Ero yinhîrî takî tî tîmtapotarî n̂ekatîmyakn̂e Kporin komo Xeu ya, Anani mumuru ya, Baasa waihkacho pokono tî n̂entamexpekn̂e yîwya.

2 Ero ke Baasa ya takî tî n̂ekatîmyakn̂e Xeu. On wara tî kekn̂e yîwya, Ai, Baasa, on wara nîîke Kporin komo awya, Pahxa noro pîntho me ro mak mîxakn̂e. Noro yipunhîrî rma oyanan komo kayaritomon me tak kiire, Ixaw Yana komo kayaritomon me. Wara rma Xeroboaw pen yehtoponho yaw roro rma mas amoro hara okwe. Oyanan komo mîpanatanmekyasî kicicitho poko kica. Orwonmekyaxe kica n̂examro kicicme cexirî ke so. Awanme makî tko ero wara naxe okwe.

3 Ero ke Owî rma tak awepamthîrî pen komo waihkes ahnoro. Exihra ro mak tak naxe awepamthîrî komo okwe. Xeroboaw N̂ebace yepamtho pen komo wara rma n̂examro wiir̂as hara.

4 Awepamthîrî komo waihyataw ewto po xapari yotî me makî nasî yupunthîrî komo. Woskara po waihyataw so kwacinama yotî me nas hara yupunthîrî komo, nîîke Kporin komo aywa, kekn̂e yîwya. Ero wa kacho tî n̂ekatîmyakn̂e Xeu Baasa ya Kporin komo mtapotarî rma.

5 Taa, miya rma nasî Baasa yehtoponho, ahce na poko ehtoponhîrî kar̂pe ehtoponhîrî marha. Ahnoro rma noro yehtoponho nasî tmewreso karita yaw, Ixaw Yana Kayaritomon Komo Yehtoponho, kacho yaw.

6 Ero yinhîrî takî tî nîwînîkyakn̂e Baasa tporin pen komo yakro. Okoputhîrî tî nahruyatken̂e Cihsa pona. Ero yinhîrî Era takî tî xakn̂e kayaritomo me hara tîîmînhîrî pen retawno me.

7 Ero yimaw tîmtapotarî takî tî n̂ekatîmyakn̂e Kporin komo Xeu ya. Kweronoman̂e tî mîk xakn̂e Xeu, Anani mumuru ha. Baasa waihkacho pokono tî mîn n̂entamexpekn̂e yîwya, epamrî komo waihkacho pokono marha. Kicicitho pokono me ro makî tî Baasa n̂een̂akn̂e Kporin komo. Tîn̂irithîrî ke rma Noro nîrwonmekyakn̂e. Xeroboaw pen yepamtho komo wara xa marha tî xakn̂e kica. Xeroboaw komo pen tî waihkekn̂e marha tî. Ero poyero tî Baasa yepamtho komo waihkacho pokono n̂ekatîmyakn̂e Kporin komo Xeu ya. Ero wa tî n̂ekatîmyakn̂e.

8 Taa, ero yimaw Ixaw Yana komo kayaritomon me tî xakn̂e Era, Baasa pen mumutho ha. 26 cimn̂ipu tî xakn̂e Asa Xuta komo kayaritomon me ehtoponhîrî ero po takî tî Era xakn̂e Ixaw Yana komo kayaritomon me hara. 2 cimn̂ipu makî tî xakn̂e kayaritomo me. Cihsa tî xakn̂e noro yewton.

9 Ero yinhîrî takî tî Era xakn̂e tîmîn yenîn̂e mîn yaw Cihsa po. Ahsa tî yîmîn yenîn̂e yosotî. Kawaxiyem tî n̂eer̂akn̂e Era iito, twenîmso ro tî n̂eer̂akn̂e kica. Ero yimaw kayaritomo waihkacho poko takî tî nîhtînoyakn̂e Sinhi. Era tararan yenîn̂e tî mîk xakn̂e Sinhi, yîraconhîrî yenîn̂e makî tî.

10 Ero yimaw Ahsa mîn yaka takî tî n̂ewomyakn̂e Sin̂hi. Era pen tî waihkekn̂e. 27 cimn̂ipu tî xakn̂e Asa yehtoponho, Xuta komo kayaritomon me ehtoponhîrî ero yimaw tî Era pen waihkekn̂e. Waihkache kayaritomo me takî tî xakn̂e Sinhi Era pen retawno me hara.

