Ero yinhîrî takî tî on wara xakn̂e Saromaw, Paraw yakro takî tî nîmtapowakn̂e Exipsiu komo kayaritomon yakro. Cetkurunpesom me cehcerî, ketken̂e tî n̂examro re. Ero ke takî tî Paraw yemsîrî nahsîyakn̂e Saromaw cipici me. Tapi pen Yewtontho pona tî n̂ekyakn̂e. Iina tî ka n̂ekenmekn̂e tîmîn ciitîkara ka exitaw, Kporin komo mîn ciitîkara exitaw marha, Xerusaren wacan ciitîkara exitaw marha. Ero wa tî xakn̂e Saromaw.

2 Ero yimaw ka Kporin komo mîn cirihra ka xakn̂e. Noro yosotî mîn me cehsom cirihra ka xakn̂e. Ero ke îh pona so kyam makî tî tookuthîrî komo pun nakn̂iyatken̂e Ixaw Yana komo Kporin komo ya tîmsom me. Ero wara makî ka xatken̂e.

3 Taa, Kporin komo xatî me tî xakn̂e Saromaw. Tîîm pen ya tpanatanmetoponhîrî n̂ewehcakn̂e roro. Îh po so makî tko tî tokuthîrî pun komo nakn̂iyakn̂e kica. Iina so marha tî kotoporem nakn̂iyakn̂e okwe.

4 Ero ke takî tî Xibeon pona cekn̂e Saromaw îh pona. Porin xa tî mîn xakn̂e iitono tîmsom yakn̂itopo. Ero ke ero pona tî tookuthîrî pun nakn̂iyakn̂e Saromaw. Mer̂pono pîn tî nakn̂iyakn̂e, 1.000 me cehsom ha tî okyo.

5 Iito rma ka exitaw Saromaw Xibeon po Kporin komo takî tî n̂esenpekn̂e yîwya kosope, wosoto. On wara tî kekn̂e Kaan yîwya, Ai, Saromaw, on wara wîîkes awya, Ahce xe xa mai? Ahce xa wîmya awya, kekn̂e tî yîwya.

6 On wara tî Saromaw n̂eyukyakn̂e, Apa, apapa pen pînîn yaw xa mîxakn̂e, Tapi pen pînîn yaw. Ero wa mîxakn̂e noro poko aaxatî me xa noro yenîrî ke awya. Yaaro xa aaxatî me xakn̂e. Kir̂wan me marha xakn̂e noro, takîhso cexi xatî me mak xakn̂e. Oroto rma apapa pen wakren̂e me mai hara yîhretawno tîmrî ke, yumumuthîrî rma. Noro retawno me ow miire hara kayaritomo me. Ero wara wasî oroto.

7 Taa, kayaritomo me tak ow miire apapa pen retawno me. Rikomo me makî tko was okwe. Camkîno mak ow okwe owtotopo poko, omohtopo poko hara.

8 Tan wasî ayanan me anahsîthîrî komo chew. Mer̂pono pîn tko moxam, yukuknomarî yopono ro mak okyo.

9 Ero ke oropotarî cma re miir̂asî yuhnari yîhtînon̂e me. Ero wa ow cirko camkîra ayanan komo yehtopo yîhtînon̂e me oyehtome. Yaaro xa ehtopo komo yetacin̂e me owî cirko, Kicicitho amoro, kachome kicicitho poko, Kir̂wan amoro, kachome kir̂wan poko hara. Mer̂pono pîn moxam ayanan komo. Onoke thakwa re ehtopo komo yîhtînon̂e me nai tanme ro? Pîra ro thakwa mak, kekn̂e tî. Ero wa tî kekn̂e Saromaw Kporin komo ya.

10 Taa, kir̂wan̂he tî Saromaw mtapotarî n̂encekn̂e Kporin komo, Yuhnari yîhtînon̂e me mak ow cirko, kacho yîwya.

11 Ero ke on wara tî kekn̂e Kaan yîwya, Kir̂wan̂he wencesî amtapotarî. Pahkî cma re ow miir̂asî waipîra, kahra meexi. Oyemyawno cma re mîmyas mer̂pora owya, kahra marha meexi. Ooxatî pîn komo cma re mîwaikapesî owya, kahra marha meexi. Yuhnari yîhtînon̂e me ow cirko yaaro xa opoyino komo yehtopo yetacitome owya, mîîka mak. Kir̂wan̂he wencesî ero wa kacho awya.

12 Ero ke ero warai me rma tak kirî ha. Takîhso tak wiirî aropotarî, yaaro apoyino komo yehtopo yîhtînotome awya. Ero wa kiirî pahxan pen komo yopono me ro mak, pahxarono komo yopono me marha.

13 An̂etacithîrî pîn meero marha wîîm awya. Awemyawno pen, takîhsom xa mîkro, kacho me awehtopo, ero wa awehtopo marha wîîm awya. Anarî exihra ro mak nasî kayaritomo awarai, takîhsom me cekaiporesom, cemyarkem marha. Iyopono komo me xa masî awaitopo pona roro. Ero warai me kiirî.

