Taa, ero yinhîrî on waano naar̂akn̂e Moises Ixaw Yana komo n̂entarî me etpoyino pîn n̂entarî me. Naatîkekn̂e yîn̂entarî komo me. On wara kekn̂e, Omtapotarî ka entacoko kah yawno komo, roowo pono komo marha. Omtapotarî xa entacoko on waano me taasom.

2 Owya kpanatanmetopo komo nasî tuuna wara tmohsom wara. Cicakî wara marha nasî omtapotarî, tuuna sararanasî pen pona atîhtaxan pona, ero wa nasî omtapotarî. Xii kesî n̂he tuuna anarimaw cuh pona ero warai xa tan omtapotarî.

3-4 Kporin komo yosotî tan wekatîmyas awya so. Kyopono ro xa Mîk Kaan, ponaro kehtopo kom ha, Toopu mak Mîk. Kir̂wan̂he ro mak nasî ahce wa so na kiitopo yîwya. Takîhso ro mak ciino n̂iir̂asî. Yaaro tîmtapotaxmu ro mak Mîk. Yaaro kiin̂e marha Mîk. Kir̂wan̂he ro mak nasî kpoko so.

5 Kicicme ro mak xatken̂e moxam Kporin komo wece. Tusmuye mak naxe kica. Noro xîkrî pînî ro mak n̂examro. Cekumxe mak nasî ehtopo komo, pataw exihra kica.

6 Ero wa ma mat ke Kporin komo poko? Camkîno komo mak amyamro ham okwe, akpîn komo okwe. Aporin komo pîn me katî nai Noro awya so? Aporin komo rma Mîk ha. Awahsîn̂ehîrî komo Mîk ha epethîrî pona. Awakîton̂enhîrî komo Mîk ha, aweceton̂e komo marha.

7 Pahxan pen komo ponaro ehcoko, emapona ehretawnomaxapu komo yehtoponho yîhtînocoko hara. Aamo komo ya kacoko, poritomo komo ya marha. N̂examro xa n̂ekatîmyaxe awya so. Ero wa xatken̂e kporin pen komo, kexe tak awya so.

8 Pahxa roowo tî wokpamekn̂e Kaan, Kyopono ro ha. Mîk hak yana komo ya tî nîmyakn̂e roowo raconho eken komo me. Ahnoro Ataw yepamtho komo nakpayakn̂e cekenî ro yahsîtome. Ixaw Yana komo yeken wokpamekn̂e n̂examro yecenarîno.

9 Kporin komo nahsîrî me makî tko naxe Noro yanan komo rma. Xako yanan komo naxe Noro yeken me.

10 Pahxa Xako n̂een̂akn̂e Kporin komo. Pohnîntaw ro makî tî n̂een̂akn̂e axawa po mak, tocowon̂em po ha. Noro yenîche nukurunpekn̂e, n̂erewusmekn̂e marha, panatanmekyakn̂e marha, ero wa n̂iir̂akn̂e. Kewru yatî tukurunpesî cicwiyem, ero wa xa marha Xako nukurunpekn̂e Kporin komo.

11 Yaimo wara marha xakn̂e poko so. On wara nasî yaimo tîmxîkrî poko, takowerî n̂ixkesî anarimaw. Ero yinhîrî tîmxîkrî yepoi n̂etapomrikyasî entome. Naporarakanwasî taporî pona epîrkachome. Taporî po rma tak naar̂asî.

12 Ero wa Ixaw Yana komo naar̂akn̂e Kporin komo. Kporin komo mak Mîk xakn̂e n̂examro yaan̂e me. Anarî exihra ro mak xakn̂e Noro yakro, ponaro anarî yana komo yehtopo exihra. Noro mak xakn̂e aan̂e komo me.

