Taa, Ixaw Yana kayaritomon komo yehtoponho tan wekatîmyas awya so. Pahkî tî xakn̂e Tapi kayaritomo me. Ero yinhîrî takî tî poritomotho me xakn̂e Tapi. Mer̂pora takî tî xakn̂e cimn̂ipu noro yewrutoponho. Ero yimaw takî tî komsîn̂em me tî poritomonwakn̂e. Yaakeno ke rma re noro namuhcetken̂e poono ke. Komsînakn̂e rma tî okwe. Ero wa tî xakn̂e Tapi.

2 Ero ke takî tî on wara ketken̂e noro maywen komo yîwya, Apa, on wara cma re kes amna awya, awanton komo ya cma re wooxam meporpesî. Emasî me cehsomu komo mak n̂epocowpe, kîîrî pokono pînî ro mak ha. Enîche yîwya so noro tak mokope oona amîn yaka rma. Awanton me n̂expe. Awenaka marha n̂etakripe komsîmra awehtome tak okre, ketken̂e tî. Ero wa tî ketken̂e Tapi maywen komo yîwya.

3 Ero ke ero wara en̂epeno n̂iir̂akn̂e Tapi. Emasî me cehsom tî n̂eporpekn̂e wooxam cenporem komo mak. Miya so ro makî tî n̂epor̂atken̂e, Ixaw Yana komo rowon mapitaka roro. Ero yimaw wooxam n̂een̂atken̂e Sunam pono, Abisake tî osotî. Ero ke kayaritomo yaka takî tî n̂ekyatken̂e.

4 Cenporem xa tî mîk xakn̂e Abisake. Kayaritomo yaka tmokuche noro yanton me takî tî xakn̂e, nakronomekn̂e roro. Noro pokohra tko tî xakn̂e Tapi. Ero wa tî xatken̂e.

5 Ero yimaw takî tî anarî komo yopono me n̂ecir̂akn̂e Aton̂ias, Axice mrerî. On wara tî nîhtînoyakn̂e, Kayaritomo me tak kecir̂asî, kekn̂e tî. Ero ke tarara nahsîyakn̂e yaake. Kawaru yosom komo marha tî nantomekn̂e tarara yaan̂e kom hara. Anarî komo marha tî nantomekn̂e yaake kîrkomo tpoturme totopo komo poko. 50 tî nantomekn̂e ero poko.

6 On warai tî mîk xakn̂e Aton̂ias, mehxaro ro rma panarera ro makî tî xakn̂e yîîm. Kicicme exiche, Ahce kacho ero wa mai hara kica? kahra ro makî tî xakn̂e yîwya. Kîîrî yenpotho tî mîk xakn̂e. Absaraw ponan me ewruxapu tî mîk xakn̂e. Noro yipu tî mîk xakn̂e Aton̂ias.

7 Xoabe yakro tî n̂esencekn̂e noro Seruia mrerî yakro. Abiata yakro marha tî n̂esencekn̂e, Kaan yaka cewomsom yakro. Ero ke Aton̂ias poko ro takî tî cetken̂e n̂examro noro yakronoman̂e me.

8 Satoke tko tî tohra xakn̂e Aton̂ias yakro, Kaan yaka cewomsom. Benaia marha tî tohra xakn̂e, Xoiata mumuru. Weronomano rin̂e marha tohra xakn̂e, Natan ha, Simei marha, Hei marha. Tapi sowtatun komo xatken̂e karitî komo xa, n̂examro marha tî tohra xatken̂e Aton̂ias yakro.

9 Ero yinhîrî takî tî oper̂a pun nakn̂iyakn̂e Aton̂ias Kaan ya tîmsom me. Paaka pun marha tî nakn̂iyakn̂e ero warai me, yupurukrexapu pun ha. Okoyi Topun mîtwo tî nakn̂iyakn̂e, En Hoxew pono mîtwo. Iina xa marha tî nanyikyakn̂e kayaritomo mumuru komo, takno komo ahnoro. Xuta komo ahnoro xa marha tî nan̂ikyakn̂e kayaritomo maywen kom ha.

10 Natan tko tî an̂ikîra xakn̂e. Benaia marha tî an̂ikîra xakn̂e. Karitî komo marha tî an̂ikîra xakn̂e, takno marha tî Saromaw. Noro yipu komo tî an̂ikîra xakn̂e Aton̂ias iina. Ero wa tî xakn̂e Aton̂ias.

11 Ero yinhîrî takî tî Baceseba yakro nîmtapowakn̂e Natan, Saromaw yon yakro. On wara tî kekn̂e yîwya, Ai aaci, Aton̂ias yekaci yentara na mai Axice mrerî yekaci. Kayaritomo me takî tî nai okwe. Entara marha nai Tapi, kîkayaritomon.

