Taa, ero yinhîrî Kporin komo tî nîrwonakn̂e xa hara Ixaw Yana komo poko. Ero ke Tapi ya takî tî nîhtînomexpekn̂e yukuknomano ritopo Ixaw Yana komo yemetanmechome ha tko. Ero ke on wara tî kekn̂e Tapi tmaywen komo ya, Etocoko Ixaw Yana komo yukuknomaxi. Xuta yepamtho komo marha yukuknomacoko, kekn̂e tî.

2 Xoabe ya tî kekn̂e kayaritomo, sowtatu yantoman̂e komo ya. Ai, Xoabe, etoko tak Ixaw Yana komo chere ro. Ahnoro tribu komo chere ro etoko. Xehxan komo yukuknomakî Taan pona rorono komo, Behseba pona rorono komo marha. Atararo na natu, wîîkesî tan, ero ke yukuknomachonho komo yenta xe wasî amn̂e, kekn̂e tî.

3 On wara tko tî kekn̂e Xoabe kayaritomo ya, On wara xa wîîkes ow, amaywen komo n̂epamnope rma Kporin komo, ponaro awehtopo. Mer̂pora ro mak cehso ro n̂epamnope, 100 me cehso ro rma 1-înhîrî. Ero wicakî epamnoxapu yenî xe was awya, kayaritomo ya ha. Wara rma ahce kacho yukuknomapo xe mai ke? kekn̂e tî.

4 Xoabe tko tî nanwekyakn̂e Tapi, sowtatu yantoman̂e komo marha tî nanwekyakn̂e. Ero ke cekn̂e takî tî Xoabe, tmaywen komo yakro rma tî cetken̂e, sowtatu yantoman̂e komo yakro. Ixaw Yana komo yukuknomaxi tî cetken̂e.

5 Xotaw Yepu tî wacetken̂e. Aroe pahnoke tî n̂etakriyatken̂e tuuna yarinho yaw, suu n̂ixan yaw. En̂exa takî tî cetken̂e Kace pore, Xase pona tî cetken̂e.

6 En̂exa takî tî cetken̂e Xireace pona. En̂exa takî tî cetken̂e Tacin-Otisi pona. En̂exa takî tî Taan-Xan pona cetken̂e hara. En̂exa takî tî wow ketken̂e hara Siton wece.

7 En̂exa takî tî cetken̂e Ciru wece, twacayem wece. Epew komo yewtonî mko pore marha tî cetken̂e, Kanan pono komo yewtonî mko pore marha. Okomn̂i xa takî tî cetken̂e Behseba pona, Xuta komo yewton pona, suu n̂ixan pona ha.

8 Ero wa tî cetken̂e Xoabe komo Ixaw Yana komo yewton pore. Ewto watohra ro makî tî xatken̂e. Iina so totîkache tak Xerusaren pona tî n̂etîrametken̂e hara. 9 nuun̂i tî xatken̂e yukuknomacho poko, 20 kaamo marha.

9 Ero yinhîrî takî tî Ixaw Yana komo kuknomacho tî n̂ekatîmyakn̂e Xoabe kayaritomo ya. 800.000 tî xatken̂e Ixaw Yana komo kîrkom ha, karitî komo, sowtatu me cehsom kom ha. 500.000 tî xatken̂e Xuta kom hara. Ero wicakî tî xatken̂e ahnoro.

10 Ero yinhîrî Ixaw Yana komo yukuknomatîkache nahwokekn̂e takî tî Tapi tpoko rma. On wara tî kekn̂e Kporin komo ya, Kicicme ro mak wehxe kica, Ixaw Yana komo wukuknomapoi kica. Akpîra ro mak wehxe ham kica. Ero ke on wara cma re wîîkes awya Apa, kicicme oyehtoponho cma re mîhcamnoyasî, kekn̂e tî Tapi Kaan ya.

11 Enmapuche hara Tapi paketaw rma weronomano rin̂e yakro takî tî nîmtapowakn̂e Kporin komo, Kace yakro. Kporin komo n̂enporî yenîn̂e ro marha Mîk xakn̂e. Tîn̂enîthîrî tî n̂ekatîmyakn̂e roro Tapi ya.

12 On wara tî kekn̂e Kporin komo yîwya, Ai, Kace, on wara kata Tapi ya, On wara nîîke Kporin komo awya, anarmerpan wîhtînoyasî apanarecho komo, 3 mak wîhtînoyasî. Ero ke amoro rma men̂ekakî apanarecho komo owya, kata Tapi ya, kekn̂e tî Kporin komo.

13 Ero ke cekn̂e takî tî Kace Tapi yaka. On wara tî kekn̂e yîwya, On wara nîîke Kporin komo awya, Ahce warai xa katî mîmen̂eke apanarecho komo owya, rooma poko katî kiir̂atu so 7 cimn̂ipu, aaxatî pîn komo nar̂marî me katî kiir̂atu so 3 nuun̂i, eper̂a nahsîrî me xa katî kiir̂atu so 3 kaamo, nîîke Kporin komo awya. Ero ke apanarecho komo tak yîhtînoko awanme ro. Yîhtînopuche awya ekatîmko owya amtapotarî yekatîmtome tak owya oyantoman̂e n̂entarî me, kekn̂e tî Kace Tapi ya.

