On wara takî tî xakn̂e Saromaw, Paraw yemsîrî xatî me tî xakn̂e. Anarî yana komo wosin xe marha tî xakn̂e hara, mer̂pono pînî ro mak okwe. Moabita wosîn, Amonita wosîn, Etomita wosîn, Siton pono komo wosîn, Etew wosîn, ero warai komo wosîn xe tî xakn̂e okwe Saromaw cipici me.

2 On wara tî kekn̂e Kporin komo pahxa Ixaw Yana komo ya, Noro yipu yana komo wosîn ahsîra ro mak ehcoko apici me so, yîwya so marha tîmîhra ehcoko awemsîrî komo. Noro yipu komo yahsîche awya so ponaro cehtopo ro komo ponarono me tak men awir̂axe so kica, kekn̂e tî yîwya so. Noro yipu komo rma tko tî nahsîyakn̂e Saromaw cipici me so okwe.

3 Mer̂pono pînî ro makî tî nahsîyakn̂e cipici komo. Kayaritomo yemsîrî komo re tî mîkyam nahsîyakn̂e. 700 tî nahsîyakn̂e okyo cipici komo. 300 xa hara tî nahsîyakn̂e cipici warai me cehsom hara. N̂examro takî tî naknametken̂e yîropotarî anarî ro komo ponaro tak ehtome okwe.

4 Poritomo me ehtîkache takî tî Saromaw ropotarî tî naknametken̂e yipici komo ponaro anarî yana komo yehtopo ponaro tak ehtome. Tporin komo Kaan ponaro mak exihra takî tî xakn̂e okwe tîîm pen warahra okwe.

5 Astaroce ponaro tî xakn̂e, ponaro Siton pono komo yehtopo ponaro. Miwkon ponaro marha tî xakn̂e, ponaro Amon komo yehtopo ponaro hara. Kicicitho ro mak mîk xakn̂e, Miwkon.

6 Kicicme takî tî Saromaw n̂een̂akn̂e okwe Kporin komo. Iime roro Kporin Komo yewetîn̂e me exihra takî tî xakn̂e okwe. Tîîm pen warahra tî xakn̂e, Tapi pen warahra.

7 Îîpî pona tî n̂iir̂akn̂e Kemos, ponaro Moabita komo yehtopo ha, kicicitho xa marha kica. Îîpî nasî Xerusaren mîtwo resce n̂ixa ero pona tî n̂iir̂akn̂e. Ero warai xa marha tî n̂iir̂akn̂e Moroke, ponaro Amon yepamtho komo yehtopo hara, kicicitho xa marha.

8 Ero warai tî n̂irpekn̂e Saromaw cipici komo yanme, etpoyino pîn yanme, anarî yana me cehsom komo yanme ha. Kotoporem tî nakn̂iyatken̂e roro yipici komo ponaro cehtopo komo tawakeretopo me. Okno puntho marha tî nakn̂iyatken̂e yîwya so tîmsom me okwe.

9-10 Ero ke nîrwonakn̂e takî tî Kporin komo Saromaw poko anarî pona etowrî ke, ponaro Ixaw yehtopo pîn pona ha. Asakî ro tî Kporin komo n̂esenpekn̂e yîwya. Noro rma tî kicicme ehtopo poko nîtwermekn̂e. Anarî ro komo yîhtînopîra ro mak men esko ponaro awehtopo ro me, enporixaputho komo, kekn̂e tî yîwya. Kporin komo mtapotarî tko tî ewetîra xakn̂e okwe.

11 Ero ke on wara takî tî kekn̂e Kporin komo yîwya, Anarme tak mas okwe. Omtapotarî yaw roro exihra tak masî, owya apanatanmetopo komo yewetîra marha mas okwe. Ero wa awexirî yanme amaywenînhîrî komo tak men wowyas ahyai. Amaywen ya makîrha wîmyasî.

