Ero yinhîrî takî tî on wara xakn̂e Hoboaw, Siken pona tî cekn̂e. Iina tî cekn̂e kayaritomo me ecirposo Ixaw Yana komo ya. Iina tî cetken̂e ahnoro Ixaw Yana komo noro ciiso. Ero ke iina cekn̂e.

2 Ero yimaw tî Saromaw waihtoponho n̂encekn̂e Xeroboaw, N̂ebace pen mumutho. Exitu po tî xakn̂e. Iina emahcixapu tî mîk xakn̂e Saromaw yai.

3 Noro tko tî nan̂ikyatken̂e Ixaw Yana komo. Ero yinhîrî takî tî noro yakro cetken̂e ahnoro Ixaw Yana komo Hoboaw yaka.

4 On wara tî ketken̂e yîwya, Ai, Hoboaw, amna yopo thakwa aamo pen amna napickekn̂e. Tawsîn̂em wara xa xakn̂e noro yewetîtopo amna ya. Ero ke on wara kes amna awya, wara n̂he tak amna apickakî aamo pen warahra. Taponukyem wara n̂he tak cirko amna ya awewetîtopo. Ero wa awexitaw tak, awewetîn̂e me rma wa nas amna, ketken̂e tî yîwya.

5 Ai ha, kekn̂e tî Hoboaw. On wara wîîkes awya so, etocoko ka. Osorwaw ro enmapuche amohcoko xa hara. Ero yimaw tak keyukyaxe so, kekn̂e tî. Ero ke tî ka cetken̂e Ixaw Yana komo.

6 Ero yinhîrî takî tî poritomo komo mtapotarî ka n̂encekn̂e Hoboaw. Saromaw pen yakro cesentaxmunhîrî komo tî mîkyam xatken̂e noro pen waipînaw. On wara tî kekn̂e yîwya so, Ai apa komo, ahce wa Ixaw Yana komo weyukya awya so? kekn̂e tî.

7 On wara tî ketken̂e yîwya, N̂examro maywen me xa matko esko amoro. Tawake eyuhko. Ero wa awexitaw amaywen me roro naxe miya roro okre, ketken̂e tî yîwya.

8 Poritomo komo mtapotarî tko tî nanwekyakn̂e Hoboaw okwe. Kar̂pamxan komo yakro makîrha tî n̂esencekn̂e hara, tpor̂mamyemînhîrî komo yakro.

9 On wara tî kekn̂e yîwya so, Amyamro hara oyakno komo, ahce wa n̂examro weyukya awya so? Wahra n̂hema amna apickakî aamo pen warahra, kace owya. Ahce wa n̂examro weyukya awya so? kekn̂e tî yîwya so.

10 On wara tî ketken̂e kar̂pamxan komo, noro por̂mamyemînhîrî komo, On wara xa kapore nasî awakro cesentaxmu komo ya, Wahra n̂he amna apickakî aamo pen warahra, kace awya, n̂examro ya, Oyamoyaran wahraitho rma nas amn̂e porin me apapa pen pun yopo, kapore nasî yîwya so.

11 Awapicketken̂e so ro mak apapa pen, owî tak kapicketîkexe so n̂he tak apapa pen yopo. Apapa pen ahyokyatken̂e so ha re ososwa ke, owî reha kîhyokyaxe so cikiri ke tak, kapore marha nasî yîwya so, ketken̂e tî yîwya.

12 Ero yinhîrî takî tî, osorwaw ro enmapuche mokyatken̂e xa hara Ixaw Yana komo Xeroboaw yakro. Noro mtapotachonho yaw roro rma tî mokyatken̂e. Osorwaw ro enmapuche amohcoko xa hara, kekn̂e noro, kayaritomo. Ero wa kachonho yaw roro rma tî mokyatken̂e yîhyaka.

