Ero yinhîrî takî tî n̂etar̂metken̂e rma Sau maywen komo Tapi maywen komo yakro. Emapona roro tî n̂etar̂metken̂e pahkî. Kar̂pe takî tî n̂ehtîketken̂e Tapi maywen komo. Kar̂pera reha tî n̂ehtîketken̂e Sau pen maywenînho komo. Ero wa tî xatken̂e okwe.

2 Taa, Ebron po exitaw Tapi yumumuru komo tî n̂ewruyatken̂e yaake. On wara tî xatken̂e yumumuru komo yosotî iito ewruxapu komo yosotî, poturme tî ka n̂ewruyakn̂e Amnon, Ainoaw yenakan, Xisirew pono yenakan ha.

3 2-înhîrî takî tî n̂ewruyakn̂e Kireabe hara Abikaw yenakan. Nabaw cinho mîk xakn̂e Abikaw, Kahmerita cinho ha. 3-înhîrî takî tî n̂ewruyakn̂e Absaraw hara Maaka yenakan. Tawmai yemsîrî tî mîk xakn̂e Maaka, Xesu pono komo kayaritomon yemsîrî ha.

4 4-nhîrî takî tî n̂ewruyakn̂e Aton̂ias hara Akice yenakan. 5-nhîrî takî tî n̂ewruyakn̂e Sepacias hara, Abitaw yenakan ha.

5 6-nhîrî takî tî n̂ewruyakn̂e Icireaw hara Ekra yenakan, Tapi pici yenakan ha. Ero wa tî xatken̂e Tapi mumuru komo Ebron po ewruxapu komo.

6 Taa, n̂etar̂metken̂e rma tî Sau pen maywenînho komo Tapi maywen komo yakro. Ero wa etar̂metaw so tak Sau pen yananînho komo yantoman̂e me n̂ecitîkekn̂e Abine.

7 Ero yimaw kayaritomo yewton po tî xakn̂e wooxam, Rispa tî osotî, Aia yemsîrî ha. Sau pen pici wara cehsomînhîrî tî mîk xakn̂e. Ero yimaw on wara takî tî kekn̂e Isbosece Abine ya, Ahce kacho Rispa poko mehxe kica apapa pen pici wara ehxapu poko? kekn̂e tî yîwya.

8 Ero wa kacho yentache nîrwonakn̂e xa takî tî Abine. On wara tî kekn̂e Isbosece ya, Ahce wa katî ow meen̂a? Xapari pîtho wara katî ow meen̂a kica Xuta yepamtho yoku pîtho wara? Aamo pen yananînho komo yecehton̂e me wasî, maywenînhîrî komo yecehton̂e me marha. Ero wa wasî oroto. Awahsîpora wîxakn̂e Tapi ya. Noro yipu ya rma, Moso wooxam pokono amoro, mîîkesî kica owya.

9 On wara tak wîîkes awya yaaro xa, Tapi tak wiir̂asî kayaritomo me Kporin komo mtapotachonho yaw roro rma. On wara tî kekn̂e Kporin komo yîwya, yaaro xa wîîkesî cemaro pîn me ro mak, Tapi xa nasî kayaritomo me, kekn̂e tî. Ero ke ero wa tak men wiir̂asî. Ero wa cirihra oyexitaw owaikape Kporin komo, kekn̂e tî Abine.

10 Kayaritomo mera tak wiir̂asî Sau pen yepamtho. Tapi tak wiir̂asî Ixaw Yana komo kayaritomon me, Xuta yepamtho komo kayaritomon me marha. Taan pona rorono komo, Behseba pona rorono komo marha, ero warai komo kayaritomon me tak noro wiir̂asî, kekn̂e tî.

11 Ero wa kacho yentache eikura ro makî tî xakn̂e Isbosece. N̂eraswakn̂e tî Abine pona. Ero ke tî eikura xakn̂e.

12 Ero yinhîrî takî tî kîrkomo n̂en̂epekn̂e Abine Tapi yaka. On wara tî kekn̂e yîwya so, On wara men kacoko Tapi ya, On wara tî nîîke Abine awya, Onok rowon tan ha ke? Etîxatî me cehcerî, kacho poko tîmtapotacerî kîwyam. Ero wa kîmtapotache Ixaw Yana komo tak wiir̂asî amaywen komo me tak, nîîke tî Abine awya, kacoko Tapi ya, kekn̂e tî yîwya so.

13 Ero ke ero wa tî ketken̂e Tapi ya. Ero wa kacho yentache on wara tî kekn̂e Tapi, Taa, on wara kacoko awen̂epen̂enhîrî komo ya, Kir̂wan̂he wencesî amtapotarî. Etîxatî me cehcerî, kacho poko rma kîmtapowasî. On wara makî tko wîîkes awya, Oyenso amokyataw Mikaw men eeko ohyaka Sau pen yemsîtho. Noro yekîhra awexitaw oyenso mokuhra ro mak esko, nîîke tî Tapi awya, kacoko Abine ya, kekn̂e tî Tapi.

