Ero yinhîrî takî tî tîmîn n̂iir̂akn̂e hara Saromaw. 13 cimn̂ipu tî n̂enatkekn̂e ero ciitoponho.

2 Amtakpo tî n̂iir̂akn̂e ero yaw rma, porinî ro mak. Ribanu Comotan, kacho me tî nosohcekn̂e ero, amtakpo imo ha. 46 metru wicakî tî xakn̂e ehyatkawnon, 23 metru wicakî tî xakn̂e akwerî, 13,5 metru wicakî tî xakn̂e kawnon hara. Setru yepu tî n̂iir̂akn̂e mapata, yaake. 4 yatî tî n̂iir̂akn̂e pataw roro, etmoxe so ciki. Xehxa anarî yatî n̂iir̂akn̂e, mehxa anarî yatî hara, 4 yatî. Makwananî mko marha tî n̂iir̂akn̂e ero yipu kanahtaka so, setru sahsamaxapu marha tî.

3-4 Setru ke marha tî tahruso xakn̂e mehxa, kahsî, sasamaxapu ke ha. Makwanan yepoyino tî mîn xakn̂e ahruru. Ero yapon me tî xakn̂e makwanan mak. 45 yakenon tî xakn̂e makwanan. 15 so tî xakn̂e makwananî mko anarî yatî yaw so. Mîîmo yewkanapan marha n̂iir̂atken̂e. Tpomxe so tî n̂iir̂atken̂e 3 so. Xehxa tî xakn̂e ewkanapan, emtacho po hara tî xakn̂e anarî hara ewkanapan. Ero wa so n̂iir̂atken̂e.

5 Cecehke so tî n̂iir̂akn̂e metata mko ahnoro, ewkanapan marha ahnoro. Peyecepu marha tî n̂iir̂akn̂e. Ero wara tî n̂iir̂akn̂e porin amtakpo.

6 Mîîmo potuhremacho marha tî n̂iir̂akn̂e tkawno. Mapata Ken̂arî, kacho me tî nosohcekn̂e ero hara amtakpo. 23 metru wicakî tî xakn̂e ehyatkawnon, 13,5 wicakî tî xakn̂e akwerî hara. Tmahcai tî xakn̂e ero potaw. Mahcan mapatan tî n̂iir̂akn̂e. Ero pona tak ahruru n̂iir̂akn̂e hara.

7 Anarî marha tî n̂iir̂akn̂e amtakpo kayaritomo yaponî ro yamtakpon iina ceremachome en̂ekano riyataw. Ero ke, En̂ekano Ritopo, kacho me tî nosohcekn̂e ero hara amtakpo. Setru ke xa marha tî wacancekn̂e ero hara sahsamaxapu ke takwekem ke. Mîîmo yeretarî roron poyero makwanan pona roro tî n̂iir̂akn̂e ero yipu waaca.

8 Yîmîn rakataw tî xakn̂e yîhroron xa hara. Ero wacan marha tî xakn̂e setru sahsamaxapu takwekem. Ero yinhîrî anarî mîîmo xa hara tî n̂iir̂akn̂e Saromaw, tîmîn wara rma ha re. Paraw yemsîrî tî nahsîyakn̂e cipici me, noro mîn me tî n̂iir̂akn̂e ero hara.

9 Ero wa n̂iir̂akn̂e mîîmo yamtakponî mko. Toopu xa takî tî n̂iir̂akn̂e mîîmo wacan me so xa, kirwanî mko toopu, cepethîkem xa. Toopu rma tî sahsametken̂e eken yecenarî xa. Mehxa xehxa tîsahsamaxi xakn̂e. Ero yipu tî n̂iir̂akn̂e mîîmo wacan me so miya rorono me, makwanan pona rorono me. Ehyatkaw xakn̂e waaca mko, yîhroron pona roro.

10 Toopu marha tî n̂iir̂akn̂e mîîmo yapon me, yuhnawno me ha. Cepethîkem mîn xakn̂e toopu, porin. 4,5 metru wicakî tî xakn̂e anarî mko, 3,6 metru wicakî tî xakn̂e anarî mko hara.

11 Ero yipu xa marha tî n̂iir̂atken̂e mîîmo wacan me hara, toopu cepethîkem ha. Setru sahsamaxapu marha tî n̂iir̂akn̂e wacan me.