12 Aamo pen pînîn yaw tko wasî. Ero ke awaipînaw ka towîhra was ahyai. Amn̂e awaipuche mak tak wowyasî amumuthîrî yai xa wowyasî.

13 Ahnoro rma tko towhra wasî amaywen komo. Cewn̂e tribu kayaritomon me rma nasî noro. N̂examro wîmcesî noro maywen me so rma. Ero wa wîmcesî Tapi yanme oyanton yanme, Xerusaren yanme marha. Onahsîtho on ewto Xerusaren ha, kekn̂e tî. Ero wa tî kekn̂e Kporin komo Saromaw ya.

14 Ero yimaw takî tî Saromaw xatî pîn me tak ciino n̂iir̂akn̂e Kporin komo. Atace tî mîk n̂iir̂akn̂e yiixatî pîn me. Eton pono tî mîk xakn̂e Atace, iitono komo kayaritomon yepamtho ha.

15 Pahxa n̂he Tapi pen tî cekn̂e Eton pona. Iina marha tî cekn̂e Xoabe okoputhîrî komo yahruso. Iitononhîrî pen komo waihkache okoputhîrî komo nahruyakn̂e.

16 6 nuun̂i tî iito xakn̂e Xoabe Eton po kîrkomo waihkatîkarî poko. Ixaw Yana sowtatun komo ahnoro tî xatken̂e Xoabe yakro.

17 Ero yimaw tî Atace n̂emahciyakn̂e Exitu pona. Eton yepamtho komo marha tî n̂emahciyatken̂e noro yakro asak mak. Atace yîîm pen yantonînho komo mîkyam xatken̂e. Rikomo me rma tî ka xakn̂e Atace cemahciyataw.

18 Micianita komo chewnonho tî cetken̂e ha ka Paran pona. En̂exa takî tî cetken̂e hara Exitu pona roro. Paran pono komo tî naar̂atken̂e takro so. Exitu pona cepatakache so Paraw yaka tî cetken̂e. Noro takî tî mîîmo nîmyakn̂e Atace ya yîmîn me, mararîn marha tî nîmyakn̂e yîwya. Noro marha tî nînahmekn̂e.

19 Tawake ro mak takî tî n̂ehtîkekn̂e Paraw Atace poko. Ero ke cipici yakno tî nîmyakn̂e yîwya yipici me. Tapnese tî xakn̂e kayaritomo pici yosotî. Noro yakno tî nîmyakn̂e Atace ya yipici me.

20 Ero yinhîrî takî tî Tapnese yakno n̂ewruyakn̂e kîîrî ciki, Atace mumuru. Xenubace me tî nosohcekn̂e. Noro ciki tî por̂mamnoyakn̂e Tapese rma Paraw mîn yaw. Iito rma tî por̂mamyakn̂e Xenubace Paraw mîn yaw noro mumuru komo yakro rma.

21 Ero yinhîrî pahkî exiche takî tî Tapi pen nîwînîkyasî tporin pen komo yakro, kacho tî n̂encekn̂e Atace Exitu po rma cexitaw. Xoabe pen waihtoponho marha tî n̂encekn̂e, Ixaw Yana sowtatun komo yantoman̂enho pen waihtoponho ha. Ero yentache on wara takî tî kekn̂e Atace Paraw ya, Ai apa, owto xe cma re was oyekenî ro pona hara, kekn̂e tî.

22 Ai okwe, kekn̂e tî Paraw yîwya. Ahce kacho awto xe mai hara awekenî ro pona? Ahce exihtorî ke xa mesemetanmekyakn̂e tan ohyaw? kekn̂e yîwya. Pîra ro mak, esemetanmekîra ro mak wîxakn̂e tan ahyaw. Wara rma owto xe wasî, kekn̂e tî yîwya. Ero wa tî kekn̂e Atace Paraw ya.

