Taa, Samuew yehtoponho tan wekatîmyas awya so. Pahxa tî ewto xakn̂e, Hamatain Sopin tî ewto yosotî. Eprain yepamtho komo rowon pono tî mîn xakn̂e ewto, îh ken̂arî pono. Ero pono tî xakn̂e Ewkana, Xeroaw pen mumutho ha. Eriu pen mumutho tî mîk xakn̂e hara Xeroaw. Tou pen mumutho tî mîk xakn̂e hara Eriu. Supe pen mumutho tî mîk xakn̂e hara Tou. Eprain yepamtho tî mîk xakn̂e Supe.

2 Asakî tî xatken̂e Ewkana pici. Ana tî xakn̂e anarî yosotî. Pen̂ina tî xakn̂e akrono yosot hara. Pen̂ina xîkrî komo tî xatken̂e. Yîmxîkîra ro makî tî xakn̂e Ana reha okwe.

3 Taa, on wara tî xakn̂e Ewkana, emapona roro tî cekn̂e cewton poi Kporin komo mîn yaka, kantoman̂e ro mîn yaka ha. Yicimn̂ipuntaxera tî cekn̂e ahwotaxi Noro poko, yîwya tîmsom yakn̂iso marha. Iito tî xatken̂e Eri mumuru komo asakî. Kporin komo ya tîmsom pokono ro tî mîkyam xatken̂e. Ohn̂i, Pin̂eias, ero wa tî xakn̂e osotî komo.

4 Taa, on wara tî xakn̂e Ewkana, tookuthîrî yakn̂itopo me exitaw tak cipici notmekn̂e Pen̂ina. Yîmrerî komo marha notmekn̂e, cemsîrî komo marha.

5 Ana ya xa tî mer̂pora nhe nîmyakn̂e wooto, yiixe xa cexirî ke. Yînasîsîrî tko tî n̂iir̂akn̂e Kporin komo etahsîn me okwe.

6 Ana penî tko tî nîwîrîyakekn̂e eepatakan. Emapona roro tî nîwîrîyakekn̂e yîmxîtan me cîrirî ke Kporin komo ya.

7 Ero wa tî xatken̂e roro n̂examro yicimn̂ipuntaxera. Ana cetaw Kporin komo mîn yaka akrono tî nîwîrîyakekn̂e xa hara. Ero ke nîwracekn̂e thakwa tî Ana pen, eseresmara marha tî xakn̂e okwe.

8 Ero ke on wara tî kekn̂e iin̂o yîwya, Ewkana ha, Ana, ahce poyero mîwrace? Ahce poyero eseresmara mai okwe? Ahce poyero ahwora mai okwe? Awahworen̂e cma re ow ha. Yaake rma exitaw amrerî komo 10 rma awahworetu rma ha re. Owî xa tko wasî awahworen̂e me xa tak, ero wicakno komo yopo ro mak, kekn̂e tî. Ero wa tî kekn̂e Ewkana cipici ya, Ana ya.

9 Ero yinhîrî takî tî on wara xakn̂e Ana, eseresmatîkache so, wooku yeetîkache marha, nawomyakn̂e, Kporin komo mîn potaka tî cekn̂e. Iito tî xakn̂e Kaan yaka cewomsom, Eri. Ceremaxi tî xakn̂e aapo po. Kporin komo mîn metatan yecepu mîtwo tî xakn̂e.

10 Iito takî tî Ana nîmtapowakn̂e Kporin komo yakro. Cerewre ro makî tî nîmtapowakn̂e. Ahwora ro makî tî xakn̂e okwe, ero ke tî nîwracekn̂e cerewre ro mak okwe.

11 On wara tî kekn̂e Kaan ya, Apa, kantoman̂e ro Amoro. Ero ke on wara cma re wîîkes awya, Cesemetanmesom ow ha. Ero ke ow enko Apa, oponaro esko, opoko yîtwen̂ekarîntara ro mak esko. Awanton mak ow. Omrerî cma re mîmyas owya. Noro yipu tîmîche owya wîmyas hara awya awanton me. Eroromero wîmyas awya miya roro, waihtopo pona roro. Yîhpoci meero marha papupra ro mak wasî, kekn̂e tî. Ero wa tî kekn̂e Ana Kporin komo ya.

12 Pahkî n̂he tî nîmtapowakn̂e Kporin komo yakro. Yîmtapowataw yîmtarî tî n̂een̂akn̂e Eri.

13 Tîropotaw makî tî nîmtapowakn̂e Ana ehtura mak. Nîmtakmakmanakn̂e makî tî. Ero wa yîmtarî picho tî n̂een̂akn̂e Eri. Ero ke wenîmxapu wara tî n̂een̂akn̂e okwe.