12 Ero wara xa marha tî xakn̂e yîhroron, porin, twacaye marha tî xakn̂e toh ke, sahsamaxapu ke. Osorwaw yatî tî xakn̂e toopu etantaw re. Setru sahsamaxapu mko marha tî n̂iir̂akn̂e ero wacan me hara. Ero yipu ke marha twacaye tî xakn̂e Kporin komo mîn roron hara, kayaritomo mîn potuhremacho marha. Ero wa tî mîîmo mko n̂iir̂akn̂e Saromaw, tîhroron wacan marha.

13 Taa, ero yimaw Iraw takî tî nan̂ikpekn̂e Saromaw Ciiru pononho.

14 Nahtari yepamtho tî noro yon xakn̂e, iin̂o waixapu tî mîk xakn̂e yîson. Yîîm pen tî xakn̂e Ciru pononho. Bronse ciin̂e ro tî mîk noro pen xakn̂e, yîîm pen. Tamocamkîno pînî ro makî tî mîk xakn̂e Iraw. Takîhso xa tî xakn̂e bronse ciitopo poko, ahce na me ciitopo poko ha. Ero ke noro takî tî mokyakn̂e Saromaw yaka. Ahnoro takî tî noro n̂iir̂akn̂e bronse ciixapu mko Saromaw yanme.

15 Bronse marha tî n̂iir̂akn̂e mapata imo me. Asakî tî n̂iir̂akn̂e. 8,1 metru wicakî tî xakn̂e kawnon, 5,4 metru wicakî tî xakn̂e awrutarî kuknomacho.

16 Ero yinhîrî asak marha tî n̂iir̂akn̂e mapata kanahtawno hara. 2,3 metru wicakî so tî xakn̂e kawnon.

17 Bronse marha tî n̂iir̂akn̂e hara mîîye warai me, kanawa mici warai me marha. Ero mko takî tî n̂iir̂akn̂e mapata imo kanahtawno porokru me. 7 kanawa mici warai tî n̂iir̂akn̂e anarî poko, 7 kanawa mici warai marha tî n̂iir̂akn̂e anarî poko hara.

18 Ero wa tî mapata imo n̂iir̂akn̂e. Mapata kanahtawno poko marha tî n̂enpor̂akn̂e roman yeperîrî warai yaake. Asakî yatî tî n̂enpor̂akn̂e ero warai me. Mîîye warai yepoi tî ero yipu mko n̂iir̂akn̂e. Etîme re tî n̂enpor̂akn̂e mapata imo kanahtawno.

19 Mîîmo potuhremacho yaw xakn̂e mapata imo. Ero kanahtawno mko n̂iir̂akn̂e epemrutun warai me. 1,8 metru wicakî kawnonke so tî xakn̂e epemrutun warai mko.

20 On wara tî xakn̂e roman, mapata imo kanahtawno pokono, 200 wicakî yakenon tî xakn̂e. Tamnon̂em yepoi tî xakn̂e, mîîye warai yepoi marha. Asakî yatî tî xakn̂e roman warai mapata imo kanahtawno tmamriso ro.

21 Ero yinhîrî mapata imo takî tî nanîmyakn̂e Iraw piiri, Kporin komo mîn potarî me rma. Kaari n̂ixan ka nanîmyakn̂e. Ero takî tî nosohcekn̂e Xakin me. Ero yinhîrî poowa n̂ixan tî nanîmyakn̂e hara. Ero takî tî nosohcekn̂e Boas me.

22 Mapata kanahtawno mko tî xakn̂e epemrutun warai me. Ero wa tî xakn̂e mapata imo, ciitîkaxi takî tî xakn̂e ero yimaw.

23 Ero yinhîrî takî tî tuuna yen n̂iir̂akn̂e hara porin ha. 4,5 metru wicakî tî xakn̂e ero potarî yamtarî. Tamnon̂e tî n̂iir̂akn̂e. 2,3 metru wicakî tî xakn̂e kawnon. Porin me tî xakn̂e 13,5 metru wicakî tî xakn̂e awrutarî kuknomacho.

24 Potarî mahyaw tî epemrutun warai ciki n̂iir̂akn̂e tmamritîkaxi ro. 20 so tî n̂iir̂akn̂e metru yecenarî. Anarî metru yecenarî ero wicakî xa marha tî n̂iir̂akn̂e hara. Ero wara roro n̂iir̂akn̂e tmamritîkaxî ro. Asakî yatî tî n̂iir̂akn̂e epemrutun warai. Ero mko n̂iir̂akn̂e tuuna yen potarî mahyaw.

