Taa, Tapi yehtoponho xa hara tan wekatîmyas awya so. On wara tî xakn̂e Tapi Sau pen waipuche, n̂etîramekn̂e hara Amarekita pen komo yar̂man̂enho. Sikrake pona tî n̂etîramekn̂e. Iito tî n̂enmayakn̂e ha ka asakî ro.

2 Enmapuche xa hara Sau pen yekaci yekatîmn̂e takî tî mokyakn̂e Tapi yaka, Sau pen yetatho pononho. Cetahyaxkaxi tî xakn̂e ponon, roowo ken̂e marha tî xakn̂e yîhpoci. Tapi mamaka takî tî n̂esewnapekn̂e cetîraposoro.

3 On wara tî kekn̂e Tapi yîwya, Ahn̂i xan amoro? kekn̂e tî. Ixaw Yana komo yetatho poi kmoko, emahcixapu ow, kekn̂e tî.

4 Ahce wa xakn̂e etar̂macho komo? Ekatîmko ika owya, kekn̂e tî Tapi yîwya. Okwe, n̂emahciyatken̂e mak okwe Ixaw Yana sowtatun pen komo. Anarînhîrî pen komo marha waihce, mer̂pono pîn kom okwe. Sau pen meero waihye okwe, yumumuthîrî pen marha Xonatas pen, kekn̂e tî.

5 Karpamxan tî mîk xakn̂e ekatîmn̂enhîrî. On wara tî kekn̂e Tapi yîwya, Meen̂e xa ha re Sau pen waihtoponho, yumumuthîrî pen komo waihtoponho marha? Mentai makî katî wa? kekn̂e tî.

6 On wara tî n̂eyukyakn̂e kar̂pamxan, Xiwboa Yîpîn po cma re wîxakn̂e. Iito tak Sau ween̂e tîrahnu po cececetoso. Pahnoke xa tak xatken̂e Piristew komo okwe, tarara yawno komo.

7 Ero yimaw tak n̂esewkor̂mai Sau owece. Ai xiya amoko, kai tak owya. Taa, ahce xe mai? wîîkai.

8 Onoke yana xa amoro? kekn̂e tak owya. Amarekita ow ha, wîîkai.

9 Ero yinhîrî on wara kai hara owya, Oyepoi tak ececetoko owaikachome awya. Owaitopo tan oyeporî okwe, cerewrem xa oko. Waipîra rma tko ka was okwe, kekn̂e owya.

10 Ero ke epoi tak kececetoi. Waihkai tak okwe, tparaxkaxi thakwa ween̂e oko. Waihyasî thakwa tan yamoro, wîîkai. Ero ke owî rma waihkai. Kayaritomo yarokorî tan weekî ahyaka yîhtîpîrî pononho. Apomcithîrî marha weekî. Ehe, ero tan wek ahyaka apa, kekn̂e tî. Ero wa tî kekn̂e kar̂pamxan, Amarekita.

11 Ero wa kacho yentache Tapi takî tî nahxaikekn̂e tpononthîrî. Ero wa xa marha tpononthîrî komo nahxaiketken̂e maywen komo hara.

12 Nîwracetken̂e tî kokmamso ro okwe Sau pen pînîn yaw. Xonatas pen pînîn yaw marha tî, Kporin komo yanan pen komo pînîn yaw marha tî. Ahnoro Ixaw Yana komo pînîn yaw tî nîwracetken̂e. Ero wa tî nîwracetken̂e waihîrî ke so kacipara imo ke paraxkaxapu me okwe.

13 Ero yinhîrî on wara tî kekn̂e xa hara Tapi kar̂pamxan ya ekatîmn̂enhîrî ya, Ahtononhîrî amoro? kekn̂e tî. On wara tî n̂eyukyakn̂e kar̂pamxan, Anarî yana mumuru ow ha, Amarekita mumuru ha, kekn̂e tî.

14 Ai ha, kekn̂e tî Tapi. Ahce kacho erasîra mîxakn̂e. Twerîhra ro mak mîwaikai Kporin komo nîhkapetho rma okwe, kekn̂e tî.

