Taa, ero yinhîrî takî tî on wara xakn̂e Ben Atace, Siriu komo kayaritomon, tîsowtatun komo takî tî nan̂ikyakn̂e ahnoro. Kayaritomo komo marha tî nan̂ikyakn̂e takrono komo me. Yaake tî nan̂ikyakn̂e, 32. Mer̂pora tî xakn̂e iyoh komo kawaru, mer̂pora marha tî xakn̂e yîtararan komo. Ero ke cetken̂e takî tî Ben Atace komo Samaria mîtkoso. Ewto tî mamcetken̂e, iitono komo yar̂ma xe tî xatken̂e.

2-3 Tmaywen komo takî tî n̂en̂epekn̂e Ben Atace Akabe yaka, Ixaw Yana komo kayaritomon yaka, On wara tî nîîke Ben Atace awya, Apurantanthîrî tak nasî opurantan me, prata, ooru, ahnoro nasî opurantan me. Ahcinhîrî komo marha tak naxe opici me hara cenporem komo xa. Amxîkîthîrî komo marha tak naxe omxîkrî me hara kir̂wan komo, nîîke tî, ketken̂e tî okwe yîwya.

4 On wara tî n̂eyukyakn̂e Ixaw Yana komo kayaritomon hara, Ero wa ham apa. Ow tak wai ham amaywen me, ohyawno komo marha naxe amaywen komo me, oyemyawnonho marha nasî awemyawno me. Ahnoro nasî awyan me tak, kekn̂e tî yîwya.

5 Ero yinhîrî Ben Atace maywen komo tî mokyatken̂e xa hara Akabe yaka. On wara tî nîîke Ben Atace awya, ketken̂e tî. Kokon̂oro omtapotarî yekatîmn̂e komo wen̂epekn̂e ahyaka. On wara wîîkekn̂e awya, tîmko owya apurantanthîrî, ooru, prata, ahcinhîrî komo, amxîkîthîrî komo, ahnoro tîmko owya, wîîkekn̂e.

6 Taa, on wara tak wîîkes hara awya, Pahxaxa tak men omaywen komo wen̂epesî ahyaka orotakî. Amîn yawno n̂entîkexe, amaywen mîn yawno komo marha. Ahce na yeen̂ataw tpoxwe tîwya so ero tak nahsîyaxe, nîîke tî Ben Atace, ketken̂e hara tî Akabe ya.

7 Taa, ero wa kacho yentache Ixaw Yana poritomon komo takî tî nan̂ikyakn̂e Akabe. On wara tî kekn̂e yîwya so, Ai, oyakno komo, on wara nai ham okwe Ben Atace, kîwîrîma xe so nai ham okwe. Entakî xe, yihcirî me on wara nîîka, Owyan me tak nasî ahcinhîrî komo, amxîkîthîrî komo marha, apurantanthîrî komo marha, prata, ooru ahnoro mak tak nasî owyan me, kai owya. Yîmtapotarî yanwekîra wehxe, kekn̂e tî yîwya so.

8 On wara tî n̂eyukyatken̂e poritomo komo, ahnoro Ixaw Yana komo, On wara kes amna awya, yîmtapotarî entara ro mak esko, ewetîra marha esko, ketken̂e tî.

9 Ero ke on wara takî tî kekn̂e Akabe Ben Atace maywen komo ya, On wara kacoko apapa ya, kayaritomo ya, Yihcirî me amtapotarî mekatîmce amaywen komo owya, ero wewehcasî. Oroto tak amtapotarî yewetîra wasî xa hara, kacoko yîwya, kekn̂e tî yîwya so. Ero ke cetken̂e hara tî Ben Atace maywen komo. Noro ya takî tî n̂ekatîmyatken̂e Akabe mtapotarî.

