Ero yinhîrî takî tî pahnoke n̂ehtîkekn̂e Tapi waihtopo. Ero ke tumumuru takî tî panatanmekyakn̂e, Saromaw ha.

2 On wara tî kekn̂e yîwya, Ai okopuci, on wara wîîkes awya, pahnoke tak nasî owaitopo. Roowo pono komo waihyaxe ero wa xa marha kwaihyas owî. Ero ke on wara wîîkes awya, erasîn me men esko. Etîtîkaxapu me esenpoko.

3 Apanatanmekyasî rma wa Kporin komo, ponaro awehtopo ha. On wara awexi xe wasî, kes awya, ero ke ero wara rma esko, noro yehtopo yaw roro awehtome. Yîmtapotarî ewetko, kpanatanmetopo, kîtwermacho komo, Ero wara men ehcoko, kacho mko. Ahnoro Moises pen nmewretho ponaro xa awexitaw ehn̂ara ro mak masî ahce na poko awexitaw, ahna na awtoche marha.

4 On wara kekn̂e Kporin komo owya, On wara awepamthîrî komo exi xe so wasî, cehtopo ponarono me exi xe so wasî kicicitho pokohra ehtome so. Oponaro xa exi xe so wasî. Ooxe ro mak exi xe so wasî, yaaro xa ooxatî me. Ero wa exitaw so miya roro tak naxe awepamthîrî komo Ixaw Yana komo kayaritomon me, kekn̂e owya. Ero ke ero wa awexitaw ero wa kachonho yaw roro rma wa awîr̂asî.

5 On wara marha wîîkes awya, Xoabe yehtoponho wa mencekn̂e Seruia mrerî yehtoponho. Yîwya owîrîmachonho mencekn̂e. Ixaw Yana sowtatun komo yantoman̂e waihkachonho mencekn̂e, yîwya waihkachonhîrî ha. Asakî waihkekn̂e okwe. Abine pen, Nee mumutho, Amasa pen hara, Xete mumutho, n̂examro pen waihkekn̂e okwe. Ketar̂matopo me exitawno wara rma n̂examro pen waihkekn̂e ketar̂matopo mera ro mak exitaw okwe. Ero ke yînwaikathîrî pen kamxukutho xakn̂e aanapotun pokono me, yîhtarî pokono me marha.

6 Ero ke takîhso xa esko Xoabe poko. Takîhso cesehtînosom me masî ero ke awanme ro mak noro yehtoponho yîhtînoko. Cerepore mak n̂expe noro twaihtopo pona roro, tumutwe exirî ke yîhpoci cerepore rma waihpe, kahra men esko.

7 Bahsirai mumutho komo reha wakreko, Xireace pononho mumutho komo. Ahyaw rma n̂eseresmacowpe. N̂examro mokyatken̂e onahmaxi Absaraw yai oyemaciyataw, awakno pen yai ha. Ero ke wakreko.

8 Tan nasî anarî hara amîtwo, Simei, Xera mumutho. Benxamin yepamtho mîk Baurin pono. Maanain pona oyemaciyataw, Kaan xa awîrîmape kr̂a, awaikape rma kr̂a, kekn̂e. Ero wa kekn̂e owya Maanain pona owcetaw. Ero yinhîrî tko Xotaw yecihtaka mokyakn̂e oyenso hara. Ero yimaw on wara wîîkekn̂e yîwya, Yaaro xa tan wîîkesî Kporin komo n̂entarî me rma, awaikara wasî kacipara imo ke, wîîkekn̂e yîwya.

9 Ero ke, Kicicme exihnî mîkro, kahra ro mak esko. Takîhsom amoro. Ero ke takîhso rma mesehtînoya noro yehtoponho poko, Ahce wa na cirpore nai, kacho poko. Noro waihkatopo rma men yîhtînoko. Tumutwe rma re nai yîhpoci. Wara rma noro pen waihkakî, kekn̂e tî. Ero wa tî kekn̂e Tapi Saromaw ya.

10 Ero yinhîrî takî tî Tapi nîwînîkyakn̂e tporin pen komo yakro. Okoputhîrî tî nahruyatken̂e Tapi pen Yewtontho pona.

11 Pahkî n̂he Tapi xakn̂e Ixaw Yana komo kayaritomon me, 40 cimn̂ipu. 7 cimn̂ipu tî ka kayaritomo me xakn̂e Ebron po. 33 cimn̂ipu takî tî kayaritomo me xakn̂e Xerusaren po hara.

