Taa, ero yinhîrî on wara takî tî xatken̂e Ixaw Yana komo, osorwaw ro tî ka n̂icimn̂ipunwatken̂e etar̂mara so Siriu komo yakro.

2 Ero yinhîrî takî tî, 3-inhîrî me yicimn̂ipuntache tak Ixaw Yana komo kayaritomon yenso cekn̂e Xeosapa, Xuta yepamtho komo kayaritomon.

3 Iito exitaw Ixaw Yana komo kayaritomon tî nîmtapowakn̂e tmaywen komo yakro. On wara tî kekn̂e yîwya so, Ai, oyakno komo, on wara wîîkes awya so, Mînto nai Hamoce, Xireace pono. Kewtonthîrî komo rma mîn. Nahsîyakn̂e okwe Siriu komo kayaritomon. Entara katî matu ahsîtoponhîrî? Ahce kacho yohno n̂he tohra tatu ahsîso xa hara? kekn̂e tî yîwya so.

4 Ero yinhîrî on wara tî kekn̂e Akabe Xeosapa ya hara, Ai, oyakno, mokuhra mai oyakro Siriu komo waparî me. Hamoce yahsîso cma re tîhcexe, Xireace pono yahsîso, kekn̂e tî yîwya. Taa, kmokya ham awakro. Noro re thakwa kîwyam, noro re marha kmaywen komo, noro re marha koh komo kawaru hara, kekn̂e tî.

5 On wara marha tî kekn̂e Xeosapa Akabe ya, Kporin komo mtapotarî cma re ka mencesî ero poko, iina kîwtotopo komo poko, kekn̂e tî yîwya.

6 Ero ke weronomano rin̂e komo tî nan̂ikyakn̂e Akabe, 400. On wara tî kekn̂e yîwya so, Ai, oyakno komo, Ahce wa wai awya so, Hamoce Xireace pona kîwce etar̂maxi? Tohra kat wai iina? kekn̂e tî yîwya so. On wara tî n̂eyukyatken̂e n̂examro, Apa, etoko rma, kayaritomo amoro. Ero yahsîn̂e me wa awir̂asî Kporin komo, ketken̂e tî yîwya.

7 On wara tko tî kekn̂e xa hara Xeosapa, Exihra katî nai tan achew so Kporin komo poko kweronoman̂e hara? Noro yipu mtapotarî xa centapore nasî, kekn̂e tî Akabe ya.

8 On wara tî kekn̂e Akabe Xeosapa ya, Nai rma re tan cewn̂e mak Kporin komo pokono weronomano rin̂e, Mikaias tî mîk noro yosotî, Inra mumuru ha. Noro xera ro makî tko wasî. Kîr̂wan̂he oyehtopo yekatîmn̂e pînî ro mak mîkî kica, oyesemetanmetopo yekatîmn̂e mak mîk kica, kekn̂e tî. Okwe, kekn̂e tî Xeosapa, ero wa kahra ro mak cexpore nai, kekn̂e tî.

9 Ero yinhîrî on wara takî tî kekn̂e Akabe tmaywen ya, Ai, Mikaias ehta yohno, Inra mumuru, kekn̂e tî yîwya. Ero ke tî cekn̂e an̂ihso.

10 Noro yan̂ihso torî poko Ixaw Yana komo kayaritomon tî xakn̂e Samaria wacan metataw, Xeosapa yakro rma tî iito xatken̂e Xuta komo kayaritomon yakro. Kayaritomo ponon yaw tî xatken̂e kawno yaw. Puruma yatho yîpîpîtîkacho tî xakn̂e iito ewto metatan mîtwo ero po tî xatken̂e ceremaxi aapo po. Iito exitaw so weronomano rin̂e komo tî nîmtapowatken̂e yîn̂entarî komo me.