14 Ero yinhîrî takî tî tîmtapotarî yekatîmn̂e komo n̂en̂epekn̂e Tapi Isbosece yaka hara. On wara kacho tî n̂ekatîmyakn̂e yîwya, Ekpoko opici Mikaw. Noro wahsîyakn̂e opici me epethîrî pona. 100 Piristew komo waihkekn̂e epethîrî me, kacho tî n̂ekatîmyakn̂e yîwya.

15 Ero wa kacho yentache Isbosece ya tmaywen komo takî tî n̂en̂epekn̂e Mikaw ka. Pawtiew yai towcoko yihcinhîrî Mikaw, Raisi mumuru yai ha. Eeko tak xiya Tapi yaka en̂epetome owya, kekn̂e tî yîwya so. Ero ke cetken̂e Mikaw towso. N̂ekyatken̂e tak Isbosece yaka.

16 Iin̂onhîrî tko tî mokyakn̂e cihcinhîrî wenari rma. Tîwrataro thakwa tî mokyakn̂e Baurin pona. Iito exitaw takî on wara tî kekn̂e Abine yîwya, Etok hara amîn yaka, kekn̂e tî. Ero ke thakwa tî cekn̂e hara tîmîn yaka. Ero wa thakwa tî xakn̂e.

17-18 Ero yinhîrî Ixaw Yana poritomon komo yakro takî tî n̂esencekn̂e Abine. On wara tî kekn̂e yîwya so, Pahxa n̂he rma re Tapi ciri xe mîxatken̂e akayaritomon komo me. Ero ke ciicoko tak oroto. Ero wara rma tî kekn̂e Kporin komo Tapi poko, Oyanton mîkro. Yîwya takî Ixaw Yana komo wowpesî Piristew komo mamawnonho. Mer̂pora naxe yiixatî pîn komo okwe. Noro ya rma tak wowpesî, kekn̂e Kporin komo yîwya. Ero ke kayaritomo me tak noro ciicoko oroto, kekn̂e tî.

19 Benxamin yepamtho komo yakro marha tî nîmtapowakn̂e Abine ero poko. Ero wa kan̂enho Tapi yaka takî tî cekn̂e noro rma Ebron pona. Tapi ya tî n̂ekatîmyakn̂e Ixaw Yana komo mtapotarî, Benxamin yepamtho komo mtapotarî marha. Tawakem me yîmtapotarî komo tî n̂ekatîmtîkekn̂e yîwya.

20 Takronoi tî cekn̂e Abine Tapi yaka, 20 tî xatken̂e akrono komo kîrkomo. N̂examro tî n̂erewusmekn̂e Tapi iito Ebron po.

21 Ero yinhîrî takî tî on wara kekn̂e Abine, Kîwces hara oroto Ixaw Yana komo yenmeso. Kayaritomo tak amoro. Ero ke n̂examro wekyasî ahyaka awakro yîmtapotachome so. Yaaro xa amna kesî, cemaro pîn me ro mak, amaywen me tak nasî, kachome so awya tan wekyasî ahyaka. Ero yinhîrî awanme ro mak tak masî amna kayaritomon komo me, kekn̂e tî. Ero wa tî kekn̂e Abine. Ero ke Abine takî tî n̂en̂epekn̂e Tapi. Tawake tî cekn̂e. Ero wa tî cekn̂e Abine.

22 Ero yimaw rma Tapi maywen komo takî tî mokyatken̂e hara waapa me toxapunhîrî. Xoabe marha tî mokyakn̂e antoman̂e komo. Mer̂pora tî n̂ekyatken̂e tînar̂mathîrî pen komo yemyawnonho. Abine mahyaka tko tî mokyatken̂e. N̂examro mokuhnaw so rma tî ka noro n̂en̂epekn̂e Tapi yîmîn yaka totohme hara. Tawake tî n̂en̂epekn̂e.

23 Ero yinhîrî takî tî mokyatken̂e Xoabe komo, sowtatu kom ha. Ero yinhîrî iitono komo takî tî n̂ekatîmyatken̂e Xoabe ya. On wara tî ketken̂e yîwya, Mokye oona Abine, Nee mumutho. Kayaritomo yenso tî mokye. Ero yinhîrî n̂en̂epew hara kayaritomo. Ero ke tom hara tawake, ketken̂e tî yîwya.

24 Ero yentache kayaritomo yaka takî tî cekn̂e Xoabe. On wara tî kekn̂e yîwya, Ahce wa mex hara kopi? Awenso tî mokye Abine. Ahce kacho men̂epew hara kica? Tomo tak ha tî okwe.

25 Kemîknon̂e pîn me ma noro yenîhra mai ke? Awemîknoso mak wa mokye. Ahna na awtotopo yenso wa mokye, ahn̂i xa na awetîramacho yenso marha. Poko awehtopo yentîkaxi wa mokye kica, kekn̂e tî Xoabe.