10 Ero wa kacho yentache tmaywen komo takî tî n̂en̂epekn̂e xa hara Ben Atace Akabe yaka, On wara wîîkes hara awya, kekn̂e tî, Awewtonthîrî wîhcamnotîkesî kr̂a men amn̂e ahce na exihra cehso ro iito. Roowo pupuntho meero exihra nasî. Amekî xe cexitaw omaywen komo yarîto me rma nasî amorî komo roowo pupuntho exihtorî ke thakwa. Ero wara rma oricowpe ponaro oyehtopo ro komo, ero yopo xa tko oyemetanmecowpe ero wa awewtonthîrî cirihra oyexitaw, nîîke tî Ben Atace, ketken̂e hara tî.

11 On wara tî kekn̂e hara Akabe Ben Atace maywen komo ya, On wara kacoko akayaritomon komo ya, Kukurun yahsîyataw mak ehcoyoponkara n̂he cexpore nasî. Kukurun yahsîpînketaw tak waapa me toxapunhîrî ero yimaw xa matko cehcoyoponkesî tak, kacoko yîwya, kekn̂e tî.

12 Taa, Akabe mtapotarî yencetaw tak roona yaw tî xatken̂e Ben Atace komo. Tmaywen komo yakro tî kawaxiyem n̂eer̂atken̂e. Ero ke on wara takî tî kekn̂e kayaritomo tmaywen komo ya, akurun komo ahsîcoko waapa me kîwtotome so tak, kekn̂e tî yîwya so. Ero ke ero wara takî tî xatken̂e sowtatu komo, tukurun komo takî tî nahsîyatken̂e ewto pono komo waparî me tîtotome so.

13 Ero yimaw takî tî weronomano rin̂e cekn̂e Akabe yaka, Ixaw Yana komo kayaritomon yaka. On wara tî kekn̂e yîwya, Ai, apa, meen̂e ha na mîkyam awaparî komo mer̂pono pîn. On wara tko kesî Kporin komo awya, Oroto n̂examro wiirasî anarmarî komo me, Kporin komo xa Mîk ham yînar̂mapon̂e kîwya so, kachome opoko, kes awya, kekn̂e tî ekatîmn̂e.

14 On wara tî kekn̂e hara Akabe weronomano rin̂e ya, Onoke warai komo xa cetu ar̂mano riso? kekn̂e tî. On wara tî n̂eyukyakn̂e weronomano rin̂e, On wara kesî Kporin komo awya, Kar̂pamxan komo tocowpe ar̂mano riso, roowo raco pono komo yenîn̂e kom ha, kekn̂e tî. Ai ha, taa, onoke xa sowtatu komo yantoman̂e me nai, Etocoko tak ha, kan̂e me? kekn̂e tî Akabe. Amoro rma, kekn̂e tî weronomano rin̂e. Ero wa tî kekn̂e noro Akabe ya.

15 Ero ke kar̂pamxan komo takî tî n̂enmekyakn̂e Akabe, mîn hak pono yantoman̂e komo. 232 makî tî xatken̂e. Ero yinhîrî ahnoro takî tî n̂enmekyakn̂e sowtatu kom hara, Ixaw Yana kom ha. 7.000 mak tî xatken̂e n̂examro hara.

16 Ero yinhîrî yuu yuu ketken̂e takî tî Ixaw Yana komo kamarakataw. Ero yimaw roona yaw rma tî xatken̂e Ben Atace komo, kayaritomo komo marha, akronomaxi mohxapu komo, 32 wicakno kom ha. Kawaxiyem tî n̂eer̂atken̂e ero yimaw twenîmso ro kica.

17 Taa, Ixaw Yana komo takî tî cetken̂e Siriu komo wece, kar̂pamxan komo tî cetken̂e poturme aano rin̂e me. Ero yimaw tmaywen komo n̂en̂epekn̂e Ben Atace Ixaw Yana komo yehtopo yekatîmn̂e me. Asakî makî tî n̂en̂epekn̂e. En̂epexapunhîrî komo mokuche hara on wara tî ketken̂e kayaritomo ya, Kîrkomo tak n̂epatakexe Samaria poi, ketken̂e tî.

