1-2 Taa, ero yinhîrî tak cekn̂e xa hara Moises Ixaw Yana komo yaka panatanmeso so xa hara. On wara kekn̂e yîwya so, Ai, oyakno komo, poritomotho me tak was okwe. 120 cimn̂ipu tak nas oyewrutoponho. Awan̂e pîn komo me thakwa tak wasî. On wara marha kekn̂e Kporin komo owya, Xotaw Yepu watohra esko, kekn̂e owya.

3 Aporin komo Kaanî rma tko waces apoturme so. Noro rma iitono komo pen nar̂mapes awya so iitono maywen komo. N̂examro pen yar̂mache ekenhîrî tak mahsîyaxe amyamro makîrha aweken komo me. Xoswe marha wacesî Xotaw apoturme so. Ero wara rma kekn̂e Kporin komo awya so.

4 Pahxa Sion pen nar̂mekn̂e Kporin komo, Oki pen marha. Amohew kayaritomon komo mîkyam xatken̂e. Yîrowonthîrî komo marha nahsîpekn̂e awya so. Ero wa xa marha Kanan pono komo nar̂mes hara.

5 Awya so rma nar̂mapesî. Ero wa n̂examro pen yar̂mapoche awya so ahnoro omtapotachonho yaw roro rma ciicoko.

6 Kar̂pe xa men ehcoko, tahwore marha ehcoko. Erasîra ro mak ehcoko iitono komo pona. Aporin komo rma tko cesî awakro so. Anomn̂e pînî ro mak Mîk ha. Awahsîpînkan̂e pîn marha Mîk ha, kekn̂e. Ero wa kekn̂e Moises yîwya so.

7 Ero yinhîrî tak Xoswe nan̂ikpekn̂e Moises. Noro yakro tak nîmtapowakn̂e Ixaw Yana komo n̂entarî me rma. On wara kekn̂e yîwya, Ai okopuci, on wara wîîkes awya, kar̂pe men esko. Erasîra ro mak esko. Moxam yakro tî mîîce amoro yîrowon komo pona. Ero wîmyas awya so, kekn̂e tî Kporin komo n̂examro porin pen komo ya. Yaaro xa tî kekn̂e yîwya so, cemaro pîn me ro mak. Ero pona tî mîîce moxam yakro. Ero takî tî mîmya yîwya so eken komo me.

8 Kporin komo xa Mîk cesî apoturme so. Awakronomesî, anomra ro mak nasî. Awahsîpînkara ro mak nasî. Ero ke erasîra ro mak ehcoko. Ahwokara marha ehcoko, kekn̂e. Ero wa kekn̂e Moises Xoswe ya.

9 Ero yinhîrî Ixaw Yana komo panatanmetopo mewrekn̂e Moises. Mewreche nîmyakn̂e Kporin komo mîn yenîn̂e komo ya. Repita me cehsom mîkyam, Kporin komo mtapotachonho yamatan yan̂e komo marha mîkyam n̂examro ya nîmyakn̂e. Ixaw Yana komo poritomon komo ya marha nîmyakn̂e.

10-11 On wara kekn̂e Moises yîwya so panatanmetopo komo tîmyataw, 7 ro yicimn̂ipuntache roro awepethîkachonhîrî komo yîhcamnotopo me tak nasî. On wara ehcoko ero cimn̂ipu po, Miimoci Yaw Kenmatopo komo me nasî, Ixaw Yana komo ahnoro mokyaxe Aporin komo Kaan yewton pona, yînahsîthîrî pona. Ero yimaw tak on apanatanmetopo komo yîmtapotarecoko yîn̂entarî komo me. Ero wa kacoko roro.

12 Ero yimaw enmekno ciicoko, kîrkomo, wooxam komo, rikomo komo, achewno komo marha. Ahnoro enmecoko apanatanmetopo komo yentachome. Ero wa on yîmtapotarecoko yîn̂entarî komo me ero poko ehcamhokachome so Aporin komo Kaan ponaro xa cehtopo komo poko. On karita yawno yentache apanatanmetopo komo ero tak na n̂ewetîtîketu.

13 On tpanatanmetopo komo yentara ka naxe yîmxîkrî komo reha. Ero ke tîmtapotarepore roro nasî yîn̂entarî komo me. Ero wa n̂ehcamhokexe Aporin komo Kaan poko ha. Ero wa ehcoko miya roro arowon komo po awehtopo komo poko hakî. Xotaw mîwacexe roowo yahsîso aweken komo me ero po awehtopo komo yecenarî tîmtapotarepore roro nasî, kekn̂e. Ero wa kekn̂e Moises Ixaw Yana komo ya.

14 Ero yinhîrî on wara kekn̂e Kporin komo Moises ya, Ai, Moises, pahnoke tak nasî awaitopo okwe. Ero ke Xoswe an̂ihko. Noro yakro amohcoko Kesentacho komo potaka. Iito awexitaw so tak noro wiir̂asî Ixaw Yana komo yaan̂e me, kekn̂e. Ero ke Kesentacho potaka tak cetken̂e Moises komo Xoswe yakro.

15 Ero yimaw Kporin komo n̂esenpekn̂e Kesentacho yepoi kaweresî me. Kesentacho potarî yepoi tî n̂esenpekn̂e kaweresî, patawno xa.

16 On wara kekn̂e Kporin komo Moises ya, Amn̂e mîwînîkyasî aporin pen komo yakro. Moxam tak naxe wooxam wara, ciin̂o yairono wara. Nahwowaxe tak anarî ro komo poko, ponaro iitono komo yehtopo poko ha. Oyahsîpînkexe okwe, Omtapotarî yewetîra tak naxe okwe, Oyewehcataw awya so kakronomexe so, kacho ha. Yîwya so wekatîmyakn̂e ero yewetîra naxe okwe. Ero wa naxe okwe.

