Taa, Xuta yepamtho komo kayaritomon yehtopo wekatîmyas hara. Kayaritomo me rma ka xakn̂e Xeroboaw Nebace Ixaw Yana komo kayaritomon me. 18 cimn̂ipu xakn̂e kayaritomo me noro yehtoponho, ero yimaw takî tî Abias tak xakn̂e Xuta yepamtho komo kayaritomon me hara.

2 Osorwaw cimn̂ipu makî tî xakn̂e kayaritomo me Xerusaren po. Maaka tî xakn̂e yînocwan, Absaraw parî ha.

3 Kicicme tî xakn̂e Abias okwe, tîîm pen yehtoponho yaw roro rma. Tporin komo Kaan ponarora xakn̂e. Tporin pen warahra tî xakn̂e, Tapi pen warahra.

4 Tapi pen ponaro rma tko tî xakn̂e Kporin komo. Ero ke noro pen weyuru wara tî n̂iir̂akn̂e epamthîrî kayaritomo me. Ewto marha tî nukurunpekn̂e Xerusaren ha.

5 Ero wa tî ciino n̂iir̂akn̂e Kporin komo Tapi yanme kir̂wan̂he noro yenîrî ke roro. Twaihtopo pona roro Kporin komo ya tpanatanmetopo ponaro xakn̂e noro, etowra ro mak xakn̂e. Urias pen poko mak kicicme tî xakn̂e, Etew pen mîk noro poko. Ero wa tî xakn̂e Tapi pen.

6 On wara roro tî xatken̂e Hoboaw komo, Xeroboaw komo, n̂etar̂metken̂e roro etpoko. Twaihtopo komo pona roro tî n̂etar̂metken̂e okwe.

7 Taa, miya rma nai Abias yehtoponho. Ahnoro rma tko nasî tmewreso karita yaw, Xuta Yepamtho Kayaritomon Komo Yehtoponho, kacho yaw. Noro marha tî n̂etar̂mekn̂e Xeroboaw yakro. Twaihtopo komo pona roro marha tî n̂etar̂metken̂e n̂examro okwe.

8 Ero yinhîrî takî tî nîwînîkyakn̂e Abias pen tporin pen komo yakro. Tapi pen Yewtontho pona tî nahruyatken̂e noro yokoputho. Ero yinhîrî takî tî yumumuthîrî takî tî xakn̂e kayaritomo me hara. Asa tî xakn̂e noro yosotî. Ero wa tî xakn̂e.

9 Ero yimaw 20 cimn̂ipu takî tî xakn̂e kayaritomo me Xeroboaw yehtoponho, Ixaw Yana komo kayaritomon me ehtoponhîrî ha. Ero yimaw takî tî Xuta yepamtho komo kayaritomon me tak xakn̂e Asa hara.

10 Pahkî n̂he tî xakn̂e kayaritomo me Xerusaren po, 41 cimn̂ipu. Maaka tî xakn̂e yînoci yosotî, Absaraw parî ha.

11 Kir̂wan̂he takî tî Asa n̂een̂akn̂e Kporin komo. Tporin pen wara rma tî n̂een̂akn̂e, Tapi pen wara.

12 Kicicitho komo takî tî n̂en̂epekn̂e Kanan poi, kîîrî re rma kicicme cehsom kom ha. Mîk hak warai me ciixaputho marha tî nar̂mekn̂e ahnoro tporin pen komo n̂iritho.

13 Maaka marha tî nowyakn̂e. Kayaritomo yon mîkî, kacho pîn me takî tî n̂iir̂akn̂e. Yînoci rma tî mîk xakn̂e Maaka. Ero wa tî nowyakn̂e kicicme exirî ke. Onoke kuknon tî n̂irpekn̂e kica ponaro cehtopo me. Ero ke nowyakn̂e. Yîn̂irpothîrî kr̂a takî tî namekn̂e, nakn̂iyakn̂e marha tî Ketîron yecihtaw.

14 Îh pono komo tko ar̂mara tî xakn̂e Asa, ponaro ehtopo komo ya tîmsom yakn̂itopo mko. Wara rma Kporin komo xe roro tî xakn̂e noro twaihtopo pona roro.

