Ero yinhîrî takî tî on wara xakn̂e Tapi, Kporin komo yakro tî nîmtapowakn̂e. On wara tî kekn̂e yîwya, Apa kah yawno, ahna tak kîwce? Xuta komo yewton pona tak na kîwce? Ahce wa katî wai awya? kekn̂e tî. Etoko rma, kekn̂e tî Kporin komo yîwya. Taa, kekn̂e takî tî Tapi, ahtono pona xa kîwce? kekn̂e tî. Ebron pona xa, kekn̂e tî. Ero wa tî kekn̂e Kporin komo yîwya.

2 Ero ke iina takî tî cekn̂e Tapi Ebron pona. Cipici komo marha tî naar̂akn̂e Ainoaw, Xisirew pononho, Abikaw marha, Nabaw pen cinho, Kahmerita pen cinho ha. N̂examro tî naar̂akn̂e cipici komo.

3 Tmaywen komo marha tî naar̂akn̂e iina. Tîhyawno komo tî naar̂atken̂e n̂examro ahnoro. Ebron pona takî tî n̂esekenmetken̂e, ewtoci pona so marha tî n̂esekenmetken̂e Ebron mîtwono pona.

4 Ero yinhîrî takî tî Xuta yepamtho komo mokyatken̂e Ebron pona kîrkom ha. Iito takî tî Tapi nîhkapetken̂e Xuta komo kayaritomon me. On wara tî ketken̂e n̂examro Tapi ya, Xabes Xireace pono komo tî nahruyatken̂e Sau pen yokoputho roowo cheka.

5 Ero ke tmaywen komo takî tî n̂en̂epekn̂e Tapi Xabes Xiriace pono komo yaka tîmtapotarî yekatîmn̂e komo. On wara tî nîîke Tapi, kacoko, kekn̂e tî yîwya so, Apapa pen yokoputho tak mahruce ham. Kir̂wan̂he miice ham. Ero ke awakronoma xe so wasî Kporin komo ya.

6 Tîmtapotachonhîrî yaw roro rma wa awakronoma xe so wasî. Ow marha kepemexe so. Ero wa was apoko so apapa pen ponarono me awesenporî ke so.

7 Ero ke tak kar̂pe ehcoko oroto, erasîra ehcoko. Twaihso thakwa wa nasî apapa pen Sau pen. On wara marha naxe Xuta komo, tîkayaritomon komo me tak ohkapece, nîîke tî Tapi awya so, kacoko, kekn̂e tî. Ero ke ero wa kacho takî tî n̂ekatîmyatken̂e Xabes Xireace pono komo ya.

8 Ero yinhîrî on wara takî tî xakn̂e Abine, Nee mumutho. Sau pen sowtatunînho komo yantoman̂e tî mîk xakn̂e Abine. On wara tî xakn̂e noro, Isbosece tî naar̂akn̂e Maanain pona, Sau pen mumutho ha.

9 Noro takî tî n̂iir̂akn̂e kayaritomo me Xiriace pono komo poko, Asurita komo poko, Xisirew pono komo poko, Eprain yepamtho komo poko, Benxamin yepamtho komo poko. Ahnoro Ixaw Yana komo kayaritomon me tî n̂iir̂akn̂e.

10 40 cimn̂ipu tî xakn̂e Isbosece yewrutoponho Ixaw Yana komo kayaritomon me ciir̂ataw. Ero yinhîrî 2 cimn̂ipu makî tî xakn̂e kayaritomo me. Xuta Yepamtho komo makî reha tî xatken̂e Tapi maywen me.

11 Pahkî n̂he tî xakn̂e Tapi Ebron po Xuta yepamtho komo kayaritomon me. 7 cimn̂ipu, 6 nuun̂i xa hara, ero wicakî tî xakn̂e kayaritomo me iito.

12 Ero yinhîrî takî tî on wara xakn̂e Abine, Nee mumutho ha, Maanain poi tî cekn̂e Xibeon pona. Isbosece maywen komo tî naar̂akn̂e iina, Sau pen mumutho maywen kom ha.

13 N̂examro yakro esepotpona tî cekn̂e Xoabe, Seruia mrerî. Tapi maywen komo tî naar̂akn̂e. Tuuna yecihtaka tî n̂esepor̂atken̂e Xibeon pono yecihtaka ha. Xehxan po tî n̂eremetken̂e Abine komo, eeco po tî n̂eremetken̂e Xoabe kom hara. Ero wa tî n̂eremetken̂e esemtaka so.

14 Ero yinhîrî on wara tî kekn̂e Abine Xoabe ya, Kar̂pamxan komo ka n̂etar̂macowpe kwero ro so, kekn̂e tî. Taa, n̂etar̂macowpe ha, kekn̂e tî Xoabe.

15 Ero ke takî tî nawomyatken̂e kar̂pamxan komo. 12 mak nawomyatken̂e Benxamin yepamtho komo, Isbosece maywen komo, Sau pen mumutho maywen kom ha. 12 marha tî nawomyatken̂e Tapi maywen kom hara.

16 Ero yinhîrî takî tî n̂esetapetken̂e. Cecentono komo re makî tî n̂etahsîyatken̂e cewn̂e so. Etîhtîpîrî poko so tî n̂etahsîyatken̂e. Ero wa tî n̂etar̂metken̂e. Tawci komo yaw so tî n̂eparaxketken̂e oko tîkaciparan ke so. Ero ke ahnoro rma tî waihyatken̂e kar̂pamxan pen komo iito re rma. Ero ke iitono takî tî nosohcetken̂e roowo, Kacipara Imo Woskaran, Tîyokem Woskaran ha, ketken̂e tî ero poko. Ero wa tî iitono nosohcetken̂e roowo, Xibeon pono ha.

