Taa, on wara takî tî Tapi kekn̂e twaihtopo pahnoke cexitaw, On wara wîîkes ow. Tapi ow, Xese pen mumutho ha. Kayaritomo me ciixapu ow ha. Kyopono ro xa Mîk Kaan ero warai me oriyakn̂e. Ponaro Xako yehtopo xa ohkapekn̂e kayaritomo me. Waano yaan̂e ro marha ow, centapore aan̂e ha. Ixaw Yana komo n̂entarî me waar̂akn̂e.

2 Kporin komo Yekatî omtari nîmtapowakn̂e. Yîmtapotarî xa xakn̂e omtaw.

3 Ponaro Ixaw Yana komo yehtopo Mîk nîmtapowakn̂e. Toopu warai Mîk ha Ixaw Yana komo yapon warai. On wara kekn̂e Noro owya, On wara cexpore nasî tooto komo kayaritomon, takîhso cexpore nasî. Kaan poko twerî marha cexpore nasî panatanmekno riyataw.

4 Ero wara exitaw kayaritomo, katpan wara nasî enmayatawno wara. Yusmumra exitaw kaapu kir̂wan̂he kîkatparesî enmarî ero wa xa marha nasî noro yipu, kayaritomo. Tuuna yîtîtmamche n̂ekatpankesî hara cuupu yatîkren̂e me. Ero wara xa marha nasî takîhsom, kayaritomo.

5 Ero warahra na natu oyepamtho komo amn̂e. Wara rma n̂examro yakronomacho poko nîmtapowakn̂e Kporin komo. Yaaro xa tan wîîkesî, on wara wasî awepamthîrî komo poko miya roro yîtîhkan me ro mak, kekn̂e. Anarmerpan me ehtopo komo poko nîmtapowakn̂e. Yaaro xa nîmtapowakn̂e. Ero ke oyakronomacho ponaro nai ham yîtwen̂ekarîntara. Yiixe oyehtopo nîmtîkes owya okre.

6 Tar̂maxmu me kr̂a tko naxe Kaan yanwekn̂e komo. Cekyekyem wara mak naxe tar̂maxmu me mak. Cekyekyem yacpokuche kîwya enmekîra tasî kamorî ke oko.

7 Kaan yanwekn̂e komo yar̂ma xe kexitaw kuripara ke mak tar̂mesî. Anarimaw tîtparaxkesî raapu ke. Anarimaw enmekîra tasî. Takn̂isom me mak naxe iina rma. Ero wara rma naxe Kaan yanwekn̂e komo amn̂e, kekn̂e tî. Ero wa tî kekn̂e Tapi twaihtopo pahnoke exitaw.

8 Taa, on wara xakn̂e Tapi maywen komo yosotî, karitî komo yosotî xa, Xosebi-Basebece tî xakn̂e kar̂pe xa Takemon̂i mumuru. Acino, kacho rma tî mîk xakn̂e, Esenita ha. Asakî tî xakn̂e noro yosotî. Noro waparî komo tî mokyatken̂e ha re mer̂pono pînî ro mak, 800 kopi. Ero wicakno rma tî waihkekn̂e noro ooro rma.

9-10 Noro xawyakan takî tî xakn̂e hara Ereasa, Toto mumuru, Aoi parî ha. 3 komo me cehsomu rma tko tî mîk xakn̂e, karitî komo me ha. Tapi yakro tî xakn̂e Ereasa Piristew komo yakro etar̂metaw so. Iito tî xatken̂e Piristew komo cepanatoso. Ixaw Yana komo waparî me takî tî mokyatken̂e. N̂examro tî Piristew komo nukurunketkekn̂e. Mokuche so tko tî n̂emahciyatken̂e Ixaw Yana komo. Iito rma tko tî xakn̂e Ereasa reha. Kacipara imo ke tî Piristew pen komo waihkekn̂e pahkî ro mak. Pahkî exirî ke namowaiyakn̂e ro mak. Namokukwenwakn̂e tî kacipara poko ceipu cehso ro. Ero kaamo po iyoponkan komo yopo rma tî Ixaw Yana komo n̂iir̂akn̂e Kporin komo. Pahkî exiche tak Ixaw Yana komo takî tî mokyatken̂e hara Ereasa yaka Piristew pen komo yemyawnonho yahsîso mak.

11 Noro xawyakan hara tî xakn̂e Sama, Axe mumuru, Ararita ha. Anarimaw xa hara Piristew komo tî n̂esenmekyatken̂e waapa me. Mararî pona tî n̂esenmekyatken̂e kumasa yewtî pona. Iina esenmekîche so n̂emahciyatken̂e xa hara tî Ixaw Yana komo.

12 Sama tko tî n̂ecececekn̂e iito mararî rakataw rma. Mararî tî n̂ewyomekn̂e. Piristew komo tî waihkekn̂e mer̂pono pîn komo. Ero wa tî noro n̂iir̂akn̂e Kporin komo, iyoponkan komo yopo rma tî n̂iir̂akn̂e.

13 Taa, on wara tî xatken̂e anarî kom hara karitî kom ha. Yaakeno n̂he tî mîkyam xatken̂e, 30 ha. Osorwawno komo tî xatken̂e xa hara anarî kom hara n̂examro poyino rma. N̂examro takî tî mokyatken̂e Tapi yaka Aturaw yaw exitaw ewtarî yaw ha. Ero yimaw Piristew komo tî xatken̂e Hepain Woskaran po. Tîmîye so tî xatken̂e iito.

