Ero yinhîrî takî tî osorwaw ro yicimn̂ipuntache on wara takî tî kekn̂e Kporin komo Erîas ya, Ai, Erias, esenpota tak Akabe yaka. Tuuna tak wekpesî, kekn̂e tî yîwya.

2 Ero ke cekn̂e takî tî Erias esenposo Akabe ya. Ero yimaw rooma poko ro makî tî xatken̂e Samaria pono komo. Wahra ro mak tî xakn̂e yînahrî komo.

3 Ero yimaw on wara takî tî xakn̂e Akabe, Obacias tî nan̂ikyakn̂e tîmîn yawno komo yenîn̂e. Kporin komo ponarono xa tî mîk xakn̂e Obacias.

4 Pahxa n̂he Kporin komo poko weronomano rin̂e komo waihketaw Xesabew ya anarî komo tî n̂eyamyakn̂e Obacias ewtarî yaka, asak hakno yaka. 100 tî n̂eyamyakn̂e, anarî yaka tî n̂eyamyakn̂e 50, anarî yaka 50 xa marha. Yînahrî komo tî naar̂akn̂e roro, yutunarî komo marha tî. Ero wa tî xakn̂e Obacias.

5 Taa, on wara tî kekn̂e Akabe yîwya, Miya so etoko tuuna pîtho mko yenso, aporî kwaka so marha. Cuupu rma ciki na ceen̂a kawaru nahrî, muura komo nahrî waipîra ehtome. Koh komo waihka xera wasî yînahrî exihtorî ke mak okwe, kekn̂e tî yîwya.

6 Ero ke roowo raconho takî tî nukuknometken̂e pore tîtotopo ro komo. On pore kîwces ow, ero pore etoko amoro, kekn̂e tî Akabe yîwya. Ero ke tî n̂etakpayatken̂e cuupu yeporîrî poko.

7 Ero yinhîrî takî tî esama yaw tîcetaw Obacias, ponan̂e n̂esepor̂atken̂e Erias yakro. Nîhtînoyakn̂e Erias me. Ero ke tî n̂esewnapekn̂e amrinaka. Amoro ma amoro apa Erias? kekn̂e tî yîwya.

8 Noro rma ow ha, kekn̂e tî. On wara kata awantoman̂e ya, Tanî nai Erias, kata yîwya, kekn̂e tî.

9 Okwe, kekn̂e takî tî Obacias, kicicme ma ow meen̂a Apa? Awanton mak ow. Ow mak mîwaikamexpesî okwe Akabe ya.

10 Yaaro tan wîîkes awya, waipîn me nasî Aporin komo Kaan, kacho wara rma nasî on omtapotarî. Miyan komo yakan komo rma re n̂en̂epekn̂e okayaritomon. On wara kekn̂e yîwya so, Miyan komo yaka etocoko Erias yekaci yentaxi, mîk hak rowon pono komo yaka etocoko watohra ro mak. Enîhra ro mak nas amna, ketken̂e etpoyino pîn entaxi toxapu komo ya. Ero wa kache on wara ketken̂e hara yîwya so Akabe maywen komo, Kporin komo n̂entarî me xa kacoko yaaro xa kachome, ketken̂e tî yîwya so. Ero wa tî kamexpekn̂e mîk hak rowon pono komo ya, miyan komo ya rma. Awenî xe ro mak nasî kayaritomo.

11 Oroto tak on wara mîîkes owya, Akayaritomon ya kata, tan nai Erias, kata, mîîkes owya.

12 Owtoche tko awar̂a tak hara na Kporin komo Yekatî ahna na on̂entorî me mak hara okwe. Tan nai, kache yîwya aweposo tak mokyasî. Awenîra cexiche tak owaihkesî mak okwe. Kporin komo ponarono tko ow mehxa ro omrenai ro.

13 Oyekaci yentara katî mai? Pahxa Kporin komo poko kweronoman̂e pen komo tî waihkekn̂e Xesabew. Ero yimaw anarî komo waar̂akn̂e eyamso ewtarî yaka. Asak hakno yaka weyamyakn̂e 50 anarî yaka, 50 xa hara anarî yaka hara. N̂examro wurmekn̂e roro, wokpekn̂e roro marha tuuna ke. Noro yipu ow ha.

