Taa, ero yimaw takî tî Kaan mîn ciitopo n̂ihciyakn̂e Saromaw. 4 cimn̂ipu tî xakn̂e Ixaw Yana komo kayaritomon me noro yehtoponho. 480 cimn̂ipu xakn̂e Ixaw Yana komo mohtoponho Exitu poi. 2-înhîrî nuun̂i po tî Kaan mîn n̂ihciyakn̂e, sipe po. Ero po xa tî n̂ihciyakn̂e.

2 On wicakno tî nukuknomekn̂e Kporin komo mîn, 27 metru wicakî tî nukuknomekn̂e ehyatkawnon, 9 metru wicakî tî nukuknomekn̂e akwerî, 13,5 metru wicakî tî nukuknomekn̂e kawnon.

3 Ero potawno takî tî nukuknomekn̂e Kaan mîn potuhremacho hara, wacamnî mak ha. Kaan yakro yîmtapotacho komo potarî n̂ixa tî nukuknomekn̂e 9 metru wicakî. Kaan mîn yakwerî yecenarî rma xakn̂e ero ehyatkawnon. 4,5 metru wicakî tî xakn̂e akwerî, wacamnî yakwerî.

4 Mîîmo yewkanapan marha tî n̂iir̂akn̂e yaake. Weewe tî n̂iir̂akn̂e ero yecepu me, enporixapu weewe ha.

5 Amtakpo marha tî n̂iir̂akn̂e yaake mîîmo wacan poko cetahsîso. Mîîmo mamhoko n̂iir̂akn̂e. Ero wa n̂iir̂akn̂e amtakpo mko, Kaan yakro yîmtapotacho komo tmamritîkaxi ro, Kaan yekenî ro tmamritîkaxî ro marha tî n̂iir̂akn̂e amtakpo mko.

6 Esepore ro tî n̂iir̂atken̂e amtakpo mko. Rooporeno tî xakn̂e 2,3 metru wicakî akwerî, rakatawno tî xakn̂e 2,7 metru wicakî akwerî, eporeno tî xakn̂e 3,1 metru wicakî akwerî. Ero mko mkari tî n̂iir̂akn̂e epirî ero poko ciitome ecetî mko. Kaan mîn wacan yaka xa ciri xera tî xakn̂e ecetî mko.

7 On wara tî n̂iir̂atken̂e toopu mko, ero mko tî sahsametken̂e towtopo to rma. Kir̂wan̂he ro makî tî ero memeseretken̂e. Ero yipu mko takî tî n̂iir̂atken̂e mîîmo wacan me. Knai knai kahra ro mak xatken̂e aama ke Kaan mîn yaw rma, cek kahra marha xatken̂e wakîknotopo ke. Ahce warai ke na cirihra ro mak xatken̂e, kuripara ke. Tîtken̂e mak tî n̂iir̂atken̂e.

8 Mîîmo yawxaw tî xakn̂e amtakpo metatan, yîrakatarî metatan. Ehyu tî n̂iir̂atken̂e ero yaka kawomtopo. Ehyu xa hara tî n̂iir̂atken̂e epoyino yakan hara amtakpo metatan yakan ha.

9 Ero wa tî Kaan mîn poko xakn̂e Saromaw ciitîkaxi ro. Ciriche mîîmo wacan takî tî nîmkarinomekn̂e setru sahsamaxapu ke.

10 Ero yinhîrî takî tî amtakpo mko n̂iir̂akn̂e anarî mko hara. Kaan mîn tmamritîkaxi ro n̂iir̂akn̂e. Setru sahsamaxapu ke cetahsîso tî xakn̂e amtakpo mko Kaan mîn poko. 2,3 metru wicakî so tî xakn̂e amtakpo mko kawnon, epoyino mko ero wicakî so marha tî xakn̂e, ero yepoyino mko xa hara ero wicakî xa marha. Ero wa tî xakn̂e amtakpo mko.

