Ero yinhîrî takî tî Ixaw Yana poritomon komo nan̂ikpekn̂e Saromaw. Tribu yenîn̂e komo, Ixaw Yana poritomon komo, poturme cehsom komo, ero warai komo tî nan̂ikpekn̂e Xerusaren pona. Kporin komo yamatan yarîrî yentome tî nan̂ikpekn̂e. Ero yarî xe tî xakn̂e Saromaw Kporin komo mtapotacho yen. Tapi pen Yewtontho poi arî xe tî xakn̂e. Siaw, kacho rma mîn Tapi pen Yewtontho.

2 Ero ke Ixaw Yana komo takî tî mohtîketken̂e kîrkomo. Kayaritomo yaka mokyatken̂e, Saromaw yaka. Tahwotacho komo yimaw mokyatken̂e. Etan̂in po xakn̂e ahwotacho komo, 7-nhîrî nuun̂i po ha. Ero yimaw tî mokyatken̂e.

3 Mokuche so Kaan yamatan takî tî nanîmyatken̂e Kporin komo mîn yenîn̂e komo.

4 Naar̂atken̂e takî tî. Kaan mîntho marha tî naar̂atken̂e, Kaan yakro esentachonhîrî komo. Ero yawnonho mko marha tî naar̂atken̂e. Ero mko tî naar̂atken̂e tîmsom pokono komo, Repita komo yakro.

5 Saromaw tî xakn̂e Kaan yamatan mîtwo. Ahnoro Ixaw Yana komo marha tî xatken̂e iito noro yakro, yîhyaka mohxapu komo. Iito tî oper̂a pen waihketken̂e mer̂pono pînî ro mak, paaka pen marha. Mer̂pora ro makî tî waihketken̂e Kaan ya tîmsom, yukunomarî yopo ro makî tî.

6 Ero yinhîrî takî tî Kporin komo mtapotarî yen n̂ekyatken̂e tîmsom pokono komo. Kesentacho yatumnaka xa tî naar̂atken̂e ekenî ro yaka, Kaan yamtakponî ro yaka. Kerubin warai xakn̂e, iina naar̂atken̂e, aporî makataka.

7 Kaan yamatan yeken yepoi tî xakn̂e kerubim warai mko tapockantaxi so. Kaan yamatan yahrun̂e wara tî xakn̂e aporî komo, aatopo yahrun̂e wara meero. Ero wa tî xakn̂e kerubin warai yaporî.

8 Kaw so tî xakn̂e aatopo, weewe xîkrî. Ero mapirî tî n̂esenpekn̂e mehxa Kporin komo yamtakpon yaw kexitaw, amtakponî ro mîtwono yaw ha. Esenîra tko tî xakn̂e mehxa katpanaw kexitaw. Iito rma tî nai aatopo oroto.

9 Kaan yamatan tî xakn̂e yarîhra ha re. Toopu makî tî xakn̂e ero yaw enporixapu, Mosese pen n̂enkaputho. Pahxa n̂he Ixaw Yana komo mokyataw Exitu poi Kporin komo tî nîmtapowakn̂e Ixaw Yana komo yakro akronomacho komo poko ero yimaw tî toopu n̂enkayakn̂e Mosese iina, ero yimawnonho rma tî iito xakn̂e Kaan yamatan yaw. Ero yipu tî naar̂atken̂e Kaanî mtapotarî yen.

10 Ero yinhîrî takî tî Kporin komo yamtakpon yai n̂epataketken̂e tîmsom pokono komo. Epatakache so takî tî kaweresî ken̂e xakn̂e Kporin komo mîn.

11 Ero ke cemyawno komo pokohra tî ka xatken̂e tîmsom pokono komo kaweresî ken̂e xa exirî ke, Kporin komo weyuru yesenporî ke marha. Kporin komo mîn yawronohkatîkan̂e wara tî xakn̂e weeyu oco.

12 Ero yimaw takî tî nîmtapowakn̂e Saromaw. On wara tî kekn̂e, Ai oyakno komo, on wara tî kekn̂e Kporin komo pahxa, Tuuna yewru warai chewno ro mak Ow ha, kekn̂e tî.