11 Ero yinhîrî on wara tî xakn̂e Sinhi kayaritomo me cexiche rma, kayaritomo yapon pona ceremache rma, Baasa pen yepamtho komo tî waihkekn̂e ahnoro. Kîrkomo pen tî yîmtora ro mak xakn̂e, cewn̂e n̂hema yîmtora. Poyinonhîrî pen komo meero tî waihkekn̂e, akronononhîrî pen komo marha tî.

12 Ero wa tî Baasa pen poyinonho pen komo nîhcamnoyakn̂e Sinhi Kporin komo mtapotachonho yaw roro rma. Baasa pen komo waihkacho poko tî n̂ekatîmyakn̂e Xeu ya, ero yaw roro rma tî n̂iir̂akn̂e Sinhi.

13 Kicicme roro tî xakn̂e Baasa pen kica, yumumuthîrî pen marha tî kica, Era pen ha. Ixaw Yana komo tî panatanmekyakn̂e n̂examro kicicitho poko kica. Ero wa tî Kporin komo nîrwonmekyatken̂e ro mak, enporixaputho ponaro cexirî ke so, tîn̂enporithîrî komo ponaro cexirî ke so ha.

14 Miya rma tî nai Era pen yehtoponho. Ahnoro rma nasî tmewreso karita yaw, Ixaw Yana Kayaritomon Komo Yehtoponho, kacho yaw. Ero wa tî xakn̂e Era pen.

15 Taa, ero yimaw 27 cimn̂ipu takî tî xakn̂e Asa yehtoponho, Xuta komo kayaritomon me ehtoponhîrî, ero yimaw takî tî Sinhi xakn̂e kayaritomo me. 7 kaamo makî tî xakn̂e kayaritomo me Cihsa po. Ero yimaw Ixaw Yana sowtatun komo tî xatken̂e Xibeton mîtwo iitono komo yar̂machome ha. Piristew komo yewton tî mîn xakn̂e Xibeton.

16 Ero yimaw n̂examro takî tî n̂encetken̂e Sinhi yekaci. Kayaritomo pen waihkacho poko tî nîhtînoyakn̂e Sinhi, noro pen marha tî waihkai, kacho tî n̂encetken̂e. Ero ke Onhi takî tî n̂iir̂atken̂e Ixaw Yana komo tîkayaritomon komo me hara. Sowtatu komo yantoman̂e tî mîk xakn̂e Onhi. Iito rma eeta po rma cexitaw so tî kayaritomo me n̂iir̂atken̂e.

17 Ero yinhîrî takî tî Onhi cekn̂e Cihsa pona hara. Ixaw Yana sowtatun komo marha tî cetken̂e noro yakro. Cihsa tî wamcetken̂e Sinhi pen yar̂machome ha.

18 Ero yinhîrî takî tî ewto wacan yaka n̂ewomyatken̂e Onhi sowtatun komo. Ewto pona ewomrî komo yenîche Sinhi ya kayaritomo mîn yaka takî tî n̂ewomyakn̂e. Mîîmo takî tî nakn̂iyakn̂e tîîpo rma okwe. Ero wa tî n̂etwaikekn̂e rma Sinhi pen.

19 Ero wa tî waihyakn̂e Sinhi pen kicicme enîrî ke Kporin komo ya. Xeroboaw pen yehtoponho yaw roro rma tî xakn̂e. Ixaw Yana komo marha tî n̂irpekn̂e kicicitho poko noro pen wara rma. Ero wa cexirî ke tî waihyakn̂e.

20 Miya rma nai Sinhi pen yehtoponho, kayaritomo pen waihkachonho marha yîwya. Ahnoro rma tko nasî tmewreso karita yaw, Ixaw Yana Kayaritomon Komo Yehtoponho, kacho yaw. Ero wa tî xakn̂e Sinhi pen.

21 Ero yinhîrî takî tî tîracoi xatken̂e Ixaw Yana komo. Yîraconhîrî tî xatken̂e Cibni ponarono me, Xinace mumuru ponarono me ha. Kayaritomo me tî noro ciri xe xatken̂e. Yîraconhîrî tî xatken̂e Onhi ponarono me hara.

22 Ero ke takî tî n̂etar̂metken̂e n̂examro hara okwe. Etar̂metaw so kar̂pe tî xatken̂e Onhi sowtatun komo, Cibni sowtatun komo yopo. Ero ke waihyakn̂e takî tî Cibni pen. Kayaritomo me takî tî xakn̂e Onhi.