14 Wara rma owya mîîkesî, Akayaritomon ya ekatîmta, Tan nai Erias, kata yîwya, mîîkesî. Owaikesî men okwe, kekn̂e tî. Ero wa tî kekn̂e Obacias Erias ya.

15 On wara tko tî kekn̂e Erias yîwya, yaaro xa tan wîîkes awya, Waipîn me nasî Kporin komo, eepataw kecececesî Noro nasî waipîn me, kacho wara rma nasî omtapotarî, oroto rma kesenpesî kayaritomo ya, kekn̂e tî.

16 Ero ke Akabe yaka takî tî cekn̂e Obacias ekatîmso. Mînto nai Erias, kekn̂e tî yîwya. Ero ke enso takî tî cekn̂e Akabe.

17 Erias yenîche on wara tî kekn̂e Akabe yîwya, Amoro xa ma amoro Ixaw Yana komo yemetanmekn̂e kica? kekn̂e tî yîwya.

18 On wara tko tî Erias n̂eyukyakn̂e, Ixaw Yana komo yemetanmekn̂e pîn ow. Amoro xa matko masî emetanmekn̂e me, aamo pen yanan komo marha naxe emetanmekn̂e me. Kporin komo ya apanatanmetopo komo mahsîpînketken̂e kica. Baaw komo ponaro tak maxe kica. Ero wa awexirî ke so emetanmekn̂e me maxe.

19 Ero ke on wara wîîkes awya, Ixaw Yana komo ahnoro an̂ihko. Kahmeru Yîpîn pona enmekno cirko. Baaw poko weronomano rin̂e komo marha enmeko ahnoro, 450 rma. Axera poko weronomano rin̂e komo marha enmeko iina 400 wicakno kom ha. Xesabew nînahmarî komo mîkyam enmeko, kekn̂e tî. Ero wa tî kekn̂e Erias Akabe ya.

20 Ero ke takî tî Ixaw Yana komo ahnoro nan̂ikpekn̂e Akabe, Baaw poko weronomano rin̂e komo marha tî nan̂ikpekn̂e, Axera poko weronomano rin̂e komo marha. Kahmeru Yîpîn pona tî enmekno n̂iir̂akn̂e.

21 Ero yimaw takî tî on wara kekn̂e Erias yîwya so, Atî wicakî pahkî matu yarpa yîhtînon̂e me kica? Kaan me xa exitaw Kporin komo Noro men ewetîcoko. Kaan me xa exitaw Baaw reha noro xa ewetîcoko, kekn̂e tî yîwya so. Yîmtapotarî tko tî eikura ro makî tî xatken̂e esenmexapu komo.

22 On wara takî tî kekn̂e hara Erias yîwya so, Ow mak wasî cewn̂e Kporin komo poko aweronoman̂e komo. Yaake naxe Baaw poko weronomano rin̂e komo, 450.

23 Ero ke n̂examro rma n̂ehcowpe bui asakî. Anarî nahsîcowpe Baaw ya tînîmrî komo. Nakpotucowpe, kamerî pona n̂iicowpe. Wehto yirihra ro makî tko n̂ehcowpe. Anarînhîrî paaka wakpocas ow hara. Kamerî pona marha wiir̂asî. Wehto yirihra marha was ow hara.

24 Ero wa ciriche ponaro awehtopo komo yakro ka amtapotacoko amyamro wehto yar̂macho poko. Kporin komo yakro kîmtapowas ow hara ero poko xa marha. Wehto ke keyukn̂e xa yîhtînocoko Kaanî me xa, kekn̂e tî yîwya so. Kir̂wan̂he, ero wa ham, kir̂wan̂he amna n̂encesî, ketken̂e tî esenmexapu komo yîwya.

25 Ero yinhîrî on wara tî kekn̂e Erias Baaw mtapotarî yekatîmn̂e komo ya, Bui ka ahsîcoko amyamro. Takn̂isom me akpotucoko amyamro yihcirî me ka. Yakeno amyamro. Ponaro awehtopo komo tak etacicoko. Noro yakro amtapotacoko wehto yar̂macho poko. Wehto tko yirihra ro mak men ehcoko akn̂itopo, kekn̂e tî yîwya so.