12 Ero yinhîrî takî tî tîîm pen retawno me xakn̂e Saromaw hara kayaritomo me, Tapi pen retawno me. Tîkayaritomon komo me takî tî noro nîhtînoyatken̂e ahnoro Ixaw Yana komo. Ero wa tî nîhtînoyatken̂e.

13 Ero yinhîrî takî tî Aton̂ias cekn̂e Baceseba yaka, Saromaw yon yaka. Akice mrerî mîk cekn̂e. On wara tî kekn̂e Baceseba yîwya, Ai okopuci, ahna mîmoko? Tawake mîmoko ha? kekn̂e tî yîwya. Nhnk, tawake kmoko, kekn̂e tî.

14 Awakro cma re kîmtapowasî, kekn̂e tî. Taa, kasko ha, kekn̂e tî Baceseba.

15 Ero ke on wara tî kekn̂e Aton̂ias yîwya, On wara wîxakn̂e yeme, kayaritomo me ka wîxakn̂e ha re kokon̂oro. Oponaro xatken̂e Ixaw Yana komo ahnoro ha re. Kayaritomo mîk ham Aton̂ias, ketken̂e. Oroto tko cetaknamaxi naxe hara oyakno pona hara. Kayaritomo me noro n̂een̂at ham kpoyino komo. Yaaro rma kayaritomo me nasî, Kporin komo yanme rma nai ham ero warai me.

16 Ero ke cewn̂e ro xa yiixe oyehtopo wekatîmyas awya. Ow anwekîra cma re masî, kekn̂e tî Aton̂ias Baceseba ya. Ai ha. Ekatîmko ka owya, kekn̂e tî Baceseba.

17 On wara wîîkes awya, kekn̂e tî Aton̂ias, Kayaritomo yakro cma re mîmtapowasî Saromaw yakro. Awanwekîra nasî noro. On wara cma re mîîkesî yîwya, Ai okopuci, Abisake xe tî nai Aton̂ias, Sunam pononho xe. Cipici me yiixe tî nai, mîîkesî cma re yîwya, kekn̂e tî Aton̂ias.

18 Taa, ero wa wîîke ham yîwya, kayaritomo ya, kekn̂e tî Baceseba.

19 Ero ke takî tî kayaritomo yaka cekn̂e Baceseba Saromaw yaka. Tîson yenîche piiri tî nawomyakn̂e Saromaw. Yîhyaka tî cekn̂e. Nutupenwakn̂e tî noro wece. Ero yinhîrî tapon pona n̂eremekn̂e hara. Tînocwan yapon marha tî n̂ekpekn̂e kayaritomo yapon warai rma ha re. Ero ke n̂eremekn̂e yîson kayaritomo panaka rma kaarî n̂ixa.

20 On wara tî kekn̂e yîwya, Ai, okopuci, cewn̂e mak nasî yiixe oyehtopo. Ow anwekîra cma re masî, kekn̂e tî. Taa, kasko ka. Awanwekîra wasî, kekn̂e tî Saromaw yîwya.

21 Abisake cma re mîmyasî awakno ya, Aton̂ias ya yipici me, kekn̂e tî.

22 On wara tko tî tîson n̂eyukyakn̂e Saromaw, Ahce kacho Abisake maponukya hara Aton̂ias pici me? Noro cma re miir̂asî kayaritomo me, kacho wara rma wencesî amtapotarî. Oyakno mîkro poritomo ha. Ero ke kayaritomo warai me marha cirko Abiata, Kaan yaka cewomsom, Xoabe marha, Seruia mretho. N̂examro xa cirko kayaritomo komo me, kacho wara wencesî amtapotarî, kekn̂e tî Saromaw tîson ya.

23 On wara marha tî kekn̂e Saromaw, Twaihkacho me rma wa ero wa nîîka Aton̂ias. Owîrîmape rma Kaan Aton̂ias waihkara oyexitaw, miya xe ro mak owîrîmape waihkara oyexitaw, kekn̂e tî Saromaw.

24 On wara wîhtînoyasî, kayaritomo me oriye Kporin komo, apapa retawno me oriye ha. Oyepamrî komo marha tî n̂iir̂a ohretawno me xa hara. Waipîn me nasî Noro, ero wa orin̂enho, kacho wara rma nasî omtapotarî yaaro xa, Aton̂ias pen waihkesî wara ha oroto, kekn̂e tî.

