Ero yinhîrî takî tî on wara xakn̂e Xisirew pono hara, Naboce tî mîk xakn̂e noro yosotî. Noro natîrî tî xakn̂e uupa yatî. Iito tî xakn̂e yînatîrî Xisirew po rma. Akabe mîn mîtwo rma tî xakn̂e, Samaria pono komo kayaritomon mîn mîtwo.

2 Ero ke on wara tî kekn̂e Akabe Naboce ya, Ai oyakno, anatîrî yewtî cma re mîmyas owya uupa yewtî. Omîn mîtwo xa nas okre. Ahsîche tak onatîrî yewtî me wiir̂asî mîn hak yewtî me. Anarî tak wîmyas hara awya uupa yewtî rma hara. Kir̂wan wîmyas awya on yopono okre. Puranta xe xa tko awexitaw ero rma wîmyasî anatîthîrî yecenarî xa, kekn̂e tî yîwya.

3 On wara tko tî kekn̂e Naboce, Apohana apa, kekn̂e tî, oporin pen komo rowontho mîn okwe onatîrî yewtî. Ero ke tîmîhra was awya. Kporin komo yanme rma ero wa wîîkes awya, kekn̂e tî.

4 Ero wa kacho yentache tîmîn yaka takî tî cekn̂e hara Akabe. Ahwora tî cekn̂e, tîrwon̂e marha. Ero wa tî xakn̂e tanwekrî poyero Naboce ya, Xisirew pono ya. Oporin pen komo rowontho tîmîhra was awya, karî ke tî yîwya. Ero ke tîkaman pona takî tî n̂etîrapekn̂e Akabe. Mîîmo wacan wece cewru makî tî n̂etaknamekn̂e. Eseresmara ro makî tî xakn̂e.

5 Ero yinhîrî Xesabew takî tî mokyakn̂e enso, yipic ha. On wara tî kekn̂e ciin̂o ya, Ahce poko mîrwona kica? Ahce kacho eseresmara mai okwe? kekn̂e tî yîwya.

6 On wara tî kekn̂e Akabe yîwya, Oyanwekî kica Naboce, Xisirew pono. On wara wîîka yîwya, Anatîrî yewtî cma re mîmyas owya epethîrî pona puranta pona. Anarimaw yiixe awexitaw anarî wîmyas hara awya uupa yewtî xa marha on yemtaka hara, wîîka yîwya. Pîra, onatîrî yewtî tîmîhra wasî awya, kekn̂e tko owya kica, kekn̂e tî.

7 On wara tko tî kekn̂e Xesabew yipici, Ai ha, Ixaw Yana komo kayaritomon ma re amoro? Ahtoko tak ha, eseresmakî, tahwore tak esko. Owî rma wîmyasî Naboce natîrî yewtî awya, Xisirew pono natîrî yewtî ha, kekn̂e tî yîwya.

8 Ero yinhîrî takî tî karita mewrekn̂e Xesabew Naboce yenmayipu komo yakan, poritomo komo yakan, antoman̂e komo yakan marha. Akabe nmewretho tan, kacho tî mewrekn̂e karita poko kica. Kayaritomo kuknon ke marha tî karita yen nahkoromekn̂e.

9 On wara kacho tî mewrekn̂e, Ai, oyakno komo, on wara wîîkes awya so, kaamo men yukuknomacoko awesenmetopo komo me, eseresmara awehtopo komo me ha. Ero po tak Naboce eremanmecoko enîno rin̂e yapon po. Esenmexapu komo yopono me noro cirko.

10 Ero yinhîrî kicicitho komo tak mohcowpe asakî noro yaka. N̂eremacowpe noro yeepatai rma, asakî. Ero yimaw Naboce yekantopo poko tak n̂ekatîmcowpe n̂examro. On wara kacowpe noro poko, Kicicitho me ro mak nîmtapotai moso Kaan poko, kayaritomo poko marha, kacowpe noro poko. Ero wa kacho yentache awya so Naboce tak aacoko ewto poi. Iito takî waihkacoko toh ke, kacho tî mewrekn̂e.

11 Ero ke Xesabew mtapotachonho yaw roro rma takî tî xatken̂e Naboce yenmayipu komo, poritomo komo, antomano rin̂e komo marha. Noro karitan yaw roro rma tî Naboce pen n̂iir̂atken̂e.

12 Kaamo tî nukuknometken̂e esenmetopo komo me, eseresmara ehtopo komo me marha. Ero wa esenmekîche so Naboce takî tî n̂eremanmekyatken̂e enîno rin̂e yapon po, esenmexapu komo yopono me.

13 Ero yinhîrî takî tî kicicitho komo mokyatken̂e kîrkomo asakî. Naboce yeepatai rma tî n̂eremetken̂e. Kicicme noro yehtoponho tî n̂ekatîmyatken̂e iitono komo n̂entarî me. Kicicitho me ro mak moso nîmtapotai Kaan poko okwe, kayaritomo poko marha, ketken̂e tî kica Naboce poko. Ero wa kacho yentache tak Naboce pen takî tî naar̂atken̂e ewto poi. Iito takî tî toopu nar̂metken̂e etapacho oko. Emapona n̂etapetken̂e twaihkaxi ro thakwa okwe.

