1-2 Ero yinhîrî okohme takî tî xakn̂e Abias ciki, Xeroboaw mumuru. Ero ke on wara tî kekn̂e Xeroboaw cipici ya, Ai, etoko Siro pona. Iito tî nai kweronoman̂e, Aias, oyehtopo yekatîmn̂enho mîk noro. Moxam kayaritomon me tak mas amn̂e, kan̂enho mîk owya. Yîhyaka awcetaw anarî kuknon yaw mak etoko, Xeroboaw pici mîkro, kahra ehtome so iitono komo apoko.

3 Iyuru arko 10, tîkporem ciki marha arko yaake, puruma aixapu ciki. Ween marha arko yîn̂emerî. Ero wa etoko yîhyaka. Noro tak n̂ekatîmyas awya kîmxîkrî yehtopo, kekn̂e tî yîwya.

4 Ero ke cekn̂e takî tî Xeroboaw pici Siro pona. Aias mîn yaka tî cekn̂e. Ewuhra thakwa tî xakn̂e Aias. Xîrpe takî tî xakn̂e ewthîrî okwe poritomotho me exirî ke.

5 Xeroboaw pici mokuhnaw rma tko tî ka noro mohtopo n̂ekatîmyakn̂e Kporin komo Aias ya. On wara tî kekn̂e yîwya, Ai Aias, Xeroboaw pici mokyasî oroto ahyaka. Okohme nasî yîmxîkrî. Ahce wa nai omxîkrî amn̂e, kaxi mokyasî ahyaka. Omtapotarî wekatîmyasî awya oroto ero rma ekatîmko yîwya. Amîn yaka cewomyataw anarî kuknon yaw makî tî n̂esenpe, kekn̂e tî yîwya.

6 Ero yinhîrî Xeroboaw pici mohtopo takî tî n̂encekn̂e Aias, metata yaro ewomtopo. Ero ke on wara tî kekn̂e yîwya, Ai, amoko amoro Xeroboaw pici. Ahce kacho anarî kuknon yaw mîmoko? Awahwokacho men nasî on̂ekatîmrî awya.

7 On wara kata aan̂o ya Xeroboaw ya, On wara tî nîîke Kporin komo, ponaro Ixaw Yana komo yehtopo, Mer̂pora naxe apoyino komo. Amoro makî tko kmen̂ekekn̂e. Oyanan komo kayaritomon me kiire, Ixaw Yana komo kayaritomon me ha.

8 Ixaw Yana komo kayaritomon me ka xatken̂e Tapi pen yepamtho komo. N̂examro tko wowye amaywen me tak ehtome so hara n̂examro maywenînho komo. Owya apanatanmetopo komo n̂ewehcakn̂e Tapi reha. Oyehtopo yaw roro xakn̂e tahwore ro mak. Takîhso ro mak noro ween̂akn̂e.

9 Amoro reha kicicme ro mak mehxe. Pahxan pen komo yopo ro mak mehxe kicicme xa tak. Ponaro awehtopo miire kuriparatho mak. Mîk hak warai mak miire orwonmetome kica. Ow tak mahsîpînkai ro mak kica, anana tak metaknamai okwe.

10 Ero ke Xeroboaw yanan komo wemetanmekyasî xa tak okwe. Noro yepamtho komo waihkesî ahnoro kîrkomo. Anto me cehsom pen komo waihkesî, tanme ro cetapickaxmu komo pen marha. Etîmtoxapu rma ciki war̂mesî exihra cehso ro, yukpurukpurun mar̂mexe ero wara n̂examro war̂mesî.

11 Ewto po so waihyataw so Xeroboaw yanan pen komo, xapari yotî me mak nasî okoputhîrî komo. Woskara po waihyataw so anarî kom hara kwacinama yotî me mak nasî n̂examro pen yokoputho hara, kesî. Ero wa men kesî Kporin komo apoko so.

12 Ero ke etok hara amîn yaka. Awewton potarî yapikyataw rma awya waihyasî takî amxîkîthîrî pen okwe.

13 Noro pen pînîn yaw ciki nîwracexe amn̂e Ixaw Yana komo. Okoputhîrî nahruyaxe. Noro pen mak nahruyaxe Xeroboaw yanan komo poyino. Ahrura naxe anarî pen komo. Ero wa noro pen nahruyaxe kir̂wan̂he exirî ke noro ropotarî, Aporin komo Kaan xatî me.

14 Anarî tak n̂iir̂as hara Kporin komo kayaritomo me. Noro tak Xeroboaw yanan pen komo waihkesî. Oroto rma ero wara n̂iir̂asî. Okyo, oroto rma ero wa ciino n̂iir̂asî.

15 On wara tak naxe Ixaw Yana komo amn̂e Kporin komo ya cetapache so, sîkîsîkî kesî wanturu tuuna kwawno, karitî yawno ero wara naxe. Ixaw Yana komo mohkan̂e wara tak nasî, naatî tîtmokesî ero wa. Ero wara tantono pen komo n̂iir̂asî Kporin komo. Kir̂wan on roowo aporin pen komo ya Kporin komo nîmîtho. On poi rma tko mohkesî Noro. Miya ro mak tak n̂examro pen nakpayasî Ewpratesî Yepu mehxa. Ero wa Ixaw Yana komo n̂iir̂asî weewe yenporirî ke ponaro cehtopo komo. Ero yipu n̂enpor̂atken̂e Kporin komo yîronmetome xa. Ero ke ero wa nakpayasî.

16 Ixaw Yana komo tak nahsîpînkesî kicicme Xeroboaw yehtoponho poyero. Kicicitho poko nasî noro. Ixaw Yana komo marha panatanmekyakn̂e kicicitho poko hara okwe, kekn̂e tî. Ero wa tî kekn̂e Aias Xeroboaw pici ya.

