen yehtoponho. Ahnoro rma nasî tmewreso karita yaw, Ixaw Yana Kayaritomon Komo Yehtoponho, kacho yaw. Ero wa tî xakn̂e Akasias pen.