Ero yinhîrî tak nîmtapowakn̂e xa hara Moises Kaan yakrono ro. Kporin komo ya Ixaw Yana komo yakronomacho n̂ekatîmyakn̂e waipîra cexitaw rma ka.

2 On wara kekn̂e n̂examro poko, Sinai Yîpîn poi mokyakn̂e Kporin komo. Sei poi Ixaw Yana komo weipekn̂e enmarî wara ro mak. Paran Yîpîn po cexitaw weipono n̂iir̂akn̂e. Takronoi xa mokyakn̂e tînakir̂wamathîrî komo ke. Mer̂pora ro mak xatken̂e akrono komo. Kporin komo yemyaw xakn̂e iyanan komo panatanmetopo. Kar̂me nahsîyakn̂e. Wehto wara ro mak xakn̂e n̂examro panatanmetopo.

3 Ixaw Yana komo xatî ro xa Mîkî. Awemyaw mak naxe ahnoro Noro nakir̂wamatho komo. N̂examro n̂eremexe awamrinaka. Iito tak amtapotarî n̂encexe.

4 Amna panatanmekn̂enho mîk Moises. Yîmtapotachonhîrî nasî Xako yepamtho komo yaw eroromero.

5 Xesurun komo kayaritomon me xakn̂e Kporin komo. Ixaw Yana komo yantoman̂e komo n̂esenmekyatken̂e ahnoro tribu komo yakro rma.

6 Taa, Huben yepamtho komo yehtopo wekatîmyasî. Waipîra n̂ehcowpe n̂examro, Huben yepamtho komo. Kar̂pe n̂ehcowpe miya roro. Asak mak exihra ro mak n̂ehcowpe yîkîrîn komo, kekn̂e.

7 On wara kekn̂e Xuta yepamtho komo poko hara, Apa kah yawno, Xuta yepamtho komo mtapotarî cma re mencesî. Iyanan komo yaka arko. Tamorî ke rma cewton komo nukurunpesî noro. Amoro rma Apa n̂examro yukurunpeko. Yiixatî pîn komo en̂epeko, kekn̂e.

8 Ero yinhîrî Repi yepamtho komo poko nîmtapowakn̂e hara. On wara kekn̂e, Apa, akuknon n̂expe aponarono ro yaw, Urin, Tumin kom ha. N̂examro mukukmekn̂e Masa po. Meriba po marha yîmtayeyukn̂e wara mîxakn̂e.

9 On wara kan̂e wara xatken̂e n̂examro, Apapa komo yenîhra nas amna, yememe komo yenîhra, kan̂e wara. Oyakno komo mîkyam okwe, kahra xatken̂e. Tîmxîkrî komo poko meero ero wa kahra xatken̂e. Amtapotarî ponaro xa xatken̂e. Oyewecataw awya so kakronomexe so, kacho yahsîpînkara ro mak xatken̂e.

10 Xako yepamtho komo nîhcamhokexe awya yîtwermacho komo poko. Ixaw Yana komo panatanmekyaxe amtapotarî poko. Kotoporem nakn̂iyaxe aweken mîtkoso. Awya tîmsom yakn̂itopo pona marha tokuthîrî komo pun nakn̂iyaxe takn̂itîkaxmu ha.

11 Etkurera ro mak n̂examro yemyawno cirko Apa. Tawake esko yîn̂irithîrî komo poko. Waparî komo mokuche etapakî petî poko. Ero wa etapakî yiixatî pîn komo awomra ro mak tak ehtome so, kekn̂e.

12 Ero yinhîrî on wara kekn̂e Benxamin yepamtho komo poko hara, Yiixe xa Kporin komo yehtopo komo mîkyam. Noro mîtwono me xa naxe. Ero ke erasîra ro mak naxe. Kaamo poko roro yukurunpen̂e komo me nasî Kporin komo. Noro yenawno wara rma n̂epokarexe. Ero wara naxe amn̂e Benxamin yepamtho komo, kekn̂e. Ero wara kekn̂e Moises.

13-14 Ero yinhîrî on wara kekn̂e noro Xose yepamtho komo poko hara, N̂examro rowon yakir̂waman̂e me exi xe wasî Kporin komo. Cepethîkem ke akir̂waman̂e me exi xe wasî, kah yawno ke. Cicakî ke marha akir̂wama xe wasî yîwya. Cepethîkem ken̂e ciri xe marha wasî yîrowon komo yuhnawno ken̂e ha. N̂examro natîrî yepetanmekpo xe marha wasî yîwya kaamo ke. Nuun̂i po roro marha n̂examro yakronoman̂e me exi xe wasî.

15 Pahxanînhîrî mîn îîpî komo. Ero yipu yai towxapu ke rma n̂examro wakre xe wasî yîwya. Eroromerono marha mîn matîwînî komo. Ero yipu yatumnawnonho towxapu ke marha n̂examro wakre xe wasî Kporin komo ya, cepethîkem ke ha.

16 Roowo chew nasî cepethîkem miya rma. Ero yipu ke n̂examro wakre xe wasî Kaan ya mîyan ke rma. Peen yarî chew n̂esenpekn̂e Noro xa n̂examro wakren̂e me exi xe wasî. Xose yepamtho komo tîpîrî pona tmohsom wara exi xe waasi yînmîthîrî. Cewyaro xakn̂e Xose takno komo chewra. Noro yepamtho tîpîrî pona tmohsom wara exi xe wasî Kporin komo ya wakretopo komo.