26 Ero ke paaka takî tî nahsîyatken̂e tîwya so tîmxapu. Nakpocatken̂e, kamerî pona tî nakriyatken̂e yupunthîrî. Baaw yakro takî tî nîmtapowatken̂e pahkî. Pahxaxaro ka n̂ihciyatken̂e, kamarakataka roro tî ketken̂e. Ai, Baaw, amna ka eyuhko, ketken̂e tî. Noro mtapotarî tko tî esentara ro mak xakn̂e, eikura ro makî tî xakn̂e Baaw. Nahronatken̂e takî tî Baaw mtapotarî yekatîmn̂e komo tîmsom yakn̂itopo pona, tînakîtothîrî komo pona.

27 Kamarakataw tak on wara takî tî kekn̂e Erias yîwya so, erenamano tî n̂iir̂akn̂e, Kar̂pe n̂he kacoko ha ke yîwya. Kaan me rma wa nai ha. Anarimaw ahce na ponaro nai. Cemyarke tko na nai, miya tko na n̂etariw mooxe, nîwînîkya katî? Ero ke cenpakapore nai, kekn̂e tî yîwya so.

28 Ero ke kar̂pe xa takî tî ketken̂e. N̂etametken̂e marha tî oko kacipara imo ke cehtopo ro komo yaw roro. Rah ke so marha tî n̂etametken̂e oko. Kamxukwatken̂e takî tî mer̂pora.

29 Pahkî rma tî n̂emtaraketken̂e. Baaw n̂entarî me tî re ketken̂e wow kaxi ro. Ketken̂e rma tî kokon̂i cehso ro, Kporin komo ya tîmtopo ro na, kokon̂i tîmtopo ro na ha. Akro yîmtapotacho mtapotarî tko esentara ro makî tî xakn̂e, eikura ro makî tî xakn̂e. Yîmtapotarî ponarono exihra ro mak xakn̂e ham.

30 Ero yinhîrî takî tî an̂ikno n̂iir̂akn̂e Erias. Taa, ohyaka tak amohcoko hara, kekn̂e tî yîwya so. Ero ke yîhyaka tî cetken̂e esenmexapu komo ahnoro. Mokyataw so Kporin komo ya tîmsom yakn̂itopo takî tî nakir̂wamekn̂e Erias. Cexixkaxi tî xakn̂e kica.

31 Toopu takî tî n̂ekyakn̂e Erias, 12 mak. 12 tî xatken̂e Xako pen mumutho komo, tribu porin pen komo. Ixaw me tak kosohcesî, kekn̂e Kporin komo yîwya, Noro pen mumutho wicakî yakenon tî toopu n̂ekyakn̂e Erias.

32 Tîn̂ekîthîrî ke takî tî Kporin komo ya tîmsom yakn̂itopo nakîhcekn̂e. Akîhtoche tarenakem takî tî nahcekn̂e aapo mamhoko yuhnaka n̂he. Naatî yatho yarketaw ero yaka 15 riituru wicakî tî n̂esenkaya ero wicakno nahcekn̂e.

33 Ero yinhîrî takî tî kamerî n̂iir̂akn̂e Erias aapo pona, paaka puntho marha tî nakpocakn̂e. Akpotuxapu tî n̂iir̂akn̂e kamerî pona. Ero yinhîrî on wara tî kekn̂e kîrkomo ya, Ai, tuuna ehtatko 4 weer̂a wicakî porin weer̂a ha. Ero tak yukmamcoko paaka puntho pore, kamerî pore marha, kekn̂e tî.

34 Ero yinhîrî tî kekn̂e xa hara, Tuuna ehtatko xa hara tukmamsom, kekn̂e tî. Ero ke n̂ekyatken̂e xa hara, nukmamyatken̂e marha tî. Ehtatko xa hara, kekn̂e xa hara. Osorwaw tak xakn̂e ero wa kacho. Ero ke n̂ekyatken̂e xa hara tî, nukmamyatken̂e marha tî.

35 Ero ke tuuna takî tî nukmekn̂e tarenakem yaka, aapo mamhokono yaka, powa.

36 Taa, kokon̂i exitaw tak aapo mîtkoso takî tî mokyakn̂e Erias, Kporin komo ya tîmsom tîmtopo ro me exitaw. Kporin komo yakro takî tî nîmtapowakn̂e. On wara tî kekn̂e, Apa kah yawno, ponaro Abraaw yehtopo Amoro, ponaro Isake yehtopo marha, ponaro Ixaw yehtopo marha, Noro yipu xa Amoro. On wara wîîkes awya Apa, oroto tak Kaan me xa awehtopo enpoko, ponaro Ixaw Yana komo yehtopo me awehtopo ha. Awanton me oyehtopo marha enpoko, amtapotarî yanme mak ciino rin̂e me oyehtopo ha. Ero wa esenpoko moxam ya oroto.