17 Ero ke kîrwonasî tak poko so. N̂examro pen wahsîpînkesî. Enîn̂e pîn wara mak tak wasî. Ero ke waihyaxe tak okwe. Anarmerpan tak nasî n̂examro yemetanmetopo okwe, yîwîrîmacho komo marha. Ero yimaw on wara kexe, Ahce yanme cesemetanmekyatu emapona roro? Kakro so exihra tko na nai Kporin komo Kaan. Noro yexihtorî ke kîhyaw so cesenmetanmekyat ham okwe, kexe tak ero yimaw.

18 Ero yimaw n̂examro yenîn̂e pîn wara was okwe. Ero wa wasî poko so kicicme exirî komo yanme kica. Ponaro anarî komo yehtopo ponaro mak naxe kica. Ero wa exirî komo yanme enîn̂e pîn komo wara wasî, entan̂e pîn komo wara marha wasî.

19 Ero ke on waano tak waar̂asî an̂entarî komo me. Ero mewrecoko. Ixaw Yana komo ya ahsîmexpoko aatome tak amn̂e yîwya so. Ero rma tak nas amn̂e opoko kicicme ehtopo komo yekatîmn̂e me.

20 Amn̂e n̂examro waar̂asî kir̂wan pona roowo pona. Paaka mown pen nasî iito mer̂pora ro mak, ween pen marha. On arowon komo me wîmyas amn̂e, wîîkekn̂e n̂examro porin pen komo ya. Yaaro xa wîîkekn̂e yîwya so, cemaro pîn me ro mak. Ero po cexitaw so tmaxmitaxi ro tak n̂eseresmexe, tupurukye cehso ro marha. Ero wa cexitaw so anarî ro komo ponaro men naxe okwe ponaro anarî yana komo yehtopo ponaro ha. Noro yipu komo poko nahwowaxe kica. Orwonmekyaxe tak okwe. Omtapotarî yewetîra tak naxe okwe, Oyewecataw awya so kakronomexe so, kachonho ha.

21 Ero ke tak n̂examro pen tak n̂etwîrîmexe, n̂esemetanmekyaxe ro mak okwe. Ero yimaw on waano tak nasî kicicme ehtopo komo yekatîmn̂e me. On yîhcamnopîra naxe amn̂e epamthîrî komo. Kicicme exi xe ehtopo komo ween̂asî tanî rma ka exitaw so, yîrowon komo pona arîhra rma ka oyexitaw, Ero wîmyas awya so, wîîkekn̂e yîwya so ero pona ka arîhra oyexitaw. Yaaro xa tan wîîkesî, cemaro pîn me ro mak, wîîkekn̂e yîwya so roowo tîmtopo poko. Ero pona arîhra ka oyexitaw kicicme exi xe ehtopo komo rma ween̂as okwe, kekn̂e. Ero wa kekn̂e Kporin komo Moises ya.

22 Ero ke waano tak mewrekn̂e Moises ero kaamo po rma. Ixaw Yana komo n̂entarî me naar̂akn̂e ahsîtome yîwya so. Ero wa naar̂akn̂e.

23 Ero yinhîrî tak Xoswe nantomekn̂e Kporin komo, Nun mumutho. On wara kekn̂e yîwya, Kar̂pe men esko. Erasîra ro mak esko. Ixaw Yana komo tak maar̂asî yîrowon komo pona. Ero wîmyas awya so, kekn̂e Kporin komo yîwya so. Yaaro xa kekn̂e, cemarontan me ro mak. Ero pona maar̂asî, kekn̂e. Ero wa kekn̂e Moises Xoswe ya.

24 Ero yinhîrî Ixaw Yana komo panatanmetopo mewretîkekn̂e tak Moises karita yaka. Yîwya so ka n̂ekatîmyakn̂e ero tak mewretîkekn̂e.

25-26 Ero yinhîrî tak Repita komo ya kekn̂e Moises, Kporin komo mtapotarî yen yaan̂e komo ya, Oyewehcataw awya so kakronomexe so, kacho yen yaan̂e komo ya ha. On wara kekn̂e yîwya so, Oyakno komo, On aacoko karita, apanatanmetopo kom ha. Aporin komo Kaanî mtapotarî yen yawxaka ciicoko. Iito mak n̂expe eroromero kicicme awehtopo komo yekatîmn̂e me.

27 Kanwekn̂e me xa awehtopo komo ween̂asî. Kporin komo manwekyaxe waipîra rma ka oyexitaw, awakro so rma ka oyexitaw ha. Soroso xa tak Noro manwekyaxe amn̂e owaipuche.

28 Ero ke aporitomon komo an̂ihcoko ohyaka, atribun komo yantoman̂e komo marha. Mokuche so ohyaka omtapotarî wekatîmyasî yîwya so hara. Ero yimaw kah yawno komo ya wîîkesî, roowo pono komo ya marha wîîkesî. Moxam yehtopo yekatîmn̂e me men ehcoko amn̂e, kicicme ehtopo komo yekatîmn̂e me ha, wîîkesî yîwya so.

29-30 Owaipuche kicicme ro mak tak mehtîkexe okwe. Apanatanmetopo komo wekatîmyas awya so ero yewetîra tak maxe okwe. Amn̂e n̂he tak kicicme maxe okwe. Kporin komo mîrwonmekyaxe kicicitho poko awexirî ke so awamorî komo ke rma. Ero yanme tak awîrîmacho komo awepor̂axe so okwe, kekn̂e. Ero wa kekn̂e Moises Ixaw Yana komo ya.