On wara kekn̂e hara Moises Ixaw Yana komo ya, Ai oyakno komo, Aporin komo Kaanî mtapotarî ewetîcoko, apanatanmetopo komo wekatîmyas awya so oroto ero ewetîtîkacoko. Ewehcataw awya so mîk hak rowon pono komo yopono me awir̂axe so Aporin komo Kaan. Roowo poko hakno komo yopono me awir̂axe so.

2-3 Aporin komo Kaanî mtapotarî yewehcataw awya so on warai ke kir̂wan̂he awir̂axe so Kaan, kir̂wan̂he awir̂axe so ewto po awexitaw so, ewto pohra awexitaw so marha.

4 Kir̂wan̂he n̂iir̂asî amxîkrî komo. Kir̂wan̂he natîkwasî anatîrî komo, kir̂wan̂he marha por̂mamyasî awoku xîkrî komo, paaka xîkrî, oper̂a xîkrî marha.

5 Kîr̂wan̂he marha n̂iir̂asî anatîrî komo yeperîrî awci yaw cenmesom kom ha. Kir̂wan̂he marha n̂iir̂asî akanawaturun komo yaka cihxapu, awru komo me taisom ha.

6 Kir̂wan̂he marha awir̂axe so ahna so na awcetaw so. Kir̂wan̂he marha awir̂axe so awetîrametaw so hara.

7 Anarimaw so rma re awar̂maxi so mokyatu awaparî komo. Noro yipu komo tko nar̂mapes awya so Kporin komo. Awece mokyaxe cewn̂e yatî mak. 7 yatî me tak n̂emahciyaxe hara.

8 Kir̂wan̂he marha n̂iir̂asî anatîrî yeperîrî yîmtoxapu komo. Etwîrîmara ro mak n̂iir̂asî. Ahce na poko awexitaw so ehn̂ara ro mak awir̂axe so. Ero wa kir̂wan̂he awir̂axe so Aporin komo Kaan arowon komo po awexitaw so, yînîmrî po awexitaw so ha.

9 Kporin komo Kaan ya apanatanmetopo komo men ewetîcoko. Noro yehtopo yaw roro xa ehcoko. Ero wa awexitaw so tîyananî ro me awir̂axe so. Ero wa matko kekn̂e pahxa awya so, Oyananî ro me kiir̂axe so, kekn̂e. Yaaro xa kekn̂e cemaro pîn me ro mak. Ero ke ero wa awir̂axe so.

10 Ero wa awexitaw so Kporin komo yanan me awehtopo komo tak n̂een̂axe ahnoro roowo poko hakno komo. Ero wa awenîrî ke so n̂eraswaxe tak apona so.

11 Cemyawnoyem me xa awir̂axe so Aporin komo. Kir̂wan̂he n̂iir̂asî amxîkrî komo, awoh komo xîkrî marha, anatîrî komo marha. Ero wa awakronomexe so arowonî ro komo po awexitaw so tak. Aporin pen komo ya kekn̂e, On wîmyasî awepamthîrî komo rowon me, kekn̂e. Yaaro xa kekn̂e, cemaro pîn me ro mak kekn̂e yîwya so. Ero po awexitaw so tak kir̂wan̂he awir̂axe so.

12 Kaapu marha nahrunkesî Aporin komo kir̂wan tîmtome awya so, cepethîkem okre. Tuuna n̂ekmexpesî roro amararîn komo yatîkren̂e. Mohtopo ro me exitaw xa n̂ekpesî. Ehn̂an me awir̂axe so ahce na poko awexitaw so. Mîk hak rowon pono komo ya mîmyaxe apurantan komo tîramansom me hara. Yîhyai so tko aponkura ro mak maxe puranta amyamro reha.

13 Mîk hak rowon pono komo tîpîrî wara awir̂axe so Kporin komo. Matkîrî warahra ro mak awir̂axe so. Aporin komo Kaan ya apanatanmetopo komo ponaro na matu, awya so wekatîmyasî oroto ero na mewehcatu. Ero wara awexitaw so tooto komo yopono me tak maxe. Mamawno komo me exihra ro mak maxe.

14 Ero ke apanatanmetopo komo yai etowra ro mak men ehcoko. Poowa men wara etowra, kaari men wara etowra marha, ero wa ehcoko. Anarî ponarora ro mak ehcoko ponaro anarî komo yehtopo ponarora. Noro yipu poko ahwotara ro mak ehcoko, kekn̂e. Ero wa kekn̂e Moises Ixaw Yana komo ya.