18 Ai ha, kekn̂e tî Ben Atace, Taa, etar̂mara thakwa amna nasî, kaxi na mokyatu. Ero wa kaxi mokyataw so ahsîcoko waihkara rma. Etar̂maxi rma na mokyatu anarimaw. Ero wa mokyataw so ahsîcoko rma waihkara, kekn̂e tî. Ero wa tî kekn̂e Ben Atace tmaywen komo ya.

19 Ero ke n̂epataketken̂e takî tî kar̂pamxan komo, roowo raconho mko yenîn̂e komo, ewto poi tî n̂epataketken̂e, kurei. Wenari so tî mokyatken̂e sowtatu komo ahnoro.

20 Siriu komo yaka tîtoche so cecento rorono komo takî tî waihketken̂e. Ero ke n̂emahciyatken̂e takî tî Siriu komo. Poko roro so tî cetken̂e Ixaw Yana komo. Ben Atace reha tî n̂emahciyakn̂e kawaru mkaw, kawaru mkawno komo yakro rma.

21 Ero yimaw takî tî Ixaw Yana komo kayaritomon takî tî aano n̂iir̂akn̂e hara Siriu komo yar̂maxi. Kawaru mkawno komo tî ka nar̂metken̂e, tarara yawno komo marha. Ero yinhîrî tîhtarî po tîtosom komo waihketken̂e mer̂pono pînî ro mak. Ero wa tî Siriu komo nar̂metken̂e.

22 Ero yinhîrî weronomano rin̂e tî mokyakn̂e xa hara Ixaw Yana komo kayaritomon yaka. On wara tî kekn̂e yîwya, Ai apa, Etok hara. Sowtatu komo tak epamnocoko n̂he kar̂pe n̂he tak awtotome so xa hara ar̂man̂e me amn̂e. Tukurui xa tak men ehcoko. Amn̂e kaamo yimawno yîhcitopo me exitaw tak awaparî komo me men mokya xa hara Siriu komo kayaritomon, kekn̂e tî. Ero wa tî kekn̂e wernomano rin̂e Akabe ya.

23 Ero yinhîrî on wara takî tî ketken̂e Siriu komo kayaritomon maywen komo yîwya, Ai, apa, On wara tko natu ponaro Ixaw Yana yehtopo komo, îh pono ro me mak naxe. Ero ke kyopo so xatken̂e Ixaw Yana komo. Capahno po ketar̂metaw so reha iyopo so tak taxe.

24 Ero ke on wara xa kasko, kayaritomo komo en̂epeko yîmîn komo yaka hara. Ekenhîrî komo yakan me sowtatu yantoman̂e komo cirko hara.

25 Ero yinhîrî tak sowtatu komo an̂ihko xa hara, Waihkaxapu pen wicakî xa marha an̂ihko hara sowtatu komo. Kawaru komo marha enmeko waihkaxapu pen komo yecenarî xa marha, tarara mko marha akîhtopoko wakrokaxaputho mko yecenarî xa marha. Ero yipu exitaw tak ahyaw capahno po tak cetar̂macerî hara Ixaw Yana komo yakro. Iito tak wa kar̂pe taxe iyopo so, ketken̂e tî yîwya. Yîmtapotarî ponaro tî xakn̂e Ben Atace. Ero ke ero wara rma tî ciino n̂iir̂akn̂e.

26 Ero yinhîrî takî tî kaamo me n̂he exitaw tak tmaywen komo takî tî nan̂ikyakn̂e xa hara Ben Atace, Siriu komo. Apeke pona tî cetken̂e Ixaw Yana komo yakro etar̂maxi xa hara.

27 Ero ke Ixaw Yana sowtatun komo takî tî nan̂ikyakn̂e hara Akabe. Yînahrî komo tî nîmyatken̂e yîwya so. Ero yinhîrî Siriu komo yakro etar̂maxi tî cetken̂e. N̂examro yecento tî tîmîn komo n̂iir̂atken̂e Ixaw Yana komo roona warai. Kootutho wara makî tî xatken̂e Ixaw Yana komo asak makno wara. Xehxa anarî komo ciki xatken̂e, mehxa anarî komo xatken̂e hara. Ero wara tî xatken̂e Ixaw Yana komo. Mehxa tî xatken̂e Siriu kom hara mer̂pono pînî ro mak. Roowo pen tî nawronohketîketken̂e kopi n̂examro reha.