11 Iito tî xakn̂e Setekias, Kenana mumuru. Paaka meretîrî warai tî xakn̂e yîhyaw kuripara asakî. Yînakîtothîrî tî mîn xakn̂e. Ero takî tî n̂enpekn̂e Akabe ya. On wara tî kekn̂e yîwya, Ai, apa, on wara nîîke Kporin komo awya, On ke, paaka meretîrî warai ke rma Siriu komo mîparaxke twaihkatîkaxi ro kr̂a mak, kekn̂e tî.

12 Ero wa marha tî ketken̂e ahnoro weronomano rin̂e komo Akabe ya. Etoko rma Hamoce Xireace pona Siriu komo yar̂maxi. Iyopo so wa masî. Nar̂mape rma tî Kporin komo awya, ketken̂e tî yîwya.

13 Taa, on wara tî kekn̂e Mikaias yan̂ikn̂e yîwya, Ai oyakno, on wara wîîkes awya, kayaritomo yahworecho poko mak nîmtapowaxe kweronoman̂e komo. Iito re mak kexe cewn̂an wara rma. Ero ke n̂examro wara xa marha cma re mîmtapowasî amoro hara, kayaritomo yahworecho poko mak ha, kekn̂e tî yîwya.

14 On wara tko tî kekn̂e Mikaias, Kporin komo nasî waipînî ro me, ero xa marha nasî omtapotarî tan yaaro xa, Ahce wa na nîîke Kporin komo owya amn̂e, ero mak xa wekatîmyasî yîwya, kekn̂e tî.

15 Ero yinhîrî takî tî kayaritomo yaka cekn̂e Mikaias. Mokuche on wara tî kekn̂e kayaritomo yîwya, Ai, Mikaias, on wara wîîkes awya, Ahce wa amna nai awya, amna cee Hamoce Xireace pona waapa me, tohra katî amna nai awya? kekn̂e tî yîwya. Etoko rma, iyopo so ehcoko, kekn̂e tî Mikaias yîwya. Nar̂mapesî rma Kporin komo awya so, kekn̂e tî yîwya.

16 Kica, kekn̂e tî Akabe yîwya. Emapona roro re wîîkesî awya hara, Yaarono mak men ekatîmko owya. Taa, Kporin komo mtapotarî mak wekatîmyas ha, Noro n̂entarî me tan wîîkes ha, kasko owya, wîîkesî roro cma re awya.

17 Ero yinhîrî on wara takî tî kekn̂e Mikaias, Ixaw Yana komo wenwo takpaxi ro mak miya so îh po so. Osomumnî wara ro mak wenwo oper̂a wara. Ero wa een̂ataw so owya on wara nîîka Kporin komo owya, Osomumnî me mak naxe n̂examro okwe. Ero ke tîmîn yaka so mak tocowpe hara, waapa me tohra ro mak n̂ehcowpe, nîîka owya, kekn̂e tî.

18 Ero wa kacho yentache on wara takî tî kekn̂e Akabe Xeosapa ya, Entakî xe yîmtapotarî. Yaaro rma wîîka awya, Oyahworecho yekatîmn̂e pînî ro mak mîk noro, oyahwokacho yekatîmn̂e mak mîk ha, wîîka rma awya, kekn̂e tî.

19 On wara tko tî kekn̂e xa hara Mikaias, Ai, Kporin komo mtapotarî xa hara entacoko. Noro rma wenwo Kporin komo. Kayaritomo yapon po wenwo ceremaxi. Kah yawno komo marha wenwo Noro mîtwo piiri. Mehxa wenwo mer̂pono pîn, xehxa wenwo mer̂pono pîn xa marha.

20 Ero yimaw Kporin komo tak nîmtapota. On wara nîîka iitono komo ya, Onoke xa cee Akabe wakpamnoso Hamoce Xireace pono komo waparî me torî poko? Onoke iina torî poko wakpamnoya iito tak waihtome? nîîka yîwya so. Ow ha na, kekn̂e anarî. Ow xa na, kekn̂e anarî hara. Ero wa so ketken̂e.

21 Ero yimaw moko anarî hara ekatî Kporin komo yeepataka. On wara nîîka yîywa, Ai, Apa, ow xa Akabe wakpamnoyasî iina totopo poko, nîîka.

