Ero yinhîrî Xesabew ya takî tî n̂ekatîmyakn̂e Akabe, Erias yehtoponho tî n̂ekatîmtîkekn̂e yîwya. Weronomano rin̂e pen komo waihkachonho marha tî n̂ekatîmyakn̂e yîwya. Ahnoro tî waihkekn̂e kacipara imo ke, kekn̂e tî yîwya.

2 Ero ke tîmtapotarî yekatîmn̂e komo takî tî n̂en̂epekn̂e Xesabew Erias yaka. On wara tî nîîke Xesabew, ketken̂e tî, Owîrîmacowpe tak ponaro oyehtopo ro komo, miya xe ro mak owîrîmacowpe awaikara oyexitaw pahxaxa orotakî, nîîke tî, ketken̂e yîwya.

3 Ero wa kacho yentache tak n̂emahciyakn̂e takî tî Erias waipîra cehtome. Behseba pona tî cekn̂e Xuta yepamtho komo yewton pona. Iito takî tî tanton nînomyakn̂e.

4 En̂exa takî tî cekn̂e rma Erias kokmamso ro. Axawa imo pona tî cekn̂e. Iina takî tî n̂eremekn̂e simbru yepu yapomyaka. Kporin komo yakro takî tî nîmtapowakn̂e twaihkacho poko. On wara tî kekn̂e, Apa kah yawno, N̂eexi takî na waipîra oyehtopo. Owî cma re mîwaikesî. Kir̂wan̂he xa exihra rma wai ham okwe, oporin pen komo yopo exihra wasî kica, kekn̂e tî.

5 Ero yinhîrî simbru yapomyaw takî tî n̂etîrapekn̂e, nîwînîkyakn̂e takî tî. Ponan̂e rma tko tî ancu xakn̂e iito. Erias tî napeyakn̂e. On wara tî kekn̂e yîwya, Ai, Erias, on ha anahrî. Apakakî aweseresmachome tak, kekn̂e tî yîwya.

6 Tpakache takî tî iito n̂een̂akn̂e tpanaw rma puruma, wehto roron pona yupuxapu. Tuuna marha tî n̂een̂akn̂e iito een yaw. Ero ke puruma takî tî nokyakn̂e, tuuna marha tî n̂eer̂akn̂e. Ero yinhîrî tî n̂etîrapekn̂e xa hara.

7 Ero yinhîrî tî mokyakn̂e xa hara Kporin komo yancun. Erias tî napeyakn̂e xa hara. On wara tî kekn̂e yîwya, Apakakî xa hara, eseresmakî xa hara. Miya ro mak men mîîces amn̂e. Mekar̂ketîkesî okwe eseresmara awexitaw, kekn̂e tî yîwya.

8 Ero ke pakekn̂e xa hara tî, n̂eseresmekn̂e xa hara tî, tuuna marha tî n̂eer̂akn̂e xa hara. Ero yinhîrî kar̂pe takî tî xakn̂e ceseresmarî ke. Miya ro mak takî tî cekn̂e eseresmara tak. 40 ro tî n̂enmayakn̂e esama yaw. Kosope so meero tî cekn̂e. Kaan yîpîn pona roro tî cekn̂e Orebe pona. Ero wa tî cekn̂e Erias.

9 Iito tî xakn̂e ewtarî. Ero yaka tak tî n̂ewomyakn̂e. Iito tî n̂enmayakn̂e ewtarî yaw. Iito exitaw takî tî Kporin komo mtapotarî n̂encekn̂e Erias. On wara tî kekn̂e yîwya, Ai Erias, ahce kacho tan mai? kekn̂e tî.

10 On wara tî Erias n̂eyukyakn̂e, Apa, Oporin Amoro, Kaan xa Amoro amna yantoman̂e ro ha. Keserepokekn̂e ro mak Apa aponarora ro mak Ixaw Yana komo yexirî poko. Amtapotachonhîrî yai tak n̂etowyatken̂e, Kir̂wan̂he kiir̂axe so kir̂wanhe awexitaw so, kachonho yai. Awya tîmsom yaponho n̂ixketken̂e, apoko weronomano rin̂e pen komo waihketken̂e kacipara imo ke. Ow mak ketîmcekn̂e amtapotarî yekatîmn̂e me. Ow meero tak owaika xe naxe okwe, kekn̂e tî.