13 On wara tko wîîkes awya Apa oroto, amîn takî wiire cenporem xa. Awekenî ro me wiire eroromerono me ha, kekn̂e tî.

14 Ero wa kache n̂etaknamekn̂e takî tî kayaritomo Ixaw Yana komo wece. Cececetoso tî xatken̂e iito. N̂examro yakro takî tî nîmtapowakn̂e. Awakronomacowpe xa Kporin komo, kekn̂e tî yîwya so.

15 On wara marha tî kekn̂e, Kir̂wan̂he xa mai ham, kapore nasî Kporin komo ya, ponaro Ixaw Yana komo yehtopo ya. Noro tî nîmtapowakn̂e Apapa pen yakro, Tapi pen yakro. Ero wa kachonho yaw roro rma tak oriye ham tamorî ke rma. On wara kai hara Noro,

16 Pahxa rma oyanan komo wekyakn̂e Exitu poi Ixaw Yana komo. Ero yimawno n̂ixa ro rma oyewtonî ro men̂ekara wîxakn̂e tribu komo yewton poyino. Ero yipu pona omîn cirpora wîxakn̂e yîwya so oyosotî yeken me. Tapi tko wiire oyanan komo kayaritomon me, kekn̂e yîwya.

17 Ero ke on wara wîîkes ow hara Saromaw ha, Kporin komo yosotî yeken ciri xe rma tî re xakn̂e apapa pen ponaro Ixaw Yana komo yehtopo mîn ciri xe.

18 On wara tko tî kekn̂e Kporin komo apapa pen ya, Kir̂wan̂he rma nas owya oyosotî mîn ciri xe awehtopo.

19 Omînî tko cirihra rma masî amoro. Amumuru xa yo n̂iir̂asî mîîmo, oyosotî me cetacisom, apunthîrî rma mîk n̂iir̂asî, kekn̂e tî yîwya.

20 Ero ke tak Apapa pen yîhretawno me tak oriye tîmtapotachonhîrî yaw roro rma. Ero ke Ixaw Yana komo kayaritomon me tak wasî ow hara oroto. Ero wa noro wiir̂as amn̂e, kekn̂e Kporin komo. Ero ke ero wa wasî yîmtapotachonhîrî yaw roro rma. Kporin komo yosotî yeken tak wiire mîîmo, ponaro Ixaw Yana komo yehtopo yosotî yeken ha.

21 Ero yaw tak Kaan yamatan yekenî ro wiire hara mîîmo yaw. Pahxa kporin pen komo yekyataw Exitu poi, Kakronomexe so amn̂e, kekn̂e Kaan yîwya so. Ero wa kachonho yen yeken mîn wiire ha, kekn̂e tî. Ero wa tî kekn̂e Saromaw Ixaw Yana komo ya.

22 Ero yinhîrî Kporin komo ya tîmsom yakn̂itopo mîtwo takî tî n̂ecececekn̂e Saromaw. Ixaw Yana komo yeepatai rma tî n̂ecececekn̂e. Napockanwakn̂e takî tî kaapu wece.

23 On wara tî kekn̂e Kaan ya, Apa, ponaro Ixaw Yana komo yehtopo Amoro. On wara cma re wîîkes awya, Amoro mak Amoro Kaan, anarî exihra ro mak nasî awarai. Kah yaw exihra nasî, roowo po marha exihra nasî. Amtapotachonhîrî yaw roro ciino rin̂e ro Amoro, apînîn yaw so wasî, kachonho yaw roro ha. Ero wa masî awanme mak xa cexi xatî komo poko.

24 Amtapotachonhîrî yaw roro rma amna makronome ham. Kakronomexe so amn̂e mîîkekn̂e apapa pen ya. Oroto tak ero wa kachonho yaw roro rma amna makronome ham. Amtarî ke makî ka mîîkekn̂e yîwya, oroto tak awamorî ke xa tak amna makronomesî. Ero ke wa anakronomarî me xa nas amna oroto.