23 Ero yimaw marha anarî xa hara tî Kporin komo n̂iir̂akn̂e Saromaw xatî pîn me. Heson tî mîk xakn̂e Eriata pen mumutho. Atatese maywen me tî ka xakn̂e noro Soba pono komo kayaritomon maywen ha. Tîkayaritomon yai tko tî n̂emahciyakn̂e.

24 Ero yinhîrî takî tî takrono komo nan̂ikyakn̂e Heson, kîrkomo yaake. N̂examro kayaritomon me tî xakn̂e. Ero wa tî xakn̂e Tapi cetaw Soba pono komo waparî me. Ero yinhîrî takî tî Heson komo cetken̂e Tamasku pona. Iitono ro me takî tî xatken̂e. Iitono komo kayaritomon me takî tî xakn̂e. Ero wa tî xakn̂e Heson.

25 Noro takî tî xakn̂e Ixaw Yana komo xatî pîn me ro mak pahkî, kayaritomo me exitaw ro Saromaw. Ero ke asakî tî xatken̂e Saromaw yîwîrîman̂e komo, Atace, Heson. Ero wa tî xakn̂e Heson, Ixaw Yana komo xatî pîn me ro mak tî xakn̂e okwe. Siriu komo kayaritomon me tî xakn̂e. Ero wa tî xakn̂e Heson.

26 Ero yimaw marha anarî tî xakn̂e Saromaw xatî pîn hara, Xeroboaw tî osotî. N̂ebace mumuru tî mîk xakn̂e. Sereta pono tî mîk xakn̂e N̂ebace, Eprain yepamtho rowon pono. Serua tî xakn̂e yîson yosotî, Xeroboaw yon yosot ha. Iin̂o waixapu thakwa tî mîk xakn̂e yîson. Noro yipu tî mîk xakn̂e Xeroboaw, Saromaw maywenînho etowxapu.

27 On yanme tî n̂etowyakn̂e, Miro tî n̂iir̂akn̂e Saromaw, sowtatu wacan. Tapi pen Yewtontho marha tî nakir̂wamekn̂e tîîm pen yewtontho ha.

28 Ero yimaw kar̂pe xa tî xakn̂e Xeroboaw, cemyaporem me marha tî xakn̂e. Ero wara rma tî noro n̂een̂akn̂e Saromaw. Ero ke tînapickarî komo yantoman̂e me takî tî n̂iir̂akn̂e, Xose yepamtho komo yenîn̂e me mak.

29 Ero yinhîrî takî tî Xeroboaw cekn̂e Xerusaren poi. Esama yaw tî cetaw takî tî n̂esepor̂akn̂e Aias yakro. Weronomano rin̂e mîk xakn̂e Aias, Siro pono ha. Xeroboaw yakro cesepor̂ataw yaxan yaw tî xakn̂e poono yaw. Mararî po tî n̂esepor̂atken̂e. Anarî komo exihra ro makî tî xatken̂e iito.

30 Xeroboaw yakro ceseporîche tpononî rma takî tî nahsîyakn̂e Aias. Xahrara kekn̂e tî, tponon nahyaxkekn̂e yaxanînhîrî. 12 raconho me tî nahyaxkekn̂e poono.

31 On wara tî kekn̂e Aias Xeroboaw ya, Ehe, 10 ahsîko amoro oponontho raconho. On wara kesî Kporin komo awya, ponaro Ixaw Yana komo yehtopo, Saromaw maywenînho komo tak wowyas amn̂e yîhyai. 10 tribu tak wîmyasî awya amaywen me.

32 Saromaw yepamtho komo yaw rma tko nasî cewn̂e tribu. Ero wa noro wiir̂asî Tapi yanme, oyantonînho pen yanme. Xerusaren pînînke marha ero wa wiir̂asî. Ero pînîn yaw wasî ewto pînîn yaw onmen̂ekatho me exirî ke xa. Anarî mko wacekn̂e Ixaw Yana komo yewtonî mko ahnoro. Xerusaren xa owî men̂ekekn̂e oyewton me, anarî tribu yewton men̂ekara wîxakn̂e. Ero ke wa wîmcesî cewn̂e tribu.