15 Ero yinhîrî tak on wara kekn̂e hara noro Ixaw Yana komo ya, Anarimaw tko na Aporin komo Kaan yewetîra matu. Apanatanmetopo komo ponarora na matu okwe, awya so wekatîmyasî oroto ero ponarora. Ero wa awexitaw so on warai tak awepor̂axe so awemetanmecho kom hara.

16 Ewto po awexitaw so Kaan nîwîrîmarî me maxe okwe. Ero wa xa marha maxe ewto pohra awexitaw so hara.

17 Kaan nîwîrîmarî me nasî awci yaw an̂enmekrî komo. Ero wa marha nasî akanawaturun yaka cihxapu.

18 Noro n̂emetanmekri me marha naxe amxîkrî komo, anatîrî komo yeperîrî marha. Cemetanmesom me marha nasî awoh komo xîkrî paaka xîkrî, oper̂a xîkrî marha.

19 Kporin komo n̂emetanmekrî me maxe amîn komo yaka amokyataw so, amîn komo yai awcetaw so marha.

20 Awemetanmekyaxe so Aporin komo ahce na poko awexitaw so. Cesewkukmaxmu me marha awir̂axe so mîn hak poko. Ceisom me marha awir̂axe so ahce na poko awexitaw so. Ero wa awir̂axe roro so ahcamnotome so tak. Yohno so mîwaiyaxe okwe. Ero wa maxe kicicme awehtopo komo yanme, Kporin komo yai awetowrî komo ke ha.

21 Eper̂a yawno me marha awir̂axe so Kporin komo ehcemanî ro yawno me okwe. Ero wa awir̂axe so awaitome so tak. Arowon komo yahsîso rma re mîîcexe ero po exihra tak maxe okwe amn̂e.

22 Eper̂a awahsîmexpexe so Kporin komo, awakpororetopo ya. Ocoronano ya marha awahsîmexpexe so. Ereh ken̂e marha awir̂axe so. Ero warai ya awahsîpexe so okwe, eper̂a ya. Tawaisom me marha n̂iir̂asî anatîrî komo, tpayantaxmu me marha. Ero yipu ke awemetanmekyaxe so awaitome so tak okwe.

23 Ceipuru wa mak nasî kaapu awepoyino komo, bronse wara. Pehu wara marha nas arowon kom hara.

24 Roowo pupuntho marha n̂ekmexpesî Aporin komo tuuna tmohsom wara rma. Ero tak sararanasî apona so mer̂pora awaikachome so okwe.

25 Awar̂mapexe so marha aaxatî pîn komo ya. Cewn̂e yatî mak mîîcexe noro yipu komo yakro etar̂maxi. Yîhyai so tko memahciyaxe 7 yatî yaw hara okwe. Cewrucpen̂e me so tak awen̂axe so kayaritomo komo, roowo poko hakno kom ha.

26 Awokoputhîrî komo tak nas amn̂e kwacinama nahrî me okwe, kamara warai komo yotî me marha. Noro yipu komo yen̂epen̂e exihra tak nasî ero yimaw.

27 On wara marha awir̂axe so Kporin komo, ereh ken̂e xatken̂e Exipsiu komo ero yipu xa marha n̂ekmexpes apona so hara oko. Kicicme so marha natîkwasî apun komo. Sahna marha n̂ekpesî apona so, askîskîmacho komo marha oco. Ecpînî ro me nasî yîn̂ekpothîrî okwe.

28 Tîmtawaimamsom me tak awir̂axe so, awewkanoyaxe so marha okwe, cesewkukmaxmu me marha awir̂axe so.

29 Kamarakataw rma tapero mak metar̂axe ewuhnîtho wara, kosope cetarisom wa mak. Ahce na poko awexitaw so mehn̂exe ro mak. Awepemara so ro mak naxe tooto komo. Awemyawnonhîrî komo xa matko naar̂axe roro. Akurunpen̂e komo exihra ro mak nas okwe.

30 On wara marha maxe okwe, wooxamu rma re mîpokonomexe. Amn̂e tak cetahsîyasî, mîîkexe. Noro yipu yenaka rma n̂etakriyasî anarî hara okwe. Amîn komo marha miir̂axe. Ciixapu yaw tko exihra maxe okwe. Anatîrî komo miir̂axe uupa yatî. Ero yeperîrî yenmekîra ro mak maxe okwe.