13 Ero yimaw rîîwoxe ro mak takî tî n̂examro n̂eyukyakn̂e Hoboaw. Poritomo komo mtapotarî tî nanwekyakn̂e.

14 Kar̂pamxan komo mtapotarî xa tî n̂ewehcakn̂e. Ero yaw roro tî n̂eyukyakn̂e. On wara tî kekn̂e Ixaw yana komo ya, Ai, tooto komo on wara wîîkes awya so, awapicketken̂e so xa apapa pen. Miya xe xa tko kapicketîkexe so owî reha apapa pen yopo. Ososwa ke ahyokyatken̂e so apapa pen. Owî reha kîhyokyaxe so cikiri ke oco, kekn̂e tî. Ero wa tî kekn̂e kayaritomo yîwya so mohxapu komo ya.

15 Ixaw Yana komo mtapotarî ponarora ro makî tî xakn̂e Hoboaw. Kporin komo yanme rma tko tî ero wa xakn̂e tîmtapotachonhîrî yaw roro rma ciino ritohme. Aias ya kekn̂e yîn̂ekatîmrî Xeroboaw N̂ebace ya ero yaw roro rma ciino n̂iir̂akn̂e.

16-17 On wara tko tî ketken̂e Ixaw Yana komo, Kîmtapotarî ponarora ro mak nai ham okwe kayaritomo, ketken̂e tî. Ero ke on wara takî tî ketken̂e yîwya, Ahce kacho Tapi pen yepamtho maywen me tat ha ke? Xese pen mumutho yepamtho maywen mera rma tat ham. Kaikatko hara ahnoro Ixaw Yana komo kîmîn yaka so hara. Amyamro re mak esencoko Tapi pen yepamtho komo re mak, ketken̂e tî Ixaw Yana komo Hoboaw ya. Ero ke cetken̂e tak hara tîmîn komo yaka hara.

18 Ero yinhîrî takî tî Atoraw n̂en̂epekn̂e Hoboaw Ixaw Yana komo yaka tapickaxmu yenîn̂e ha. Noro pen takî tî waihketken̂e okwe Ixaw Yana komo toh ke. Noro pen waihkachonho yentache Hoboaw ya tîtararan yaka takî tî n̂esenkayakn̂e yohno. Ero yaw takî tî n̂emahciyakn̂e Xerusaren pona hara.

19 Ero ke Tapi pen yepamtho komo maywen pîn me takî tî xatken̂e Ixaw Yana komo. Oroto meero n̂examro maywen mera naxe.

20 Ero yimaw tak Ixaw Yana komo ahnoro tî n̂encetken̂e Xeroboaw mohtoponho hara. Ero ke noro takî tî nan̂ikyatken̂e. Mokuche tkayaritomon me takî tî noro n̂iir̂atken̂e, Ixaw Yana komo kayaritomon me ha. Xuta yepamtho komo makî reha tî xatken̂e Tapi pen yepamtho maywen me rma.

21 Taa, on wara takî tî xakn̂e Hoboaw Xerusaren pona cepatakache hara, Xuta yepamtho komo ahnoro tî nan̂ikyakn̂e kîrkomo. Benxamin yepamtho komo marha tî nan̂ikyakn̂e. 180.000 yakenon tî mîkyam xatken̂e sowtatu me cehsom kom ha. Ixaw Yana komo yahsî xe xakn̂e tmaywen me xa hara, Saromaw pen mumutho maywen me ha.

22-23 On wara tko tî kekn̂e Kaan Semaias ya, Kaan yakrono ro ya, Ai, Semaias, amtapotata Hoboaw yakro, Saromaw pen mumutho yakro, Xuta yepamtho komo kayaritomon mîk noro yakro ha. Xuta yepamtho komo ya marha kasko, Benxamin yepamtho komo ya marha, miyan komo ya rma kasko.

24 On wara kasko yîwya so, Ai, oyakno komo, on wara tî nîîke Kporin komo awya so, tohra ro mak men ehcoko awakno komo yakro etar̂maxi, Ixaw Yana komo yakro. Etocoko hara amîn komo yaka. Oyanme rma n̂examro n̂etowce, kasko yîwya so, kekn̂e tî. Ero ke ero wa tî kekn̂e Semaias yîwya so. Ero ke Kporin komo mtapotarî tî n̂ewehcatken̂e. Tîmîn komo yaka takî tî cetken̂e hara Kporin komo mtapotarî yanme rma. Ero wa tî xatken̂e.

