Taa, ero yimaw Saromaw yehtopo takî tî n̂encekn̂e Saba pono komo kayaritomon, wooxam. Kporin komo nakronomatho xa mîk Saromaw, kacho tî n̂encekn̂e. Ero ke takî tî Saromaw mtapotarî yentaxi mokyakn̂e. Yîmtapotarî yenta xe tî xakn̂e camkîno ro pokono. Ahce wa on mîhtînoya? Mîn hara ahce wa mîhtînoya hara? ka xe tî xakne mîn hak poko, camkîno ro poko.

2 Xerusaren pona tî mokyakn̂e tmaywei xa okyo. Kameru komo tî n̂ekyakn̂e knahrî poxun ke tîmkawnoi so, ooru ke marha, toopuci enporixapu mko ke marha. Ero yipu tî n̂ekyakn̂e Saromaw yaka. Noro yaka tmokuche mîn hak poko tî nîmtapowakn̂e enta xe cehtopo poko.

3 Enta xe noro yehtopo tî n̂ekatîmyakn̂e yîwya Saromaw watohnî me ro mak. Ehn̂ara ro makî tî xakn̂e Saromaw ekatîmtopo poko. Miyan poko rma tî noro nîhcamhokekn̂e, yîhyaka mohxapu.

4-5 N̂eserepokekn̂e xa takî tî noro, Saba pono komo kayaritomon Saromaw yehtopo poko. Yuhnarino poko takîhso ehtopo poko tî n̂eserepokekn̂e, yîn̂irithîrî poko marha tî. Mîîmo poko marha tî n̂eserepokekn̂e, noro yerewusmacho me etakaxapu poko, maywen komo poko mer̂pora ro mak exirî komo poko, anton komo poko, n̂examro ponon poko, wokpan̂e komo poko, tîmsom nakn̂iyakn̂e roro Kporin komo mîn mîtwo, ero poko marha. Ero warai poko tî n̂eserepokekn̂e xa takî tî tîyopo.

6 Ero ke on wara takî tî kekn̂e Saromaw ya, Yaarono xa mîn wencekn̂e ham. Awehtopo wencekn̂e meye rma oyexitaw oyewton po. Keserepokacho xa mîn ahce na yin̂irithîrî. Yuhnarino yîhtînon̂e me marha nasî, kacho wencekn̂e.

7 Ero yipu yekatîmn̂e komo tko wanwekyakn̂e ha ka. Omokrî ke tak awehtopo ween̂asî oyewru ke rma. Awehtopo yekatîmtîkara ro mak xatken̂e owya. Takîhso xa masî yîn̂ekatîmthîrî komo yopo ro mak. Cemyawnoi marha masî yîn̂ekatîmthîrî komo yopo.

8 Tawake ro mak naxe moxam amaywen komo, tawake marha naxe awanton komo. Amîtwo roro naxe takîhso tîmtapotaxmu me xa awehtopo yentan̂e me okre.

9 Kir̂wan̂he xa mai ham okre, kapore nasî Kporin komo ya ponaro awehtopo ya. Tîn̂enîrî mexe xa awen̂akn̂e ham. Ero ke Ixaw Yana komo kayaritomon me awir̂akn̂e. Eroromerono me Ixaw Yana komo xatî me nai ham Kporin komo. Ero ke kayaritomo me awir̂akn̂e yaaro ciino ritohme awya, takîhso ciino ritohme marha, kekn̂e tî yîwya. Ero wa tî kekn̂e Saba pono komo kayaritomon Saromaw ya.

10 Ero yimaw takî tî ooru nîmyakn̂e noro Saromaw ya 4 tarentu wicakî. Knahrî poxun marha tî nîmyakn̂e yîwya mer̂pono pîn, toopuci enporixapu mko marha tî nîmyakn̂e Saromaw ya. Ero wicakî esekîra ro mak tak nasî knahrî poxun ero yimaw ehxapunhîrî wicakî xa hara, Saba pono komo kayaritomon nîmyakn̂e Saromaw ya ero wicak ha.