15 Ero yinhîrî takî tî tmaywen nan̂ikyakn̂e Tapi. Moso kr̂a waihkakî akaciparan ke, kekn̂e tî. Ero ke tîkaciparan ke takî tî namekn̂e twaihkaxi ro. Ero wa tî waihkekn̂e Amarekita pen.

16 On wara tî kekn̂e Tapi yîwya waihkarî me, Awanme ro rma kr̂a mîwaiyasî. Amtapotachonhîrî poyero rma kwaihkesî, Kporin komo nîhkapetho rma ow waihkekn̂e, mîîka. Ero wa kacho poyero kwaihkesî, kekn̂e tî. Ero wa tî kekn̂e Tapi Amarekita ya.

17 Taa, ero yinhîrî nîwracekn̂e rma tî Tapi Sau pînîn yaw, Xonatas komo pînîn yaw ha. Tîmtapotaro tî nîwracekn̂e.

18 Yîmtapotachonhîrî nasî tmewreso Xase karitan poko. Ero rma tî waano me n̂iir̂akn̂e, Xuta komo ya narpekn̂e. Krapa Pokono On Waano, kacho waano yetacitopo. On wara nasî yîmtapotachonhîrî,

19 Ai Ixaw Yana komo, on wara wîîkes awya so, awesenporitoponhîrî pen komo poko, wîîkes okwe. Îh po nasî okoputhîrî okwe. Karitinhîrî pen komo waihce okwe, enko xe. Waihce okwe.

20 Waihtoponhîrî komo ekatîmra ro mak ehcoko Kace pono komo ya, Askaron pono komo ya marha ekatîmra ehcoko. Yîwya so ekatîmîche Piristew wosîn komo men tawake natu kica, anpikantho yemsîrî komo nahwowatu kica.

21 Ai, Xiwboa Yîpîn, awya tak wîîkesî, tuuna tak moku xera wasî apona, cicah ken̂e awexi xera marha wasî. Apono atîhtara n̂expe mararî, wîîkesî, Kporin komo ya tîmsom atîhtara ha. Ero wa awexi xe wasî karitînhîrî pen yecen̂antho yetwîrîmarî ke iito aapo, Sau pen yecen̂antho ha. Ero pen kapehnî me tak nas okwe.

22 Twaihkaxmu komo kamxukutho poko ehn̂ara ro mak xakn̂e Xonatas pen krapan waipîra exitaw noro. Karitî komo katî poko marha ehn̂ara xakn̂e. Ehn̂ara marha xakn̂e Sau pen kaciparan waipîra exitaw noro hara.

23 Yiixe kehtopo me xatken̂e Sau komo, Xonatasî komo. Kahwotacho me roro xatken̂e n̂examro waipîra ka cexitaw so. Iito re rma takî tî waihyatken̂e. Kar̂pe xa tîtosom pen komo mîkyam xatken̂e yaimo yopo ro mak. Karitî xa mîkyam xatken̂e reaw yopo. Ero wa xatken̂e.

24 On wara wîîkes awya so okopuci komo, Ixaw yana yemsîrî komo, Sau pînîn yaw tak awratacoko. Apononman̂enhîrî komo pen mîk xakn̂e cucurem ke, cepethîkem ke. Noro xa aponon komo porokucekn̂e ooru ke.

25 Karitînhîrî pen komo xa mîkyam waihce cetar̂metaw so rma okwe. Enko xe, Îh po Xonatas pen waihketken̂e okwe.

26 Oyakno Xonatas, apînîn yaw xa was okwe. Aaxe ro mak wîxakn̂e. Tawake ro mak wîxakn̂e ooxe xa awexirî ke. Kîîxatî me rma re naxe wooxam komo. Ooxe xa tko mîxakn̂e okre wooxam komo yopo ro mak.

27 Karitînhîrî komo pen waihce okwe, enko xe, yukurunthîrî komo tak nasî cetar̂maxi okwe, kekn̂e tî. Ero wa tî waano naar̂akn̂e Tapi tîwrataro rma.