Taa, pahxa rma, tîmtapotarî n̂ekatîmyakn̂e Kporin komo Moises ya Orebe Yîpîn yamrinaw exitaw so Ixaw Yana komo. Oyewecataw awya so kakronomexe so, kacho n̂ekatîmyakn̂e yîwya Ixaw Yana komo ya yîn̂ekatîmrî hara. Ero yinhîrî anarî xa hara n̂ekatîmyakn̂e, Kakronomexe so, kacho xa hara. On wara tak ekatîmko yîwya so, kekn̂e Noro yîwya. Ero wa kekn̂e Moises ya Moabe rowon po exitaw so hara.

2 Ero ke Ixaw Yana komo n̂enmekyakn̂e xa hara Moises ahnoro ero wa kacho yekatîmtome yîwya so. On wara kekn̂e yîwya so, Ai oyakno komo, anarmerpan ke Exitu pono komo yemetanmetoponho meen̂atken̂e. Paraw yemetanmetoponho wa meen̂atken̂e, Kporin komo ya emetanmetoponhîrî ha. Noro maywen komo n̂emetanmekyakn̂e marha awero ro so, iitono pen komo ahnoro.

3 N̂examro pen yemetanmetoponho wa meen̂atken̂e cerewrem ro mak oko. Kar̂pe xa cehtopo n̂enpekn̂e. Cirihnî n̂iir̂akn̂e awero ro so aweserepokacho komo xa.

4 Yuhnari yîhtînon̂e me rma tko aropotarî komo cirihra rma nas okwe Kporin komo. Takîhso enîn̂e me awewru komo cirihra marha nasî. Takîhso entan̂e me cirihra marha nas okwe apanarî komo.

5 40 cimn̂ipu kaar̂atken̂e so axawa pore. Ero yecenarî aponon komo atpîra xakn̂e. Ahtarî komo marha etawkara xakn̂e.

6 Awru komo tokuhra mîxatken̂e. Uupa yukun yerîhra marha mîxatken̂e. Ahnoro ero yipu komo exihra xakn̂e awokru komo. Ero warai ke awerewusmara so wîxakn̂e Aporin komo Kaan me oyehtopo yenpotome tak awya so, kesî Aporin komo Kaan awya so.

7 Oona amokuche so Sion komo mokyatken̂e kwaparî komo me. Esbon pono mîk xakn̂e Sion, kayaritomo ha. Oki komo marha mokyatken̂e kwaparî komo me. Basan pono mîk Oki, kayaritomo marha. N̂examro pen tar̂metken̂e.

8 Yîrowonthîrî komo tahsîyatken̂e. Ero tîmyatken̂e Huben yepamtho komo yeken me, Kace yepamtho komo yeken me marha, Manase yepamtho komo poyinonho yeken me marha.

9 Ero ke Kporin komo mtapotachonho ponaro men ehcoko, Oyewehcataw awya so kakronomexe so, kacho. Ewetîcoko ro mak. On yewehcataw roro awya so ehn̂an me ro mak maxe okre ahce na poko awexitaw so.

10-11 Tan maxe ahnoro cececetoso oroto Aporin komo Kaan n̂enîrî me. Atribun komo yantoman̂e komo naxe tan, aporitomon komo marha. Ahnoro tan maxe kîrkomo, Ixaw Yana kom ha. Amxîkrî komo marha tan naxe, apici komo marha. Achewno komo marha naxe tan, awehtorî rakan̂e komo, atunarî yenmekn̂e komo marha.

12 Tan maxe amtapotachome so Aporin komo Kaan yakro. Oyewehcataw awya so kakronomexe so, kes awya so. Taa, ero wa ham, kacho yenta xe tak nai amtapotarî komo. Yaaro xa amtapota xe so tî nai oroto, cemaro pîn me ro mak ha.

13 On wara kesî Noro awya so oroto, oyanan me xa tak kiir̂axe so. Ponaro xa awehtopo komo me kesenpesî marha awya so, kesî. Ero wara rma kekn̂e pahxa awya so. Ero wa xa marha kekn̂e aporin pen komo ya hara. Abraaw pen ya kekn̂e, Isake pen ya marha, Xako pen ya marha. Yaaro xa kekn̂e yîwya so, cemaro pîn me ro mak.

14-15 Awya so mak tan kahra wasî, Oyewehcataw awya so kakronomexe so, kacho poko. Awya so rma re wîîkesî Kporin komo tantono komo ya, Kaan n̂enîrî me ececetoxapu komo ya. Anarî komo ya meero wa wîîkesî, tan exihnî komo ya rma.

16 Exipsiu komo chew cesemetanmekyatken̂e. Anarî komo rowon pono komo chere tîtmokyatken̂e marha.

17 Kicicme ro mak n̂examro yehtopo meen̂atken̂e. Ponaro n̂examro yehtopo komo meen̂atken̂e yîhyaw so kica. Weewe mîn meen̂atken̂e mîk hak warai me ciixapu, toopu marha ciixapu, prata ciixapu, ooru ciixapu, ero yipu meen̂atken̂e.