11-12 Ero yinhîrî on wara takî tî kekn̂e Kporin komo Saromaw ya, Ai okopuci, on wara wîîkes awya on omîn poko an̂irirî poko, omtapotachonho yaw roro xa awexi xe wasî. Owya apanatanmetopo yewetî xe was awya. Ero yewehcataw awya, omtapotachonho yaw roro rma kakronomesî amn̂e, aamo pen ya wîîkekn̂e ero yaw roro ha.

13 Ixaw Yana komo chewno ro me marha wasî, ahsîpînkara ro mak wasî, kekn̂e. Ero wa tî kekn̂e Kporin komo Saromaw ya.

14 Ero ke tî Kaan mîn poko xakn̂e Saromaw ciitîkaxî ro.

15 Kaan mîn wacan tî n̂iir̂akn̂e setru sahsamaxapu. Takwekemu mko tî n̂iir̂akn̂e waaca me. Mîîmo yetarî poyero ahruru pona roro ero mko n̂iir̂akn̂e wacan me. Ero yinhîrî siprexte sahsamaxapu takî tî n̂iir̂akn̂e mîîmo yeretarî roron me. Ero wa tî n̂iir̂akn̂e.

16 Ero yinhîrî amtakpo tî n̂iir̂akn̂e xa hara 9 metru wicakî ehyatkawnon. Ero marha tî wacancekn̂e setru sahsamaxapu ke, mîîmo yetarî poyero ahruru pona roro n̂iir̂akn̂e. Kaan mîn mapitawno mîn n̂iir̂akn̂e amtakpo, Kporin komo yekenî ro me.

17 Ero yinhîrî mîîmo potawno tî n̂iir̂akn̂e hara amtakpo. Kaan yakro yîmtapotacho komo me tî n̂iir̂akn̂e. 18 metru wicakî tî n̂iir̂akn̂e kawnon.

18 Mîîmo wacan ahnoro tî xakn̂e setru re. Ero n̂enpor̂atken̂e epemrutun me so waaca poko hakî. Bacibaci warai me marha tî n̂enpor̂atken̂e. Waaca ahnoro tî xakn̂e tîratarinomaxi setru sahsamaxapu ke, toopu tî esenpora ro makî tî xakn̂e mîîmo yaw.

19 Ero yinhîrî Kporin komo yekenî ro takî tî n̂iitîkekn̂e hara. Mîîmo yatumnawno me tî n̂iir̂akn̂e. Kporin komo yamatan yeken me tî n̂iir̂akn̂e, yîmtapotarî yen yeken me ha.

20 9 metru wicakî tî xakn̂e amtakpo ehyatkawnon, ero wicakî xa marha tî xakn̂e akwerî hara, ero wicakî xa marha tî xakn̂e kawnon hara. Ciriche tak ero nîratarinomekn̂e ooru ke, esmanî ro ke. Iito marha tî xakn̂e aapo hara kotoporem yakn̂itopo. Setru sahsamaxapu marha tî mîn n̂iir̂akn̂e.

21 Kporin komo mîn ahnoro tî nîratarinomekn̂e ooru ke. Ero yinhîrî kanawa mici warai marha tî n̂ehyatkekn̂e mîîmo wacan poko potawno poko mak. Ooru marha tî mîn nakîhcekn̂e kanawa mici warai me. Amtakpo perî marha tî nîmkarinomekn̂e ooru ke.

22 Ahnoro Kporin komo mîn tî nîratarinometîkekn̂e ooru ke. Kotoporem yakn̂itopo marha tî nîmkarinometîkekn̂e ooru ke. Ero wa tî nakîhcekn̂e aapo, Kporin komo yekenî ro mîtwono ha.

23 Taa, ero yinhîrî takî tî kerubin warai n̂enpor̂akn̂e asakî, Kporin komo yekenî ro yakan me. Oripera yepu tî n̂enpor̂akn̂e noro yipu me so. 4,5 metru kawnonke so tî n̂iir̂atken̂e ha.

24 2,3 wicakî tî xakn̂e kawnon anarî yaporî yaimo yaporî warai. Ero wicakî xa marha tî xakn̂e anarî yaporî hara. Ero ke 4,6 wicakî xakn̂e kaw aporî mko anarî yaporî mapitai anarî yaporî mapitaka hara.