11 Taa, on wara marha tî xakn̂e Iraw kanawarî mko hara, ooru n̂ekyatken̂e Opi pononho, awmuke yepu marha tî n̂ekyatken̂e merpono pîn. Toopuci enporixapu mko marha tî n̂ekyatken̂e. Ero warai tî n̂ekyatken̂e Oopi pononho.

12 Awmuke yepu tî n̂irpekn̂e Saromaw Kporin komo mîn yaka tawomtopo. Ero yipu xa marha tî n̂irpekn̂e kayaritomo mîn yaka tawomtopo me hara. Ero yipu marha tî nakîhtopekn̂e raatî me hara tîyorkaxmu me, anarmerpan me ha. Waano yaan̂e komo nîyorkarî tî mîn nakîhtopekn̂e. Kir̂wanî ro mîn xakn̂e awmuke yepu Saromaw ya n̂ekyatken̂e ero. Ero yîmawnonho warai takî tî esekîra nasî awmuke yepu, kir̂wanî ro xa.

13 Saba pono komo kayaritomon ya makîrha tî nîmyakn̂e Saromaw hara yiixe ehtopo. Yînaponkuthîrî nîmyakn̂e yîwya cemyawnonhîrî poyino mer̂pora ro mak. Ero wa tî nîmyakn̂e Saromaw yîwya. Ero yinhîrî cewton pona takî tî n̂etîramekn̂e hara wooxam, noro maywen komo marha. Ero wa tî xakn̂e Saba pono komo kayaritomon wooxam.

14 Taa, on wara tî xakn̂e Saromaw, ooru tî nahsîyakn̂e roro mehxan komo n̂ekîtho. Mer̂pono pînî ro makî tî n̂ekyatken̂e yîhyaka. 23 trentu wicakî so tî n̂ekyatken̂e roro yîhyaka yicimn̂ipuntaxera.

15 Anarî komo marha tî n̂ekyatken̂e ooru yîhyaka. Mehxan komo tî mokyatken̂e roro warawantaxi Ixaw Yana komo yakro. Ixaw Yana komo marha tî warawanwatken̂e meyeno komo yakro hara. Cemyawnonhîrî komo tî nîmyatken̂e epethîrî pona. Arabia pono komo kayaritomon komo marha tî n̂ekyatken̂e ooru Saromaw yaka, roowo raco kopenaton komo marha tî n̂ekyatken̂e yîhyaka.

16 Ero yinhîrî tak kecen̂an takî tî nakîhtopekn̂e Saromaw ooru re rma. 200 tî n̂irpekn̂e porin komo re. 3,5 kiru wicakî ooru tî nakîhtopekn̂e cewn̂e kecen̂an me. Ero wicakî tî nakîhtopekn̂e kecen̂anî mko.

17 Ero yipu mko xa hara tî n̂irpekn̂e ooru rma. Wahrai mko n̂he takî tî mîn n̂irpekn̂e, 300 yakenon ha. 1,7 kiru wicakî ooru tî nakîhtopekn̂e cewn̂e kecen̂an me. Ero mko ciriche mîîmo yaka takî tî n̂ermonoyakn̂e, Ribanu Comotan, kacho yaka.

18 Ero yinhîrî takî tî kayaritomo yapon n̂irpekn̂e hara Saromaw, porinî ro. Erepanci yotho tî n̂irpekn̂e ero me. Ciriche nîmkarinomapekn̂e takî tî ooru ke esman ke.

19 6 tî n̂irpekn̂e tîhtarî yapon, kayaritomo yapon yaka tawomtopo. Tamnon̂e tî xakn̂e aapo mkarî. Taporî yapon marha tî n̂irpekn̂e mehxa, xehxa wara ececoka. Reaw warai marha tî nakîhtopekn̂e asakî mehxa xehxa wara, taporî yapon mîtwo.

