1-2 Ero yinhîrî takî tî Kporin komo n̂esenpekn̂e xa hara Saromaw ya. Pahxa n̂he ha ka Xibeon po exitaw tî n̂esenpekn̂e yîwya yihcirî me ha ka. Ero yinhîrî takî tî n̂esenpekn̂e xa hara yîwya Kporin komo mîn ciitîkache, kayaritomo mîn ciitîkache marha, ahce na ciri xe Saromaw yehtoponho ciitîkache ero yimaw tî n̂esenpekn̂e Kporin komo yîwya.

3 On wara tî kekn̂e yîwya, Ai, Saromaw, amtapotachonhîrî wentai, owya mîîkai ero. Amoro mak Kaan, mîîkai, amna cma re makronomesî mîîkai marha, ero wa kachono wentai. Omîn me tak wahsîy an̂irithîrî, wakir̂wamai omîn me xa tak ehtome. Eroromerono me tak oyosotî yekenî ro me wiirasî. Ero ween̂asî miya roro, ponaro marha wasî eponarononkara ro mak.

4-5 Taa, on wara wîîkes awya, kir̂wan̂he xakn̂e aamo pen, takîhso. Noro wara xa marha esko amoro. Yaaro cesehtînosom me mak esko. Takîhso marha esko. Apanatanmetopo komo wekatîmyakn̂e awya so, ero yaw roro esko watohnî me ro mak. Ero wara awexitaw awepamthîrî marha tak wiir̂asî Ixaw Yana komo kayaritomon me miya roro towîhnî me ro makî. Aamo pen ya wîîkekn̂e ero wa xa marha wîîkes awya hara, watohnî me ro mak naxe amn̂e awepamthîrî komo Ixaw Yana komo kayaritomon me, kachonho yaw roro rma n̂examro wiir̂asî.

6 On wara tko na mai amn̂e, anarî pona tko na metowya okwe. Amumuru komo marha na n̂etowyatu anarimaw. Oponarora tak na mat okwe, apanatanmetopo komo yewetîra na mat okwe. Anarî ro komo tak na mîhtînoyatu ponaro awehtopo komo me. Noro yipu komo poko tak na matu, mamakan me marha na mutupenwatu kica.

7 Ero wa awexitaw so Ixaw Yana komo tak anana wen̂epesî on po exihra ehtome so, yîwya so onmîtho po exihra ehtome so. On omîn wahsîyasî oyosotî yekenî ro me ero rma tko wakn̂ipesî waapa komo ya enîhra tak oyehtome. Ero yimaw tak, Ixaw Yana komo warahra cexpore nasî, kacho n̂encexe okwe miyan komo rma. N̂etaporexe tak okwe apoko so rma.

8 Mîîmo yenpotho okre, kacho me ka nas on mîîmo. Pahxaro tko n̂eserepokexe ro mak tak iito xa re tîtosom komo. Okwe okwe, kexe ro mak enîche. Ahce kacho on roowo nîwîrîmai okwe Kporin komo? kexe. Ahce kacho on mîîmo nakn̂ipoi okwe? kexe marha.

9 On wara n̂eyukyaxe entan̂e komo, Kporin komo tî nahsîpînketken̂e okwe ponaro cehtoponhîrî komo rma. N̂examro porin pen komo tî n̂ekyakn̂e Kporin komo Exitu poi. Noro tî nahsîpînketken̂e mak okwe. Anarî ro komo ponaro tak tî xatken̂e. Noro yipu komo mamakan me tî nutupenwatken̂e kica. Ero ke tak Kporin komo n̂examro pen n̂emetanmekye ro mak okwe, kexe. Ero wa men kexe iitoxari tîtosom komo apanatanmetopo komo yewetîra awexitaw so, kekn̂e tî yîwya. Ero wa tî kekn̂e Kporin komo Saromaw ya.

10 Taa, 20 cimn̂ipu tî n̂enahcakn̂e Kporin komo mîn ciitoponho, kayaritomo mîn ciitoponho marha.

11 Ero me ciisom tî nîmye roro yîwya Iraw, Ciru pono komo kayaritomon. Setru yepu tî nîmyakn̂e Saromaw ya, siprexte yepu marha, ooru marha. Ero wicakî yiixe wasî, kachonho yaw roro rma tî nîmyakn̂e yîwya. Taa, mîîmo mko ciitîkache tak 20 ewto mko takî tî nîmyakn̂e Saromaw Iraw ya. Karireia pono mko nîmyakn̂e.

12 Ero ke Ciru poi takî tî cekn̂e Iraw ewto mko yenso, Saromaw nîmîtho yenso. Kirwan̂he tko tî enîhra xakn̂e okwe ewto mko yînmîthîrî.

13 Ero ke on wara tî kekn̂e Saromaw ya, Ai oyakno, ahce warai mko mîmye owya hara kica ewto mko ha? kekn̂e tî yîwya. Ero ke Kabu me takî tî nosohcekn̂e ewto mko, Saromaw nîmîtho. Ero wara rma n̂etahcaxe iitono komo oroto.