13-14 Îh pore Ixaw Yana komo naar̂akn̂e kawno pore. Mararî pono yeperîrî ke nînahmekn̂e. Ween marha n̂enpekn̂e yîwya so yîn̂emerî komo toh yawno ha. Aseci marha n̂enpekn̂e yîwya so saama warai yawno. Paaka mownu ke wokpekn̂e yîkîtîtîrexapu ke, oper̂a mownu ke marha. Oper̂a xîkrî katî ke marha nîyotmekn̂e, Basan pono ke marha nîyotmekn̂e kahn̂eru pun ke, boce pun ke marha. Puruma ke marha nînahmekn̂e kir̂wanî ro ke. Uupa yukun marha meer̂atken̂e okre. Kamxuku wara xakn̂e ero cucure okre.

15 Tupurukye xa tko tî n̂ehtîkekn̂e Xesurun. Tupurutache tak Kporin komo yanwekn̂e me tak mîxatken̂e hara kica. Mupurukwatken̂e xa tmaxmitarî ke. Ero wa exitaw tak Kaan nahsîpînkai okwe. Toopu wara rma re nasî Kporin komo kecehton̂e me. Noro yipu xera rma tko xakn̂e Xesurun okwe. Noro pîntho me mak n̂een̂akn̂e okwe.

16 Tîyanan komo yewyoman̂e me tak xakn̂e Kporin komo anarî poko exirî ke so, ponaro anarî yana komo yehtopo poko ha kica. Noro nîrwonmekyatken̂e kicicitho poko cexirî ke so okwe.

17 Tookuthîrî komo pun nakn̂iyatken̂e worokyam ya tîmsom me mak kica, ponaro cehtoponhîrî pîn komo ya. Kaan ya tîmîhra ro mak xatken̂e. Kokon̂oro n̂he esenpoxapu komo ya mak nîmyatken̂e. Noro yipu komo ponarora ro mak xatken̂e aporin pen komo pahxa.

18 Toopu wara nasî Kporin komo. Noro rma nasî aamo komo me. Awakîton̂enhîrî komo Mîk Kaan. Noro yipu ponarora rma tko maxe kica. Aamo me cehsomu rma mîtwen̂ekarînwatken̂e kica.

19 Ero wa n̂examro yehtopo tî n̂een̂akn̂e Kporin komo. Ero yanme n̂examro pen makîrha nahsîpînkekn̂e Noro hara. Noro nîrwonmekyatken̂e yumumuru komo, emsîrî komo marha. Ero ke n̂examro nahsîpînkekn̂e.

20 On wara kekn̂e poko so, N̂examro wece enîhra tak wasî. Ahce wa na nat amn̂e waihyataw so okwe, ween̂asî amn̂e mak. Kanwekn̂e me ewruxapu mak mîkyam okwe. Omxîkrî komo rma re mîkyam, kemîknon̂e komo makî tko okwe.

21 Kaan pîn poko mak xatken̂e kica. Ero ke kîrwonakn̂e, wewyomekn̂e ro mak. Orwonmekyatken̂e noro pîntho poko akîhtoxaputho poko. Ero ke n̂examro makîrha wîrwonmekyas hara anarî rowon pono komo ke rma, camkîno komo ke ha.

22 Wehto etahsîxapu wara nasî orwon oco. Wehto ywaka roro akn̂ino rin̂e mîn oco. Roowo yakn̂in̂e mîn oco, mararî pono yeperîrî yakn̂in̂e marha, îîpî yapon yakn̂in̂e marha oco.

23 N̂examro wemetanmekyasî ro mak. Wîtwesî oyuhre ke waiwî ke.

24 Rooma wekpesî n̂examro pona takporoso cehso ro. Ocoronano yaw marha wirpesî pona so. Anarmerpan komo nasî eper̂an komo okwe n̂examro pen waihkacho. Kamara warai komo marha wekpesî eskan̂e komo. Okoyi komo marha wekpesî roowo pupuntho pore tîtosom kom ha.

25 Katpanaw cexitaw so waapa nar̂marî me naxe okwe. Mîîmo yaw cexitaw so meero cerahsom me rma naxe okwe. Ero wa naxe kar̂pamxan pen komo, emasî pen komo marha. Rikomo pen komo cik marha waihyaxe moomo yeen̂e pen komo, poritomo pen komo marha kanahmutwem komo. Ahnoro n̂eraswaxe okwe.

