Taa, ero yimaw takî tî iito xakn̂e Kaan yakrono ro hara. Noro takî tî cekn̂e Xuta yepamtho komo chei, Betew pona. Kporin komo yanme rma tî cekn̂e. Iina epatakache iito tî xakn̂e Xeroboaw kotoporem yakn̂itopo mîtwo. Kotoporem yakn̂irî poko rma tî xakn̂e.

2 Ero yimaw Xuta poi mohxapu takî tî nîmtapowakn̂e akn̂itopo yakro rma. Kporin komo yanme rma tî ero wa nîmtapowakn̂e. On wara tî kekn̂e, Ai, kotoporem yakn̂itopo, kotoporem yakn̂itopo amoro, awakro kîmtapowasî. On wara tî nîîke Kporin komo awya, pahxaro tak n̂ewruyasî Tapi pen yepamtho Xosias tî osotî. Awenîn̂e pen komo yocho tak nakn̂iyasî noro apona, oroto kotoporem nakn̂iyaxe apona n̂examro yocho rma ha. Apona men nakn̂iyasî tooto yochotho rma, kekn̂e tî.

3 On wara marha tî kekn̂e ero kaamo po rma, On wara kesî Kporin komo, omtapotarî ponaro xa awehtome so tak, kotoporem yakn̂itoponho tak men n̂ekararakesî. Wemronho tak n̂epahyasî iipononho, kesî, kekn̂e tî. Ero wa tî kekn̂e Xuta poi mohxapu, Kaan yakrono ro.

4 Yîmtapotarî tî n̂encekn̂e Xeroboaw, kayaritomo. Kotoporem yakn̂itopo yakro yîmtapotacho tî n̂encekn̂e. Ero ke napockanwakn̂e noro yekantome. On wara tî kekn̂e tmaywen komo ya, Noro ahsîcoko, kekn̂e tî. Ero yimaw rma tko tî ceipamyakn̂e thakwa okwe kayaritomo yapotho, Kaanî mtapotarî yekatîmn̂e n̂ekanîyakn̂e iike ero. Tupun porero cirihra thakwa tî xakn̂e okwe, tapockantaxi rma tî xakn̂e.

5 N̂ekararakekn̂e marha tî kotoporem yakn̂itoponho. Wemronho takî tî n̂epahyakn̂e iipononho Kaanî mtapotarî ponaro xa awehtome so, kachonho yaw roro rma tî xakn̂e. Ero wa tî kekn̂e Kaan yakrono ro Kporin komo yanme.

6 Ero yinhîrî on wara takî tî kekn̂e kayaritomo Kaan yakrono ro ya, Ai, oyakno, Aporin komo Kaan yakro cma re mîmtapowasî opoko. Moso yaporî cma re makir̂wames hara Apa, mîîkesî cma re yîwya, kekn̂e tî yîwya. Ero ke Kporin komo yakro takî tî nîmtapowakn̂e Kaanî mtapotarî yentan̂e ro noro yaporî poko. Ero ke kir̂wan̂he takî tî xakn̂e hara noro yaporî, pahxa xakn̂e ero wara rma tî xakn̂e.

7 Ero yinhîrî takî tî on wara kekn̂e kayaritomo Kaanî mtapotarî yentan̂e ro ya, Oyakno, amok ha omîn yaka eseresmaxi. Awemyawno marha wîmyasî, kekn̂e tî yîwya.

8 On wara tko tî kekn̂e Kaanî mtapotarî yentan̂e ro kayaritomo ya, Pîra, mokuhra wasî. Awemyawno raconho rma tîmyataw owya ahyaka mokuhra wasî. On ewto po eseresmara ro mak wasî, owokru meero erîhra wasî tuuna.

9 Ero poko rma kekn̂e Kporin komo owya. Eseresmara ro mak esko iito, tuuna marha erîhra esko. Amokyataw hara, awtotoponhîrî yawhra amoko hara esama yaw ha, kekn̂e owya, kekn̂e tî kayaritomo ya.