25 On wara marha tî n̂iir̂akn̂e tuuna yen, paaka warai tî n̂iir̂akn̂e apon me, 12 tî n̂iir̂akn̂e paaka warai. Osorwaw tî xakn̂e paaka nohce wece cewru, osorwaw tî xakn̂e oesce wece cewru hara, osorwaw tî xakn̂e suu wece hara, osorwaw tî xakn̂e resce wece cewru hara. Ero yipu mko maxkokoro tî nakriyatken̂e tuuna yen. Paaka warai matkîrî tî xakn̂e tuuna yen yapomyaw.

26 Yahcome tî xakn̂e tuuna yen. Kamorî kawnon wicakî tî xakn̂e iyahconon, ketamoyanketawno wicak ha. Potarî tî xakn̂e tahrem potarî wara, er̂mo kahxapu potarî wara. Epemrutun wara tî xakn̂e swaa wara. Tuuna ke tarîhtosom tî mîn xakn̂e 44.000 ritru wicakno ke ha. Porin me ro makî tî xakn̂e. Ero wa tî xakn̂e tuuna yen Iraw n̂iritho.

27 Ero yinhîrî takî bronse takî tî nakîhcekn̂e aapo hara, tîhtakem, cewyarisom me. 10 tî n̂iir̂akn̂e. 1,8 metru wicakî so tî nakîhcekn̂e ehyatkawnon. 1,8 metru wicakî xa marha tî nakîhcekn̂e akwerî hara. 1,3 metru wicakî nakîhcekn̂e kawnon hara.

28 On wara tî nakîhcekn̂e aapo mko, yamata wara tî nakîhcekn̂e pataw mak. Panahno mko tî n̂iir̂akn̂e yamata warai me. Panahno yecetî marha tî n̂iir̂akn̂e ehyatkawno mko.

29 Tporokye tî xakn̂e panahno mko. Reaw warai tî xakn̂e, paaka warai, kerubin warai, ero warai ke tî xakn̂e tporokye so. Ero mko mahyaw so tî n̂iir̂akn̂e porokru xa hara aroko warai mko hara.

30 Tîhtake so tî aapo mko nakîhcekn̂e. 4 so tî n̂iir̂akn̂e yîhtarî, tarara tarî warai ha. Yîhtarî yecepu marha tî n̂iir̂akn̂e asakî so. Ero yecepu tî n̂iir̂akn̂e yamata pokono hara. Bronse tî n̂iir̂akn̂e ero mko me. Bronse marha tî n̂iir̂akn̂e kesemokacho me aapo pono mko. Kesemokacho yecetî mko marha tî n̂iir̂akn̂e. Ecetî mko marha tî n̂iir̂akn̂e aroko warai ke tporokye so.

31 Kesemokacho potarî tî xakn̂e tamnon̂e. Meia metru wicakî tî xakn̂e potarî yamtarî. Kesemokacho yecepu tî xakn̂e 0,75 metru wicakî takweke. Tmewreso tî xakn̂e potarî. Ceknuke tko tî xakn̂e aapo, tamnon̂e exihra tî xakn̂e.

32 Panahno mko yapomyaw tî xakn̂e yîhtarî, 4 mak, tamnon̂em ha. Tasîsîknoso tî xakn̂e yîhtarî yecepu tarara poko. 0,75 metru wicakî so tî xakn̂e yîhtarî yakwerî.

33 Yîhtarî tî xakn̂e tarara tarî wara, sowtatu yen tarî wara. Bronse makî tî n̂iir̂akn̂e yîhtarî, yîhtarî yecepu, ecepu mko ahnoro mak.

34 Kesemokacho yecetî tî xakn̂e tarara yeknutaw so. 4 makî tî xakn̂e ecetî mko. Aapo poko ciiso rma tî xakn̂e ecetî.

35 Aapo meretwo tî xakn̂e tamnon̂em aan̂apotu warai. Meia metru wicakî tî mîn xakn̂e awrutarî kuknomacho. Ahnoro tî xakn̂e ero re raconho me rma, cewn̂an me rma. Ero wa xakn̂e ecetî mko, panahno mko marha.

36 Tamnon̂emu mko tî wakîknoyakn̂e kerubin warai me, reaw warai me, kuum yepu warai me, ero warai me tî porokucekn̂e cesekenkaxî ro. Awci yapomitopo warai me marha tî n̂iir̂akn̂e enporitopo me.

37 Ero wara so tî aapo mko nakîhcekn̂e. 10 mak ha. Etîme re makî tî nakîhcekn̂e.

38 Ero yinhîrî bronse marha tî n̂iir̂akn̂e kesemokacho me xa hara. 10 tî n̂iir̂akn̂e. Tuuna yen me tî nakîhcekn̂e, kesemokacho komo yen me ha. 880 ritru wicakî so tî nahsîyakn̂e tuuna. Aapo pona so tî n̂iir̂akn̂e kesemokacho mko.

