Taa, ero yinhîrî takî N̂ebu Yîpîn takî tî nawnukyakn̂e Moises. Moabe woskaran poi cekn̂e îh pona. Miya tî nawnukyakn̂e meretkoso xa, Piska meretkoso xa. Xer̂ko yecentono mîn Piska. Iito exitaw tî roowo n̂enpekn̂e Kporin komo yîwya. Miyanî rma tî n̂enpekn̂e yîwya. Xireace tî ka n̂enpekn̂e yîwya. Miya rorono tî n̂enpekn̂e Taan pona rorono.

2 Nahtari yepamtho komo yeken marha tî n̂enpekn̂e yîwya, Eprain yepamtho komo yeken marha tî, Manases yepamtho komo yeken marha tî. Xuta yepamtho komo yeken marha tî n̂enpekn̂e yîwya miya rorono, tuuna yecihtaka rorono, oesce n̂ixan ha.

3 Suu n̂ixan marha tî n̂enpekn̂e yîwya. Xer̂ko Woskaran marha tî n̂enpekn̂e, Kuum Warai Ken̂arî, ewto ha. Soa pona rorono marha tî n̂enpekn̂e yîwya. Ero warai tî n̂enpekn̂e Moises ya.

4 Enpoche yîwya on wara tî kekn̂e Kporin komo yîwya, Ero ha Ixaw Yana komo yeken me tahsîsom. Ero poko wîîkekn̂e Abraaw ya, Isake ya, Xako ya. On wîmyasî awepamthîrî komo ya amn̂e eken komo me. Yaaro xa tan wîîkesî, cemaro pîn me ro mak, wîîkekn̂e yîwya so. Ero tak wenpes awya. Awewru ke rma meen̂asî. Ero pona tko watohra masî, kekn̂e. Ero wa tî kekn̂e Kporin komo Moises ya.

5 Ero yinhîrî tak Moises pen takî tî waihyakn̂e. Kporin komo yantonînho xa mîk waihyakn̂e okwe. Moabe rowon po rma waihyakn̂e Kporin komo mtapotarî yaw roro rma.

6 Okoputhîrî tî nahruyakn̂e Kaan. Woskara po tî nahruyakn̂e Moabe rowon po, Bece Peo yemtacho po ha. Ahrutoponhîrî tko enîhra ro mak naxe tooto komo, oroto meero enîhra naxe.

7 Poritomo me xa xakn̂e Moises twaihyataw, 120 cimn̂ipu tî xakn̂e ewrutoponhîrî. Cewxîrîtpe exihra rma tko tî xakn̂e, ekar̂kan me marha tî xakn̂e.

8 Noro waipuche Ixaw Yana komo nîwracetken̂e yîpînîn yaw. Moabe woskaran po rma nîwracetken̂e. 30 kaamo n̂enmayatken̂e tîwratarî komo poko. Ero wa nîwracetken̂e.

9 Taa, takîhso xa tak xakn̂e Xoswe hara Nun mumutho. Kaan Yekatî yanme xakn̂e takîhso. Pahxa rma yîhtîpîrî nahsîyakn̂e Moises takîhso ehtome. Ero ke yîmtapotarî ponaro tî xatken̂e Ixaw Yana komo. Kporin komo mtapotachonho yanme rma noro ponaro xatken̂e, Moises ya kekn̂e ero yanme ha.

10 Ero yinhîrî Ixaw Yana komo weronoman̂e komo rma re xatken̂e anarî komo. Moises pen warai xa exihra tko xakn̂e. Noro yakro tî Kporin komo nîmtapowakn̂e, yîwya ro tî kekn̂e centaxmu me.

11 Cirihnî n̂iir̂akn̂e noro pen emapona roro. Kporin komo yanme rma n̂iir̂akn̂e, Exitu po cexitaw so. Paraw yemetanmetopo n̂iir̂akn̂e, noro maywen komo yemetanmetopo marha, yîrowon komo yîwîrîmacho marha. Ero wa cirihnî n̂iir̂akn̂e Moises pen.

12 Kar̂pe xa Kaan yehtopo n̂enpekn̂e noro eraspetono ro mak kopi. Keserepokacho komo xa mîn Moises n̂enpekn̂e Ixaw Yana komo ya. Ero warai n̂iir̂akn̂e noro. Ero wa xakn̂e Moises pen. Iina mak nai ekatîmtopo.