17 Yukurumîkno me xa naxe n̂examro bui wara, poturme me ewruxapu wara. Tmeretkem wara naxe bui wara, okno pîn wara. Tmeretîrî warai ke rma nar̂mes anarî yana komo roowo yenatîtopo pona roro. Ero wa naxe Eprain yepamtho komo, 10.000 me roro yukuknomaxapu komo. Ero wa xa marha naxe Manase yepamtho kom hara, 1.000 me roro yukuknomaxapu kom hara, kekn̂e.

18 Ero yinhîrî on wara kekn̂e Seburon yepamtho komo poko hara, Ahwotacoko amyamro Seburon yepamtho komo. Mîîmo yai awepataketaw so ahwotacoko. Isaka Yana komo, awya so wîîkes hara, amyamro xa ahwotacoko amîn komo yaw rma awexitaw so.

19 On wara kexe n̂examro anarî yana komo ya, Amohcoko îh pona, kexe. Mokuche so Kporin komo ya tîmsom nakn̂iyaxe iito kir̂wan̂he cexirî ke so. Cepethîkem pen nasî tuuna kwaw. Cepethîkem marha nasî ceseyamso axawa chew. Ero yipu rma n̂examro nahsîyaxe, kekn̂e.

20 Ero yinhîrî on wara kekn̂e Kaace yepamtho komo poko hara, Kir̂wan̂he xa nasî Kaace yepamtho komo yeken yîhreman̂e. Reaw wara naxe n̂examro iito ceken komo po. Tîîxatî pîn komo yaporî kararakexe, kanahkararakexe marha oko.

21 Roowo yîraconketaw yîwya so n̂examro xa n̂ihciyatken̂e ceken komo yahsîtopo. Panatanmekno komo yeken n̂ahsîyatken̂e ceken komo me. Kaace yepamtho komo marha mokyatken̂e Ixaw Yana yantoman̂e komo yesenmekyataw. Ero yimaw Kporin komo yanme xa en̂ekano n̂iir̂atken̂e. Ixaw Yana komo panaretken̂e ha. Ero wa xatken̂e Kaace yepamtho komo, kekn̂e.

22 Ero yinhîrî on wara kekn̂e Taan yepamtho komo poko hara, On wara naxe Taan yepamtho komo amn̂e, reaw xîkrî wara naxe, Basan poi tahronîmsom wara, kekn̂e.

23 Ero yinhîrî on wara kekn̂e Nahtari yepamtho komo poko hara, Cerepore xa naxe n̂examro Kaan nîmîtho ke. Kporin komo nwakretho xa mîkyam Nahtari yepamtho komo. Kaamo yemicitopo n̂ixan ahsîcoko aweken komo me, suu n̂ixan marha ahsîcoko, kekn̂e.

24 Ero yinhîrî on wara kekn̂e Ase yepamtho komo poko hara, Kaan nwakretho xa mîkyam Aase yepamtho komo, akno komo yopo, Xako mumuru yepamtho komo yopo xa. Takno komo nakronomarî me exi xe so wasî Ase yepamtho komo. Tîhtarî komo marha nukpacowpe katî kwaka.

25 Pehu me nas amn̂e ahtarî wom, bronse me marha nasî. Karitî me maxe miya roro waipîra ka awehtopo komo yecenarî, kekn̂e. Ero wa kekn̂e Moises noro re yepamtho komo poko.

26 Ero yinhîrî on wara kekn̂e hara Moises, Noro mak Mîkî Kaan, ponaro Xesurun komo yehtopo. Anarî exihra ro mak nasî Noro warai. Kah ratari xa mokyasî awakronomaxi so. Kaapu smunu mkaw mokyasî takîhsom me xa.

27 Eroromerono xa Mîk Kaan. Noro xa nas awetkurunpetopo komo me. Awahsîn̂e komo me nasî Noro yaporî eroromerono ha. Noro rma nar̂mapes aaxat pîn komo awya so rma. N̂examro pen wocoko, kes awya so.

28 Ero wa naxe Ixaw Yana komo amn̂e, cewyaro naxe anarî komo mîtwora. Tukuruye tko naxe iito erasîra. Tuuna pîtho nasî Xako yepamtho komo tunarî me. Mer̂pora n̂eperwasî puruma n̂examro mararîn pono, puruma warai komo marha. Twokye xa naxe iito yaxan ke uupa yukun ke ha. Yîrowon komo pona sararanasî cicakî kah yai.

29 Tawake xa maxe amyamro Ixaw Yana komo Kporin komo nukurunperî kaxi. Ahto katî nat anarî komo awarai komo xa marha, Kporin komo nukurunperî xa? Awecen̂an komo me nasî Noro, awakronoman̂e komo me marha. Akaciparan komo warai marha Mîk ha, kacipara warai Mîk, kayaritomo. Aaxatî pîn komo tak naxe awewetîn̂e me. Yîtîwîn pona so mîîcexe ponaro n̂examro yehtopo komo yakuhr̂aposo ahtarî ke. Ero wa n̂examro mar̂mexe, kekn̂e. Ero wa kekn̂e Moises Ixaw Yana komo poko, tribu komo poko.