Ero yinhîrî Iraw takî tî n̂en̂epekn̂e tmaywen komo Saromaw yaka. Ciru pono komo kayaritomon mîk xakn̂e Iraw. Kayaritomo me Saromaw ciitoponho tî n̂encekn̂e, yîîm pen retawno me ciitoponhîrî ha. Tapi pen xatînho tî mîk xakn̂e Iraw.

2 Ero yinhîrî takî tî tîmtapotarî yekatîmn̂e komo n̂en̂epekn̂e Saromaw Iraw yaka hara.

3 Ero ke tî yîmtapotarî n̂ekatîmyatken̂e, On wara tî nîîke Saromaw, ketken̂e tî, Ai oyakno, on wara cma re wîîkes awya, apapa pen yehtoponho mencesî, Tapi pen yehtoponho ha. Kporin komo mîn cirihra tî xakn̂e noro pen cetar̂macho poko roro cexirî ke okwe. Mehxa mehxa wara tî mokyatken̂e noro waparî komo. Ero ke cetar̂maxmu me thakwa tî xakn̂e. Pahkî exiche tak yîîxatî pîn komo yopono me takî tî n̂iir̂akn̂e Kporin komo, miyan komo yopono me rma.

4 Oroto tak tîtken̂e oriyasî Kporin komo, ponaro oyehtopo ha. Tawakem me tak naxe omîtwono komo miyan komo rma. Owaparî mokuhra ro mak nasî, oyesemetanmetopo marha exihra nasî.

5 Ero ke ow tak Kporin komo mîn ciitopo wîhtînoyasî, ponaro oyehtopo mîn. Ero wara rma tî kekn̂e Kporin komo apapa ya. Amn̂e awaipuche amumuthîrî tak wiir̂asî kayaritomo me ahretawno me. Noro tak n̂iir̂asî omîn, oyosotî yekenî ro, kekn̂e tî yîwya. Ero ke yîmtapotarî yaw roro rma tak ciri xe wasî.

6 Ero ke awanton komo ya cma re mamapesî setru yepu, Ribanu pono ha. Ohyaka cekposom me cma re mamapesî. Oyanton komo wen̂epesî amaywen komo yakronomachome. Awanton komo wepemesî amachonhîrî komo yepetho. Ero wicakî cepemapore nasî, kache awya ero wicakî wepemesî. Camkî mak nas amna weewe yamacho poko, enporitopo poko marha. Amyamro xa maxe yaana me ero yipu poko, Siton pono komo amyamro. Ero wara tî nîîke Saromaw awya, ketken̂e tî. Ero wa tî ketken̂e Samromaw n̂en̂epetho komo Iraw ya.

7 Ero wa kacho yentache takî tî tahwore xa xakn̂e Iraw. On wara tî kekn̂e, Kir̂wan̂he xa nai ham okre Kporin komo. Takîhsom tak nîmye ham okre Tapi pen ya yumumuru. Ixaw Yana komo kayaritomon me n̂iire okre, mer̂pono pîn komo kayaritomon me ha, kekn̂e tî.

8 Ero ke tîmtapotarî yekatîmn̂e komo tî n̂en̂epekn̂e Iraw Saromaw yaka hara. On wara tî nîîke Iraw awya, ketken̂e tî, Ai oyakno, amtapotarî wentai. Taa, wîîkes awya, yiixe awehtopo wîmyas awya setru yepu, siprexte yepu marha.

9 Oyanton komo tak n̂aar̂axe weewe yepu Ribanu pononho tuuna imo kwaka. Iito tak kan̂ihcexe yaake so kir̂wan̂he aatome yukwaw. Ero yipu tak naar̂axe anakwataka roro. Ahtono yaka arî xe may yîwya so, Iina naacowpe, kasko mak owya. Iito tak nîmhokexe hara aatome tak awya so. Ero ke ohyaka takî cma re mekpesî ohyawno komo nahrî, nîîke tî Iraw, ketken̂e tî. Ero wa tî ketken̂e Iraw n̂en̂epetho komo Saromaw ya.

10 Ero ke setru yepu takî tî nîmyakn̂e Iraw Saromaw ya, siprexte yepu marha. Yiixe noro yehtopo wicakî rma tî nîmyakn̂e yîwya.

11 Ero yepetho me takî tî Saromaw nîmyakn̂e Iraw ya hara. Puruma tî nîmyakn̂e yîwya 4.400.000 ritru wicakî. Asece marha tî nîmyakn̂e yîwya 440.000 ritru wicakî. Ero wa tî nîmyakn̂e yîhyawno komo nahrî me. Ero wicakî so tî nîmyakn̂e roro yîwya yicimn̂ipuntaxera so.

12 Taa, on wara tî xakn̂e Kporin komo Saromaw poko, yuhnarino yîhtînon̂e me tî n̂iir̂akn̂e tîmtapotachonhîrî yaw roro rma. Tawake tî xatken̂e etpoko Iraw, Saromaw yakro. Cetakronomarî, kacho poko tî nîmtapowatken̂e.

13 Ero yimaw takî tî cetapickaxmu komo men̂ekekn̂e Saromaw Ixaw Yana poyino komo. Mer̂pono pîn men̂ekekn̂e, 30.000 tî.

14 Ribanu pona tî n̂en̂epekn̂e noro yipu komo. Anarî nuun̂i po roro tî 10.000 cetapickaxmu komo n̂en̂epekn̂e iina. Iito tî n̂etapicketken̂e cewn̂e nuun̂i mak tîmîn komo yaka tmohtome so hara. Tîmîn yaw so tî xatken̂e 2 nuun̂i tîtotome so xa hara etapickaxi xa hara. Atoniraw tî xakn̂e cetapickaxmu komo yenîn̂e me.

15 Anarî komo tî napickekn̂e hara Saromaw tawsîn̂em yarîrî poko. 70.000 tî napickekn̂e ero yipu poko. 80.000 tî napickekn̂e hara toopu towtopo poko. Îîpî chew tî n̂etapicketken̂e n̂examro reha.

16 3.300 tî nantomekn̂e cetapickaxmu komo yenîrî poko. Saromaw maywenî ro komo poyino mîkyam nantomekn̂e ero yipu poko.

17 On wara tî kekn̂e kayaritomo toopu town̂e komo ya, Porin komo men towcoko toopu mko, cepethîkem kom ha. Kir̂wan̂he men sahsamacoko Kporin komo mîn yapon me ciisom ha, kekn̂e tî.

18 Ero ke Saromaw yanton komo tî n̂etapicketken̂e toopu towrî poko, Iraw yanton komo marha, Xibaw pono komo marha. Toopu nowyatken̂e, weewe sahsametken̂e, ero wa tî n̂etapicketken̂e Kporin komo mîn me ciisom poko. Ero wa tî n̂etapicketken̂e.