Taa, ero yimaw mehxa tî mokyakn̂e Xireace pono. Erias tî xakn̂e noro yosotî. Cisbi tî xakn̂e noro yewton. Noro takî tî nîmtapowakn̂e Akabe yakro. On wara tî kekn̂e yîwya, Apa, on wara wîîkes awya, yaaro men tan wîîkes awya, waipîn me nasî Kporin komo, ponaro Ixaw Yana komo yehtopo, ewetîn̂e me roro oyehtopo Mîk noro nasî waipîn me, ero wa kacho wara rma nas on omtapotarî yaaro xa. Tuuna tak men mokuhra nasî yaake cimn̂ipu. Cicakî meero exihra nasî. Omtapotache mak tak mokyas hara tuuna amn̂e, kekn̂e tî yîwya.

2-3 Ero yinhîrî takî tî on wara kekn̂e Kporin komo Erias ya, Miya tak etoko resce yaw roro. Aporî yecihtaka eseyamta. Meye nasî Kerice Yewku, Xotaw yaporî, ero yecihtaka eseyamta.

4 Iito awexitaw aporî nasî awokru me. Kohpu komo marha wantomai anahmacho poko hara, kekn̂e tî yîwya.

5 Ero ke cekn̂e takî tî Erias Kporin komo mtapotarî yanme. Kerice Yewku yecihtaw tî n̂enmayakn̂e, Xotaw yaporî yecihtaw ha.

6 Enmapuche roro Erias yuru tî n̂ekyakn̂e kohpu, iyotî marha. Ero wa xa marha tî n̂ekyakn̂e yîhyaka kokon̂i hara. Aporî rma tî twokru n̂eer̂akn̂e tuuna.

7 Pahkî exiche takî tî n̂ewturpamyakn̂e takî tî aporî tuuna mokuhtorî ke okwe.

8-9 Ero ke on wara takî tî kekn̂e Kporin komo yîwya, Ai Erias, etoko tak miya hara Sarepta pona, Siton mîtwono pona. Iito tak esko. Iito nasî wooxam iin̂o waixapu, enko xe amn̂e. Noro wantomai anahmacho poko hara, kekn̂e tî yîwya.

10 Ero ke cekn̂e takî tî Erias Sarepta pona. Ewto potaw cexitaw iito tî n̂een̂akn̂e wooxam iin̂o waixapu. Twehtorî tî namekyakn̂e. On wara tî kekn̂e Erias yîwya, Ai, aaci, owokru xe cma re wasî tuuna, wahra mak kuupu yaw, kekn̂e tî yîwya.

11 Tuuna ka cetaw wooxam on wara marha tî kekn̂e hara Erias yîwya, Oyuru marha cma re mekyasî awemyaw amokyataw, kekn̂e tî.

12 On wara tko tî wooxam n̂eyukyakn̂e, Waipîn me nasî Aporin komo Kaan, kacho wara rma nas omtapotarî yaaro xa, oyuru exihra nasî. Nai rma puruma akihxapu wahra mak okwe, kamorî yawno wicakî cik mak. Katî marha nasî wahra mak patiri yaw. Owehtorî tan wamekyasî asakî mak ero yaitome oyuru me, omrerî yuru me marha. Ero yohtîkache amna tak waihyas okwe, kekn̂e tî.

13 On wara tko tî kekn̂e Erias yîwya, Erasîra esko aaci. Mîîka owya ero wara rma kasko. Ero poi cokorî ka oyuru aiko. Ero eeko ohyaka. Ero yinhîrî awru tak aiko hara amrerî yuru marha.

14 On wara nîîke Kporin komo awya, ponaro Ixaw Yana komo yehtopo, enatîra nasî puruma, katî marha enatîra nasî patiri yawno. Amn̂e mak tuuna yekpetaw tak Kporin komo ya mararî yatîkrecho ero yimaw makî tî n̂enahca puruma, katî marha, kekn̂e tî yîwya.

15 Ero ke tîmîn yaka tî cekn̂e iin̂o waixapu. Erias mtapotarî yaw roro rma tî n̂iir̂akn̂e. Ero yinhîrî pahkî ro makî tî n̂eseresmetken̂e ero poko, Erias, wooxam, yîhyawno komo ahnoro tî n̂eseresmetken̂e iito.

16 Enatîra tî xakn̂e puruma, katî marha tî enatîra xakn̂e. Ero wa tî xakn̂e Kporin komo mtapotarî yaw roro rma, Erias mtari kekn̂e ero wa kachonho yaw roro ha. Ero wa tî xakn̂e.

17 Ero yinhîrî takî tî iin̂o waixapu mrerî namotoyakn̂e okwe, mîîmo yosomu mrerî. Miya xe xa tî namotoyakn̂e. Esesîra takî tî xakn̂e okwe.

18 Ero ke on wara takî tî kekn̂e yîson Erias ya, Ai, Kaan yakrono ro, ahce wece mîmokyakn̂e ohyaka, Kicicme oyehtoponho ponaro oriso na mîmokye ohyaka, omrerî waihkaxi marha na okwe, kekn̂e tî yîwya.

19 On wara tko tî kekn̂e Erias yîwya, Ek ha amrerî, kekn̂e tî. Ero ke tî yîson yenai nahsîyakn̂e, tamtakpon yaka takî tî naar̂akn̂e eporeno yaka, yîwîntopo yaka. Tîkaman pona tî nîrapekn̂e.

20 Ero yinhîrî takî tî cerewre nîmtapowakn̂e Erias Kporin komo yakro. On wara tî kekn̂e yîwya, Ai, Apa, ponaro oyehtopo Amoro. On wara wîîkes awya, iin̂o waixapu yaw mak wasî tan. Ahce kacho noro menmetanmekî yîmrerî waihkacho ke okwe? kekn̂e tî.

21 Ero wa kache rikomo pona tî n̂etîrapekn̂e tuupe cewru rma. Osorwaw ro tî n̂etîrapekn̂e ero wara. Kporin komo yakro tî nîmtapowakn̂e xa hara. On wara tî kekn̂e, Apa, ponaro oyehtopo Amoro, twaihso nasî moso, rikomo okwe. Noro yekatî cma re mekmexpes hara yupun yaka, kekn̂e tî.

22 Ero ke Erias mtapotarî tî n̂encekn̂e Kporin komo. Rikomo yekatî takî tî mokyakn̂e hara yupun yaka. Cewke takî tî xakn̂e hara.

23 Ero yinhîrî takî tî rikomo naar̂akn̂e hara Erias roopoyino yaka amtakpo yaka. Yîson ya tî nîmyakn̂e hara. Kar̂pe nas hara amrerî, enko xe, kekn̂e tî yîwya.

24 On wara tî n̂eyukyakn̂e wooxam, Ero wara omrerî yenpakarî ke awya, Kaan yakrono ro xa mîkro, wîîkesî tak apoko. Yaaro xa Kporin komo mtapotarî n̂ekatîmyasî, wîîkesî marha apoko, kekn̂e tî. Ero wa tî kekn̂e iin̂o waixapu Erias ya.