26-27 On wara cma re wîîkarî ha re n̂examro poko, Ixaw Yana komo men wîhcamnotîkes okwe. Osotî komo wîhcamnopesî miyan komo ya rma, wîîkarî ha re. Ooxatî pîn komo mtapotarî pona tko ween̂akn̂e. Nîrwonaxe noro yipu komo Ixaw Yana komo waihtîketaw owya. Camkî n̂een̂axe waihtopo komo. On wara kexe, Ixaw Yana komo tîtwaikatîkace kamorî ke so rma. Kporin komo pîn n̂examro waihkai, kexe men kica, wîîkai. Ero wa karî komo pona Ixaw Yana komo waihkatîkara wîxakn̂e.

28 On wara naxe Ixaw Yana komo, wara mak yîhtînon̂e me mak naxe okwe. Yuhnari yîhtînon̂e me exihra ro mak naxe okwe.

29-30 Takîhso yîhtînon̂e me exi xe so ro mak wasî. Pahxaro cehtopo ponaro exi xe so wasî. Oponaro cexitaw so twaparî yen̂epen̂e me n̂ehcerî ha re. 1.000 pen komo rma n̂en̂eperî cewn̂anî rma. Anarimaw 10.000 pen komo n̂en̂epecerî 2 mak okre. N̂examro tko wîmyakn̂e yiixatî pîn komo ya epethîrî pona. Toopu warai cma re Owî n̂examro yecehton̂e. N̂examro Porin Owî, wara rma n̂examro wahsîpînkekn̂e okwe.

31 Anarî me nasî n̂examro yecehton̂e reha toopu warai. Kecehton̂e komo warahra nasî. Ero wara rma kexe kîîxatî pîn komo rma.

32 Anarî me nasî n̂examro natîrî uupa. Sotoma pononho pen komo natîrî poyinonho rma mîn. Komoha pononho pen komo mararîn poyinonho marha mîn yînatîrî komo. Kicicme nasî n̂examro natîrî yeperîrî uupa, cîmîkî nasî kica erexkuru wara. Kmasman̂e me marha nas okwe. Ero wa nasî n̂examro natîrî yeperîrî uupa warai.

33 Twokye so rma re naxe okoyi yokumuru ke mak oko. Cerewrem yokumuru mîn oko n̂examro wokru.

34 N̂examro yepantopo tko wîmcekn̂e omîn yaka. Opurantan yen yaka rma wîmcekn̂e, kesî Kporin komo.

35 Ohyaw nasî n̂examro poko oyesepantopo. Kicicme ehtopo komo yepetho wîmyasî yîwya so. N̂examro poko oyesepantopo me exitaw tak turai kesî tak yîhtarî komo epîrkachome so. Pahnoke tak nasî etwîrîmacho komo. Yohno rma n̂enmayasî n̂examro yepotopo ero yipu okwe.

36 Tîyanan komo rma n̂epanîyasî Kporin komo. Tanton komo pînîn yaw rma wa nasî. Ero wa nasi poko so ekar̂katîkache so okwe. Ero yimaw exihra tak n̂een̂as okwe tanme ro cetapickaxmu komo, antonano komo marha. Ero wa een̂ataw yîpînîn yaw so nasî.

37 Ero yimaw on wara kesî Kporin komo, Ahto natu oroto ponaro ehtoponhîrî kom ha? Toopu warai me cma re ka n̂een̂atken̂e cecehton̂e komo me. Ahto natu n̂examro? kesî.

38 Onoke xa n̂examro yoku pun non̂etken̂e tîwya so tîmxapu? Onoke xa n̂examro nîmîtho n̂eer̂atken̂e uupa yukun? An̂erewusmathîrî komo rma tak nawomcowpe oroto akurun komo me.