25 Taa, ero yinhîrî takî tî sowtatu wacan n̂iir̂akn̂e Xeroboaw Siken pona, Eprain yepamtho komo yewton pona, îîpî chewno pona. Iina takî tî n̂esekenmekn̂e. En̂exa takî tî cekn̂e xa hara Penuew ciiso hara.

26 Ero yimaw on wara takî tî kekn̂e Xeroboaw tîropotaw, On wara na natu amn̂e omaywen komo, Ixaw Yana komo, Tapi pen yepamtho maywen me men naxe xa hara okwe.

27 Enko, cexe roro Xerusaren pona Kporin komo mîn yaka tookuthîrî komo puntho yakn̂iso. Ero wa tîcetaw so n̂enpamtîkexe hara men okwe tkayaritomonînhîrî poko hara, Hoboaw poko, Xuta yepamtho komo kayaritomon poko. Ero wa enpamtîkache so owaikexe men okwe. Hoboaw maywen me tak naxe hara, kekn̂e tî. Ero wa tî kekn̂e Xeroboaw tîropotaw.

28 Ero ke poritomo komo yakro cesentache paaka xîkrî takî tî nakîhtopekn̂e Xeroboaw asakî. Ooru tî mîn n̂irpekn̂e paaka xîkrî me. On wara tî kekn̂e Ixaw Yana komo ya, Ai, Ixaw Yana komo, mooxe xa thakwa nasî Xerusaren. Moso rma ponaro awehtopo komo, Exitu poi aporin pen komo yekn̂enho ha, kekn̂e tî kica.

29 Anarî n̂iir̂akn̂e Betew pona, paaka xîkrî warai. Anarînhîrî tî n̂iir̂akn̂e Taan pona hara.

30 Ero ke Ixaw Yana komo kiciciren̂e me takî tî xakn̂e okwe paaka xîkrî warai ooru ciixapu. Ero mko yaka tî cetken̂e roro poko ahwotaxi kica. Meyeno yaka meero tî cetken̂e ahwotaxi Taan pono yaka meero.

31 Mîîmoci mko marha tî n̂iir̂akn̂e Xeroboaw îh pona so paaka xîkrî warai mîtkoso. Paaka xîkrî warai yenîn̂e komo marha tî n̂iir̂akn̂e onoke warai kom ha na, Repi yepamtho pîn komo ro mak okwe.

32 Tawotacho komo marha tî nukuknomekn̂e Xeroboaw. 8-nhîrî tî nukuknomekn̂e nuun̂i, 15-nhîrî tî nukuknomekn̂e kaamo. Xuta yepamtho komo yahwotacho warai xa marha tmaywen komo yahwotacho nukuknomekn̂e. Ero po takî tî okno puntho nakn̂iyakn̂e paaka xîkrî warai ya tîmsom yakn̂itopo pona. Ero wa tî xakn̂e Xeroboaw Betew po, tîn̂irithîrî ya tîmsom nakn̂iyakn̂e paaka xîkrî warai ya tîmsom ha. Iito cexitaw marha tî paaka xîkrî warai ya tîmsom pokono komo n̂iir̂akn̂e, tîn̂irithîrî ya tîmsom pokono ro.

33 Ero ke okno puntho takî tî nakn̂iyakn̂e akn̂itopo pona, tîn̂irithîrî pona, Betew pono pona. 8-nhîrî po tî nakn̂iyakn̂e nuun̂i po, 15-nhîrî kaamo po. Tanme ro makî tî nîhtînoyakn̂e ero kaamo Ixaw Yana komo yahwotacho me. Ero po akn̂itopo pona tî tîmsom nakn̂iyakn̂e, kotoporem marha nakn̂iyakn̂e. Ero wa tî xakn̂e Xeroboaw okwe.