11 Ero yinhîrî takî tî on wara kekn̂e Kporin komo yîwya, Miya ka epatakakî. Îh po ececetota Aporin komo yeepatai, kekn̂e tî. Ero ke iina tî cekn̂e ececetoso. Ero yimaw Kporin komo takî tî cekn̂e yîhyari. Ero yimaw puu kekn̂e ro makî tî ocowo kar̂pe ro mak. Îîpî mko tî nîyotakekn̂e okyo, toopu mko tî nahkekn̂e. Ero wa tî xakn̂e ocowo imo Kporin komo mîtwono. Ocowo chew rma tko Kporin komo exihra tî xakn̂e. Ocowo yîtîtmamche tak n̂esewsîyakn̂e takî tî roowo. Esewsîtopo chew tko exihra marha tî xakn̂e Kporin komo.

12 Roowo yesewsîtoponho yîtîtmamche tak wehto takî tî n̂etahsîyakn̂e oco. Wehto chew tko exihra rma tî xakn̂e Kporin komo. Ero yinhîrî wehto yeseikache tak tooto mtapotarî warai takî tî n̂esencekn̂e. Yamoro mak kekn̂e eserepokan wara.

13 Ero yentache takî tponon ke rma takî tî n̂esewopon̂akn̂e Erias. Ewtarî potaka takî tî cekn̂e. Iito tî n̂ecececekn̂e. Ponan̂e takî tî n̂esencekn̂e xa hara tooto mtapotarî warai. On wara tî kekn̂e yîwya, Ai Erias, ahce kacho tan mai? kekn̂e tî.

14 On wara tî Erias n̂eyukyakn̂e, Apa, Oporin Amoro. Kaan xa Amoro amna yantoman̂e ro. Keserepokekn̂e ro mak aponarora ro mak Ixaw Yana komo exirî ke. Amtapotachonhîrî takî nahsîpînketken̂e kica, Kir̂wanhe kiir̂axe so kir̂wan̂he awexitaw so, kachonho ha. Awya tîmsom yaponho mko n̂ixketken̂e kica, apoko weronomano rin̂e pen komo waihketken̂e okwe kacipara imo ke. Ow mak ketîmtoi cewn̂e mak. Ow meero tko owaika xe tak naxe okwe, kekn̂e tî.

15 On wara takî tî kekn̂e Kporin komo yîwya, Etok hara awesamathîrî yaw xa marha. Tamasku Yaxawan pore marha etoko. Iito awexitaw takî Asaew tak yîhkapeko Siriu komo kayaritomon me.

16 Ero yinhîrî tak Xeu yîhkapeko hara Ixaw Yana komo kayaritomon me hara, N̂insi mumuru ha. Taa, Erisew tak yîhkapeko hara weronomano rin̂e me, Abew Meora pono ha. Ahretawno me noro yîhkapeko.

17 Pahxaro tak Ixaw Yana pen komo waihkes okwe Asaew. Noro yemahcixapu pen komo tak Xeu waihkesî hara, Xeu yemahcixapu komo tak Erisew waihkes hara.

18 Yaake rma tko wîmtoi Ixaw Yana komo, oponarono kom ha. 7.000 naxe Baaw mamakan me yutupentan komo, ewcokan̂e pîn komo marha, kekn̂e tî. Ero wa tî kekn̂e Kporin komo Erias ya.

19 Ero ke en̂exa takî tî cekn̂e hara Erias. Erisew tî n̂een̂akn̂e mararî po. Roowo pomorî poko tî xakn̂e paaka ke. Sapace mumuru tî mîk xakn̂e Erisew. Paaka ke tî roowo pomekn̂e. 24 paaka tî napickekn̂e ero poko. Etpoko cimiso tî xakn̂e taknoye re so. Mapitawno ke tî pomekn̂e Erisew. Ero poko exitaw yîhyari tî cekn̂e Erias. Tmotarî yamînho takî tî n̂iir̂akn̂e Erisew motaka.

20 Ero ke takî tî Erias yaka cekn̂e Erisew kar̂pe. Tooku tî nînomyakn̂e. On wara tî kekn̂e yîwya, Apa, owto xe cma re wasî apapa yewcokaxi, yememe marha. On wara tî n̂eyukyakn̂e Erias, Etok hara amararîn pona. Ahce kacho meserepoke? kekn̂e tî yîwya.

21 Ero ke mararî pona takî tî cekn̂e hara Erisew. Paaka takî tî paraxkekn̂e asakî. Yupunthîrî tî nîyekn̂e. Roowo pomotoponho rma tî nîknoyakn̂e wehto kamerî me. Ero ke tî wehto kamehcekn̂e paaka puntho tîyotome. Tîyoche cenmayipu komo yotî me takî tî n̂etakekn̂e. Ero ke tî n̂eseresmetken̂e. Eseresmache so Erias yaka takî tî cekn̂e Erisew. Noro poko ro takî tî cekn̂e. Anton me tî xakn̂e. Ero wa tî xakn̂e Erisew.