25 Anarînhîrî kerubin warai marha tî xakn̂e 4,5 metru wicakî kawnonke xa marha. Etîme re makî tî n̂iir̂atken̂e kerubin warai.

26 4,5 metru wicakî kawnonke tî xakn̂e anarî, 4,5 metru wicakî kawnonke xa marha tî xakn̂e anarî hara.

27 Kerubin warai yenporitîkache Kporin komo mîn mapitawno yaka takî tî n̂iir̂atken̂e. Tapockaw tî n̂iir̂atken̂e waaca tapeso ro. Akrono marha tî n̂iir̂atken̂e tapockaw waaca tapeso ro hara. Amtakpo rakataw takî tî teme wara n̂iir̂atken̂e aporî poturu mko. Ero wa tî kerubin warai yaporî xakn̂e.

28 Kerubin warai marha tî nîmkarinomekn̂e ooru ke.

29 Ahnoro mîîmo wacan tî wakîknoyakn̂e kerubin warai me, kuum yepu warai me, epemrutun warai me. Ero warai ke so tî n̂enporitîkekn̂e amtakpo wacan, mapitawno wacan ha, potawno wacan marha.

30 Mîîmo yeretarî roron tî nîmkarinomekn̂e ooru ke. Ero wa tî nîmkarinomekn̂e mapitawno yeretarî roron, potawno yeretarî roron marha.

31 Oripera yepu ke tî mapitawno metatan n̂iir̂atken̂e asak hakno. Metata yaporwan marha tî n̂iir̂akn̂e, peyecepu mko marha. Kinta wicakî waaca raconho mîn n̂iir̂atken̂e metata mko me.

32 Metata ciriche kerubin warai me takî tî wakîknoyakn̂e ero pore, kuum yepu warai me, epemrutun warai me, ero warai me tî wakîknoyakn̂e metata mko poko. Wakîknoche nîmkarinomekn̂e ooru ke. Kerubin warai tî nîmkarinomekn̂e, kuum yepu warai meero. Ero wa tî n̂iir̂akn̂e.

33 Kaan mîn potarî metatan marha tî nakîhcekn̂e. Metata yecepu tî ka n̂iir̂akn̂e oripa yepu. Kwahta wicakî waaca raconho n̂iir̂akn̂e ero me, metata mko me.

34 Metata takî tî nakîhcekn̂e siprexte yepu. Asakî tî nakîhcekn̂e tankaxmu. Xehxa asakî metata tî nakîhcekn̂e iito re rma. Mehxa marha tî nakîhcekn̂e asak hara metata iito re xa marha.

35 Ero poko marha tî kerubin warai me n̂enpor̂akn̂e kuum yepu warai me, epemrutun warai me, ero warai me tî n̂enpor̂akn̂e xa hara. Enporiche takî tî nîmkarinomekn̂e ooru ke. Ero wa tî nîmkarinometken̂e enporixapu mko.

36 Mehxa Kporin komo mîn roron takî tî wacancetken̂e toh ke, sahsamaxapu ke. Osorwaw yatî tî n̂iir̂atken̂e waaca. Setru sahsamaxapu marha tî waaca me cewn̂e yatî mak. Ero wa tî yîhroron wacancekn̂e.

37 4 cimn̂ipu tî xakn̂e kayaritomo me Saromaw yehtoponho Kporin komo mîn yapon ciir̂ataw, yuhnawno ciir̂ataw. Siipe po xa tî ero n̂iir̂akn̂e nuun̂i po.

38 11 cimn̂ipu takî tî xakn̂e kayaritomo me ehtoponhîrî Kaan mîn ciitîketaw tak. Mewrexapu yaw roro rma tî n̂iitîkekn̂e. Buuru po xa tî n̂iitîkekn̂e, nuun̂i po. Ero ke 7 cimn̂ipu tî n̂enatkekn̂e cirirî poko. Ero wicakî pahkî tî xakn̂e Kporin komo mîn ciitopo.