37 Omtapotarî entak Apa, entakî xa tak. Ero wa omtapotarî entakî Tporin komo me awehtopo yentome tak moxam ya, Kaan xa Mîk hamî, kachome me marha. Omtapotarî yencetaw awya on wara tak kexe moxam, Kropotarî komo naknama ham Kporin komo tponarono me tak kehtome so hara, kexe. Ero wa kachome tak yîwya so ow entak Apa, kekn̂e tî.

38 Taa, ero wa kache rma takî tî wehto n̂epîrkekn̂e oco kah yai. Paaka puntho tî nakn̂itîkekn̂e exihra cehso ro, kamerî marha tî, toopu marha tî okyo, tuuna marha tî nakn̂iyakn̂e oco tarenakem yawnonho.

39 Wehto yeen̂ataw takî tî esenmexapu komo ya n̂esewnapetken̂e ahnoro. On wara tî ketken̂e, Kaan xa Mîk ham Kporin komo, Kaan xa Mîk ham Kporin komo, ketken̂e tî.

40 Ero yinhîrî takî tî on wara kekn̂e Erias iitono komo ya, Baaw poko weronomano rin̂e komo ahsîcoko. Cewn̂e n̂hema emahcira ro mak n̂expe, kekn̂e tî. Ero ke nahsîyatken̂e. Ahsîche Kison Yewku yecihtaka takî tî aano n̂iir̂akn̂e Erias. Iito takî tî n̂examro pen waihkekn̂e Erias. Ero wa tî Baaw poko weronomano rin̂e pen komo waihkekn̂e.

41 Ero yinhîrî takî tî on wara kekn̂e Erias Akabe ya, Ai, apa, etoko tak eseresmaxi, wooku yeeso marha. Tuuna mohtopo tak wencesî mer̂pono pîn mohtopo, kekn̂e tî yîwya.

42 Ero ke eseresmaxi takî tî cekn̂e Akabe. N̂eseresmekn̂e tî, wooku marha tî n̂eer̂akn̂e. Ero wa eseresmetaw Erias tî cekn̂e Kahmeru Yîpîn meretkoso. Roowo pona takî tî n̂eremekn̂e iina. Nutupenwakn̂e takî tî, tîhtîpîrî n̂iir̂akn̂e tosokmuru yotaka.

43 Ero yinhîrî on wara tî kekn̂e tanton ya, Ai, miya etoko, kaapu enta tuuna imo yepoyino, kekn̂e tî. Ero ke cekn̂e takî tî enso. Enîche mokyakn̂e hara. Ahce na esenpora ro mak nai, kekn̂e tî. Ero yinhîrî ero wa kekn̂e xa hara Erias yîwya, 7-ro tî ero wa kekn̂e yîwya, Enta xa hara, kekn̂e tî emapona.

44 7-nhîrî me kache tak on wara takî tî kekn̂e Erias yanton, N̂esenpesî tak ha re kaapu smun ciki tooto yamorî wicakno mak ha. Tuuna imo kwaino wara nawomyasî, kekn̂e tî. Ero ke on wara takî tî kekn̂e Erias yîwya, Taa, on wara kata Akabe ya, awoku yimipoko atararan poko awtotome tak ha. Etoko tak men awewton pona tuuna ya awahkotora ehtome, kata yîwya, kekn̂e tî.

45 Ero yinhîrî takî tî tuuna yewru ken̂e xa n̂ehtîkekn̂e kaapu, cicwiyem ken̂e. Nocowonakn̂e takî tî. Tuuna takî tî mokyakn̂e mer̂pono pîn, xii, kekn̂e ro makî tî. Ero yimaw takî tî tarara yaw cekn̂e Akabe Xisirew pona.

46 Ero yimaw marha tî Erias karihcekn̂e ro mak tî Kporin komo. Ero ke tponon tî naramekn̂e kar̂pe tîtotome. Cekn̂e takî tî noro kar̂pe Akabe poturme. Miya roro tî cekn̂e Xisirew potaka roro. Ero wa tî cekn̂e Erias.