39 On warai me xa Ow encoko, Ow mak Ow ha Kaan. Anarî exihra ro mak nasî. Waihkano rin̂e Ow, karihtono rin̂e marha. Erepeno rin̂e Ow oko. Owî rma tko erewkano rin̂e hara. Ahsîno riche owya nai ha ma re oyemyacokan̂e awya so?

40-41 Kapockanwasî tak yaaro xa entachome awya so omtapotarî, kesî Kporin komo. Waipînî ro mak Ow. Ero ke yaaro xa tan wîîkesî, okaciparan wîyohcesî amn̂e tpepeyurem xa. Iyohtoche wahsîyasî tak ar̂mano ritohme. Ooxatî pîn komo poko tak kesepanîyas oko.

42 Oyuhre tak wiir̂asî twenîmsom wara kamxukutho ke. Tooto pun tonon̂e me tak nas okaciparan. Waihkaxapu pen kamxukutho n̂en̂epesî, ahsîxapu pen kamxukutho marha. Ooxatî pîn yantoman̂e pen komo nîpîmkocesî okaciparan, kesî Kporin komo.

43 Taa, tahwore tak ehcoko amyamro Xenciu komo Kporin komo yanan komo yakro rma. Noro yanton pen komo waihketken̂e yiixatî pîn komo. Noro rowon nîwîrîmetken̂e marha. Iyanan pen komo marha waihketken̂e. Ero ke tak n̂esepanîyasî tak Noro. N̂examro makîrha tak waihkesî. Ero wa ciino n̂iir̂asî Kporin komo amn̂e, kekn̂e Moises komo waano me. Ero wa kacho naar̂akn̂e.

44 Ero yinhîrî tak mokyatken̂e hara Moises komo Xoswe yakro, Nun mumutho yakro ha. Mokuche so ero wa kacho naar̂atken̂e waano. Ixaw Yana komo n̂entarî me naar̂atken̂e.

45-46 Ero waano yaatîkache tak on wara kekn̂e hara Moises yîwya so, Ahnoro omtapotachonho ponaro men ehcoko, wekatmo awya so oroto ero ponaro. Amxîkrî komo marha panatanmecoko ero ponaro xa ehtome so.

47 Ero pîntho warahra ro mak entacoko omtapotachonho. Waipîra awitopo komo xa matko mîn wekatmo awya so. Ero yewehcataw awya so pahkî maxe waipîn me arowon komo po. Amn̂e Xotaw Yepu mîwacexe arowonî ro komo yahsîtome ero po awexitaw so waipîn me maxe pahkî. Ero wa maxe omtapotachonho yewehcataw awya so, kekn̂e. Ero wa kekn̂e Moises Ixaw Yana komo ya.

48-49 Ero yinhîrî ero po rma on wara kekn̂e Kporin komo Moises ya, Mînto nasî Abarin Yîpîn komo. Ero komo cheka tak etoko amoro. N̂ebu Yîpîn xa awnuko. Moabe komo rowon pono mîn, Xer̂ko yecentono. Ero meretîn̂i tak enko Kanan. Wîmyasî Ixaw Yana komo ya eken komo me ero enko en̂exa.

50 Iito rma tak mîwaiyasî anawnukuthîrî meretwo rma. Ayanan komo yaka tak mîîcesî. Awakno pen waihyakn̂e Araw pen Oro Yîpîn po. Tîyanan komo yaka cekn̂e. Ero wa xa marha mîîcesî amoro hara.

51 Xotaw watohra maxe kicicme awexirî komo yanme. Pahxa Meriba Kates yecihtaw awexitaw so oyewetîra mîxatken̂e okwe, Sin Yaxawan pono yecihtaw ha. Oponarono wara xa esenpora mîxatken̂e Ixaw Yana komo wero ro. Ero yanme watohra maxe Xotaw.

52 Kananî rma re meen̂asî. Iina xa tohra masî. Wîmyasî Ixaw Yana komo ya ero pona tohra masî, kekn̂e. Ero wa kekn̂e Kporin komo Moises ya.