12 Ero ke omtapotarî cma re ka mewehcasî waipîra awehtome, waipîra ehtome marha amrerî Saromaw.

13 Oroto rma cma re mîîcesî kayaritomo yaka, Tapi yaka. On wara kasko yîwya, Apa, kayaritomo xa amoro. Pahxa mîmtapowakn̂e oyakro, awanton yakro ha. On wara mîîkekn̂e owya, Yaaro tan wîîkes awya, esemîknopîn me. Amrerî Saromaw tak nas amn̂e kayaritomo me owaipuche. Ohretawno me tak nasî noro amn̂e, mîîkekn̂e cma re owya. Ero ke on wara wîîkes awya, ahce kacho Aton̂ias tak nai kayaritomo me hara okwe? kasko yîwya, kekn̂e tî.

14 Ero wa awya ketaw rma kayaritomo ya ow marha tak kmokyasî awakronomaxi omtapotarî ke hara, kekn̂e. Ero wa tî kekn̂e Natan Baceseba ya.

15 Ero ke takî tî kayaritomo yaka cekn̂e Baceseba, amtakpon yaka xa. Poritomo me xa takî tî xakn̂e noro. Iito rma tî xakn̂e Abisake, Sunam pono, Tapi yanton.

16 Amtakpon yaka cewomuche nutupenwakn̂e takî tî Baceseba. Pahkî awexi xe wasî kayaritomo me, kekn̂e tî. Ero yinhîrî on wara takî tî kekn̂e kayaritomo yîwya, Ahce xe mai? kekn̂e tî.

17 On wara tî kekn̂e Baceseba, Apa, on wara cma re mîîkekn̂e owya, Yaaro xa tan wîîkesî esemîknopîn me, Amrerî tak nas amn̂e kayaritomo me ohretawno me, Saromaw ha. Noro xa nasî oyekenho yakan me amn̂e, mîîkekn̂e cma re owya. Kporin komo n̂entarî me tan wîîkesî, ponaro oyehtopo n̂entarî me ha, mîîkekn̂e owya.

18 Ero warahra tko nas oroto. Enko xe, Aton̂ias xa matko nasî kayaritomo me. Noro yekaci yentara rma na mai okwe.

19 Paaka pun nakn̂ipu yupurukrexapu pun, oper̂a pun, ero warai komo tî nakn̂ipu mer̂pono pîn Kaan ya tîmsom me. Kayaritomo mumuru komo tî nan̂ikyakn̂e takronoman̂e me, amumuru komo rma. Abiata marha tî nan̂ikyakn̂e, Kaan yaka cewomsom, Xoabe marha, sowtatu komo yantoman̂e. Ero warai komo tî nan̂ikyakn̂e takronoman̂e komo me. Saromaw tko tî an̂ikîra n̂eexi okwe.

20 Ero ke on wara wîîkes awya apa, apona xa n̂een̂axe Ixaw Yana komo ahnoro. Amtapotarî yenta xe naxe, Noro xa tak nas amn̂e kayaritomo me ohretawno me, kacho yenta xe.

21 Ero wa kahra awexitaw apa, amna xera tak naxe awînkîche tak amn̂e aporin pen komo yakro. Ero yimaw tak kicicitho me men oyen̂asî kayaritomo okwe, omrerî marha Saromaw ha, kekn̂e tî. Ero wa tî kekn̂e Baceseba Tapi ya.

22 Ero wa yîmtapowataw rma kayaritomo yakro Natan takî tî mokyakn̂e hara kayaritomo yaka.

23 Apa, ketken̂e tî Tapi maywen komo, moso hara Natan. Ahyaka tî moko, ketken̂e tî. Ero ke kayaritomo yaka tmokuche nutupenwakn̂e takî tî kayaritomo mamakan me. Cesewnaposo ro tî nutupenwakn̂e.

24 On wara tî kekn̂e Natan, Apa, kayaritomo amoro. On wara cma re wîîkes awya, Ahce wa mîîkekn̂e Aton̂ias poko? Aton̂ias tak nas amn̂e kayaritomo me ohretawno me, mîîkekn̂e ha ma?

25 On wara tî n̂eexi noro oroto, moro na tomo paaka pun yakn̂iso, yupurukrexapu pun, oper̂a pun yakn̂iso marha. Merpono pîn nakn̂ipu. Kayaritomo mumuru komo nan̂ikî, sowtatu yantoman̂e komo, Abiata marha, Kaan yaka cewomsom, ero wara an̂ikno n̂iirî. Oroto n̂eseresmexe Aton̂ias yakro. Pahkî exi xe wasî Aton̂ias kayaritomo me, kexe okwe.