25 Ponaro Ixaw Yana komo yehtopo Amoro Apa. Ero ke on wara wîîkes awya, amtapotachonhîrî yaw roro rma cma re kayaritomo me miir̂asî roro Tapi yepamtho komo. On wara tî mîîkekn̂e yîwya, apapa pen ya. Awanton mîk, noro ya mîîkekn̂e, Awepamthîrî komo naxe amn̂e Ixaw Yana komo kayaritomon me miya roro. Watohnî me ro mak ero wa naxe. Kir̂wan̂he cexi xe cexitaw so makî tko ero wa naxe. Oyanme roro masî, ero wa xa marha cexitaw so n̂examro kayaritomo me naxe, mîîkekn̂e tî yîwya.

26 Apa, ponaro Ixaw Yana komo yehtopo Amoro. Amtapotachonhîrî yaw roro rma tak amna cirko, apapa pen ya mîîkekn̂e ero wa kachonho yaw roro ha, wîîkesî. Awanton mîk xakn̂e apapa pen, Tapi, noro ya mîîkekn̂e.

27 On̂iritho on amîn. Kaanî ro xa tko Amoro. Noro yipu ma re mesekenme roowo pona? Kaapu mawronohketîkesî, epoyino meero nasî wahra awecenarîra. Soroso xa thakwa on̂iritho yopo ro mak masî on yopo ha.

28 Wara rma omtapotarî cma re mencesî, awanton mak ow ha. Ponaro oyehtopo Amoro Apa. Ero ke kîmtapowasî awakro yiixe oyehtopo poko. Ero ke omtapotarî cma re mencesî Apa.

29 On poko cewke cma re masî amîn poko. Kosope meero poko cewke esko, katpanaw meero. On wara mîîkekn̂e on poko mîîmo poko, Oyosotî yeken me tak nasî, mîîkekn̂e. Ero ke omtapotarî cma re mencesî on wece cewru omtapowataw.

30 Yiixe oyehtopo poko omtapowataw roro cma re omtapotarî mencesî, awantonî mtapotarî ha. Ayanan komo mtapotarî marha cma re mencesî, Ixaw Yana komo mtapotarî. On wece cewru yîmtapowataw so Amoro cma re mencesî kah yaw rma, awekenî ro po. Yîmtapotarî komo yencetaw awya kicicme ehtoponhîrî komo cma re mîhcamnoyasî.

31 Anarimaw kicicme na nai anarî komo tpoyino wece rma okwe. Ero yinhîrî, Kicicme exihra ro mak weexi noro poko, nîîke na en̂ekano rin̂e komo ya. Tanî rma na ero wa nîîke amîn mîtwo, awya tîmsom yakn̂itopo mîtwo rma.

32 Yîmtapotarî cma re mencesî kah yaw rma. Ero ke ero wa kan̂e komo en̂ekakî Amoro, epantome awya. Kicicme cehsom komo mîwîrîmesî yînwîrîmathîrî komo wara xa marha. Kir̂wan mîkro, mîîkesî reha kir̂wan komo poko. Ero ke noro yipu komo akronomakî kir̂wan me ehtoponhîrî komo yaw roro rma.

33 Anarimaw kicicme na natu ayanan komo, Ixaw Yana komo. Apoko rma kicicme natu. Ero yanme tîîxatî pîn komo nar̂marî me thakwa naxe okwe. Ero yinhîrî aponaro tak na nat hara. Awakro marha na nîmtapowatu takronomacho komo poko, on yaw rma na nîmtampowatu, amîn yaw.

34 Ero wa yîmtapowataw so cma re mencesî kah yaw rma. Kicicme ehtoponhîrî komo cma re mîhcamnoyasî. N̂examro marha cma re mekyas hara oona yîrowon komo pona hara, porin pen komo ya mîmyakn̂e ero pona. Ero wa cma re miir̂asî ayanan komo Ixaw Yana kom ha.

35 Anarimaw so kicicme na natu xa hara apoko. Ero yanme tak tahruso na nai kaapu. Tuuna mokuhra ro mak nai. Ero yinhîrî na n̂examro nîmtapowatu awakro. On wece cewru nîmtapowatu amîn wece cewru apa. Ayananî rma amna, ketu na awya. Kicicme cehtoponhîrî komo tak na nahsîpînketu cemetanmekrî ke awya.