14 On wara tî kekn̂e Tapi Kace ya, Keserepokesî ro mak. On warai xa amna yerepetopo men̂ekesî, Kporin komo xa amna n̂emetanmekpe. Kîpînîn yawno xa Mîk Noro. Tooto n̂emetanmekrî me oyexi xera ro mak wasî kopi, kekn̂e tî. Ero wa tî tpanarecho komo men̂ekekn̂e Tapi.

15 Ero ke eper̂a yawno me takî tî Ixaw Yana komo n̂iir̂akn̂e Kporin komo. Enmapuche rma tî ero wa n̂iir̂akn̂e. 3 kaamo tî eper̂a yaw xatken̂e Ixaw Yana komo okwe Kporin komo mtapotacho yaw roro rma. Ero yanme mer̂pono pîn pen komo tî waihyatken̂e okwe, 70.000 ha tî. Taan pona rorono poyino pen komo tî waihyatken̂e okwe, Behseba pona rorono poyino pen komo marha tî.

16 Ero yinhîrî Xerusaren pona takî tî cekn̂e ancu waihkano rin̂e. Ero yimaw Ixaw Yana komo pînîn yaw xa takî tî xakn̂e Kporin komo eper̂a yawno komo pînîn yaw. Ero ke on wara takî tî kekn̂e ancu ya waihkano rin̂e ya, N̂eexi tak, waihkano cirihra tak esko, kekn̂e tî. Ero wa ketaw yîwya Kporin komo yancun tî xakn̂e Arauna yeken mîtwo, Xebusew yeken mîtwo ha. Iito tî xakn̂e puruma yîpîpîtîkacho, Arauna n̂iritho. Ero po tî xakn̂e.

17 Iito exitaw ancu takî tî n̂een̂akn̂e Tapi, waihkano rin̂e ha. Ero ke on wara tî kekn̂e Kporin komo ya, Apa kah yawno, Ow xa kicicme ehxapu. Oper̂a warai makî reha moxam Ixaw Yana komo. Ahce wa ma re xatken̂e moxam kicicme awya? Ow xa wîxakn̂e kicicme. Ero ke ow makî cma re memetanmekyasî oyanan komo marha, kekn̂e tî Tapi.

18 Ero yinhîrî takî tî ero kaamo po rma Tapi yaka cekn̂e xa hara Kace. On wara tî kekn̂e yîwya, Arauna yaka tî etoko Xebusew yaka. Yînatîrî yîpîpîtîkacho pona akîhtoko Kporin komo ya tîmsom yakn̂itopo, kekn̂e tî.

19 Ero ke iina tî cekn̂e Tapi Kporin komo mtapotarî yanme, Kace ya tî kekn̂e ero wa kacho yanme.

20 Ero yinhîrî kayaritomo takî tî n̂een̂akn̂e Arauna twece mokrî. Maywen komo marha tî n̂een̂akn̂e akrono kom ha. Ero ke kayaritomo yaka tî cekn̂e. N̂esewnapekn̂e takî tî amrinaka.

21 On wara tî kekn̂e Arauna yîwya, Apa, ahce wece mîmohcow ohyaka? kekn̂e tî. On wara tî Tapi n̂eyukyakn̂e, Anatîrî yîpîpîtîkacho yahsîso kmoko. Epethîrî pona ahsî xe wasî. Ero pona akîhto xe wasî Kporin komo ya tîmsom yakn̂itopo. Ero wa oyexi xe wasî eper̂a yîtîtmamnotome tak, kpoyino komo pokononho ha.

22-23 Taa, kekn̂e takî tî Arauna Tapi ya, awanme ro mak tak ahsîko takn̂isom, Kporin komo ya tîmsom. Tanî nai anîmrî paaka, tanî marha nai weewe, wehto kamerî. Puruma yîpîpîtîkacho mko nai, paaka pîmtawno marha nai kamerî me. Ahnoro rma wîmyas awya apa. Kayaritomo amoro. Apoko tawake exi xe wasî Kporin komo, ponaro awehtopo, kekn̂e tî.

24 On wara tko tî kekn̂e Tapi, Pîra, oyakno, tohnaw mak ahsîra ro mak wasî awemyawnonhîrî. Kepemesî wa ha ero mko pona. Kporin komo Kaan ya tîmîhra ro mak wa wasî epethîmnî ro, kekn̂e tî. Ero ke Arauna takî tî n̂epemekn̂e Tapi naatî yîpîpîtîkacho yepetho, paaka yepetho marha. 50 sikru tî nîmyakn̂e yîwya prata ha.

25 Ero yinhîrî takî tî Kporin komo ya tîmsom yakn̂itopo nakîhcekn̂e Tapi iina. Ero pona tî nakn̂iyakn̂e paaka pun, takn̂itîkaxmu. Aaxe xa wasî, kacho marha tî nakn̂iyakn̂e. Kaan ya tîmsom me tî nakn̂iyakn̂e. Ero yinhîrî tak yîmtapotarî komo takî tî n̂ewehcakn̂e Kporin Komo. Eper̂a takî tî nîhcamnoyakn̂e Ixaw Yana komo pokononho. Ero wa tî xakn̂e.