14 Ewtarî yaw makî tî n̂enmayakn̂e Tapi toopu yexenawno yaw ha. Anarî komo tî xatken̂e Beren po Piristew sowtatun komo xa hara.

15 Ero yimaw twokru xe xa takî tî xakn̂e Tapi tuuna xe. On wara tî kekn̂e, Owokru yekn̂e xe ro mak wasî tuuna yekn̂e. Ahtoxapu yawno yekî xe wasî yîwya, Beren potawno yawno ha, kekn̂e tî.

16 Ero ke cetken̂e takî tî karitî komo osorwaw mak. Piristew komo tî nîyotaketken̂e. Tuuna tî nanîmyatken̂e ahtoxapu yawno Beren potawno yawno ha. Anmîche Tapi yaka tî naar̂atken̂e. Erîhra rma tko tî xakn̂e hara. Kporin komo ya tîmsom me makî tî nukmamyakn̂e.

17 Apa kah yawno, kekn̂e tî noro, on yerîhra ro mak wasî. Moxam kamxukru wara rma nas on. On wece tocow twairî komo yaro xa kopi, kekn̂e tî. Ero ke tî erîhra xakn̂e. Ero wa ciin̂enho tî mîkyam karitî komo, osorwawno kom ha.

18 Abisai tî xakn̂e osorwawno komo yaan̂e me, Xoabe yakno, Seruia mrerî yakno ha. On wara tî xakn̂e noro hara, waapa me tî mokyatken̂e Ixaw Yana komo wece 300 kopi. N̂examro pen tî paraxkekn̂e noro tîrahnu ke rma. Ero ke n̂ekaiwakn̂e takî tî osorwawno komo me rma.

19 Osorwawno komo yopono me rma tî noro n̂een̂atken̂e Ixaw Yana komo. Ero ke osorwawno komo yaan̂e me takî tî xakn̂e. Yihcirî komo xawyakan me rma tko tî xakn̂e, osorwawno komo xawyakan me. Ero wa tî xakn̂e Abisai.

20 Anarî marha tî xakn̂e hara karitî, Benaia tî osotî. Xoiata mumuru tî mîk xakn̂e Kabseew pono mumuru. Kar̂pe cehtopo tî n̂enpekn̂e emapona. Moabita pen tî waihkekn̂e asakî. Karitînhîrî komo tî mîkyam xatken̂e, reaw warai komo xa. Noro yipu komo ti waihkekn̂e. Anarimaw hara reaw tî xakn̂e ewtarî yaw. Iina tî nîhcekn̂e Benaia ewtarî yaka reaw waihkachome. N̂eepe mokyataw rma waihkekn̂e.

21 Exipsiu pen marha tî waihkekn̂e noro, porin pen kopi. Raapu rma re tî xakn̂e Exipsiu yemyaw. Noro yipu rma tî nukurunkekn̂e Benaia watma ke mak. Exipsiu rahnutho rma tî mohkekn̂e emyai. Ero ke takî tî noro pen waihkekn̂e, yîrahnuthîrî ke rma.

22 Ero wa tî kar̂pe cehtopo n̂enpekn̂e Benaia, Xoiata mumuru. Ero ke noro marha tî n̂ekaiwakn̂e karitî me osorwawno komo warai me rma.

23 30 komo yopono me tî noro n̂ekaiwakn̂e. Poturu komo mera rma tko tî xakn̂e, osorwawno komo mera. Tukurunpen̂e ro komo yantoman̂e me tî noro n̂iir̂akn̂e Tapi. Ero wa tî xakn̂e Benaia.

24 Anarî komo tak wetahcasî karitî komo 30 me cehsomu rma. On wara tî xakn̂e osotî komo, Asaew, Xoabe yakno, Ewanan, Toto mumuru, Beren pono mumuru,

25 Sama, Arocita, Erika, Arocita.

26 Erese, Pawcita, Iira, Ikese mumuru, Tekoita.

27 Abiese, Anatocita, Mebunai, Usacita,

28 Sawmon, Aoita, Maarai, N̂etopacita,

29 Erebe, Baana mumuru, N̂etopacita, Itai, Hibai mumuru, Xibea pono, Benxamin yepamtho me cehsom.

30 Benaia, Piratonita, Itai, aporî kwawno, Kaasa pono kwawno,

31 Abi-Awbon, Ahmacita pono, Asmapece, Barumita,

32 Eriaba, Sawbonita, Xasen mumuru,

33 Xonatas, Sama mumuru, Ararita, Aiaw, Sararî mumuru, Ararita,

34 Eriperece, Asbai mumuru, Maakacita mumuru, Erian, Aitopew mumuru, Xironita,

35 Esîrai, Kahmerita, Paarai, Ahbita,

36 Ikaw, Natan mumuru, Soba pono mumuru ha, Bani, Kace yepamtho,

37 Sereke, Amonita, Naarai, Beerocita. Xoabe kurun yaan̂e ro mîk xakn̂e, Seruia mrerî kurun yaan̂e ro ha.

38 Iira, Itîrita, Karebe, Itîrita,

39 Urias, Etew. Ero wa xatken̂e Tapi sowtatun komo, karitî komo xa. 37 hakî tî xatken̂e ahnorono yukuknomacho. Ero wa tî xatken̂e.