Taa, Xoswe yehtoponho tan wekatîmyas awya so. Moises yakronoman̂e me makî ka xakn̂e Xoswe. Ero yinhîrî tak waihyakn̂e Moises pen okwe, Kaan yantonînho xa. Waipuche takî tî Kporin komo nîmtapowakn̂e Xoswe yakro hara. On wara tî kekn̂e yîwya,

2 Ai Xoswe, Moises pen tak waihye okwe, oyantonînho pen. Ero ke on wara wîîkes awya, awemyawno komo tak enkacoko awtotome so tak Xotaw yeco pona. Ahnoro Ixaw Yana komo yakro rma etocoko Kanan pona, awya so wîmyasî ero pona.

3 Roowo tak mapikyaxe amn̂e miya xiya wara. Ahnoro anapikîthîrî komo wîmyasî awya so. Ero wa wîîkekn̂e Moises pen ya. Ero ke tak wîmyasî awya so omtapotachonho yaw roro rma.

4 Axawa imo yen̂etî pona rorono mahsîyaxe aweken komo me, Ribanu wokpan yaka rorono marha. Eepu imo yecihtaka rorono marha mahsîyaxe, Ewpratesî yecihtaka rorono ha, tuuna imo yecihtaka rorono marha, oesce n̂ixan ha. Etew komo yekenho mahsîtîkexe ahnoro.

5 Ayopono komo mera so ro mak naxe aaxatî pîn komo miya roro awaitopo komo pona roro. Moises pen wakronomekn̂e ero wa xa marha kakronomes hara. Awahsîpînkara ro mak was ha, anomura marha wasî.

6 Ero ke kar̂pe xa men esko. Ahwokan me ro mak esko. Amoro xa moxam ya mekamyasî yîrowon komo. N̂examro porin pen komo ya wîîkekn̂e, Kanan wîmyasî awya so, wîîkekn̂e. Yaaro tan wîîkesî, cemaro pîn me ro mak, wîîkekn̂e yîwya so. Ero rma tak mekamyasî amoro moxam ya.

7 Ero ke kar̂pe xa esko. Ahwokan me ro mak esko. Apanatanmetopo komo men ewetko ahnoro. Oyanton pen n̂ekatîmyakn̂e awya so, Moises pen ha. Ero ewetko etowîn me ro mak. Kaari wara etowra ehcoko, poowa wara etowra marha ehcoko. Ero wa esko ehn̂an me ro mak tak awehtome ahna so na awcetaw.

8 Amtapotakî roro on apanatanmetopo poko, karita yawno poko. Ero ponaro esko miya roro katpanaw, kosope marha. Ponaro xa esko ewetîtome tak awya. Watohnî me ro mak ewetko ero yaw mewrexapu. Ero wa awexitaw ehn̂an me ro mak masî. Pîra wai ham okwe, kahra ro mak tak masî ahce na poko awexitaw.

9 Owî rma kpanatanmekyasî kar̂pe awehtopo poko. Ahwokan me ro mak esko, wîîkes awya. Kar̂pe ro mak esko, tahwore marha. Erasîn me ro mak esko, ahwokan me marha. Aporin komo Kaan Ow ha. Awakro wasî ahna so na awcetaw, kekn̂e. Ero wa kekn̂e Kporin komo Xoswe ya.

10-11 Ero ke on wara kekn̂e Xoswe Ixaw Yana yantoman̂e komo ya, Apoyino komo chere etocoko. On wara kacoko yîwya so, Ai oyakno komo, aporan komo tak ciicoko. Osorwaw ro enmapuche tak Xotaw tîtwacexe. Eeco pona tak tîhcexe Aporin komo Kaan nîmrî pona. Ero tak mahsîyaxe aweken komo me, kacoko yîwya so, kekn̂e. Ero wa tî kekn̂e Xoswe antomano rin̂e komo ya.

12-13 Ero yinhîrî Huben yepamtho komo yakro nîmtapowakn̂e hara Xoswe. Kace yepamtho komo yakro marha, Manases yepamtho poyinonho komo yakro marha. On wara kekn̂e yîwya so, Moises penî mtapotachonho ponaro men ehcoko amyamro oyakno komo. On wara kekn̂e noro pen awya so, Aaxatî pînînhîrî pen komo nar̂mapekn̂e Aporin komo Kaan awya so, Xotaw xehxan pen kom ha. Onî rma nîmye awya so aweken komo me, kekn̂e awya so.

14 Ero ke tanî rma tînomcoko apici komo, amxîkrî komo, awoh komo. Xotaw xehxa rma tînomcoko. Amyamro makî ka etocoko awakno komo poturme. Kîrkomo mak etocoko, karitî komo, erasîn kom ha. Akurun komo aacoko. Awakno komo ka akronomacoko eken komo yahsîtopo poko.

15 Aweken komo nîmye Aporin komo Kaan awya so ero wa xa marha n̂examro yeken nîmyas hara yîwya so. Ero pona tak n̂esekenmexe. Iina esekenmache so mak tak mîmokyaxe oona hara awekenî ro komo pona tak, Moises pen nîmîtho pona. Xotaw xehxan pona mîmokyaxe kaamo yepatakacho n̂ixan pona, kekn̂e. Ero wa tî kekn̂e Xoswe yîwya so.

16 On wara n̂eyukyatken̂e n̂examro, Taa, amtapotarî amna n̂ewehcasî. Amna mantomesî ero poko rma amna nasî. Amna men̂epesî iina rma amna ces ha.

17 Moises pen amna n̂ewehcakn̂e ero wa xa marha amna awewecas hara. On wara mak awexi xe nas amna, Moises pen nakronomekn̂e Kporin komo Kaan ero wa xa marha awexi xe nas amna yînakronomarî me hara.

18 Amtapotarî yanwekn̂e exitaw, amtapotarî yewetîtîkan̂e pîn ha, noro penî kr̂a amna waihkesî. On wara mak kes amna awya kar̂pe xa esko, ahwokan me ro mak ha, ketken̂e. Ero wa ketken̂e yîwya Huben yepamtho komo, Kace yepamtho komo marha, Manases yepamtho poyinonho komo marha.