26 Ero yinhîrî takî tî Tapi yai cekn̂e Xoabe. Abine yan̂ikn̂e komo tî n̂en̂epekn̂e. Noro takî tî n̂epor̂atken̂e tuuna mîtwo Sira mîtwo ha. En̂exa tî n̂ekyatken̂e hara. Tapi wen̂ekarî tko tî nan̂ikyakn̂e.

27 Taa, Ebron pona mokuche xa hara Abine takî tî naar̂akn̂e Xoabe ewto potaka. Cewyaro cma re ka cesencexe, kekn̂e tî re yîwya. Iina arîche Abine pen takî tî paraxkekn̂e wethîrî poko oko. Ero wa tî waihkekn̂e Abine pen. Ero wa tî taknonhîrî pen n̂epanîyakn̂e, Asaew pen ha.

28 Ero yinhîrî takî tî Abine pen waihkachonho n̂encekn̂e Tapi. Ero ke on wara tî kekn̂e, Opona cirihra ro mak wa nasî Kporin komo Abine pen waihkachonho. Omaywen komo pona marha cirihra nasî.

29 Xoabe pona xa n̂irpe, Xoabe yanan komo pona marha. Cesemetanmesom ken̂ehra exihnî ro me mak n̂ehcowpe noro yanan komo miya roro. Eper̂a ken̂e n̂ehcowpe anarî komo, tîhcîpîrî yeper̂an ken̂e repra ken̂e ha na, anarî pen komo tîknaka tîknaka me tîtosom wara, anarî pen komo, kacipara imo ke twaihkaxmu me n̂ehcowpe, anarî pen komo rooma pokono me n̂ehcowpe hara. Ero wa so n̂ehcowpe Xoabe yanan komo miya roro yîtîhkan me, kekn̂e tî. Ero wa tî kekn̂e Tapi.

30 Ero wa tî Abine pen waihkekn̂e Xoabe takno yakro, Abisai yakro. Taknonhîrî pen komo tî mîkî n̂epanîyatken̂e. Xibeon po etar̂metaw so Asaew pen tî waihkekn̂e pahxa Abine. Noro pen yepantopo me tî waihketken̂e hara Xoabe komo.

31 Ero yinhîrî Abine pen yokoputho tî naar̂atken̂e ahruso. Okopu yenî ro yaw tî naar̂atken̂e. Ero yimaw tî on wara tî kekn̂e Tapi Xoabe komo ya, akro tmohsom komo ya marha, Aponon komo ahyaxkacoko, kumixi marha amrucoko. Ero wa etocoko Abine pen yokoputho yaan̂e komo ywapu. Ero wa awratacoko Abine pînîn yaw, kekn̂e tî. Tapi reha tî cekn̂e okoputhîrî mahyaw.

32 Ero yinhîrî takî tî Abine yokoputho nahruyatken̂e Ebron pona. Ahruche yîwya so nîwracekn̂e xa takî tî Tapi ahrutoponhîrî yepoi, nîwracekn̂e ro makî tî. Ahnoro tî nîwracetken̂e ahrutopo yenso mohxapu komo.

33 On warai takî tî naar̂akn̂e Tapi waano tîwratarî me, Ahce kacho mîwaipo okwe Abine, kayaritomo yanwekn̂e wara?

34 Emeknumira meexi, yîhromira marha. Kicicitho komo nwaihkatho wara xa matko mîwaipo okwe, kekn̂e tî. Ero wa tî kekn̂e Tapi tîwratarî me. Ero wa kacho yentache nîwracetken̂e xa hara tî ahrutopo yenso mohxapu komo.

35 Ero yinhîrî takî tî Tapi yaka mokyatken̂e iitono komo. On wara tî ketken̂e yîwya, Apa, eseresmakî tak ha kokmamra ka exitaw, ketken̂e tî yîwya. Pîra ro mak, kekn̂e tko tî yîwya so. Kaan xa owîrîmape, owaikape meero, oyuru tokyataw owya kokmamra ka exitaw. Ahce na poko eseresmara ro makî ka wasî, kekn̂e tî.

36 Ero wa kacho tî kir̂wan̂he n̂encetken̂e Tapi maywen komo. Kir̂wan̂he tî Tapi yehtopo n̂een̂atken̂e roro ahce na poko exitaw.

37 On wara marha tî ketken̂e Ixaw Yana komo, Kayaritomo yanmera ro mak wa Abine pen waihkacow, Nee mumutho pen ha, ketken̂e tî. Ero wa tî ketken̂e.

38 Ero yinhîrî on wara tî kekn̂e xa hara tî Tapi tmaywen komo ya, Antomano rin̂e me cehsom pen xa mîk waipo, anarî komo yopono pen xa. Ixaw Yananho rma mîk noro pen.

39 Kayaritomo rma re ow yîhkapexapu rma. Kar̂pera tko was oroto okwe. Ero ke oyopo thakwa naxe moxam Seruia mrerî komo okwe. Waihkan̂enhîrî n̂epemape Kporin komo ehtoponhîrî komo yaw roro rma, kekn̂e. Ero wa tî kekn̂e Tapi.