25 Ero ke Benaia takî tî nantomekn̂e Saromaw, Xoiata mumutho. Aton̂ias waihkacho poko tî nantomekn̂e. Ero ke tî cekn̂e Aton̂ias yaka. Paraxkekn̂e takî tî waihkachome. Ero wa tî Aton̂ias pen waihkekn̂e.

26 Ero yinhîrî on wara tî kekn̂e Saromaw Abiata ya, Kaan yaka cewomsom ya, Etoko amoro Anatoce pona, amararîn pona. Twaihkaxmu rma cma re amoro. Oroto tko awaikara wasî Kporin komo Kaan yamatan yaan̂enho me awexirî ke. Apapa pen yanme maar̂akn̂e. Noro pen yesemetanmekyataw marha akro rma mesemetanmekyakn̂e amoro hara. Ero ke waipira rma masî, mîîcesî makî ka amararînî ro pona, kekn̂e tî yîwya.

27 Ero wa Abiata nowyakn̂e Saromaw Kporin komo yaka cewomsomînhîrî. Ero wa n̂iir̂akn̂e Kporin komo mtapotachonho yaw roro rma ciitome. Pahxa tî Kporin komo nîmtapowakn̂e Eri pen yepamtho poko, Siro pono pen yepamtho poko ha. Ero wa kachonho yaw roro rma ciitome tî Abiata nowyakn̂e.

28 Ero yinhîrî takî tî Aton̂ias pen waihkachonho n̂encekn̂e Xoabe. Abiata towtoponho marha tî n̂encekn̂e. Aton̂ias yakronoman̂e me toxapunhîrî marha tî mîk xakn̂e Xoabe. Absaraw wenari tko tî tohra xakn̂e. Wara rma n̂examro pen yehtoponho yentarî ke n̂emahciyakn̂e takî tî Xoabe Kporin komo mîn yaka. Kaan ya tîmsom yakn̂itopo meretîrî poko tî n̂etahsîyakn̂e.

29 Ero yinhîrî tî Saromaw ya n̂ekatîmyatken̂e iitono komo Xoabe yemahcitoponho. N̂emahciw Xoabe Kporin komo mîn yaka. Iito nai Kporin komo ya tîmsom yakn̂itopo mîtwo, ketken̂e tî yîwya. Ero ke Benaia takî tî n̂en̂epekn̂e xa hara Saromaw yîhyaka. On wara tî kekn̂e yîwya, Xoabe pen paraxkata, kekn̂e tî yîwya.

30 Ero ke takî tî cekn̂e Benaia Kporin komo mîn yaka. On wara tî kekn̂e Xoabe ya, Ai, on wara tî nîîke kayaritomo awya, Amok ha, nîîke tî. Pîra, tanî rma kwaihyasî, kekn̂e tko tî Xoabe yîwya. Ero ke Xoabe mtapotachonho tî n̂ekatîmyakn̂e kayaritomo ya, Ero wa nîîka Xoabe owya, kekn̂e tî yîwya.

31 On wara tî kekn̂e kayaritomo, Taa, yîmtapotachonhîrî yaw roro rma waihkata. Waihkache okoputhîrî ahruko. Ero wa waihkakî kicicme exihnî pen komo waihkachonho yehcamnotome tak oponan me ehxapunhîrî, apapa pen yepamtho komo ponan me ehxapunhîrî marha.

32 Ero wa waihkano rin̂enho n̂epeme hara Kporin komo. Asak hakno pen waihkekn̂e okwe Xoabe kacipara imo ke. Kir̂wan pen komo mîkyam xatken̂e, takîhsom ha. Xoabe yopo xatken̂e takîhso. Abine pen tî waihkekn̂e Nee pen mumutho, Ixaw Yana sowtatun komo yantoman̂enho pen ha. Amasa pen marha tî waihkekn̂e Xete pen mumutho. Xuta sowtatun komo yantoman̂enho marha mîk xakn̂e noro hara. N̂examro pen tî waihkekn̂e apapa pen wen̂ekarî.

33 Ero ke Xoabe ponan me tak nasî n̂examro pen waihkachonho, epamthîrî komo ponan me marha nasî miya roro yîtîhkan me ro mak. Tapi reha nukurunpesî Kporin komo, emetanmekn̂e komo wahkocesî. Epamthîrî marha nukurunpesî miya roro yîtîhkan me marha, kekn̂e tî. Ero wa tî kekn̂e Saromaw.

