Taa, pahxa tî on wara xatken̂e Ixaw Yana komo, yukurunpeno rin̂e komo makî tî xatken̂e n̂examro panatanmekn̂e me. Ero wa exitaw so tî rooma poko tî xatken̂e okwe. Ero yimaw tî Beren pono xakn̂e, Xuta rowon pono. Noro takî tî cekn̂e Moabe rowon pona esekenmaxi. Yipici marha tî cekn̂e, yumumuru komo marha tî asakno roro rma.

2 Erimereke tî mîk xakn̂e iina tîtosom yosotî. Noemi tî xakn̂e yipici yosotî, Maron, Kir̂on, ero wa xakn̂e yumumuru komo yosot hara. Eprata pono tî mîkyam xatken̂e, Beren pono kom ha, Xuta rowon pono kom ha. N̂examro tî cetken̂e Moabe rowon pona. Iina takî tî n̂esekenmetken̂e.

3 Iito exitaw so takî tî Erimereke pen tak waihyakn̂e okwe Noemi yin̂onho pen okwe. Noemi yaw rma tî xatken̂e yîmrerî komo asakî rma.

4-5 N̂examro takî tî nahsîyatken̂e Moabita komo wosîn cipici me so. Ohpa tî xakn̂e anarî pici yosotî, Huce tî xakn̂e anarî pici yosot hara. Pahkî tî xatken̂e iito 10 cimn̂ipu ha tî. Iito rma exitaw so Noemi mretho pen komo marha tî waihyatken̂e okwe, Maron pen, Kir̂on pen marha. Ero wa tî waihyatken̂e. Ero ke takî tî Noemi yin̂o exihra takî tî xakn̂e, yîmrerî komo exihra marha tî xatken̂e. Ero wa thakwa tî xakn̂e okwe.

6 Ero yinhîrî takî tî Kporin komo yanan yekaci n̂encekn̂e Noemi. Tîyanan komo takî tî nakronome Kporin komo yînahrî komo ke, kacho tî n̂encekn̂e Moabe rowon po rma cexitaw so. Ero ke cemyawno takî tî n̂enkayakn̂e Noemi tîtotome takî Moabe rowon poi. Woxin komo marha tî n̂enkayatken̂e cemyawno komo noro yakro tîtotome so.

7 Ero ke twoxin komo yakro rma takî tî cekn̂e Noemi cekenhîrî komo poi. Esama yaw tî cetken̂e Xuta komo yesamarî yaw.

8 Esama yaw tîcetaw so on wara takî tî kekn̂e Noemi twoxin komo ya, Ai okopuci komo, etocoko hara amyamro asakî rma. Anocwan komo yeken pona etocoko hara. Kporin komo awakronomacowpe so. Aan̂onhîrî pen komo makronometken̂e, ow marha makronometken̂e ero wa xa marha awakronomacowpe so Kporin kom hara.

9 Anarî tak nîmpe hara Kporin komo, aan̂o komo, aweceton̂e komo me ha, kekn̂e tî Noemi yîwya so. Ero yinhîrî twoxin komo tî n̂ewcokekn̂e. N̂examro takî tî nîwracetken̂e tî kar̂pe.

10 On wara tko tî ketken̂e yîwya, Awakro rma cma re amna ces apoyino komo cheka, ketken̂e tî yîwya.

11 On wara tko tî n̂eyukyakn̂e Noemi, Apohana okopuci komo, etocoko xa matko awekenhîrî komo pona hara. Ahce kacho oyakro mîmokyat ha re? Omrerî komo ma re n̂ewruyatu xa hara aan̂o komo me tak ehtome so amn̂e?

12-13 Pîra ro mak, awekenhîrî komo pona etocoko hara okopuci komo, nocwakomo me tak was okwe anarî yahsîrî yarohra on̂iyo xa hara. Rikomo yon me rma tko na wai, wîîke rma na anarimaw, on̂iyo xa hara na nai oroto kosope. Ero yinhîrî kewruya xa hara na asakî ro omrerî komo ciki, wîîke rma na. Ero wa oyexitaw ketaw ha re owya omrerî komo por̂mamrî mîtwo ma re mat ha? Anarî yahsîra ma re matu aan̂o komo xa hara omrerî pîn kom ha? Pîra okopuci komo. Mesemetanmekyaxe rma ha re okwe. Owî xa kesemetanmetîkesî tak okwe. Oyemetanmetîkekn̂e xa Kporin komo okwe, kekn̂e tî. Ero wa tî kekn̂e Noemi.

14 Ero ke tî nîwracetken̂e xa hara. Ero yinhîrî takî tî tînoci n̂ewcokekn̂e xa hara Ohpa. Taa, kîwce haram, kekn̂e tî. Huce reha tî xakn̂e tînoci yakro rma.

15 Enko xe, kekn̂e takî tî Noemi yîwya, awakrononhîrî tak ces hara tpoino komo cheka. Ponaro ehtoponhîrî komo yaka marha cesî. Ero ke noro yakro etoko amoro hara, kekn̂e tî.

16 On wara tko tî n̂eyukyakn̂e Huce yîmtaka, Ohyai etoko, etîramak hara, kahra ro mak esko owya. Awtotopo pona xa matko kmokyasî awakro, mesekenmesî tak amn̂e iina xa marha kesekenmesî. Apoyino komo tak wiir̂asî opoyino me. Ponaro awehtopo marha wiir̂asî ponaro oyehtopo me hara.

17 Ahto na mîwaiya amn̂e iina xa marha kwaihyas ow hara. Iina xa marha oyokoputho yahru xe wasî iitono komo ya. Owîrîmape ro mak Kporin komo awahsîpînketaw owya. Owaitopo yanme mak kahsîpînkesî tak amn̂e, kekn̂e tî yîwya.

18 Taa, yîmtapotarî yentache on wara takî tî kekn̂e Noemi tîhnaw, Tmoku xe ro mak nai ham noro anarme kan̂e pîn me ro mak, kekn̂e tî. Ero ke, Etok hara, kahra takî tî xakn̂e yîwya. Ero wa tî xakn̂e.

19 Ero ke takî tî asakno roro rma cetken̂e Beren pona. Ero pona epatakache so tak n̂eserepoketken̂e takî tî iitono komo. On wara tî ketken̂e wooxam komo iitono kom ha, Noemi xa ma mîkro? ketken̂e tî.

20 On wara tko tî n̂eyukyakn̂e noro, Noemi me ow etacira tak ehcoko. Mara me mak tak ow etacicoko. Oyemetanmekyakn̂e xa Kariti ro okwe.

21 Xehxa owcetaw cemyawnoi xa kîwcekn̂e. Emyawnomra ro mak tak oyekyas hara Karitî ro. Ahce kacho Noemi me ow metahcat hara? Cemetanmesom me xa Kporin komo oyenpe ham. Karitî ro, kacho Mîk noro oyemetanmekyasî, kekn̂e tî. Ero wa tî kekn̂e Noemi.

22 Ero wa tî Noemi mokyakn̂e hara Moabita komo chewnonho. Huce yakro tî mokyatken̂e Moabita wosîn yakro. Beren pona tî n̂epataketken̂e sepata yeperîrî yenmetopo me exitaw, yihcitopo me exitaw mak ha ka. Ero yimaw xa tî mokyatken̂e iina.