On wara marha kekn̂e Moises Ixaw Yana komo ya, Taa, on wara maxe amn̂e, awakronoman̂e komo me ka wasî, awemetanmekn̂e komo me marha tak was hara. Awya so wekatmo ero wara rma maxe. Ero yimaw tak on wara mîîkexe, Ero wara rma kekn̂e Moises pen pahxa kîwya so, mîîkexe. Mîk hak rowon pono komo chew tak maxe ero yimaw. Yîcheka so awen̂epexe so Aporin komo Kaan. Iito awexitaw so ero wa tak mesehtînoyaxe.

2 Ero yimaw tak Aporin komo Kaan pona tak meen̂axe xa hara, amxîkrî komo yakro rma tak meen̂axe Noro pona. Noro mtapotarî tak mewehcaxe, apanatanmetopo komo wekatîmyasî awya so oroto ero rma tak mewehcaxe ahnoro. Tahwore tak mewehcaxe, ewetî xe ro tak maxe okre.

3 Ero wa awexitaw so tak awekyaxe so hara Aporin komo Kaan, waapa komo nahsîthonhîrî. Apînîn yaw so tak nasî. Awenmekyaxe so hara, pahxa rma awakpayatken̂e so mîk hak rowon komo cheka. En̂exa rma awekyaxe so hara.

4 Anarimaw kaapu mapitawno makataka rma awen̂epetu so. En̂exa rma tko awenmekyaxe so hara, awekyaxe so Aporin komo Kaan.

5 Aporin pen komo rowontho pona rma awekyaxe so hara. Ero tak mahsîyaxe hara. Iito awexitaw so tak awakronomexe so, awepamnoyaxe so marha. Aporin pen komo rma re nakronomekn̂e, n̂epamnoyakn̂e marha re ero yopo xa tak awakronomexe so amyamro reha.

6 Aropotarî komo yanpikan̂e wara xa nasî Aporin komo Kaan, awepamthîrî komo ropotarî yanpikan̂e wara marha nasî. Ero wa awir̂axe so tîîxe tak awehtome so. Yiixe xa tak maxe ero yimaw. Yaaro xa yiixe maxe. Noro ponaro mak tak maxe okre. Ero wa awexitaw so tak waipîra tak maxe okre.

7 Ero yimaw tak aaxatî pîn komo makîrha tak n̂emetanmekyas hara Aporin komo Kaan, awemetanmekn̂enhîrî komo n̂emetanmekyasî. Awemetanmetopo komo wekatîmyasî awya so ero warai ke xa marha n̂examro wemetanmekyasî.

8 Ero yimaw tak Kporin komo mtapotarî mewehcaxe xa hara okre. Apanatanmetopo komo mewehcaxe, awya so wekatîmyasî oroto ero ha.

9 Ero wa awexitaw so tak ehn̂an me ro mak awir̂axe so Aporin komo Kaan ahce na poko awexitaw so. Kar̂pe so marha n̂iir̂asî amxîkrî kom hara. Ero wa xa marha awoh komo xîkrî n̂iir̂as hara. Cepetaxmu me xa marha n̂iir̂asî anatîrî komo. Tahwore tak nasî Kporin komo awakronomacho komo poko hara. Pahxa tahwore xakn̂e aporin pen komo poko ero wa xa marha tak nasî apoko so hara.

10 Ero wa nasî apoko so Aporin komo Kaan tîmtapotarî yewehcataw awya so, apanatanmetopo komo yewehcataw ha. On karita yaw nasî tmewreso apanatanmetopo komo, on mewehcaxe. Aporin komo Kaan pona marha meen̂axe yaaro xa tak. Ero wa awexitaw so tahwore nasî Noro awakronomacho komo poko.

11 Apanatanmetopo komo wekatîmyasî awya so oroto. Camkî wencesî ero okwe, kacho mera nas awya so. Mooxe exihra marha nasî. Ahce wa thakwa re cencetu. Mooxe nas okwe, kacho mera nasî.

12 Kah yaw mak exitaw ketaw ha re apanatanmetopo komo on wara mîîkexe, Onoke thakwa ha re cee kah yaka kpanatanmetopo komo yehso, kîwya so ekatîmtome ha? Ekatîmîche mak tak kîwya so cewehcaxe, mîîkexe. Kah yaw tko exihra nasî.

13 Tuuna yeco po reha exitaw on wara mîîkexe, Onoke thakwa ha re cee tuuna yeco pona kpanatanmetopo komo yehso. Ekîche mak kîwya so n̂ekatîmyasî ewetîtome tak kîwya so, mîîkexe.

14 Pîra, meyehra ro mak wa nasî apanatanmetopo komo. Amtaw so rma wa nasî, aropotaw so marha wa nasî ewetîtome awya so.

15 Enko xe, waipîra awehtopo komo wekatîmyas awya so oroto, esemetanmekîra awehtopo komo marha. Awaitopo komo marha wekatîmyas awya so, cesemetanmesom me awehtopo komo marha.

16 Ero ke Aporin komo Kaan xe xa men ehcoko, wîîkes awya so oroto. Noro yehtopo yaw roro mak ehcoko, yîwya apanatanmetopo komo xa ewetîcoko, wîîkesî marha awya so. Ero wa awexitaw so waipîra maxe, mepamyaxe marha tak. Aporin komo Kaan awakronomexe so arowon komo po, ahsîso mîîcexe ero po ha.

17 Ero warahra tko na matu, anarî ro komo pona na metowyatu aropotaw so. Apanatanmetopo komo yentara tak na mat okwe. Ero wa awexitaw so Noro yipu komo mamaka mutupenwaxe, Oporin amoro, mîîkexe kica yîwya so.

18 On wara wîîkes oroto awya so, ero wa awexitaw so mîwaiyaxe men okwe. Pahkî exihra men maxe arowon komo po, Xotaw mîwacexe amn̂e ahsîtome, ero po pahkî exihra rma maxe okwe.

19 Oroto kah yawno komo wan̂ikyasî omtapotarî yentan̂e me. Roowo pono komo wan̂ikyasî marha omtapotarî yentan̂e me. N̂examro n̂entarî me tan wekatîmyas awya so waipîra awehtopo komo, twaihsom me awehtopo komo marha. Awakronomacho komo tan wekatîmyas awya so, awemetanmetopo komo marha. Ero ke waipîn me awehtopo komo men̂ekacoko awehtopo komo me waipîra awehtome so, waipîn me amxîkrî komo yehtome marha.

20 On wara marha maxe waipîn me awehtopo komo men̂eketaw awya so, Aporin komo Kaan xe tak maxe, yîmtapotarî yentan̂e me marha maxe. Noro yahsîpînkara marha maxe. Waipîra awehtopo komo rma Mîkî Kporin komo, pahkî awehtopo komo arowon komo po ha. On arowon komo me wîmyas, kekn̂e aporin pen komo ya. Abraaw pen ya kekn̂e, Isake pen ya marha, Xako pen ya marha. Yaaro xa tan wîîkesî, cemaro pîn me ro mak ha, kekn̂e. Ero po maxe pahkî, kekn̂e. Ero wa kekn̂e Moises Ixaw Yana komo ya.