14 Taa, on wara na mai amn̂e, oyehtopo yaw roro rma na mai, owya apanatanmetopo marha na mewehca, aporin pen oyewecakn̂e ero wa xa marha na ow mewehca. Ero wa awexitaw waipîra marha kiir̂asî pahkî. Ero wa xa kiir̂asî kekn̂e tî. Ero wa tî kekn̂e Kporin komo Saromaw ya.

15 Ero yinhîrî pakekn̂e takî tî Saromaw. Kwosotmo ham kopi, kekn̂e tî. Ero yinhîrî Xerusaren pona takî tî n̂etîramekn̂e hara. Iito takî tî Kporin komo mtapotacho yen mîtwo n̂ecececekn̂e. Kporin komo ya tîmsom marha nakn̂iyakn̂e takn̂itîkaxmu, Aaxe xa wasî, kacho marha. Ero yinhîrî tmaywen komo yerewusmacho n̂iir̂akn̂e hara tahwore ehtome so. Ero wa tî xakn̂e Saromaw.

16 Ero yinhîrî takî tî wooxam mokyatken̂e kayaritomo yaka asakî. Kîîrî pohkan̂e ro tî mîkyam xatken̂e kica. Kayaritomo yeepatai tî n̂ececetken̂e.

17 On wara tî kekn̂e yîwya anarî, Ai apa, etîhyaw re nas amna moso yakro. Kokon̂oro kewrui ow iito rma moso exitaw amna mîn yaw.

18 Ero yinhîrî tak osorwaw enmapuche xa hara moso marha n̂ewruyakn̂e hara. Amna mak xakn̂e asak hak mak mîîmo yaw. Anarî exihra ro mak xakn̂e amna yaw.

19 Ero yinhîrî tak moso mretho pen waihyakn̂e okwe kosope erewnukrî ke yîson ya.

20 Ero ke rakatawro tak moso nîhto, omrerî naar̂e oyenawnonho rma owînîkyataw. Cenaka rma tak n̂iire. Tîmrethîrî pen n̂iir̂e oyenaka hara kica.

21 Enmayataw tak kpakai ow hara omrerî wokpachome. Omrerî wenwo twaihso okwe. Enmatîkache n̂he tak kir̂wantaw xa tak ween̂e. Omrerî pîn me thakwa xakn̂e okwe, kekn̂e tî wooxam kayaritomo ya.

22 Ero yimaw anarî takî tî kekn̂e hara wooxam ha, Pîra, omrerî xa moso karitî. Amrethîrî mexe mîk waihxapu pen, kekn̂e tî. Pîra, kekn̂e hara tî, yihcirî me nîmtapowakn̂e noro, Pîra, amrethîrî rma mexe mîk waihxapu pen. Omrerî xa moso karitî, kekn̂e hara tî. Ero wa makî tî ketken̂e kayaritomo n̂entarî me rma.

23 Ai ha, kekn̂e takî tî kayaritomo, on wara nîîke anarî, Omrerî moso rîkomo karitî. Amrethîrî mexe mîk waihxapu, nîîke. Pîra ro mak, nîîke tko anarî hara, amrethîrî mexe mîk waixaputho. Omrerî moso karitî, nîîke hara okwe, kekn̂e tî.

24 Taa, kacipara imo ek ha ke, kekn̂e tî kayaritomo tmaywen ya. Ero ke kacipara imo n̂ekyakn̂e kayaritomo yaka.

25 Ero yinhîrî on wara tî kekn̂e kayaritomo, Taa, rikomo kararakacoko karitînhîrî pen. Rakataw xa kasko. N̂examro ya tak tîmcoko, Yîraconhîrî tîmcoko anarî ya, yîraconhîrî hara tîmcoko anarî ya hara, kekn̂e tî kopi.

26 Ero yentache on wara tî kekn̂e karitî yon kayaritomo ya, Okwe, apa, yîwya xa matko karitî tîmko. Waihkara ro mak esko, kekn̂e tî. Ero wa tî kekn̂e tîmrerî pînîn yaw ro mak cexirî ke. On wara tko tî kekn̂e anarî hara, Pîra, omrerî me exihra rma tak n̂expe, amrerî me exihra marha n̂expe. Kararakacoko rma kr̂a, kekn̂e tî.

27 Ero ke on wara takî tî kekn̂e kayaritomo, Yihcirî me nîmtapota noro ya xa tîmcoko rikomo karitî. Waihkara ro mak men ehcoko. Yîmrerî mîk ham, kekn̂e tî. Ero wa tî kekn̂e Saromaw wooxam komo poko.

28 Ero yinhîrî takî tî ahnoro Ixaw Yana komo takî tî n̂encetken̂e kayaritomo ya wooxam komo yen̂ekachonho. Ero ke twerî takî tî xatken̂e kayaritomo poko. Kaan yehtopo ken̂e xa nai ham kayaritomo, yuhnari yîhtînon̂e me ehtopo ken̂e. Yaaro xa kehtopo yetacin̂e mîk ham, ketken̂e tî. Ero wa tî ketken̂e kayaritomo poko.