15 Ero yimaw mer̂pora tî xakn̂e Kaan ya tîmxapu mko Kaan mîn yawhra, anarî yaw mak. Asa yîîm pen nîmîtho mîn xakn̂e, Asa nîmîtho marha. Prata ciixapu mko tî mîn xakn̂e, ooru ciixapu marha tî. Ero mko takî tî n̂ermonoyakn̂e Asa Kporin komo mîn yaka. Ero wa tî n̂ermonoyakn̂e.

16 On wara marha tî xakn̂e Asa, Baasa yakro tî n̂etar̂mekn̂e roro twaihtopo pona roro. Ixaw Yana komo kayaritomon tî mîk xakn̂e Baasa.

17 Ero yimaw Xuta yepamtho komo yemetanmeso takî tî mokyakn̂e Baasa. Hama tî n̂iir̂akn̂e ewto, wahkotono ritopo. Asa yaka tîtosom komo wahkoto xe tî xakn̂e, Asa yai tmohsom komo marha tî wahkoto xe xakn̂e.

18 Ero ke on wara takî tî xakn̂e Asa, Cepethîkemu mko tî nahsîyakn̂e Kporin komo mîn yawno mko, kayaritomo mîn yawno mko marha. Prata ciixapu mko mîn nahsîyakn̂e, ooru ciixapu mko marha. Ero takî tî narpekn̂e tmaywen komo ya Ben Atace yaka, Siriu komo kayaritomon yaka. Tabrimon mumuru tî mîk xakn̂e Ben Atace. Esion mumuru tî mîk xakn̂e Tabrimon. Tamasku pono tî mîk xakn̂e Ben Atace. Noro yipu yaka tî cepethîkemu mko narpekn̂e Asa.

19 On wara kacho marha tî n̂entamexpekn̂e yîwya, Pahxa tî apapa pen nîmtapowakn̂e aamo pen yakro cetkurunpetopo komo poko. Ero ke ero wa xa marha tak tîmtapotacerî kîwyam hara. On men prata ciixapu mko, ooru ciixapu mko marha awya tîmsom. Ero ke Baasa yakro amtapotachonhîrî cma re tak mowyasî, Cetkurunpecerî, kachonho. Ero wa cma re masî Baasa totohme tak ohyai, kacho tî n̂entamexpekn̂e yîwya.

20 Ero ke Asa mtapotarî takî tî n̂ewehcakn̂e Ben Atace. Tîsowtatun yantoman̂e komo tî n̂en̂epekn̂e Ixaw Yana komo yewton pono komo yar̂man̂e me. Ixon pono pen komo tî nar̂metken̂e, Taan pono pen komo marha, Abew Bece Maaka pono pen komo marha, Kinerece pono pen komo marha. Ahnoro Nahtari rowon pono komo meero tî nar̂metken̂e. Ero warai komo yar̂man̂e me tî tîsowtatun komo n̂en̂epekn̂e Ben Atace.

21 Taa, Waapa, kacho yentache tak Baasa ya nîtîhkekn̂e takî tî, Hama ciitîkara rma, wahkototopo kom ha. Cihsa pona takî tî n̂etîramekn̂e hara.

22 Ero yinhîrî Xuta komo takî tî n̂ekaimapekn̂e Asa kîrkomo ahnoro. N̂examro takî tî n̂ixketken̂e Baasa n̂iritho, Haama pono mîîmo mko. Toopu tî n̂ixketken̂e, weewe marha tî, ahnoro tî n̂ixketîketken̂e. Ero mko ke takî tî Xeba pono n̂iir̂akn̂e hara mîîmo mko. Benxamin yepamtho komo chewno mîn Xeba. Mispa pono mko marha tî n̂iir̂akn̂e. Ero warai tî mîîmo nîir̂akn̂e Asa ewto pona so.