28 Ero yinhîrî takî tî Kaan yakrono ro mokyakn̂e Ixaw Yana komo kayaritomon yaka. On wara tî kekn̂e yîwya, Ai, apa, on wara kesî Kporin komo awya, On wara kexe Siriu komo, Îh pono komo kurunpen̂e me mak nasî Kporin komo, capahno pono komo kurunpen̂e mera ro mak nasî, kexe kica Siriu komo. Ero wa karî ke n̂examro warmepesî xa hara awya so. Ero yimaw tak, Kporin komo xa Mîk ham, mîîkexe tak opoko, kesî Kaan awya so, kekn̂e tî. Ero wa tî kekn̂e Kaan yakrono ro kayaritomo ya.

29 Ero yinhîrî tî iito rma xatken̂e Siriu komo, Ixaw Yana komo marha, ececento re xatken̂e. Roona yaw so makî tî ka xatken̂e. 7 ro tî n̂enmayatken̂e iito etar̂mara rma. Ero yinhîrî 7-nhîrî po takî tî n̂etar̂metken̂e. Siriu komo pen tî waihketken̂e ro mak Ixaw Yana komo mer̂pono pîn. 100.000 yakenon tî waihketken̂e ero kaamo po rma.

30 Etîmtoxapu komo takî tî n̂emahciyatken̂e Apeke pona ewto pona. Iito exitaw so waaca takî tî n̂emacakekn̂e pona so, 27.000 komo pona hara. Ero yimaw Ben Atace marha tî n̂emahciyakn̂e ewto pona. Mîîmo yamtakpon yaka takî tî n̂ewomyakn̂e, atumnawno yaka.

31 Ero yinhîrî takî tî on wara ketken̂e Ben Atace maywen komo yîwya, Ai, apa, on wara amna n̂encesî Ixaw Yana kayaritomon komo yehtopo, kîpînîn yawno komo tî mîkyam. Ero ke on wara cma re amna n̂iir̂asî, kumixitho amna namruyasî kamisa wara. Ruupu marha amna karamiyasî amna tîpîrî pore. Ero wa tak amna cesî Ixaw Yana kayaritomon yaka. Ero wa amna yeen̂ataw awaikara na nai noro, ketken̂e tî yîwya.

32 Ero ke ero wara rma tî cetken̂e. Kumixitho tî namruyatken̂e kamisa wara, ruupu marha tî karamiyatken̂e tîhtîpîrî komo pore. Ero wa takî tî cetken̂e Ixaw Yana komo kayaritomon yaka. On wara tî ketken̂e yîwya, Ai, apa, on wara amna kes awya, on wara nîîke awanton, Ben Atace, Owî cma re waihkara masî, kes awya, ketken̂e tî. On wara tî n̂eyukyakn̂e Akabe, Ai ha, waipîra rma ma nai ke Ben Atace. Oyakno mîk ha, kekn̂e tî yîwya so.

33 Akabe mtapotarî ponaro xa tî xatken̂e Ben Atace maywen komo tîpînîn yaw so ehtopo ponaro. Ero ke ero wa xa marha tak Ben Atace n̂etahcatken̂e. Awakno, kekn̂e tak noro poko. Ero ke, Ero wa kes awakno Ben Atace, ketken̂e takî tî. Ero yinhîrî on wara tî kekn̂e hara Akabe, Ehta noro oroto, kekn̂e tî yîwya so. Ero ke Akabe yenso takî tî mokyakn̂e Ben Atace. Amok ha xiya otararan yaka rma, kekn̂e takî tî Akabe yîwya.