26 Oyan̂ikîra tko n̂eexi noro. Amaywenî rma owî reha. Satoke marha an̂ikîra n̂eexi Kaan yaka cewomsom. Benaia, Xoiata mumuru mîk noro, Saromaw, amaywen mîk noro, ero warai amna yînan̂ikîtorî.

27 Amoro ma wa noro miire kayaritomo me? Ekatîmra ma meexi owya kayaritomo me an̂irirî? Noro xa nasî kayaritomo me amn̂e, kahra ma meexi owya? kekn̂e tî. Ero wa tî kekn̂e Natan.

28 Ero yinhîrî on wara takî tî kekn̂e Tapi, Baceseba an̂ihcoko xa hara, kekn̂e tî. Ero ke Baceseba takî tî mokyakn̂e xa hara kayaritomo yaka.

29 On wara tî kekn̂e kayaritomo yîwya, Yaaro xa tan wîîkes awya, Kporin komo nasî waipînî ro me, oyakronomekn̂e roro oyesenmekyataw, Noro nasî waipînî ro me. Ero wa kacho wara rma nasî omtapotarî yaaro xa.

30 Pahxa rma wîîkekn̂e awya. Kporin komo n̂entarî me kîmtapowakn̂e, ponaro Ixaw Yana komo yehtopo n̂entarî me ha. On wara wîîkekn̂e awya ero yimaw, yaaro xa tan wîîkesî, Saromaw xa nas amn̂e kayaritomo me ohretawno me amrerî ha. Noro tak nasî oyekenho yakan me, wîîkekn̂e awya. Ero ke ero warai me rma wiir̂asî oroto, kekn̂e tî yîwya.

31 Ero ke nutupenwakn̂e xa hara tî Baceseba, cesewnaposo ro tî nutupenwakn̂e kayaritomo mamakan me. Okayaritomon xa amoro, kekn̂e tî yîwya. Eroromero awexi xe wasî waipîn me, kekn̂e marha tî. Ero wa tî kekn̂e Baceseba.

32 Ero yinhîrî on wara takî tî kekn̂e Tapi, Satoke an̂ihko, Natan marha, weronomano rin̂e mîk ha, Benaia marha, Xoiata mumuru. Ero warai komo an̂ihko oroto, kekn̂e tî. Ero ke n̂examro takî tî mokyatken̂e kayaritomo yaka.

33 On wara tî kekn̂e kayaritomo yîwya so, Ai, on wara wîîkes awya so, omaywenî ro komo aacoko. On wara tak omumuru ciicoko, Saromaw, akricoko oyoku mkahsî, muura mkahsî. Ero wa tak aacoko miya Xion pona, muura mkaw rma.

34 Iito awexitaw so omumuru nîhkapepe Satoke, Kaan yaka cewomsom. Natan marha, Ixaw Yana komo kayaritomon me noro nîhkapecowpe. Ero yinhîrî tuu kacoko. Pahkî exi xe taxe Saromaw kayaritomo me, kacoko marha.

35 Ero yinhîrî noro tak mokope ewto pona xa hara. Amyamro marha amohcoko noro wenari. Oyapon pona xa n̂eremape tak noro, kayaritomo yapon pona xa. Kayaritomo me tak nasî. Owî rma wiir̂asî noro Ixaw Yana komo kayaritomon me, Xuta komo kayaritomon me marha, kekn̂e tî. Ero wa tî kekn̂e Tapi tmaywen komo ya.

36 Taa, ero wa ham Apa, kekn̂e takî tî Benaia. Ero wa xa marha kape Kporin komo hara, ponaro awehtopo ha.

37 Awakronoman̂e me roro xakn̂e Kporin komo, ero wa xa marha Saromaw yakronoman̂e me n̂expe hara. Takîhsom me ciri xe wasî, takîhsom me awir̂akn̂e, ero wa awehtopo yopono me rma amumuru n̂irpe Kporin komo, kekn̂e tî. Ero wa tî kekn̂e Benaia Tapi ya.

38 Ero ke cetken̂e takî tî Satoke, Natan, Benaia, Kereteu komo, Pereteu komo marha, ero warai komo cetken̂e Saromaw ka. Noro takî tî nakriyatken̂e kayaritomo yoku mkahsî, muura mkahsî. Yîmkaw takî tî naar̂atken̂e miya Xion yecihtaka.

39 Iito exitaw so paaka meretîtho takî tî nahsîyakn̂e Satoke katî ke tarkem. Kaan mîn yawnonho rma mîn nahsîyakn̂e Saromaw yîhkapetome tak. Yîhkapeche takî tî tuu ketken̂e. Yaake takî tî xatken̂e enso mohxapu komo. Ahnoro rma takî tî ketken̂e kar̂pe, Pahkî n̂expe Saromaw kayaritomo me ha, ketken̂e tî.