22 Ahce wa mîwakpamnoya? nîîka Kporin komo yîwya. On wara n̂eiku ekatî, N̂examro weronoman̂e komo mtaw tak wasî. Cemarontaxmu me n̂examro wiir̂asî, nîîka. Taa, ero wa ciino ciriche awya Akabe mîwakpamnoya rma ham. Awanme cee ham. Ero ke ero wa ciino riso etoko, nîîka yîwya. Ero wa nîîka Kporin komo ekatî ya.

23 Ero ke ero wara rma nîmtapowaxe moxam, aweronoman̂e komo, entakî xe. Cemarontaxmu tak n̂irî ham Kporin komo moxamu mtaka, ekatî mîk n̂irî ham. Awaitopo tko n̂ekatmo Kporin komo, kekn̂e tî Mikaias yîwya, Akabe ya.

24 Ero yinhîrî Setekias takî tî cekn̂e Mikaias yewkatapaxi. Eepataka rma tî n̂etapekn̂e oko. On wara tî kekn̂e yîwya etapetaw, Ahto xa tomo ekatî ohyai awakro yîmtapotax hara, Kporin komo n̂en̂epetho ha, kekn̂e tî yîwya.

25 On wara tî n̂eyukyakn̂e Mikaias yîmtaka, Ero rma wa meen̂asî amn̂e awcetaw eseyamso mîîmo yamtakpon yaka, atumnawno yaka xa, kekn̂e tî yîwya.

26 Ero yinhîrî on wara tî kekn̂e Akabe tmaywen komo ya, Mikaias aacoko Amon yaka, ewto yenîn̂e yaka. Xoas yaka marha aacoko kayaritomo mumuru yaka.

27 On wara kacoko yîwya so, Moso ahrucoko kahrutopo yaka. Iyurmacoko wahra mak, wokpacoko marha wahra mak. Ero wa yînahmakî omohtopo pona roro. Cerepore rma kmokyas hara amn̂e, kekn̂e tî tmaywen komo ya.

28 On wara tko tî kekn̂e Mikaias, cerepore rma amokyataw hara amn̂e Kporin komo pînî mtapotarî wekatmo ham, wîîkesî. Omtapotarî ponaro men ehcoko amyamro oyentan̂e komo, kekn̂e tî. Ero wa tî kekn̂e Mikaias.

29 Ero ke takî tî cetken̂e n̂examro Hamoce Xireace pona. Ixaw Yana komo kayaritomon, Xeosapa, Xuta yepamtho komo kayaritomon mîk ha, ero wara tî cetken̂e.

30 Iina toche so on wara tî kekn̂e Akabe Xeosapa ya, Anarî kuknon yaw men kîwces ow. Amoro reha amruko ahnorono, kayaritomo ponon, kekn̂e tî yîwya. Ero ke anarî kuknon yaw takî tî cekn̂e Ixaw Yana komo kayaritomon. Ero wa tî cekn̂e noro cetar̂maxmu komo cheka.

31 Ero yimaw on wara tî xakn̂e Siriu komo kayaritomon, tîtararan yaan̂e yantoman̂e komo yakro takî tî nîmtapowakn̂e. Yaake tî xatken̂e noro tararan yaan̂e komo yantoman̂e, 32 tî. On wara tî kekn̂e yîwya so, Noro pîntho komo yakro etar̂mara ehcoko, aano rin̂e me cehsom komo yakro meero etar̂mara ehcoko. Ixaw Yana komo kayaritomon yakro mak etar̂macoko, kekn̂e tî yîwya so.

32 Ero ke takî tî etar̂metaw so on wara xatken̂e tarara yaan̂e yantoman̂e komo, Xeosapa tî n̂een̂atken̂e. Ero ke on wara tî ketken̂e, Mîkro ham Ixaw Yana komo kayaritomon, ketken̂e tî. Ero ke noro wece takî tî cetken̂e waihkaxi. Mokyataw so tko tî n̂emtarakekn̂e Xeosapa.