17 Ero yinhîrî takî tî ahnoro rma n̂esetapetken̂e ero po rma. Kar̂pe ro makî tî n̂etar̂metken̂e okwe. Tapi maywen komo mamakan me takî tî xatken̂e Abine, Ixaw Yana kom ha.

18 Iito tî xatken̂e Seruia mrerî komo 3 rma. Xoabe, Abisai, Asaew. Ero wicakî tî xatken̂e iito. Kar̂pe tîtosom tî mîk xakn̂e Asaew, kooso wara ro mak.

19 Noro takî tî Abine poko ro cekn̂e etowra ro mak, kaari me etowra xakn̂e, poowa me marha tî etowra xakn̂e.

20 Ero yinhîrî takî tî tîmkai n̂een̂akn̂e Abine. On wara tî kekn̂e Asaew ya, Ai, Asaew amoro? kekn̂e tî. Nhnk, Asaew ow ha, kekn̂e tî.

21 On wara takî tî kekn̂e Abine yîwya, Esama yai etowko tak ha ke. Kari me etowko, poowa me na anarimaw. Kar̂pamxan ahsîko. Noro kurunînho tak ahsîko akurun me, kekn̂e tî. Etowra rma tko tî xakn̂e Asaew, Abine tî weken̂emekyakn̂e rma.

22 Ero yinhîrî kekn̂e xa hara tî Abine Asaew ya, N̂ex ha. Etowko tak ha opoko ro mokuhra tak esko. Aparaxka xera was roowo pona awepîrkachome. Awaikache owya kîhyapamyasî kopi awakno pona Xoabe pona, kekn̂e tî.

23 Etowra rma tko tî xakn̂e Asaew, poko ro rma tî cekn̂e. Ero ke Asaew takî tî n̂etapekn̂e Abine tîrahnu mapirî ke mak. Wethîrî tî n̂etapekn̂e kar̂pe ro mak. Mehxa tî n̂epatakekn̂e hara yîrahnu Asaew penî mkai rma oko. Ero ke tî n̂epîrkekn̂e thakwa tî Asaew pen iina rma. Yohno rma tî waihyakn̂e. Ero yinhîrî Asaew wenari tîtosom komo tî n̂ecececetken̂e okoputhîrî yenîche.

24 Abine komo poko ro rma tko tî cetken̂e Xoabe komo, Abisai komo. Pahkî tî cetken̂e. Kokmamyataw takî tî Ama yîpîn pona takî tî cetken̂e. Xia mîtwono mîn, Xibeon yaxawan yesamarî yakumyawno rma.

25 Anarî meretkoso takî tî n̂esenmekyatken̂e Benxamin yepamtho komo, Abine yaka rma, îîpî meretkoso hara.

26 On wara takî tî kekn̂e Abine Xoabe ya, N̂ex ha ke keparaxkacho komo kacipara imo ke. Ahwora men taxe okwe amn̂e pahkî keparaxketîketaw so. Ahcemaw tak, N̂ex ha, mîîke amaywen komo ya, takno komo weken̂emekîra tak ehtome so? kekn̂e tî.

27 On wara tî n̂eyukyakn̂e Xoabe, Yaaro tan wîîkesî, waipîn me nasî Kaan, kacho wara rma nasî omtapotarî yaaro xa, N̂ex ha, kahra awexitaw ketaw ha re amoro tîyanan komo weken̂emecerî rma omaywen komo miya roro cenmakaxi ro, kekn̂e tî.

28 Ero ke tuu kekn̂e takî tî Xoabe. Tuu kacho yentache n̂ecececetken̂e takî tî noro maywen komo. Ixaw Yana komo poko ro takî tî tohra xatken̂e. Etar̂mara marha tî xatken̂e.

29 Ero yinhîrî cetken̂e takî tî Abine komo woskara pore. Cenmakaxi ro tî cetken̂e. Xotaw Yepu tî wacetken̂e. Biciron pore marha tî cetken̂e. Miya takî tî cetken̂e Maanain pona tak.

30 Abine komo wece tohra takî tî xakn̂e Xoabe. Tmaywen komo takî tî n̂enmekyakn̂e, nukuknomekn̂e marha. On wicakî tî Tapi maywenînho pen exihra xatken̂e okwe, Asaew pen, 19 pen komo xa hara exihra tî xatken̂e. Ero wicakî tî waihyatken̂e Tapi maywenînho pen komo.

31 360 pen komo tî waihyatken̂e Benxamin yepamtho pen komo, Abine maywenînho pen kom ha. Ero wicakî tî xatkn̂e Tapi maywen komo nwaihkatho.

32 Tîcetaw so takî tî Asaew pen yokoputho naar̂atken̂e Xoabe komo Beren pona. Iina takî tî nahruyatken̂e tîîmînhîrî pen yahrutoponho yaka rma toopu yawno ewtarî yaka ha. Ero yinhîrî cetken̂e xa hara Xoabe komo miya Ebron pona. Cenmakaxi ro tî cetken̂e. Saa ketaw Ebron pona takî tî n̂epataketken̂e. Ero wa tî xatken̂e.