17 Ero yinhîrî Xeroboaw pici takî tî cekn̂e hara Cihsa pona. Tîmîn potarî yapikyataw rma, tow, waihyakn̂e takî tî yîmxîkîthîrî pen okwe.

18 Ero yinhîrî noro yokoputho takî tî nahruyatken̂e. Nîwracetken̂e marha tî Ixaw Yana komo noro pînîn yaw. Ero wa tî xatken̂e noro poko ciki Kporin komo mtapotachonho yaw roro rma. Tanton ya n̂entamexpekn̂e, Aias ya, ero wa kachonho yaw roro rma tî xatken̂e Ixaw Yana komo rikomo poko.

19 Taa, miya rma nai Xeroboaw yehtoponho, sowtatu me etar̂machonhîrî, kayaritomo me ehtoponhîrî marha. Karita yaw tmewreso nai, Ixaw Yana Kayaritomon Komo Yehtoponho, kacho yaw.

20 22 cimn̂ipu tî xakn̂e Xeroboaw kayaritomo me. Ero yinhîrî nîwînîkyakn̂e takî tî tporin pen komo yakro. Ero yinhîrî takî tî Natabe xakn̂e kayaritomo me hara tîîmînhîrî pen retawno me.

21 Taa, Hoboaw reha tî xakn̂e Xuta yepamtho komo kayaritomon me. Saromaw pen mumutho mîk xakn̂e Hoboaw. 41 cimn̂ipu tî xakn̂e ewrutoponhîrî kayaritomo me ecir̂ataw. 17 cimn̂ipu tî xakn̂e kayaritomo me. Xerusaren tî xakn̂e ewton me. Kporin komo nmen̂ekatho mîn Xerusaren tosotî yeken me. Yaake xatken̂e Ixaw Yana tribun komo yewtonî mko. Anarî tko men̂ekara xakn̂e tosotî yeken me, Xerusaren mak men̂ekekn̂e. Taa, Naama tî xakn̂e Hoboaw nocwan yosotî, Amonita wosîn tî mîk xakn̂e.

22 Ero yimaw takî tî kicicme Xuta yepamtho komo n̂een̂akn̂e Kporin komo. Noro tî nîrwonmekyatken̂e ewyoman̂e komo me cehso ro. Kicicime xa tak tî xatken̂e okwe. Kicicme rma re xatken̂e porin pen komo. Kicicme xa takî tî xatken̂e okwe epamthîrî kom hara.

23 Mîk hak tak nîhtînoyatken̂e ponaro cehtopo komo me. Noro yipu komo poko tahwotacho komo tî n̂iir̂atken̂e îh po so. Toopu tî n̂iir̂atken̂e piiri so îh pona so poko tahwotacho komo me kica. Weewe marha tî wakîknoyatken̂e mîk hak warai me. Îh po so n̂iir̂atken̂e poko tahwotacho komo, weewe yapomyaw so marha, porin yapomyaw so. Kir̂wan̂he taakem me exitaw weewe iina so n̂iir̂atken̂e kica.

24 Cipici pîn pokono me marha tî xatken̂e ero yipu pooko tahwowataw so kica. Kicicme ro mak xatken̂e Kanan pononho pen komo wara rma. N̂examro penî tî waihkapekn̂e Ixaw Yana komo ya. Tînwaikathîrî komo wara rma tko tî xatken̂e Ixaw Yana kom hara kica.

25 Ero yinhîrî takî tî 5 cimn̂ipu exiche tak kayaritomo me Hoboaw yehtoponho, Sisake tî mokyakn̂e Exitu pono komo kayaritomon. Xerusaren pono komo yar̂man̂e me tî mokyakn̂e.

26 Cepethîkemu mko tî n̂aatîkekn̂e okwe Kporin komo mîn yawnonho, kayaritomo mîn yawnonho marha. Naatîkekn̂e ro mak okwe. Kecen̂anî mko meero tî naatîkekn̂e ooru ciixapu, Saromaw n̂irpotho ha.

27 Ero yinhîrî takî tî kecen̂an xa hara tî nakîhtopekn̂e Hoboaw aaxapunhîrî yemtakan hara. Bronse makî tko nakîhtopekn̂e ero yipu me. Akîhtoche sowtatu yantoman̂e komo takî tî n̂iir̂akn̂e ewyoman̂e me, kayaritomo mîn potarî yenîn̂e kom ha.

28 Kayaritomo cetaw Kporin komo mîn yaka, kecen̂anî mko tî naar̂atken̂e sowtatu komo. Noro mokuche hara kecen̂anî mko tî n̂ekyatken̂e hara tamtakpon komo yaka hara, sowtatu mîn yaka.

29 Miya rma nai Hoboaw yehtoponho. Ahnoro rma tî nai tmewreso karita yaw, Xuta Yepamtho Komo Kayaritomon Komo Yehtoponho, kacho yaw.

30 N̂etar̂mekn̂e roro tî noro Xeroboaw yakro. Pahkî ti n̂etar̂metken̂e Hoboaw waihtopo pona roro.

31 Tporin pen komo yakro tî nîwînîkyakn̂e Hoboaw pen. Noro porin pen komo yawxaka rma tî okoputhîrî nahruyatken̂e Tapi pen Yewtontho pona. Naama tî xakn̂e yînocwan pen yosotî, Amonita wosîn. Ero yinhîrî Abias takî tî xakn̂e kayaritomo me hara Hoboaw pen retawno me hara. Hoboaw pen mumutho tî mîk xakn̂e Abias. Ero wa tî xakn̂e.