34 On wara takî tî kekn̂e Ben Atace yîwya, Pahxa awewtonthîrî mko nowyakn̂e apapa pen aamo pen yewtontho mko. Ero ke ero mko wîmyas hara awya. Apapa pen marha n̂iir̂akn̂e warawantacho mko Samaria pona. Ero ke ero warai xa marha miir̂a amoro Tamasku pona hara ciri xe awexitaw, kekn̂e tî yîwya. Taa, kekn̂e tî Akabe, ero wa ham. Ero wa karî ke tak awya etoko hara awanmero, kekn̂e tî Akabe yîwya. Ero ke ero wa kache makî tî Ben Atace n̂en̂epekn̂e hara. Ero wa tî n̂en̂epekn̂e.

35 Taa, ero yinhîrî takî tî iito xakn̂e weronomano rin̂e komo npanatanmekrî. On wara tî kekn̂e noro takrono ya, Ai, cîw, ow amakî akaciparan ke, kekn̂e tî yîwya. Kporin komo yanme rma tî ero wa kekn̂e yîwya. Nanwekyakn̂e tko, takrono yama xera tî xakn̂e.

36 On wara tko tî kekn̂e weronomano rin̂e yîwya, Kicicme meexi. Kporin komo mtapotarî yewetîra mex okwe. Ero ke xehxa awtoche reaw tak awepor̂asî, awaikes tak okwe, kekn̂e tî yîwya. Ero ke en̂exa toche rma takî tî reaw mokyakn̂e eskaxi. Kaanî mtapotarî yanwekn̂enho pen tî waihkekn̂e okwe.

37 Ero yinhîrî anarî takî tî n̂een̂akn̂e weronomano rin̂e. Ero wa xa marha tî kekn̂e yîwya hara, Ai, ow amakî akaciparan ke, kekn̂e tî. Ero ke namekn̂e takî tî noro pen cerewre oko.

38 Ero yinhîrî esama yakumyaka takî tî cekn̂e weronomano rin̂e Kayaritomo tî momokyakn̂e iito. Anarî kuknon yaw tko tî n̂esenpekn̂e. N̂esewopon̂akn̂e tî poono ke.

39 Ero yinhîrî takî tî iitoxari mokyakn̂e kayaritomo. Ero ke kar̂pe tî kekn̂e weronomano rin̂e yîwya. Ai, apa, on wara wîîkes awya, awanton ow ha, kekn̂e tî. Kokon̂oro ketar̂metaw so mînto wîxakn̂e cetar̂maxmu komo chew. Ero yimaw sowtatu mokyakn̂e ohyaka. Tooto n̂ekyakn̂e ohyaka tînahsîthîrî. On wara noro kekn̂e owya, Moso men ka ahsîko, en̂epera ro mak men esko. En̂epeche awya amoro rma mîwaiyasî emtaka hara. Anarimaw prata ke mepemesî en̂epetoponhîrî yepetho. 1 tarentu wicakî men mepemesî, kekn̂e owya.

40 Ero yinhîrî tak cemyarke wehxe mîn hak poko. Ero poko oyexitaw, poku, n̂esen̂epanmekye tak okwe ahsîxapunhîrî, kekn̂e tî. On wara tî Akabe n̂eyukyakn̂e, Ai ha, ero wara rma mai ham ke awantoman̂enhîrî mtapotachonho yaw roro thakwa. Awanme ro rma mehxe ham, kekn̂e tî yîwya.

41 Ero yinhîrî yohno takî tî poono mohkekn̂e weronomano rin̂e ceewoponînhîrî. Noro yewru yenîche tak Akabe ya weronomano rin̂e me tî n̂een̂akn̂e.

42 On wara takî tî kekn̂e noro Akabe ya, On wara kesî Kporin komo awya, ahyaw n̂eexi twaihkaxmu me ro mak onkuknomatho. Men̂epew mak okwe. Ero ke noro yemtaka tak mîwaiyas amoro pen hara, amaywenînhîrî pen komo marha waihyaxe noro maywen komo yemtaka hara, kekn̂e tî. Ero wa tî kekn̂e weronomano rin̂e Akabe ya.

43 Ero yentache Samaria pona takî tî cekn̂e Ixaw Yana kayaritomon tîmîn yaka. Ahwora ro makî tî cekn̂e, tîrwon̂e marha. Ero wa tî cekn̂e Akabe.