33 Ero ke Ixaw Yana komo kayaritomon pîn me takî tî noro n̂een̂atken̂e hara Siriu komo. Ero ke anana tî cetken̂e yîhyai hara.

34 Ero yimaw iito tî xakn̂e sowtatu, Siriu. Krapa takî tî n̂ehsakn̂e noro merpono pîn komo wece mak, Ixaw Yana komo wece. Mîkro xa wîtwesî, kahra rma tî xakn̂e. Iyuhre tko tî cekn̂e Ixaw Yana komo kayaritomon po xa. Kuripara xakn̂e noro ponon. Ero raconho yotaka xa tî noro pen wekn̂e oko. Ero ke on wara tî kekn̂e tîtararan yaan̂e ya, Ai, miya kaika hara. Cetar̂maxmu komo yai ow arko. Twoso was oko, kekn̂e tî yîwya.

35 Ero kaamo po tî n̂etar̂metîketken̂e rma Ixaw Yana komo Siriu komo yakro. Sowtatu komo chew rma tî xakn̂e Akabe Siriu komo wece cewru. Tîtararan yaw rma tî xakn̂e. Noro tî n̂ecehcetken̂e maywen komo epîrkara ehtome. Kamxukwakn̂e tî wotoponhîrî. Tarara mapirî yaka rma tî n̂esenmekyakn̂e kamxukuthîrî.

36 Ero yinhîrî takî tî kaamo yemihcataw on wara kacho takî tî n̂encetken̂e sowtatu komo. N̂eexi tak ha. Awewton komo pona so tak etocoko xa hara, aweken komo pona so ha, kacho tî n̂encetken̂e.

37 Ero yimaw takî tî waihyakn̂e kayaritomo pen. Okoputhîrî tko tî naar̂atken̂e Samaria pona. Iina takî tî okoputhîrî nahruyatken̂e.

38 Ero yinhîrî Akabe pen tararantho takî tî koroketken̂e Samaria po rma. Tuuna yecihtaw tî koroketken̂e, n̂ikitho yecihtaw. Wooxam komo yeyehtopo ro tî mîn xakn̂e tuuna, kîîrî pokono ro komo yeyehtopo kica. Tarara koroketaw xapari tî n̂emeyakn̂e kayaritomonhîrî pen kamxukutho. Ero wa tî n̂emeyakn̂e Kporin komo mtapotarî yaw roro rma, Akabe pen ya kekn̂e ero yaw roro rma.

39 Miya rma nai Akabe pen yehtoponho. Mîîmo tî n̂irpekn̂e erepanci yotho ciixapu. Ewto mko marha tî n̂irpekn̂e yaake. Ahnoro noro pen yehtoponho nasî tmewreso karita yaw, Ixaw Yana Kayaritomon Komo Yehtoponho, kacho yaw.

40 Ero wa takî tî xakn̂e Akabe pen, tporin pen komo yakro takî tî nîwînîkyakn̂e. Ero yinhîrî yumumuthîrî takî tî xakn̂e kayaritomo me, yîhretawno me hara. Akasias tî xakn̂e yumumuthîrî yosotî. Ero wa tî xakn̂e.

41 Taa, on wara tî xakn̂e Xeosapa hara, Asa pen mumutho, Xuta komo kayaritomon me tî xakn̂e pahxa rma ha re. 4 cimn̂ipu exitaw Akabe Ixaw Yana komo kayaritomon me, ero yimaw takî tî Xuta komo kayaritomon me n̂iir̂atken̂e Xeosapa.

42 35 cimn̂ipu tî xakn̂e Xeosapa yewrutoponho kayaritomo me tak exitaw. Pahkî tî xakn̂e kayaritomo me, 25 cimn̂ipu. Xerusaren tî xakn̂e noro yewton. Yînocwan yosotî tî xakn̂e Asuba, Siri yemsîrî.