10 Ero ke anarî yaw takî tî cekn̂e hara Kaan yantan̂e ro Betew pona tmohtoponhîrî yawhra.

11 Taa, iito Betew po tî xakn̂e anarî hara weronomano rin̂e. Poritomo tî mîk xakn̂e. Ero yimaw takî tî mokyatken̂e yumumuru komo yîhyaka. Tîîm komo ya tî n̂ekatîmtîketken̂e Kaan yakrono ro yehtoponho Betew exitaw. Ero kaamo po rma tîmson yapon yîwîrîmachonho yîwya n̂ekatîmyatken̂e, kayaritomo yakro yîmtapotachonhîrî marha tî.

12 On wara tî kekn̂e yîîm yîwya so, Ahto xa tom hara? kekn̂e tî. Kaan yakrono ro totoponho tî n̂een̂atken̂e yumumuru komo, Xuta yepamtho komo chewno totoponho. Ero ke tî n̂ekatîmyatken̂e yîwya.

13 Ero ke on wara takî tî kekn̂e tumumuru komo ya, Oyeremacho akriko buhu mkahsî, kekn̂e tî. Ero ke tîîm yeremacho nakriyatken̂e buhu mkahsî. Ero ke yîmkaw takî tî cekn̂e yîîm.

14 Kaan yakrono ro wenari tî cekn̂e. Noro takî tî n̂een̂akn̂e kahpar̂u yepu yapomyaw. On wara tî kekn̂e yîwya, Kaan yakrono ro amoro Xuta yepamtho komo chewno mohxapu ha? kekn̂e tî. Nhnk, noro ow ha, kekn̂e tî yîwya.

15 On wara tî kekn̂e Betew pono, Amok hara omîn yaka eseresmaxi, kekn̂e tî yîwya.

16 Pîra, kekn̂e tî Kaanî mtapotarî yentan̂e ro tohra ro mak was amîn yaka. Eseresmara marha wasî, tuuna meero erîhra wasî tan, kekn̂e tî yîwya.

17 On wara kekn̂e Kporin komo owya, Iito awexitaw eseresmara ro mak esko, tuuna marha erîhra esko. Amokyataw hara anarî yaw mak amok hara awtotoponhîrî pîn yaw, kekn̂e owya, kekn̂e tî.

18 On wara tko tî kekn̂e Betew pono yîwya, Ai, oyakno, weronomano rin̂e ow ha awarai xa marha. Kporin komo mtapotarî n̂ekatmo ancu owya. On wara kekn̂e owya, Noro ehta Kaan yakrono ro. Amîn yaka ek ha eseresmachome, tuuna yeetome marha, kekn̂e owya, kekn̂e tî yîwya. Cemaronwakn̂e makî tko tî kica.

19 Ero ke Betew pono yakro takî tî n̂etîramekn̂e hara Kaanî mtapotarî yentan̂e ro. Yîhyaw takî tî n̂eseresmekn̂e, tuuna marha tî n̂eer̂akn̂e.

20 Ero yinhîrî takî tî on wara xakn̂e weronomano rin̂e, anarî yekn̂enho hara, Kporin komo mtapotarî takî tî n̂encekn̂e tîropotaw.

21 Ero ke on wara takî tî kekn̂e yîwya tîn̂ekîthîrî ya rma, Ai, oyakno, kicicme mex ham. Kporin komo mtapotarî yewetîra mex ham ke kica. Atwermai Kporin komo, Noro yewetîra tko meexi kica.

22 Metîrama hara kica. On po tak meseresma, tuuna marha meerî. Iito eseresmara ro mak men esko, tuuna marha erîhra esko iito, kekn̂e tî Kporin komo awya. Ero wa kacho yanwekrî ke awya awokoputhîrî yahrura ro mak naxe aporin pen komo yokoputho yawxaka, kekn̂e tî. Ero wa tî kekn̂e Betew pono mohxapu ya.

23 Ero yinhîrî ceseresmache tak, wooku yerîche marha pawana yoku mkahsî tî nakriyakn̂e eremacho. Ero wa tî pawana nakronomekn̂e ekn̂enhîrî hara.

24 Taa, noro cetaw takî tî reaw takî tî noro pen n̂epor̂akn̂e. Waihkekn̂e marha tî okwe. Ero ke okoputhîrî tî n̂epîrkekn̂e esama yaka rma. Iito rma tî n̂ecececekn̂e iyokuthîrî buhu okoputhîrî mîtwo rma. Iito marha tî n̂ecececekn̂e reaw okoputhîrî mîtwo.