36 Ero wa exitaw so yîmtapotarî komo cma re mencesî kah yaw rma. Kicicme ehtoponhîrî komo cma re mîhcamnoyasî. Ero wa esko ayanan komo poko Ixaw Yana komo poko. Ero wa ehtoponhîrî komo yîhcamnoko kir̂wan̂he ehtopo komo poko panatanmetome so hara awya. Ero yinhîrî tuuna takî cma re mekmexpes hara yîrowon komo pona, ayanan komo ya mîmyakn̂e eken komo me ero pona.

37 Anarimaw rooma poko na natu on roowo pono komo. Eper̂a na nai anarimaw poko so, ceper̂ai na nai yînatîrî komo, tpayaye na nai anarimaw. Rîîro komo na nahya, makaka komo anarimaw. Ixaw Yana komo waparî marha na mokyatu anarimaw ewton komo wamtoso. Ahce warai komo na nai esemetanmetopo komo.

38 Ero wa na n̂esemetenmekyatu xa okwe. Ero ke awakro na nîmtapowatu. Owî cma re makronomesî, ketu na awya. Anarimaw cewn̂e mak na nîmtapowa awakro, anarimaw ahnoro rma na nîmtapowatu ayanan komo. Tîmtapowataw so on wece na napockanwatu amîn wece.

39 Ero wa yîmtapowataw so mencesî cma re kah yaw rma. Kicicme ehtoponhîrî komo cma re mîhcamnoyasî. Epanko marha ahce wa na ehtoponhîrî komo yaw roro rma Apa. Amna ropotarî yenîn̂e xa Amoro, miyan komo ropotarî yenîn̂e rma. Amoro mak ero wa masî.

40 Ero wa epanko apa, kicicme exitaw so. Ero wa ciino cirko aponaro xa tak ehtome so miya roro tîrowon komo po ehtopo komo yecenarî, amna yîîm pen komo ya mîmyakn̂e ero po ehtopo komo yecenarî ha.

41 Anarimaw amna poyino pîn na mokya Ixaw Yana pîn ha. Mehxa na mokya meyenonhîrî. Awehtopo yentarî ke na mokya.

42 Ero wa naxe amn̂e meyeno komo, kyopono me xa awehtopo n̂encexe, Karitî xa Mîk ponaro Ixaw Yana komo yehtopo, tîyanan komo yakronoman̂e Mîk ha, kacho n̂encexe. Noro yipu komo na mokyatu amîn wece cewru tîmtapotachome awakro.

43 Ero wa yîmtapowataw so mencesî cma re kah yaw rma, awekenî ro po rma. Yîmtapotarî komo yaw roro rma cma re n̂examro miir̂asî. Ero wa cma re miir̂asî amna cheka mohxapu komo apoko twerî tak ehtome so ahnoro roowo poko hakno komo ayanan komo wara rma. Ero wa yîmtapotarî komo entakî on ponaro ehtome so amîn ponaro, on̂iritho ponaro. Awosotî yeken me nai ham, kexe tak ha.

44 Anarimaw sowtatu me na cetu ayanan komo tîîxatî pîn komo yar̂maxi. Awanme rma na cetu ahtono komo yar̂max ha na. Tîcetaw so awakro na nîmtapowatu on ewto wece cewru, anmen̂ekathîrî wece cewru ha. On mîîmo wece cewru marha na nîmtapowatu, awosotî yeken me on̂irîtho wece cewru ha.

45 Ero wa yîmtapowataw so yîmtapotarî komo cma re mencesî kah yaw rma. Amna xatî pîn komo yopono me cma re amna miir̂asî, kacho mencesî. Ero ke iyopono me so takî cma re miir̂asî.

