Taa, ero wa tî xakn̂e Saromaw, Ixaw Yana komo kayaritomon me xakn̂e, etpoyino pîn kayaritomon me.

2 Taa, Saromaw maywen yenîn̂e komo tak wetahcasî, Asarias tî xakn̂e Kaan yaka cewomsom me. Satoke mumuru tî mîk xakn̂e.

3 Eriorepe, Aias komo, n̂examro tî xatken̂e kayaritomo karitan mewren̂e ro me. Sisa mumuru komo tî mîkyam xatken̂e. Xeosapa tî xakn̂e kayaritomo mtapotacho mewren̂e me, Airuce mumuru ha.

4 Benaia tî xakn̂e sowtatu komo yantoman̂e me, Xoiata mumuru ha. Satoke, Abiata komo, Kporin komo mîn yenîn̂e komo mîkyam xatken̂e.

5 Asarias tî xakn̂e ahce na pokono komo yenîn̂e me. Natan mumuru tî mîk xakn̂e. Sabuce tî xakn̂e tîmsom pokono me marha. Yiixe kayaritomo yehtopo marha tî mîk xakn̂e. Natan mumuru marha tî mîk xakn̂e noro hara.

6 Aisa tî xakn̂e kayaritomo yawno komo yenîn̂e me. Atoniraw tî xakn̂e tapickaxmu komo yenîn̂e me, Abita mumuru ha.

7 Kayaritomo yerewusmacho yekpon̂e komo marha tî n̂iir̂akn̂e Saromaw, 12. Ixaw Yana komo yenîn̂e me tî xatken̂e etpoyino pîn yenîn̂e me ha. N̂examro tî erewsî n̂ekpetken̂e kayaritomo nahrî, yîhyawno komo nahrî marha. Anarî tî ka n̂ekpekn̂e anarî nuun̂i po. Ero yinhîrî anarî mak hara tî n̂ekpekn̂e anarî nuun̂i po hara. Ero wa tî n̂esenhîyakametken̂e kayaritomo yeseresmacho yenmetopo poko.

8 On wara tî xakn̂e erewsî yekpon̂e komo yosotî, Ben Uru mumuru tî xakn̂e Eprain rowon pono komo nîmîtho yekpon̂e me, îh pono komo nîmîtho ha.

9 Ben Teke mumuru tî xakn̂e Makas pono komo nîmîtho yekpon̂e me, Xarbin pono komo nîmîtho, Bece Semese pono komo nîmîtho, Eron pono komo nîmîtho, Bece Anan pono komo nîmîtho, iitono komo nîmîtho yekpon̂e me tî xakn̂e noro, Ben Teke mumuru.

10 Ben Esece tî xakn̂e Aruboce pono komo nîmîtho yekpon̂e me, Soko pono komo nîmîtho, Epe pono komo nîmîtho, iitono komo nîmîtho yekpon̂e me tî noro xakn̂e.

11 Ben Abinatabe tî xakn̂e Toro pono komo nîmîtho yekpon̂e me. Tapace tî xakn̂e noro pici me, Saromaw yemsîrî ha.

12 Baana tî xakn̂e Taanake pono komo nîmîtho yekpon̂e me, Airuce mumuru ha. Mexito pono komo nîmîtho, Bece Sean pono komo nîmîtho, ero warai pono komo nîmîtho yekpon̂e me xakn̂e Baana. Saretan mîtwono mîn Bece Sean, Xisirew mahyawno mîn ha. Bece Sean mehxan komo nîmîtho marha n̂ekpekn̂e Abew Meora pona rorono komo nîmîtho ha. Miya rorono komo nîmîtho yekpon̂e me tî xakn̂e Xokmeaw pona rorono komo nîmîtho ha.

13 Ben Xebe tî xakn̂e erewsi yekpon̂e me hara Hamoce Xireace pono komo nîmîtho. Xai pen yewtontho pono komo nîmîtho yekpon̂e me xakn̂e noro, Manases pen mumutho yewton pono komo nîmîtho ha. Ahkobe pono komo nîmîtho yekpon̂e me marha tî xakn̂e noro. Basan pono mîn Ahkobe. Iito xakn̂e 60 ewto mko, porin, twacayem. Bronse ciixapu tî xakn̂e waaca metatan yecehton̂e me. Ero warai pono komo nîmîtho yekpon̂e tî mîk xakn̂e Ben Xebe.

14 Ainatabe tî xakn̂e Maanain pono komo nîmîtho yekpon̂e me. Itu mumuru tî mîk xakn̂e Ainatabe.

15 Aimas tî xakn̂e Nahtari komo nîmîtho yekpon̂e me. Basemace tî nahsîyakn̂e noro cipici me, Saromaw yemsîrî xa hara.

16 Baana tî xakn̂e Ase komo nîmîtho yekpon̂e me, Aroce pono komo nîmîtho yahsîn̂e me marha. Usai pen mumutho tî mîk xakn̂e Baana.

17 Xeosapa tî xakn̂e Isaka komo nîmîtho yekpon̂e me. Parua pen mumutho tî mîk xakn̂e.

18 Simei tî xakn̂e Benxamin komo yekpon̂e me. Era pen mumutho tî mîk xakn̂e.

19 Xebe tî xakn̂e Xireace pono komo nîmîtho yekpon̂e me, Uri pen mumutho ha. Sion pen rowontho pono komo nîmîtho, Oki pen rowontho pono komo nîmîtho, iitono komo nîmîtho yekpon̂e me tî xakn̂e noro. Amohew pen komo kayaritomon pen mîk xakn̂e Sion. Basan pononho komo kayaritomon pen mîk xakn̂e Oki hara. Noro makî tî xakn̂e iitono komo nîmîtho yekpon̂e me, Xebe mak. Ero wa tî xakn̂e kayaritomo yerewusmacho yekpon̂e komo yosotî.