34 Ero ke cekn̂e takî tî Benaia Xoabe pen waihkaxi. Paraxkekn̂e tî waihkachome. Ero yinhîrî okoputhîrî tî nahruyatken̂e yîmînthîrî yaka rma pohnîntawno yaka. Ero wa tî Xoabe pen waihkekn̂e.

35 Ero yinhîrî takî tî sowtatu komo yantoman̂e me n̂iir̂akn̂e Benaia, Xoabe pen retawno me. Satoke tî n̂iir̂akn̂e Kporin komo yaka cewomsom me Abiata yekenho yakan me hara. Ero wa tî ciino n̂iir̂akn̂e.

36 Ero yinhîrî Simei takî tî nan̂ikpekn̂e Saromaw. Mokuche on wara tî kekn̂e yîwya, Ai, Simei, on wara wîîkes awya, Amîn tak cirko oona Xerusaren pona. Tan mak esko ewto po ewto poi tohnî me ro mak.

37 Anana awtoche, Setîron watoche awya tuuna watoche, Kwaihyasî tak okwe, kasko men. Awanme ro rma wa mîwaiyasî ero wa awtoche, kekn̂e tî yîwya.

38 On wara tî Simei n̂eyukyakn̂e, Taa, kir̂wan̂he wencesî amtapotarî. Amtapotarî yaw roro rma wasî, kekn̂e tî. Ero ke Xerusaren pono me takî tî xakn̂e Simei. Anana tî tohra xakn̂e mer̂pora kaamo.

39 Ero yinhîrî takî tî 3 cimn̂ipu yenatîche Simei yanton komo n̂emahciyatken̂e okwe asakî. Akisi yaka tî n̂emahciyatken̂e, Maaka pen mumutho yaka. Kace pono komo kayaritomon mîk xakn̂e Akisi. Ero yinhîrî Simei taki tî n̂encekn̂e tanton komo yekaci. Meye naxe awanton komo Kace po, kacho tî n̂encekn̂e.

40 Ero ke tooku takî tî nîmkayamcekn̂e Simei, buhu. Yîmkaw tî cekn̂e Akisi yaka, Kace pono yaka tanton komo yeposo. N̂een̂akn̂e takî tî. Ero ke tî n̂ekyakn̂e hara Kace poi.

41 Ero yinhîrî takî tî Saromaw n̂encekn̂e noro totoponho. Xerusaren poi toye Simei Kace pona. Ero yinhîrî mokye hara, kacho tî n̂encekn̂e.

42 Ero ke Simei takî tî nan̂ikpekn̂e Saromaw. Mokuche on wara tî kekn̂e yîwya, Ai, Simei, on wara wîîkekn̂e awya pahxa, Tohra ro mak men esko Xerusaren poi, wîîkekn̂e. On wara marha wîîkekn̂e awya, Ahna na awtoche ewto poi ero po rma men mîwaiyasî, wîîkekn̂e awya. Taa, kewehcasî wara ha. Kporin komo n̂entarî me wîîkesî, kasko owya, wîîkekn̂e. Ero ke ero wara rma mîîkekn̂e on̂entarî me.

43 Ero ke ahce kacho Kporin komo n̂entarî me amtapotachonhîrî yaw roro exihra mehxe hara? Omtapotarî marha ewetîra meexi okwe, kekn̂e tî yîwya.

44 On wara marha tî kekn̂e kayaritomo Simei ya, Kicicme ro mak mîxakn̂e apapa pen poko. Ero wa awehtoponhîrî rma wa mîhtînoyasî aropotaw rma. Ero ke kicicme awehtoponhîrî tak nîramanîyasî Kporin komo ahtîpîrî pona hara.

45 Owî reha Saromaw, kayaritomo, Kporin komo nakronomarî me reha wasî ow. Kayaritomo me naxe Tapi yepamtho komo eroromero. Ero wa men naxe, kekn̂e. Ero wa tî kekn̂e Saromaw Simei ya.

46 Ero ke takî tî Benaia nantomekn̂e Simei waihkarî poko. Ero ke anana tî ka naar̂akn̂e. Iito takî tî paraxkekn̂e waihkachome. Ero wa tî waihyakn̂e Simei pen. Ero yinhîrî ahnoro Ixaw Yana komo tak xatken̂e Saromaw ponaro. Kayaritomo xa mîk ham Saromaw, ketken̂e tî. Ero wa tî ketken̂e Saromaw poko.