43 Tîîm pen wara rma tî xakn̂e Xeosapa, Asa pen wara. Takîhso tî noro n̂een̂akn̂e Kporin komo. Tîîm pen yehtoponho yaw roro rma tî xakn̂e etowra. Iito rma tko tî xakn̂e tîmsom yaponî mko îh po so rma. Iina so rma tî Ixaw Yana komo nakn̂iyatken̂e kica Kporin komo ya tîmsom. Tookuthîrî komo puntho tî nakn̂iyatken̂e, kotoporem marha.

44 Ixaw Yana komo kayaritomon yakro marha tî nîmtapowakn̂e Xeosapa etkurunpetopo komo poko.

45 Miya rma nai Xeosapa yehtoponho. Kar̂pe tî xakn̂e, sowtatu komo tî naar̂akn̂e etar̂maxi anarî rowon pono komo yakro. Ero wa noro yehtoponho nai tmewreso karita yaw, Xuta Yepamtho Kayaritomon Komo Yehtoponho, kacho yaw.

46 On wara marha tî xakn̂e Xeosapa, tîîm pen waipuche iito rma tî n̂een̂akn̂e kîrkomo, wooxam pokono ro komo. En̂epetîkara tî xakn̂e Asa, Xeosapa yîîm ha. Noro yipu komo takî tî n̂en̂epekn̂e Xeosapa Kanan poi.

47 Ero yimaw marha Eton pono komo kayaritomonî ro exihra tî xakn̂e. Kayaritomo maywen makî tî xakn̂e iitono komo yenîn̂e me.

48 On wara marha tî xakn̂e Xeosapa, kanawa imo tî nakîhtopekn̂e Tahsisi pono komo nakîhtotho warai. Opi pona en̂epe xe tî xakn̂e ooru ka. Tohra rma tko tî xakn̂e kanawa imo. Esion Xebe nakwataw rma tî n̂ewakrokekn̂e okwe.

49 Ero yimaw on wara tî kekn̂e Akasias, Akabe pen mumutho, Xeosapa ya tî kekn̂e, Omaywen komo cma re wen̂epesî akanawarî yaw amaywen komo yakro, kekn̂e tî yîwya. Nanwekyakn̂e tko tî Xeosapa. Akasias maywen tî en̂epera xakn̂e tmaywen komo yakro kanawa imo yaw.

50 Ero yinhîrî takî tî nîwînîkyakn̂e Xeosapa pen tporin pen komo yakro. Tporin pen komo yocho mîtkoso rma tî okoputhîrî nahruyatken̂e Tapi pen Yewtontho pona rma, tporin pen yewtontho pona ha. Ero yinhîrî Xewraw takî tî xakn̂e hara kayaritomo me tîîm pen yekenho yakan me hara.

51 Taa, on wara takî tî xakn̂e Akabe pen mumutho hara, Akasias ha, 17 cimn̂ipu takî tî xakn̂e Xeosapa yehtoponho, Xuta komo kayaritomon me ehtoponhîrî ha. Ero cimn̂ipu po tak Ixaw Yana komo kayaritomon me takî tî xakn̂e Akasias hara. Samaria tî xakn̂e noro yewton. 2 cimn̂ipu makî tî xakn̂e kayaritomo me.

52 Kicicme tî noro n̂een̂akn̂e Kporin komo. Tîîm pen yehtoponho yaw roro rma tî xakn̂e okwe, tînocwan pen yehtoponho yaw roro marha. Xeroboaw N̂ebace yehtoponho yaw roro marha tî xakn̂e kica. Kicicitho poko Ixaw Yana komo panatanmekn̂enho pen mîk xakn̂e Xeroboaw, noro wara xa marha tî xakn̂e Akasias hara.

53 Baaw poko roro tî xakn̂e. Oporinî ro amoro, kekn̂e tî yîwya kica. Ero wa exirî ke Kporin komo nîrwonakn̂e noro poko ha. Tîîm pen wara rma tî xakn̂e kica Kporin komo yîrwonmekn̂e me. Ero wa tî xakn̂e Akasias.