14 Ero yinhîrî on wara kacho takî tî n̂ekatîmpetken̂e Xisirew pono komo Xesabew ya, Naboce pen amna n̂etapa toh ke. Twaihso tak nasî, kacho tî n̂ekatîmpetken̂e yîwya.

15 Ero ke ero wa kacho tî n̂encekn̂e Xesabew, Twaihso tak nasî Naboce pen. Toh ke amna n̂etapekn̂e, kacho tî n̂encekn̂e. Ero ke on wara takî tî kekn̂e Akabe ya, Ai, Akabe, ahtoko tak ha. Naboce natîtho yewtî tak ahsîta. Kar̂pe exihra takî tî nai osomunhîrî pen, Naboce. Twaihso takî tî nai, kekn̂e tî yîwya.

16 Ero wa kacho yentache tak Akabe ya, Twaihso takî tî nai Naboce pen, kacho yentache nîhcekn̂e takî tî. Naboce pen natîtho yewtî yahsîso tî cekn̂e.

17-18 Ero yimaw rma tko tî Kporin komo nîmtapowakn̂e Erias yakro, Cisbi pono yakro. On wara tî kekn̂e yîwya, Ai, Erias, etoko pupyaka Akabe yakro ceseposo ro, Samaria pono yakro. Naboce pen natîtho chew nasî. Iina tomo oroto ahsîso tînatîrî yewtî me.

19 On wara kasko yîwya, On wara kesî Kporin komo awya, Tantono pen na mîwaikai, yînatîthîrî na mahsî? On wara marha kesî Noro awya, Naboce pen kamxukutho n̂emeye xapari iito xa marha akamxukuthîrî n̂emeyas hara xapari, awyanî ro xa n̂emeyasî, kes awya, kasko yîwya, kekn̂e tî Kporin komo yîwya.

20 On wara tî kekn̂e Akabe Erias ya noro yenîche, Ow ma menwo okwe amoro, yiixera oyehtopo ro? kekn̂e tî yîwya. Nhnk, kenwo tak ha, kekn̂e tî Erias yîwya. Kicicitho yanton me metîmyakn̂e epethîrî ponan wara rma. Kicicme ro mak awen̂asî Kporin komo.

21 Ero ke on wara kesî Kporin komo awya, kîwîrîmexe so ro mak men okwe. Awepamthîrî pen komo waihkesî kîrkomo. Anto me cehsom pen komo, tanme ro cehsom pen komo marha, ahnoro mak waihkesî awepamthîrî pen komo, Ixaw Yana chewno kom ha.

22 Ayananînhîrî pen komo wiir̂asî Xeroboaw pen yananînho wara rma, Baasa pen yananînho wara xa marha wîîr̂asî, Aias mumutho pen yananînho wara. Ero wa awepamthîrî pen komo wiir̂asî orwonmekrî ke awya. Ixaw yana komo mirpesî kicicitho pokono me kica. Ero ke kîrwonasî apoko, kes awya.

23 On wara marha kesî Kporin komo Xesabew poko hara, Xesabew pen puntho tak non̂esî xapari Xisirew wacan mîtwo rma, kesî.

24 On wara marha kesî apoko hara, Akabe yepamtho pen komo waihyataw ewto po xapari yotî me mak nasî yupunthîrî. Woskara po waihyataw so kwacinama yotî me tak nas hara, kes apoko, kekn̂e tî Erias. Ero wara tî kekn̂e Erias Akabe ya.

25 Noro yipu tî mîk xakn̂e Akabe, kicicme ro makî tî xakn̂e anarî komo yopo ro mak okwe. Kicicitho pokono ro me makî tî n̂ehtîkekn̂e epethîrî pona cetapickaxmu wara ro mak okwe. Kicicitho pokono ro me mak noro n̂een̂akn̂e Kporin komo. Ero wa tî xakn̂e Akabe twakpamnorî ke cipici ya, Xesabew ya.

26 Mîk hak warai me ciixaputho pokono ro me tî xakn̂e, kicicitho pokono ro me xa. Amohew pen komo wara rma tî xakn̂e kica. N̂examro pen waihkapekn̂e Kporin komo Ixaw Yana komo ya, n̂examro pen wara rma tî xakn̂e okwe. Ero wara tî xakn̂e Akabe okwe.

27 On wara tko tî xakn̂e Akabe Erias mtapotarî yentache, tponon takî tî nahxaikekn̂e, kumixitho tî namruyakn̂e, ceseresmacho tî wacekn̂e, Okwe okwe, kacho poko makî tî n̂enmayakn̂e. Ero wa takî tî xakn̂e Akabe.

28-29 Ero ke on wara takî tî kekn̂e Kporin komo Erias ya, Cisbi pono ya, Omamakan me n̂ecir̂asî Akabe, enko xe exirî. Kîwîrîmexe so ro mak okwe, wîîkekn̂e ka yîwya. Ero wa ecirirî ke tko yîwîrîmano cirihra rma ka wasî noro waipînaw. Yumumuthîrî exitaw kayaritomo me ero yimaw mak tak iyananînhîrî komo wîwîrîmesî, kekn̂e tî. Ero wa tî kekn̂e Kporin komo Erias ya.