20 Ero yimaw mer̂pora ro makî tî xatken̂e Xuta komo, Ixaw Yana komo marha. Axawa wicakî tî xatken̂e iyakenon, tuuna imo yecihtawno wicak ha. N̂eseresmetken̂e roro tî, wooku marha tî n̂eer̂atken̂e roro. Tahwore roro tî xatken̂e okre.

21 Kayaritomo komo kayaritomon me tî xakn̂e Saromaw. Miyan komo kayaritomon me rma tî xakn̂e Ewprates xehxan komo kayaritomon me. Piristew komo kayaritomon me marha tî xakn̂e. Exitu rowon xehxan komo kayaritomon me meero xakn̂e. Saromaw purantan tî n̂ekyatken̂e roro n̂examro. Miya roro tî n̂ekyatken̂e noro waihtopo pona roro. Saromaw ya marha tî n̂etantomapetken̂e. Ero wa tî xatken̂e.

22 On wicakî tî xakn̂e Saromaw yerewusmacho yîhyawno komo yerewusmacho marha, cewn̂e kaamo yecenarîno mak ha, 6.600 ritru wicakî puruma aposokaxapu, 13.200 ritru wicakî nasînasî, aposokaxapu.

23 10 paaka yupurukrexapu, 20 paaka woskara pononho, 100 oper̂a, ero wicakî xakn̂e roro iyotî komo kaamo po roro tonosom. Kooso marha n̂ekyatken̂e iyotî komo me, kooso warai komo, pixkaru komo, kapikara komo, yuruma komo, miyan komo rma. Ero wicakî n̂examro yeseresmacho xakn̂e cewn̂e kaamo yecenarîno mak.

24 Kayaritomo komo yopono me tî xakn̂e Saromaw Ewprates pona rorono komo yopono me. Tipsa poi rorono komo, Kasa pona rorono komo, ero wicakno komo yopono me tî xakn̂e. Ahnoro kayaritomo komo tî xatken̂e Saromaw mamawno me Ewpratesî yepu xehxan komo. Saromaw waparî me cehsom exihra ro makî tî xakn̂e, miyan komo rma tî xatken̂e noro waparî mera.

25 Erasîn me ro makî tî xatken̂e Xuta yepamtho komo, Ixaw Yana komo marha. Tînatîrî ro komo mîtwo rma tî xatken̂e ahnoro mak, uupa yepu mîtwo, piiku yepu mîtwo marha.

26 Yaake xakn̂e Saromaw yoku kawaru. 40.000 tî xakn̂e kawaru yeken, Saromaw tararan yaan̂e yeken. 12.000 tî xakn̂e kîrkomo, kawaru yaan̂e komo.

27 Roowo raco yawno komo nîmîtho tî erewsî n̂ekpetken̂e roro, Ero nuun̂i po xa erewsî ekpoko amoro, kacho yaw roro n̂ekpetken̂e. Saromaw yerewusmacho tî mîn n̂ekyatken̂e, yîhyawno komo yerewusmacho marha. Ero exihra nas okwe erewsî, kacho exihra ro mak xakn̂e. Ero wa tî xakn̂e ekpon̂e komo yanme.

28 Sepata marha tî n̂ekpetken̂e, puruma yeputho marha. Ero yipu tî n̂ekpetken̂e kawaru nahrî, yînahrî komo yîmtotopo ro yaka n̂ekpetken̂e. Ero wicakno komo nahrî ekpoko amoro, kacho yaw roro rma tî n̂ekpetken̂e roro. Ero wa kawaru nînahmetken̂e.

29 Takîhsom me xa Saromaw n̂iir̂akn̂e Kaan, yuhnari yîhtînon̂e me xa. Miyan yîhtînon̂e me rma tî n̂iir̂akn̂e yukuknomarî yopono yîhtînon̂e me. Axawa nasî yukuknomarî yopo tuuna imo yecihtawno ero wicakî tî xakn̂e Saromaw nîhtînorî.

30 Yuhnari yîhtînon̂e me tî xakn̂e resce n̂ixan komo yopo ro mak, Exipsiu komo yopo marha.

31 Yuhnari yîhtînon̂e me tî xakn̂e mîk hak yopo, Etan yopo, Esîraita yopo ha, Eman yopo marha, Karko yopo marha, Tahta yopo marha, Mao mumuru komo yopo ha. Mîk hak rowon pono komo ya tî n̂esekaiporekn̂e noro yuhnarîno yîhtînon̂e me ehtopo.

32 3.000 poko tî nîmtapowakn̂e kakîhrecho komo poko. Yaake marha tî nakîhcekn̂e waano, 1.005.

33 Weewe komo poko tî nîmtapowakn̂e mîn hak poko. Setru poko tî nîmtapowakn̂e Ribanu pono poko. Miyan poko rma tî nîmtapowakn̂e weewe komo poko. Iisopu poko meero tî nîmtapowakn̂e, waaca pore tatîhtaxmu poko ha. Comota pono komo poko marha tî nîmtapowakn̂e miyan komo poko rma. Tarin̂em poko marha tî nîmtapowakn̂e, torowo komo poko, sehrere me tîtosom komo poko, ootî komo poko. Miyan komo poko rma tî nîmtapowakn̂e.

34 Mîk hak rowon pono komo tî n̂encetken̂e takîhso xa yîmtapotarî poko. Ero ke mokyatken̂e roro yîmtapotarî yentaxi. Tîkayaritomon komo yanme so rma tî mokyatken̂e. Ero wa tî mokyatken̂e Saromaw mtapotarî yentaxi.