40 Ero yinhîrî takî tî ewto pona cekn̂e Saromaw. Wenari tî cetken̂e enso mohxapu komo ahnoro. Nahwowatken̂e ro makî tî. Raatî tî n̂eceyatken̂e mer̂pono pîn komo. Roowo tî n̂esewsîyakn̂e kar̂pe xa karî ke. Ero wa tî xatken̂e Saromaw yakrono komo.

41 Taa, meye rma tî xatken̂e Aton̂ias komo. N̂eseresmetken̂e ewto po rma. Ceseresmatîkache so rma tuu kacho takî tî n̂encetken̂e. On wara tî kekn̂e Xoabe, Ahce kacho wara hakî ket hara kopi ewto pono komo? kekn̂e tî.

42 Ero wa ketaw rma Xonatas takî tî mokyakn̂e Abiata mumuru, Kaan yaka cewomsom mumuru. Ero ke yîwya takî tî kekn̂e Aton̂ias, Amok ha. Takîhsom amoro, kahwotacho yekatîmn̂e me mîmoko ham, kekn̂e tî.

43 On wara tko tî n̂eyukyakn̂e Xonatasî, Pîra, On wara tak n̂eexi kîkayaritomon Tapi, Saromaw tak n̂iirî kîkayaritomon komo me hara kopi.

44 Noro yakro n̂en̂epew Satoke, Natan, Benaia, Keretew komo, Peretew komo marha, ero wara tocow kayaritomo me ciin̂e komo. Kayaritomo yoku mkahsî Saromaw nakricow aatome.

45 Kayaritomo me tak noro nîhkapecow Satoke komo, Natan yakro, Xion yecihtaw nîhkapecow. En̂exa tak tahwotaro mohcow hara Saromaw yakrono komo. Wara ro mak kexe ewto pono komo. Ero wa kacho rma mîn mentacow, wara hakî kacho.

46 Kayaritomo yapon pona tak n̂eremesî Saromaw.

47 Anarî komo, kayaritomo maywenî ro komo tî tocow kayaritomo yaka Tapi yaka. Kaan ya noro yakronomacho poko yîmtapotaxi tî tocow. On wara tî kacow, Takîhso cekaiporesom me tak Saromaw n̂irpe Kaan. Takîhso cekaiporesom me rma re mîxakn̂e amoro ero yopono me tak noro n̂irpe hara. Mer̂pora rma re naxe amaywen komo, ero yopo xa tak Saromaw maywen komo n̂irpe hara. Ero wa xa Saromaw n̂irpe Kaan, kaxi tî tocow. Ero wa kacho yentache kayaritomo takî tî nutupenta kama po rma.

48 On wara marha nîîka kayaritomo, Kir̂wan̂he xa nai ham okre Kporin komo, ponaro Ixaw Yana komo yehtopo, kapore nasî. Oroto ohretawno n̂enpo kayaritomo me cehsom hara. Owero ro rma n̂enpo, nîîka tî. Ero wa tî nîîka kayaritomo, kekn̂e tî Xonatasî.

49 Ero wa kacho yentache takî tî n̂eraswatken̂e ro mak Aton̂ias n̂an̂ikîtho komo. Ero ke cetken̂e hara, n̂etakpetken̂e mak.

50 Ero yimaw Saromaw pona takî tî n̂eraswakn̂e Aton̂ias. Ero ke Kaan mîn yaka tî cekn̂e. Kaan ya tîmsom yakn̂itopo meretîrî poko tî n̂etahsîyakn̂e.

51 Ero yinhîrî takî tî Saromaw ya n̂ekatîmyatken̂e Aton̂ias totopo. N̂eraswa ham Aton̂ias apona. Enko xe, Kaan ya tîmsom yakn̂itopo meretîrî poko tak nasî cetahsîso. On wara nîîke, Saromaw maywenî rma ow. Noro rma nîmtapotape oroto owaikara cehtopo poko. Kaan n̂entarî me xa tan wîîkesî yaaro xa, Aton̂ias waihkara wasî, kape, nîîke ha noro, ketken̂e tî Saromaw ya.

52 On wara tî kekn̂e Saromaw ero wa ekatîmn̂e komo ya, Kir̂wan̂he exitaw Aton̂ias cewn̂e na rma yîhpoci emarakara nasî. Kicicme ehtopo yesenpetaw tko amn̂e waihyasî rma okwe, kekn̂e tî.

53 Ero yinhîrî tmaywen komo n̂en̂epekn̂e Saromaw Aton̂ias ka. Aton̂ias ehtatko Kaan ya tîmsom yakn̂itopo poko cetahsîsom, kekn̂e tî yîwya so. Ero ke mokyakn̂e takî tî Aton̂ias. Saromaw mamakan me tî nutupenwakn̂e. Taa, etoko tak amîn yaka, kekn̂e makî tî Saromaw yîwya. Ero wa tî kekn̂e.