23 Taa, 31 cimn̂ipu takî tî xakn̂e Asa yehtoponho, Xuta komo kayaritomon me ehtoponhîrî. Ero yimaw takî tî Ixaw Yana komo kayaritomon me tak xakn̂e Onhi. 12 cimn̂ipu tî xakn̂e kayaritomo me. 6 cimn̂ipu tî xakn̂e Cihsa pono me ha ka.

24 Ero yinhîrî takî tî Samaria nahsîyakn̂e Onhi, îîpî. Epethîrî pona tî nahsîyakn̂e. Seme rowontho tî mîn nahsîyakn̂e. Prata tî nîmyakn̂e yîwya ero yepetho, 2 tarentu wicakî. Ahsîche iina takî tî cewton n̂iir̂akn̂e. Samaria me takî tî ewto nosohcekn̂e osomunhîrî yosotî ke rma.

25 Kicicme xa tko tî Onhi n̂een̂akn̂e Kporin komo. Pahxan pen komo yopo tî xakn̂e kicicme xa tak, kayaritomo pen komo yopo.

26 Xeroboaw N̂ebace pen wara rma tî xakn̂e okwe. Noro pen wara xa marha tî Ixaw Yana komo panatanmekyakn̂e kicicitho poko kica. Ero poko tî Kporin komo nîrwonmekyakn̂e, ponaro Ixaw Yana komo yehtopo. Tîn̂enporethîrî komo ponaro exirî ke so tî nîrwonakn̂e.

27 Taa, miya rma nai Onhi yehtoponho, ahce na poko ehtoponhîrî, kar̂pe ehtoponhîrî marha. Ahnoro noro yehtoponho rma nasî tmewreso karita yaw, Ixaw Yana Kayaritomon Komo Yehtoponho, kacho yaw.

28 Ero yinhîrî takî tî nîwînîkyakn̂e Onhi hara tporin pen komo yakro. Okoputhîrî tî nahruyatken̂e Samaria pona. Ero yinhîrî Akabe takî tî xakn̂e kayaritomo me Onhi pen retawno me hara. Noro pen mumutho tî mîk xakn̂e Akabe.

29 38 cimn̂ipu takî tî xakn̂e Asa yehtoponho, Xuta komo kayaritomon me ehtoponhîrî. Ero yimaw takî tî Ixaw Yana komo kayaritomon me tak xakn̂e Akabe, Onhi pen mumutho ha. Pahkî n̂he tî xakn̂e kayaritomo me, 22 cimn̂ipu. Samaria tî xakn̂e noro yewton.

30 On wara tko tî xakn̂e Akabe, Onhi pen mumutho, kicicme ro makî tî xakn̂e pahxan pen komo yopo ro mak, kayaritomo komo yopo.

31 Xeroboaw N̂ebace pen yehtoponho yaw roro rma tî xakn̂e okwe. Erasîra tî xakn̂e Kaan pona Xeroboaw yehtoponho poko cexitaw. On wara meero tî xakn̂e, Siton pono komo kayaritomon yemsîrî takî tî nahsîyakn̂e cipici me. Ecbaaw tî mîk xakn̂e kayaritomo yosotî. Xesabew tî xakn̂e noro yemsîrî yosotî. Noro yahsîche cipici me Baaw ya tîmsom takî tî nakn̂iyakn̂e Akabe. Oporinî ro amoro, kekn̂e marha tî Baaw ya kica.

32 Baaw mîn marha tî n̂irpekn̂e Samaria pona. Baaw ya tîmsom yakn̂itopo tî nakîhtopekn̂e ero yaw mîîmo yaw.

33 Axera kuknon marha tî n̂enpor̂pekn̂e Akabe kica. Kporin komo tî nîrwonmekyakn̂e pahxan pen komo yopo ro mak, kayaritomo pen komo yopo. Ponaro Ixaw Yana komo yehtopo rma Mîk nîrwonmekyakn̂e okwe.

34 Ero yimaw, kayaritomo me exitaw Akabe iito tî xakn̂e Betew pono, Iew tî osotî. Noro takî tî Xer̂ko n̂ewtomekn̂e hara. Ero wacan yapon ciir̂ataw yumumuthîrî pen tî waihyakn̂e okwe, potuthîrî pen, Abiraw tî osotî. Waaca metatan yakriyataw hara mahtîkîthîrî pen takî tî waihyakn̂e hara yumumuthîrî pen, Sekube tî osotî. Ero wa tî xatken̂e yumumuthîrî pen komo okwe Kporin komo mtapotarî yaw roro rma. Xoswe penî mtari kekn̂e ero wa kachonho yaw roro tî xatken̂e. Ero wa tî xatken̂e.