Taa, Xoswe pen waipuche takî tî on wara ketken̂e Ixaw Yana komo Kporin komo ya, Ai Apa kah yawno, Kananew komo waparî me tak amna cesî. Ero wa amna cetaw onoke xa nîîce amna yaan̂e me? ketken̂e tî.

2 On wara tî n̂eyukyakn̂e Kporin komo, Xuta yepamtho komo xa tocowpe awan̂e komo me. Yîwya so war̂mapoi Kananew komo, kekn̂e tî.

3 Ero yinhîrî on wara takî tî ketken̂e Xuta yepamtho komo Simeaw yepamtho komo ya takno komo ya ha, Amna yakronomaxi cma re mîmokyaxe amna rowon pona, amna nahsîrî pona ha. Amna yakro cma re cetar̂mexe Kananew komo yakro. Ero yinhîrî awakro so ces amna arowon komo pona awakro so hara, ketken̂e tî. Ero ke Xuta yepamtho komo yakro tî cetken̂e Simeaw yepamtho komo.

4 Ero yinhîrî tak Kananew komo yar̂maxi cetken̂e Xuta yepamtho komo, Peresew komo yar̂maxi marha cetken̂e. Yuu yuu ketken̂e takî tî n̂examro wece. Ero ke tak tî ar̂mapono n̂iir̂akn̂e Kporin komo Xuta yepamtho komo ya. Beseke po tî waihkano n̂iir̂atken̂e. 10.000 waihketken̂e Kananew pen komo iito okwe.

5 Iito Beseke po marha tî Aton̂i Beseke n̂een̂atken̂e. Noro yakro marha n̂etar̂metken̂e. Kananew komo tî mîkyam noro sowtatun komo, Peresew komo marha. N̂examro pen tî nar̂metken̂e.

6 N̂emahciyakn̂e takî tî Aaton̂i Beseke. Wenari tko tî cetken̂e Xuta yepamtho komo. Nahsîyatken̂e takî tî. Noro yamorî yîmheto tî nîhkocetken̂e ececoka rma oko, yîhtarî yîmheto marha tî nîhkocetken̂e ececoka xa marha oko.

7 Ero yinhîrî on wara tî kekn̂e Aaton̂i Beseke, Pahxa 70 kayaritomo komo pen onahrî mîtîtho mak namekyatken̂e tînahrî me, onahrî yapon makataka armaxaputho mak. N̂examro pen yamorî yîmheto wîhkocekn̂e, yîhtarî yîmheto komo marha. Ero ke tak Kaan n̂esepanîyasî opoko. N̂examro pen wiirakn̂e, ero wa xa marha oriya hara mî, kekn̂e tî. Ero yinhîrî Xerusaren pona takî tî noro naar̂atken̂e. Iito takî tî waihyakn̂e. Ero wa tî xakn̂e Aaton̂i Beseke pen okwe.

8 Ero yinhîrî Xerusaren pono komo waparî me takî tî cetken̂e xa hara Xuta yepamtho komo. Iitono pen komo tî waihketken̂e kacipara imo ke. Yîmînthîrî komo tî nakn̂iyatken̂e.

9 Ero yinhîrî takî tî Xuta yepamtho komo cetken̂e îh ken̂arî pona hara, suu n̂ixan pona marha, îh ken̂arî pona marha oesce n̂ixan pona ha. Iitono komo yar̂maxi tî cetken̂e Kananew pen kom ha.

10 Ebron pono pen komo yar̂maxi marha tî cetken̂e. Kiriace Ahba, kachonho rma mîn Ebron ha. Kananew komo rma mîkyam xatken̂e iitono komo. Sesai pen waihketken̂e, Aiman pen marha, Tawmai pen marha, n̂examro pen tî waihketken̂e.

11 En̂exa takî tî cetken̂e Tebi pono pen komo yar̂max hara. Kiriace Sepe kachonho rma mîn Tebi, ewto ha.

12 Ero yimaw on wara takî tî kekn̂e Karebe, Onoke xa sowtatu komo naar̂a Kiriace Sepe pono komo yar̂maxi? Iitono komo yar̂man̂enho ya oyemsîrî tak wîmyasî yipici me, kekn̂e tî.