18 On warai wekatîmyas awya so oroto Kporin komo Kaan poko ceponarononkaxmu mera ro mak awehtome so. Mîk hak ponaro anarî yana komo yehtopo meen̂atken̂e amokyataw so. Noro yipu komo pona awetow xera ro mak wasî. Ero warai exi xera wasî achewno, kîîrî, wooxam marha, noro re me cehsom komo marha, tribu me cehsom komo marha. Ahnoro mak ero warai me awexi xera ro mak wasî. Ero wa exitaw so rma tko cîmîkno wara mak naxe kica, kmasmacho wara kica. Ero ke noro yipu komo exihra ro mak exi xe wasî achew so.

19 On wara kan̂e exi xera ro mak wasî awetwîrîmacho komo pokono yentan̂enho ha, Kir̂wanî rma mexe ow ha. Esemetanmekîra rma tko wasî oyanme ro mak cehsomu rma, kan̂e exi xera wasî. Twokru xatî wara naxe ero wa kan̂e komo. Ero ke tak wenaxe twokru xe cexirî ke so. Noro yipu wara naxe ero wa kan̂e komo.

20 Ero wa kan̂e komo yîmtora ro mak nasî Kporin komo. Noro yipu komo yîmcetaw ketaw ha re nîrwonasî ro mak oko poko so ha. Mer̂pora ro mak nas awemetanmecho komo on karita yaw mewrexapu. Ahnoro ero yipu ke rma tko Kporin komo n̂emetanmekyasî noro yipu komo. N̂examro pen yosotî nîhcamnopesî ro mak kah poko hakno komo ya.

21 Noro yipu tak nakpayasî Kporin komo Ixaw Yana tribun komo yai cemetenmesom me okwe. On karita yaw cekatîmso nas awemetanmetopo komo mer̂pono pîn, Oponarora awexitaw so kemetanmekyaxe so, kacho ha. Ero wa kacho yaw roro rma noro yipu n̂emetanmekyasî.

22 Amn̂e tak pahxaro arowonthîrî komo n̂een̂axe awepamthîrî komo, ahretawno kom ha. Anarî yana komo marha n̂een̂axe, mooxe mohxapu komo. Tîwîrîmaxi n̂een̂axe, eper̂a ken̂arî komo marha n̂een̂axe iito. Kporin komo n̂ekpotho mîn n̂een̂axe eper̂a.

23 Ecahxapu wara mak tak n̂een̂axe arowonthîrî komo, yîmîtî ken̂e n̂een̂axe kica, enxopre ken̂e marha. Naatî yewtî mera ro mak n̂een̂axe, cepetaxmu exihra ro mak n̂een̂axe. Cuupu meero atîhtara n̂een̂axe. Sotomatho wara mak n̂een̂axe okwe, Komohatho wara, Atmatho wara, Sebointho wara. N̂examro pen nar̂mekn̂e Kporin komo rîîwoxe xa cexirî ke. Ero wa xa marha awekenhîrî komo n̂een̂axe hara tîwîrîmatîkaxi okwe.

24 Ero yipu yenîche on wara kexe anarî maywen komo, Ahce yanme on tîyanan komo rowontho nîwîrîmetîkai ro mak Kporin komo? Ahce yanme ero wa nîrwona xa poko so? kexe.

25 On wara n̂eyukyaxe anarî komo, Ero wa nasî tantononhîrî komo rowontho, ponaro tporin pen komo yehtopo yahsîpînkarî ke okwe, yîmtapotachonhîrî yahsîpînkarî ke okwe. N̂examro pen yakro cma re nîmtapowakn̂e Noro Exitu poi ekyataw so. Oyewehcataw awya so kakronomexe so, kacho poko nîmtapowakn̂e rma re. Ero wa kachonho yai n̂etowyatken̂e kica.

26 Anana makî tî cetken̂e ponaro anarî yana komo yehtopo poko ahwotaxi. Noro yipu komo ya ketken̂e, Oporin amoro, ketken̂e mamakan me yutupenwataw so kica. Tînîhtînotoponhîrî pîn poko tak xatken̂e, Kporin komo n̂ekatîmtho pîn poko mak kica.

27 Ero ke nîrwonakn̂e ro mak tak Kporin komo tantononhîrî komo poko. Ero ke emetanmetopo komo n̂ekpekn̂e pona so. Tmewreso nasî on karita yaw ero komo n̂ekpekn̂e iipo so.

28 Nîrwonakn̂e ro mak Noro n̂examro pen poko. Ero ke n̂examro mohkan̂e wa mak xakn̂e yîrowonthîrî komo poi. Anarî pona tak n̂en̂epekn̂e hara. Iito rma naxe yîn̂en̂epethîrî komo, kexe. Ero wa kexe anarî yana komo Ixaw Yana komo poko.

29 Taa, nasî rma tko kîwya so ekatîmnî komo. Kporin komo Kaan ekatîmra nasî ero yipu komo. Yîn̂ekatîmîthîrî rma tko nasî ponaro kehtopo komo me, ponaro kîmxîkrî komo yehtopo me marha miya roro. Kpanatanmetopo komo rma n̂ekatîmyasî ewetîtome kîwya so, ahnoro yewetîtome ha, kekn̂e. Ero wa kekn̂e Moises Ixaw Yana komo ya.