46 Anarimaw kicicme xa hara na natu awece. (Kicicme exihnî ro exîhra rma nasî tooto.) Ero ke mîrwona tak na poko so. Ero ke ayanan komo tak na mahsîpe yîîxatî pîn komo ya okwe. N̂examro pen na naar̂atu okwe tanton komo me. Mooxe rma na naar̂atu anarimaw, meyehra n̂he anarimaw.

47 Iito cexitaw so tko na n̂esehtînoyatu hara, meye rma cexitaw so tîîxatî pîn komo yanton me mak cexitaw so ha. Ero yimaw tak kicicme cehtoponhîrî komo poxunketu. Awakro na nîmtapowatu. Kicicme ro mak amna nasî kica, kir̂wan̂he exihra ro mak amna nasî, ketu na awya.

48-49 Yaaro xa aaxe tak na natu meye rma tîîxatî pîn komo chew rma. Awakro na nîmtapowatu on roowo wece cewru marha, yîîm pen komo ya mîmyakn̂e ero wece cewru. On ewto wece cewru nîmtapowatu, awewtonî ro me anahsîthîrî wece. On mîîmo wece cewru marha na nîmtapowatu, awosotî yeken me on̂iritho wece cewru ha. Ero wa yîmtapowataw so mencesî cma re kah yaw rma. Amna cma re makronomesî, kacho mencesî. Ero ke takî cma re n̂examro makronomesî.

50 Kicicme ayanan komo yehtoponho cma re mîhcamnoyasî, apoko kicicme ehtoponhîrî kom ha. Ahnoro rma apoko kicicme ehtoponhîrî komo cma re mîhcamnoyasî. Aan̂enhîrî komo tak cirko yîpînîn yaw so.

51 Ayanan komo mîkyam, eroromero anahsîthîrî komo. Exitu poi an̂ekîthîrî komo mîkyam, wehto yen warai yawnonho ha.

52 Ero ke cewke roro cma re masî awanton komo poko yîmtapotarî komo yencetaw. Ayanan komo mtapotarî cma re mencesî ahcemaw so na yiixe cehtopo komo poko yîmtapowataw so awakro.

53 Anarme amna miir̂akn̂e anarî yana komo warai pîn me, roowo poko hakno komo warai pîn me. Ero wa amna miir̂akn̂e ayananî ro me amna yehtome. Ero wara rma tî mîîkekn̂e Moises ya pahxa kporin pen komo yekyataw Exitu poi. Ero ke ero wa cma re wîîkes awya Apa. Kaan Amoro amna Porin ha, kekn̂e tî. Ero wa tî kekn̂e Saromaw Kporin komo ya.

54 Ero wa Kporin komo yakro tîmtapotache piiri tak nawomyakn̂e Saromaw. Kporin komo ya tîmsom yakn̂itopo mîtwo rma xakn̂e. Ceremaxi tî ka xakn̂e tosokmuru po, tapockantaxi marha tî ka xakn̂e kaapu wece. Ero wa ehxapunhîrî tî nawomyakn̂e hara.

55 Piiri tawomuche Ixaw Yana komo yakronomacho poko takî tî nîmtapowakn̂e. Awakronomacowpe xa Kporin komo, kekn̂e. Kar̂pe tî nîmtapowakn̂e yîn̂entarî komo me. On wara marha tî kekn̂e yîwya so,

56 Kir̂wan̂he xa nai ham Kporin komo okre, kapore nasî. Tîmtapotachonhîrî yaw roro rma kiir̂axe so tak kerahtîmtopo ken̂ehra ro mak. Ehn̂an me ro mak ero wa kiice so ham tîmtapotachonhîrî yaw roro rma, Moises pen ya kekn̂e ero wa kachonho yaw roro rma.

57 Kakro so exi xe wasî Kporin komo, kporin pen komo yakro xakn̂e ero wara rma. Knomîhra ro mak exi xe wasî, kahsîpînkara ro mak ha.

58 Ero wa exi xe wasî kpoko so kropotarî komo yaknamachome twece rma. Cehtopo yaw rorono me kiri xe wasî yîwya, kpanatanmetopo yewetîn̂e me marha, pahxa kekn̂e kporin pen komo ya ero wa kachonho yewetîn̂e me ha.