13 Ero ke Ocn̂iew takî tî sowtatu komo naar̂akn̂e iina ar̂mano riso. Kenasa mumuru mîk Ocn̂iew, Karebe yakno mumuru, mahtîkîthîrî mumuru ha. Iitono pen komo tak waihketken̂e. Ero ke takî tî cemsîrî nîmyakn̂e Karebe yîwya yipici me. Aksa noro yemsîrî yosotî.

14 Ero yinhîrî on wara tî xakn̂e Aksa, ciin̂o yaka tî cekn̂e, on wara tî kekn̂e yîwya, Mararî xe cma re nas amna, kasko men apapa ya, kekn̂e tî. Ero yinhîrî takî tî tîîm yaka cekn̂e Aksa rma. Nîhcekn̂e tak buhu mkawnonho. On wara tî kekn̂e Karebe yîwya, Ahce xe mai okopuci? kekn̂e tî.

15 Apa, kekn̂e tî, Owî cma re mîwakresî. Suu n̂ixan ka mîmyakn̂e orowon me. Tuuna pîtho xe cma re was hara. Ero cma re mîmyas owya, kekn̂e tî. Ero ke takî tuuna pîtho nîmyakn̂e cemsîrî ya. Yaasîno nîmyakn̂e, uuman marha. Ero wa nîmyakn̂e Karebe.

16 Taa, you warai ken̂arî po ka xatken̂e Kenew pen yepamtho komo. Moises pen tamrunho yepamtho komo tî mîkyam xatken̂e. Xuta yepamtho komo yakro tak n̂examro cetken̂e Xuta yaxawan pona. Ero pono komo cheka takî tî n̂esekenmetken̂e suu n̂ixan pona, Araci mîtkoso ha.

17 Ero yinhîrî takî tî Xuta yepamtho komo cetken̂e xa hara Simeaw yepamtho komo yakro, tîyanan komo yakro ha. Kananew komo yar̂maxi xa hara tî cetken̂e Sepace pono komo yar̂max ha tî. Iitono pen komo takî tî waihketken̂e ahnoro. Yîmînthîrî komo tî nakn̂iyatken̂e ahnoro. Ero ke Ohma kacho me takî tî xakn̂e ewtotho ha.

18 Kaasa pono pen komo marha tî nar̂metken̂e Xuta yepamtho komo, Askaron pono pen komo marha, Ekron pono pen komo marha. Ero komo takî tî nahsîyatken̂e ewto komo, ero komo mîtwono marha nahsîyatken̂e woskara kom ha.

19 Taa, Kporin komo tî xakn̂e Xuta yepamtho komo yakronoman̂e me. Ero ke îîpî chewno pen komo yekenho tak nahsîyatken̂e ceken komo me. Woskara pono komo tko tî ar̂mara xatken̂e okwe tarara yosom me exirî ke so, pehu akîhtoxapu yosom me ha. Ero ke tî n̂examro yar̂mara xatken̂e okwe Xuta yepamtho kom ha.

20 Ebron tî nîmyatken̂e Karebe ya Moises penî mtapotachonho yaw roro rma. Noro reha tî waihkekn̂e Enake pen mumutho komo osorwaw rma.

21 Xerusaren pono komo poko reha tî n̂ehn̂etken̂e Benxamin yepamtho komo. Waihkara tî xatken̂e iitono komo okwe Xebusew yepamtho kom ha. Iito rma naxe oroto Xerusaren po rma Benxamin yepamtho komo chew.

22 Taa, Xose yepamtho komo takî tî cetken̂e Betew pono komo yar̂maxi. N̂examro tî nakronomekn̂e Kporin komo cetaw so.

23 On wara tî xatken̂e, ewto pono yerasman̂e komo tî ka n̂en̂epetken̂e Betew pona. Rus kachonho rma mîn Betew kacho.

24 Ewto pahnoke cexitaw so ewto poi epatakaxapu tî n̂een̂atken̂e erasman̂e komo, Ero ke on wara tî ketken̂e yîwya, Ai oyakno, ewto pona awtotopo komo cma re menpes amna ya. Ero wa awexitaw akurunpes amna, ketken̂e tî.