39 5 aapo tî n̂iir̂akn̂e xehxa kaari n̂ixa. 5 marha tî n̂iir̂akn̂e mehxa hara poowa n̂ixa hara. Porin tuuna yen tî n̂iir̂akn̂e hara mîîmo mîtkoso marha kaari n̂ixa, suu n̂ixa ha re.

40 Ero mko tî n̂iir̂akn̂e Iraw. On warai mko tî n̂iir̂akn̂e, wetacitîkesî tak yin̂irithîrî, kesemokacho mko, caarapa mko, tutumu mko. Saromaw mtapotarî yanmen tî n̂iitîkekn̂e ahnoro, Kporin komo mîn yawno mko, yîmkaino mko marha.

41 Mapata imo tî n̂iir̂akn̂e asakî, mapata imo kanahtawno mko marha, tutum warai ha, mîîye warai marha, mapata imo kanahtawno pokono,

42 400 romanî mko n̂iir̂akn̂e mîîye warai yakrono me ha, asakî yatî tî n̂iir̂akn̂e romanî mko. Ero warai tî n̂iir̂akn̂e mapata imo kanahtawno yenporitopo me.

43 10 tî n̂iir̂akn̂e aapo mko, 10 marha tî n̂iir̂akn̂e kesemokacho mko, aapo pono mko.

44 Tuuna yen tî n̂iir̂akn̂e cewn̂e mak porin, 12 paaka warai tuuna yen yaponî mko,

45 tahremu mko, caarapa mko, tutumu mko, ero warai mko tî n̂iir̂akn̂e Iraw Saromaw mtapotarî yaw roro rma. Bronse tî n̂iir̂akn̂e ero yipu me ahnoro. Tpepeyure tî xakn̂e yin̂irithîrî.

46 Xotaw woskaran po tî kayaritomo n̂irpekn̂e yîwya. Kawau tî n̂iir̂akn̂e Iraw ciisom komo kuknon me xa. Bronse tî ka nocoronpekn̂e xukrape cehsoro ero yaka arkachome tak. Mînto nai woskara. Sukoci nasî mehxa, Saretan tak nasî xehxa hara. Iito tî n̂iir̂akn̂e yukuknonî mko, woskara po ha.

47 Yin̂irithîrî mko yawsîn tî yukuknomara xakn̂e Saromaw mer̂pora ro mak exirî ke. Yuknomarî yopo tî xakn̂e bronse yawsîn.

48 Kporin komo mîn yawno mko marha tî nakîhtopekn̂e Saromaw. Ooru tî nakîhtopekn̂e kotoporem yapon me. Ooru marha tî nakîhtopekn̂e cuure warai yapon me.

49 Weeyu yecepu marha tî n̂iir̂akn̂e. 5 tî n̂iir̂akn̂e Kporin komo yekenî ro mîtkoso kaari n̂ixa, 5 xa marha tî n̂iir̂akn̂e poowa n̂ixa hara. Epemrutun warai tî n̂iir̂akn̂e ecepu poko. Ramha mko marha tî n̂iir̂akn̂e, etahsîtopo potkototopo mko marha. Ahnoro tî ero yipu mko xakn̂e ooru re.

50 Katî yen marha tî n̂iir̂akn̂e, etahsîtopo potkototopo, tutum, warapapoturu, kotoporem yakn̂itopo ciki, ero yipu tî n̂iir̂akn̂e ooru, esmanî ro. Ooru ciixapu marha tî xakn̂e Kporin komo yekenî ro metatan yetahsîtopo mko, Kporin komo yakro yîmtapotacho yetahsîtopo mko marha n̂iir̂akn̂e, metata yetahsîtopo ha.

51 Ero yimaw takî tî ciitîkaxi xakn̂e Kporin komo mîn, Saromaw n̂irpotho, ciitikaxi marha tî xakn̂e ero yawno mko ahnoro. Ero yinhîrî ero yaka takî tî n̂ekpekn̂e Saromaw tîîm pen yawnonho, Kaan ya tîmson tan ha kachonho yîwya. Prata ciixapu mko tî mîn xakn̂e, ooru ciixapu mko marha tî, aapo mko marha, ero yipu mko tî n̂ekpekn̂e Kaan mîn yaka. Kporin komo mîn purantan yîmtotopo yaka tî n̂iir̂akn̂e, amtakpo yaka ha. Ero wa tî n̂iir̂akn̂e Saromaw.