59 Omtapotachonho ponaro exi xe wasî Kporin komo, oroto kîmtapota kakronomacho komo poko ero ponaro exi xe wasî kosope, katpanaw marha. Ero ponaro exi xe wasî oyakronomachome, tîyanan komo yakronomachome ahnoro Ixaw Yana komo. Ahce xe na kehtopo komo tîmn̂e me roro exi xe wasî enmar̂atîxera.

60 Ero wa kakronoman̂e me roro exi xe wasî roowo poko hakno komo n̂enîrî me. Kporin komo ya kakronomacho yenîche, Nnn, ketu, Noro xa ham Kaan. Anarî exihra ro mak nai ham, ketu tak Kporin komo poko.

61 Ero ke Noro ponaro ro rma men ehcoko, Kporin komo Kaan ponaro ro rma. Yîwya kpanatanmetopo ewetîcoko roro, oroto mewehcaxe ero wara roro, kekn̂e. Ero wa tî kekn̂e Saromaw Ixaw Yana komo ya.

62 Ero yinhîrî takî tî Kporin komo ya tîmsom nakn̂iyatken̂e Saromaw komo, Ixaw Yana komo. Kporin komo mîn mîtwo rma tî nakn̂iyatken̂e.

63 Mer̂pono pîn tî okno waihkapekn̂e Saromaw Kporin komo ya tîmsom, Aaxe xa wasî, kacho me tîmsom ha. 22.000 bui tî waihkekn̂e, 120.000 oper̂a marha tî waihkekn̂e. Waihkache yupunthîrî tî nakn̂iyatken̂e. Ero wa tî mîîmo nîmyakn̂e kayaritomo Kporin komo ya. Ahnoro Ixaw Yana komo tî nîmyatken̂e yîwya.

64 Ero kaamo po marha tî Kaan mîn roron takî tî n̂iir̂akn̂e kayaritomo Kporin komo ya tîmsom tîmtopo me hara. Kaan mîn potawno tî ero warai me n̂iir̂akn̂e. Ero yinhîrî takî tî iina paaka pun nakn̂iyatken̂e marha takn̂itîkaxmu, puruma yeperîrî, paaka katî, Aaxe xa wasî, kacho me takn̂isom ha. Ero yipu nakn̂iyatken̂e iina. Wahra tî xakn̂e akn̂itopo ro bronse ciixapu, Kporin komo mîn yecentono ha. Iyopo thakwa tî xakn̂e takn̂itîkaxmu pen, naatî yeperîrî pen, okno katîtho pen, Aaxe xa nasî amna, kacho me tîmsom ha.

65 Ero yimaw marha tî erewusmano n̂iir̂akn̂e Saromaw. Ahnoro Ixaw Yana komo tî n̂eseresmetken̂e iito re Kporin komo poko ahwotachome so, ponaro kehtopo komo poko ha. Mer̂pora ro makî tî n̂examro xatken̂e. Mehxa tî mokyatken̂e Amace potaka rorono komo, xiya rorono komo Exitu Yaporî pona rorono komo marha. Ero wicakno komo tî mokyatken̂e. 7 kaamo tî ka n̂eseresmetken̂e iito Xerusaren po, ero yinhîrî 7 kaamo xa hara tî n̂eseresmetken̂e. 14 kaamo tî xatken̂e iito.

66 Enmapuche xa hara takî tî en̂epeno n̂iir̂akn̂e Saromaw. On wara tî ketken̂e tîtorî me so tak, Awakronoma xe wasî Kporin komo ya, ketken̂e Ixaw yana komo tîkayaritomon komo ya. Ero yinhîrî cetken̂e hara tî tîmîn komo yaka. Tahwore ro makî tî cetken̂e. Kir̂wan̂he tî n̂een̂atken̂e Kporin komo ya Tapi pen yakronomacho, tanton yakronomacho ha. Ixaw Yana komo yakronomacho marha tî n̂een̂atken̂e kir̂wan̂he, tîyanan komo yakronomacho ha. Ero ke tî tahwore xatken̂e. Ero wa tî xatken̂e Ixaw Yana komo.