25 Ero ke ewto pona totopo komo tî n̂enpekn̂e yîwya so. Ero yinhîrî ewto pononho pen komo takî tî waihketken̂e kacipara imo ke. Taan̂enhîrî komo waihkara reha tî xatken̂e. Iyanan komo meero tî waihkara xatken̂e.

26 Ero yinhîrî noro rma takî tî cekn̂e Etew komo cheka. Iito takî tî ewto n̂iir̂akn̂e hara. Rus me takî tî ero nosohcekn̂e hara. Ero wa kacho me rma nasî yin̂irithîrî ewto oroto. Ero wa nasî.

27 Manases yepamtho komo marha tî waihkara xatken̂e tîrowon pono komo. Yaake rma tî xatken̂e iitono komo, ewto pono komo, ar̂man me okwe. Bece Sean pono komo, Taanake pono komo, Toro pono komo, Ibreaw pono komo, Mexito pono komo, iitono komo waihkara tî xatken̂e okwe. Ewto mîtwono komo marha tî waihkara xatken̂e. Tan thakwa nas amna, ketken̂e tî Kananew komo iitono kom ha.

28 Pahkî exiche so takî tî kar̂pe xatken̂e Ixaw Yana komo. Ero yimaw tak Kananew komo rma re napicketken̂e epeman me. Waihkara so tko tî xatken̂e okwe.

29 Kese pono komo marha tî waihkara xatken̂e Eprain yepamtho kom hara okwe. Kananew komo marha mîkyam xatken̂e. Iito rma xatken̂e Eprain yepamtho komo chew rma.

30 Kitîron pono komo waihkara marha xatken̂e Seburon yepamtho komo okwe, Naarow pono komo marha waihkara xatken̂e. Iito rma xatken̂e Seburon yepamtho komo chew. Ero pono komo rma re napicketken̂e epeman me, waihkara xatken̂e okwe.

31 Mîn hak pono komo waihkara marha xatken̂e Ase yepamtho komo. Ako pono komo, Siton pono komo, Arabe pono komo, Akisibi pono komo, Ewba pono komo, Apeke pono komo, Heobe pono komo. Iitono komo waihkara xatken̂e okwe Ase yepamtho komo.

32 Ero ke Kananew komo chew mak xatken̂e okwe Ase yepamtho komo. Waihkara so tî xatken̂e okwe.

33 Bece Semes pono komo waihkara marha xatken̂e Nahtari yepamtho kom hara, Bece Anace pono komo waihkara marha. Kananew komo marha mîkyam xatken̂e. Yîchew so mak xatken̂e n̂examro hara, Nahtari yepamtho komo chew ha. Napicketken̂e makî tî yîchew so cehtopo komo, epeman me mak napicketken̂e. Ero wa tî xatken̂e Nahtari yepamtho komo.

34 On wara tî xatken̂e Taan yepamtho kom hara, îîpî chew thakwa mak n̂esekenmetken̂e. Iina rma n̂examro pen n̂en̂epeteken̂e Amohew komo. Iitono ro me thakwa xatken̂e capahno pona mokrî yarohra so. Ero wa tî xatken̂e Taan yepamtho kom okwe.

35 Anarî ewto po so marha xatken̂e Amohew komo rma, Erese Yîpîn po, Aixaron po, Sawbin po. Iitono komo marha xatken̂e cekuswem wara ar̂man me ro mak okwe. Pahkî exiche Xose pen yepamtho komo tak kar̂pe n̂ehtîketken̂e. Ero yimaw takî tî tanton me so mak ero pono komo iitono komo n̂iir̂atken̂e.

36 On wara xakn̂e Amohew komo rowon wokpan, Akrabin pono mîn xakn̂e. Miya rma xakn̂e Sera mkaino pona roro. Ero wa xakn̂e Amohew komo rowon wokpan ha.