23 Taa, miya rma tî nai Asa yehtoponho, ahce wa na ehtoponhîrî, ahce na poko ehtoponhîrî, ewto mko ciitoponho marha yîwya. Ahnoro nasî tmewreso karita yaw, Xuta Yepamtho Kayaritomon Komo Yehtoponho, kacho yaw. Ero yinhîrî poritomo me cexiche takî tî ceper̂ai xakn̂e Asa tarî oko.

24 Ero yinhîrî takî tî nîwînîkyakn̂e hara Asa pen tporin pen komo yakro. Tporin pen komo yawxari takî tî okoputhîrî nahruyatken̂e Tapi pen Yewtontho po ha. Ero yinhîrî Xeosapa takî tî xakn̂e kayaritomo me hara, yumumuthîrî ha. Ero wa tî xakn̂e.

25 Taa, pahxa n̂he ka, 2 cimn̂ipu makî ka exitaw Xuta yepamtho komo kayaritomon me Asa yehtoponho, ero yimaw takî tî Natabe tak xakn̂e Ixaw Yana komo kayaritomon me hara. 2 cimn̂ipu makî tko tî xakn̂e kayaritomo me.

26 Kicicme tko tî noro n̂een̂akn̂e Kporin komo. Tîîm pen yehtoponho yaw roro rma tî xakn̂e noro hara okwe. Kicicitho poko tî Ixaw Yana komo panatanmekyakn̂e yîîm pen ero wa xa marha tî n̂examro panatanmekyakn̂e yumumuthîrî xa hara okwe.

27 Ero yinhîrî takî tî takrono komo yakro n̂esencekn̂e Baasa Natabe waihkacho poko. Aias mumuru tî mîk xakn̂e Baasa, Isaka yepamtho mumuru ha. Ero yimaw Natabe xakn̂e Ixaw Yana komo yakro Xibeton pono komo yar̂macho poko. Piristew komo yewton mîn xakn̂e Xibeton. Ero yimaw Xibeton pona tî cekn̂e Baasa, Natabe pen tî waihkekn̂e iito rma.

28 Ero yimaw osorwaw cimn̂ipu tî xakn̂e kayaritomo me Asa yehtoponho ero po tî Natabe pen waihkekn̂e. Ero yinhîrî kayaritomo me takî tî xakn̂e Baasa hara Natabe yemtaka hara.

29 Kayaritomo me cexiche takî tî noro waihkekn̂e Xeroboaw yanan pen komo. Cesesîsom yîmtora ro makî tî xakn̂e waihkara. Ahnoro tî waihkekn̂e iyanan pen komo Kporin komo mtapotachonho yaw roro rma. Aias mtari tî kekn̂e Kporin komo, Siro pono mtari, ero wa kachonho yaw roro rma tî waihkano n̂iir̂akn̂e Baasa.

30 Ero wa tî Xeroboaw pen yananînho tî waihkapekn̂e Kporin komo kicicme exirî komo yanme. Kicicitho poko Ixaw Yana komo panatanmekyakn̂e Xeroboaw. Ero wa tî Kporin komo nîrwonmekyakn̂e, ponaro Ixaw Yana komo yehtopo ha.

31 Miya rma nasî Natabe yehtoponho. Ahnoro rma tko nasî tmewreso karita yaw, Ixaw Yana Kayaritomon Komo Yehtoponho, kacho yaw.

32 Asa yakro tî n̂etar̂mekn̂e Baasa okwe. Pahkî tî n̂etar̂metken̂e waihtopo komo pona roro. Ero wa tî xatken̂e okwe.

33 Taa, osorwaw cimn̂ipu xakn̂e kayaritomo me Asa yehtoponho ero yimaw takî tî Ixaw Yana komo kayaritomon me takî tî xakn̂e Baasa. Cihsa xakn̂e noro yewton. 24 cimn̂ipu tî xakn̂e kayaritomo me.

34 Kicicme tko tî noro n̂een̂akn̂e hara Kporin komo. Xeroboaw yehtoponho yaw roro rma tî xakn̂e noro hara okwe. On wara tî xakn̂e Xoroboaw, Ixaw Yana komo panatanmekyakn̂e kicicitho poko, ero wa xa marha tî xakn̂e Baasa hara okwe. Ero wa tî xakn̂e.