14 Ooru tî nîmyakn̂e Iraw mer̂pora ro mak. Saromaw ya nîmyakn̂e mîîmo poko exitaw. 23 tarentu wicakî tî nîmyakn̂e yîwya okyo. Ero wa tî nîmyakn̂e yîwya Iraw.

15 Taa, on wara tî xakn̂e Saromaw, mer̂pono pîn komo tî nantomekn̂e epeman me ro makî. Mîn hak ciitopo poko tî n̂examro nantomekn̂e, Kaan mîn ciitopo poko, tîmîn marha, Miro marha, Xerusaren wacan marha. Ewto mko marha tî n̂irpekn̂e yîwya so. Aso, Mexito, Xese, ero mko n̂irpekn̂e yîwya so ewto mko.

16 On wara tî xakn̂e Paraw, Exipsiu komo kayaritomon, pahxa n̂he tî ka cekn̂e Xese pono komo waparî me. Kananew komo mîkyam xatken̂e Xese pono komo. N̂examro pen yar̂mache yîmînthîrî komo tî nakn̂iyakn̂e. Ewtonthîrî komo takî tî nîmyakn̂e cemsîrî ya, Saromaw pici me cehsom ya. Wakrecho me tî nîmyakn̂e yîwya etahsîtopo yimawno me.

17 Ero ke mîîmo mko takî tî n̂irpekn̂e hara Saromaw iina Xese pona, Bece-Oron pona marha n̂irpekn̂e mîîmo mko, mahyawno pona.

18 Baarace marha tî n̂irpekn̂e ewto, Tacmo marha tî, pohnîntawno mko mîn n̂irpekn̂e tîrowon pono rma. Ero mko tî n̂irpekn̂e.

19 Anarî ewto mko marha tî n̂irpekn̂e Saromaw cemyawno mîn me. Tîtararan yewtonî mko marha tî n̂irpekn̂e, kawaru yaan̂e komo yewton marha. Ahce na ciri xe cexitaw ero rma tî n̂irpekn̂e Saromaw tînapickarî komo ya. Xerusaren pono mko tî n̂irpekn̂e yîwya so, Ribanu pono mko marha, miyan pono rma n̂irpekn̂e tmamawno komo rowon pono rma. Ero wa tî ewto mko n̂irpekn̂e.

20 Ixaw Yana komo chew rma tî xatken̂e Amohew komo, Etew komo, Peresew komo, Epew komo, Xebusew komo, noro yipu komo rma tî xatken̂e Ixaw Yana komo chew, Ixaw Yana pîn komo rma.

21 Pahxa n̂examro yîîm pen komo waihkatîkara xatken̂e okwe Ixaw Yana komo. Ero ke epamthîrî komo xatken̂e rma yîchew so. Noro yipu komo tî nantomekn̂e Saromaw ahce na ciitopo poko epethîmnî me ro mak. Ero warai komo rma nantomexe Ixaw Yana komo oroto.

22 Ixaw Yana komo reha tî apickara xakn̂e Saromaw epethîmnî me. N̂examro reha tî xatken̂e sowtatu me, kayaritomo yanton me marha. Antomano rin̂e me xatken̂e, tarara yaan̂e komo yantoman̂e me, tarara yenîn̂e me, kawaru yenîn̂e me marha.

23 Anarî komo tî xatken̂e tapickaxmu komo yantoman̂e me hara. 550 tî mîkyam xatken̂e ero pokono komo. Ero pokono me makî tî xatken̂e Ixaw Yana komo reha.

24 Taa, Paraw yemsîrî tî ka xakn̂e Tapi pen Yewtontho po. Ero yimaw yîmînî ro takî tî n̂irpekn̂e Saromaw. Ciitîkache tak ero yaka takî tî mokyakn̂e Paraw yemsîrî. Miiro marha tî n̂irpekn̂e Saromaw tînapickarî komo ya.

25 On wara marha tî xakn̂e Saromaw, Kporin komo ya tîmsom tî nakn̂iyakn̂e akn̂itopo pona, tîn̂irithîrî pona. Takn̂itîkaxmu tî nakn̂iyakn̂e, Aaxe xa wasî, kacho marha. Kotoporem marha tî nakn̂iyakn̂e akn̂itopo ro pona, Kporin komo yekenî ro mîtwono pona. 3 ro tî nakn̂iyakn̂e ero yipu yicimn̂ipuntaxera. Taa, Kporin komo mîn tî n̂iitîkekn̂e.

26 On poko marha tî xakn̂e Saromaw, kanawa imo mko tî nakîhtopekn̂e Esion Xebe po, Eraci panawno po. Cucurem Yewku yecihtawno mîn, Esion Xebe. Eton yepamtho komo yewton mîn xakn̂e.

27 Ero yinhîrî tmaywen komo takî tî n̂en̂epekn̂e Iraw Saromaw kanawarî yaw. Yaana me kanawa imo yaan̂e tî mîkyam xatken̂e. Saromaw maywen komo yakronomaxi tî cetken̂e.

28 Kanawa imo yaw tî cetken̂e Opi pona. En̂exa tî n̂ekyatken̂e ooru, 14,5 tarentu wicakî. Saromaw yaka tî n̂ekyatken̂e. Ero wa tî n̂ekyatken̂e.