33 10 tko wowyasî epamthîrî komo yai oyahsîpînkarî ke yîwya so. Astaroce poko tî nahwowatken̂e kica, ponaro Siton pono komo yehtopo poko. Kemos poko marha nahwowatken̂e, ponaro Moabita komo yehtopo poko, Miwkon poko marha nahwowatken̂e, ponaro Amonita komo yehtopo poko kica. Oyehtopo yaw roro exihra xakn̂e Saromaw, takîhso exihnî me ween̂as okwe. Owya tpanatanmetopo yewetîra nai okwe. Yîîm pen n̂ewehcakn̂e ero warahra reha tak nasî Saromaw okwe.

34 Ahnoro tko towhra wasî yîhyai maywenînhîrî komo. Waihtopo pona roro thakwa wiir̂akn̂e kayaritomo me. Ero wa wiir̂akn̂e oyanton yanme, Tapi pen yanme ha. Noro reha owya tpanatanmetopo n̂ewehcakn̂e. Noro yanme rma kayaritomo me wiir̂akn̂e yumumuru hara.

35 Saromaw mumuru yai rma tko wowyasî maywenînhîrî komo. Amaywen me tak wiir̂asî, 10 tribu mak ha tko.

36 Tapi pen mumutho ya wîmyasî cewn̂e tribu mak. Ero wa wîmyasî oyanton pen yosotî yehcamnopîra ehtome iito Xerusaren po. Onmen̂ekatho mîn Xerusaren oyewtonî ro me. Oyosotî yeken me men̂ekekn̂e.

37 Ero yimaw tak Ixaw Yana komo kayaritomon me kiir̂asî. Awanme ro mak tak kayaritomo me masî.

38 Ero yimaw tak owya apanatanmetopo komo men ewetko, oyehtopo yaw roro xa esko. Takîhso marha esko on̂enîrî mexan me. Oyanton pen wara xa marha esko Tapi pen wara. Omtapotarî n̂ewehcakn̂e noro pen apanatanmetopo komo, noro wara esko. Ero wara awexitaw kakronomesî. Awepamthîrî komo wiir̂asî kayaritomo me miya roro, Tapi pen yepamtho wiir̂akn̂e ero wara rma. Ixaw Yana komo wiir̂asî amaywen komo me.

39 Ero wa Tapi pen yepamtho komo wemetanmekyasî kicicme exirî komo ke. Eroromero tko emetanmekîra wasî, kesî. Ero wa kesî Kporin komo awya, kekn̂e Aias Xeroboaw ya.

40 Ero ke Xeroboaw waihka xe takî tî xakn̂e Saromaw okwe. Ero ke Exitu pona takî tî n̂emahciyakn̂e Xeroboaw. Sisake yaka tî cekn̂e iitono komo kayaritomon yaka. Iito tî xakn̂e yîhyaw Saromaw pen waihtopo pona roro.

41 Taa, miya rma nai Saromaw pen yehtoponho, yin̂irithîrî mko, takîhso yîmtapotachonhîrî. Ahnoro rma nasî tmewreso karita yaka, Saromaw Yehtoponho, kacho yaka.

42 Pahkî n̂he tî xakn̂e Saromaw Ixaw Yana komo kayaritomon me, 40 cimn̂ipu. Xerusaren tî xakn̂e noro yewton me.

43 Ero yimaw takî tî tporin pen komo yakro nîwînîkyakn̂e Saromaw. Tapi pen Yewtontho pona tî okoputhîrî nahruyatken̂e. Ero yinhîrî yumumuthîrî takî tî xakn̂e kayaritomo me hara, Hoboaw tî xakn̂e noro yosotî. Ero wa tî xakn̂e.