25 Ero yinhîrî iito xa re takî tî cetken̂e kîrkomo. Kaan yakrono ro pen yokoputho tî n̂een̂atken̂e cepîrkaxi esama yaw. Reaw marha tî n̂een̂atken̂e okoputhîrî mîtwo. Ero ke Betew pona takî tî cetken̂e enîn̂enhîrî komo. Iitono komo ya tî n̂ekatîmyatken̂e okoputhîrî yentoponho tîwya so. Poritomotho yenmayipu komo ya tî n̂ekatîmyatken̂e waihkachonho, weronomano rin̂e yenmayipu komo ya ha.

26 Yîmtapotarî komo takî tî n̂encekn̂e weronomano rin̂e anarî pen yekn̂enho hara, mîk noro. Entache on wara tî kekn̂e, Kaan yakrono ro pen yokoputho mîn okwe. Kporin komo mtapotarî nanwekî. Ero ke reaw ya n̂eskapo ham okwe. Waihkapo ham okwe tîmtapotachonhîrî yaw roro rma, kekn̂e tî.

27 Ero ke on wara tî kekn̂e xa hara tumumuru komo ya, Ai, okopuci komo, buhu mkahsî akricoko xa hara oyeremacho, kekn̂e tî. Ero ke tî nakriyatken̂e.

28 Ero ke cekn̂e takî tî esama yaw. Iito takî tî n̂een̂akn̂e Kaan yarononho pen yokoputho. Ero mîtwo tî n̂een̂akn̂e buhu, reaw marha. Okoputhîrî tonohra ro makî tî xakn̂e reaw, buhu marha tî eskara xakn̂e.

29 Ero ke tooku mkahsî takî tî waihkaxapu pen yokoputho nanîmyakn̂e tooku mkahsî. Ewto pona tî n̂ekyakn̂e hara. Ewto pona ekîche nîwracekn̂e takî tî yîpînîn yaw. Ero yinhîrî okoputhîrî takî tî nahruyakn̂e.

30 Tokohrî yahrutopo yaka rma tî nahruyakn̂e. Ero yinhîrî nîwracetken̂e xa hara n̂examro yîpînîn yaw. Okwe, okwe, okwe, oyakno ciki okwe, ketken̂e tî n̂examro, okoputhîrî yahrun̂enho komo. Ero wa tî xatken̂e.

31 Ero yinhîrî takî tî Kaan yakrono ro pen yokoputho yahruche on wara tî kekn̂e noro tumumuru komo ya, Ai, okopuci komo, on wara wîîkes awya so, owaipuche oyokoputho tak ahrucoko ewtarî yaka, Kaan yakrono ro pen yokoputho nasî ero yaka. Oyocho cirko iyochîrî yawxari rma.

32 On wara wîîkes awya so, yîmtapotachonhîrî yaw roro rma men nas amn̂e. Kporin komo mtapotarî rma mîn n̂ekatîmye tîmsom yakn̂itopo yîwîrîmacho, Betew pono yîwîrîmacho ha. Mîîmoci mko yîwîrîmacho marha, îh pono mko, Samaria poko hakno mko yîwîrîmacho. Ero poko nîmtapotai poritomo pen. Yîmtapotachonhîrî yaw roro rma men nas amn̂e, kekn̂e tî. Ero wa tî kekn̂e Kaan yakrono ro pen yahrun̂enho ha.

33 Ero yinhîrî kicicme cehtoponhîrî tî ahsîpînkara rma xakn̂e Xeroboaw okwe. Mîk hakî rma tî n̂iir̂akn̂e tîmsom yakn̂in̂e me, îh po so akn̂in̂e me ha. Paaka xîkrî warai ya tîmsom yakn̂in̂e me oyexi xe kyam wasî, kan̂enho komo tî n̂iir̂akn̂e ero pokono ro me.

34 Ero poko exirî komo tî xakn̂e kicicme ehtopo komo me, Xeroboaw yanan komo yehtopo me okwe. Ero poko exirî komo rma tî xakn̂e waihkan̂e komo me, exihra ro mak tak ehtome so epamthîrî komo roowo po. Ero wa tî xakn̂e Xeroboaw okwe.