14 Ero ke on wara tî kekn̂e yîwya, Ahce kacho pahkî mîwena hara kica? N̂expe ro mak kawaxiyem kica, kekn̂e tî yîwya.

15 Pîra ro mak Apa, kekn̂e takî tî Ana yîwya, kawaxiyem yerîhra ro mak weexi. Ahwora ro mak tan was okwe. Kporin komo yakro mak kîmtapowasî cerewre ro mak.

16 Kicicitho me ow enîhra esko apa. Ahwora ro mak oyexirî ke mak tan kîmtapowasî Kporin komo yakro, kekn̂e tî yîwya.

17 Taa, kekn̂e takî tî Eri, tahwore mak etok hara. Amtapotachonhîrî yaw roro rma awakronoma xe wasî Kaan ya, ponaro Ixaw Yana komo yehtopo ya, kekn̂e tî.

18 On wara tî kekn̂e Ana, Kir̂wan me makî cma re ow meen̂asî, kekn̂e. Ero yinhîrî takî tî cekn̂e hara, eseresmaxi tak. Ewyahwon me exihra takî tî xakn̂e. Ero wa tî xakn̂e Ana.

19 Ero yinhîrî takî tî, enmayataw hara Ewkana komo takî tî paketken̂e pahxaxaro rma. Kporin komo poko tî nahwowatken̂e. Ero yinhîrî takî tî ceken komo pona cetken̂e hara Hama pona. Iito tak cipici yenaw takî tî xakn̂e Ewkana, Ana yenaw. Ero yimaw takî tî Ana ponaro xakn̂e Kporin komo.

20 Ero ke takî tî n̂etahsîyakn̂e. Ero yinhîrî takî tî ewrutopo me exitaw n̂ewruyakn̂e takî tî kîîrî ciki. Samuew me tî nosohcekn̂e. On wara tî kekn̂e, Kporin komo yakro kîmtapotai moso tîmtopo poko owya, kekn̂e tî. Ero ke Samuew me tî nosohcekn̂e.

21 Ero yinhîrî takî tî cekn̂e xa hara Ewkana Kporin komo mîn yaka tookuthîrî puntho yakn̂iso xa hara. Yicimn̂ipuntaxera tî nakn̂iyakn̂e Kaan ya tîmsom. Kaan yakro tîmtapotachonhîrî yaw roro cehtome marha tî cekn̂e, On wara men was amn̂e, kachonho yaw roro ha. Tîhyawno komo yakro rma tî cetken̂e.

22 Ana reha tî ka tohra xakn̂e ero yimaw. On wara tî kekn̂e ciin̂o ya, Amn̂e mak kmokyas awakro so moomo yahsîpînkache mak kîmxîkrî ya. Ero yimaw tak moso cik waar̂asî oyakro. Kporin komo ya tak wîmyasî. Iitono ro me tak wiir̂asî Kporin komo mîn yawno me eroromero, kekn̂e tî.

23 Taa, kekn̂e tî iin̂o, awanme ro mak esko. Tanî rma ka esko moomo tahsîpînkaxî ro. Tîmtapotachonhîrî yaw roro rma moso ciki n̂irpe Kporin komo, kekn̂e tî. Ero ke cewton po rma ka xakn̂e Ana. Tîmrerî ciki tî wokpekn̂e roro moomo tahsîpînkaxi ro.

24 Ero ke moomo yahsîpînkache tak tîmrerî takî tî naar̂akn̂e Kporin komo mîn yaka Siro pono yaka. Wahrai rma ciki tî mîk naar̂akn̂e. 3 bui marha tî naar̂akn̂e. Puruma marha tî naar̂akn̂e akihxapu 22 ritru wicak ha. Uupa yukun marha tî naar̂akn̂e cewn̂e een makî. Ero warai tî naar̂akn̂e Ana Kporin komo mîn yaka.

25 Taa, paaka komo waihketken̂e. Ero yimaw takî tî rikomo naar̂akn̂e Eri yaka.

26 On wara tî kekn̂e yîwya, Apa, pahxa wooxam meen̂akn̂e tan amîtwo, Kporin komo yakro tîmtapotaxmu, noro rma ow ha. Yaaro tan wîîkesî.

27 Moso poko kîmtapowakn̂e Kporin komo yakro, Omrerî cma re mîmyas Apa, wîîkekn̂e. Oyewehce ham okre. Enko xe moso, omrerî rma nîmye owya.

28 Ero ke Kporin komo ya wîmyas hara Noro yanton me tak ehtome. Eroromero wîmyasî yîwya, waihtopo pona roro, kekn̂e tî. Ero wa tî kekn̂e Ana Eri ya. Ero yinhîrî takî tî iito rma tî xatken̂e Ewkana komo, Kporin komo poko tî nahwowatken̂e. Ero wa tî xatken̂e.