20 Tîhtarî yapon po so marha tî nakîhtopekn̂e reaw warai xa hara, 12. Mehxa xehxa wara tî xakn̂e yîhtarî yapon mapitaw so ececoka.

21 On wara marha tî xakn̂e Saromaw parakwen komo, kuupu komo ahnoro tî xakn̂e ooru ciixapu. Ero wa xa marha tî xakn̂e anarî mîîmo yawno hara, Ribanu Comotan, kacho yawno, etîme re tî xakn̂e ooru ciixapu re. Prata me ciixapu exihra ro makî tî xakn̂e. Eserepokara rma tî xatken̂e Ixaw Yana komo ero yimaw ero poko, ooru pen poko.

22 Kayaritomo kanawarî komo tî xakn̂e hara. Tuuna imo kwaw xakn̂e Iraw kanawarî komo yakro. Osorwaw cimn̂ipu yenatîche roro tî mokyakn̂e Saromaw kanawarî ooru yehso, prata yehso, erepanci yotho yehso, iyoku yehso xîpîrî warai, meeku warai marha, ero warai tî n̂ekyatken̂e roro Saromaw yaka kanawa yaw.

23 Ero wa tî xakn̂e Saromaw, cemyawnoi xa tî xakn̂e anarî komo kayaritomon yopo ro mak, roowo poko hakno komo yopo xa. Iyopo so xa marha tî xakn̂e yuhnari yîhtînon̂e me.

24 Ero ke roowo poko hakno komo ahnoro tmoku xe so tî xatken̂e Saromaw mtapotarî yentaxi, yîropotaka Kaan n̂iritho yentax ha.

25 Tmokyataw so Saromaw ya tîmsom tî n̂ekyatken̂e ahce na akîhtoxapu. Prata ciixapu mko n̂ekyatken̂e, ooru ciixapu mko anarimaw. Poono n̂ekyatken̂e, sowtatu ponon kuripara, yînahrî komo poxun, kawaru komo, muura komo. Yicimn̂ipuntaxera tî n̂ekyatken̂e. Ero warai tî n̂ekyatken̂e.

26 Tarara marha tî nahsîyakn̂e Saromaw mer̂pono pîn. 1.400 tî nahsîyakn̂e tarara mko. Kawaru yaan̂e komo marha tî nahsîyakn̂e tmaywen me, 12.000 tî noro yipu komo nahsîyakn̂e. Noro yipu tî n̂ekenmekn̂e ewto pona so tarara yekenî ro mko pona. Xerusaren pona marha tî n̂ekenmekn̂e.

27 Saromaw yanme takî tî n̂epamyakn̂e prata mer̂pora cehso ro, setru yepu marha. Tohkarara wara kyam makî tî prata n̂een̂atken̂e iitono komo mer̂pora ro mak exirî ke. Sikomoru yepu wara kyam tî n̂een̂atken̂e setru hara, tuuna yecihtawno wara. Mer̂pora xa marha exirî ke ero wara tî n̂een̂atken̂e. Ero wa tî n̂een̂atken̂e Xerusaren pono komo.

28 Kawaru komo tî n̂ekpekn̂e Saromaw Exitu poi, Kue poi marha. Noro maywen komo tî cetken̂e Kue pona kawaru yaponso. Ero wicakî kawaru yepetho, kacho yecenarî rma tî n̂epemetken̂e ahsîtome.

29 Exitu poi tî tarara mko n̂ekpetken̂e Saromaw maywen komo. 7 kiru wicakî so tî n̂epemetken̂e prata tarara yepetho. 1,7 kiru wicakî so tî n̂epemetken̂e kawaru hara. Ahsîxapunhîrî anarimaw tî nîmyatken̂e hara Etew kayaritomon komo ya, Siriu kayaritomon komo ya marha. Ero wa tî warawanwatken̂e Saromaw maywen komo tarara poko, kawaru poko marha.