31 Awokuthîrî komo paaka paraxkexe aaxatî pîn komo awero ro so rma. Yupunuthîrî tonohra maxe okwe. Awokuthîrî komo kr̂a naar̂axe buhutho awero ro so rma. Ekîhra ro mak naxe hara ahyaka so. Awokuthîrî komo marha naar̂axe oper̂a aaxatî pîn komo. Ahyaka so yîramanîn̂e kom hara exihra ro mak naxe okwe.

32 Amumuthîrî komo marha naar̂axe anarî yana komo, awemsîthîrî komo marha okwe. Esamathîrî komo wece meen̂axe kaamo poko roro. Awewthîrî komo n̂ekar̂kexe ro mak n̂examro yenî xe xa hara awexirî ke. Mokuhra ro mak naxe amxîkîthîrî komo okwe. Kar̂pera maxe n̂examro pen yahsîso awtorî komo yarohra thakwa okwe.

33 Anarî rowon pono komo nahyaxe anatîrî komo yeperîrî. Awetapickachonhîrî komo rma nahyaxe anatîrî komo okwe. An̂entorî komo mîkyam nahyaxe. N̂examro rma awapickexe so ro mak epethîmnî me. Ahyokyaxe so oco. Ero wara roro awir̂axe so.

34 Tîmtawaimamsom me tak mehtîkexe okwe emetanmekno ritopo yenîrî ke roro awya so.

35 Cerekyem me n̂iir̂asî awosokmuru komo Aporin komo rma, ahrepu komo marha ero wa n̂iir̂asî. Cerewrem xa mîn n̂iir̂asî apoko so erekî, ecpînî ro mak oko. Ahnoro mak apun komo n̂iir̂asî cerekye ahtarî komo ratai akanahtaka roro so oko.

36 Anarî rowon pono komo cheka marha awen̂epexe so an̂entorî komo cheka, aporin pen n̂entorî komo cheka marha. Akayaritomon komo yakro rma awen̂epexe so, an̂irithîrî komo yakro rma. Iito awexitaw so tak ponaro anarî yana komo yehtopo poko maxe kica. Weewe yenporixaputho poko maxe, toopu yenporixaputho poko marha.

37 Mîk hak maywen komo cheka awen̂epexe so Aporin komo. On wara kexe n̂examro apoko so, Xutew Yanatho mak amoro kica, kexe tpoyino komo poko yîwîrîyakarî me. N̂ewrexe anarimaw so awetacataw so. Ero wa naxe apoko so yîchew so awehtopo kom ha.

38 Anatîrî komo yatho rma re miir̂axe mer̂pora. Wahra mak takî tko menmekyaxe hara ero yeperîrî. Makaka warai mak nahyas okwe.

39 Uupa yatî rma re miir̂axe anatîrî komo. Ero yipu matkexe kir̂wan̂he atîhtachome. Ero yipu yukun yerîhra ro makî tko maxe okwe. Eperîrî yenmekîra marha maxe. Akrî mak nahyas okwe.

40 Oripera nai amn̂e anatîrî komo. Mer̂pora ro mak nai arowon komo poko hakî. Ero katî ke tko ekapera maxe okwe. Eperîrî mak n̂emaxkunketîkes okwe.

41 Tumumuke rma re maxe amn̂e, cemsîke marha re. Ahyaw so tko exihra naxe okwe. Waapa komo mak naar̂axe okwe ahsîpînkan me.

42 Makaka warai marha nahtîkes anatîrî komo okwe weewe komo, amararîn komo pono marha.

43 Anarî yana komo naxe achew so amn̂e. Cewetîsom me xa tko n̂ehtîkexe n̂examro ayopo so ro mak. Yîwîrîyakaxapu me mak tak mehtîkexe amyamro reha okwe.

44 Tupurantan nîmyaxe achewno komo awya so tîramansom me hara. Amyamro reha tîmîhra ro mak maxe yîwya so hara. Ahtîpîrî komo wara mak naxe n̂examro, matkîrî wara mak maxe amyamro reha okwe.

45 Ero yipu ke awemetanmekyaxe so Kaan. Awenatîkan̂e wa mak nasî, awahsîn̂e wa marha. Awahsîyaxe so awaikachome so tak okwe. Ero wa awaikexe so Aporin komo Kaan yewetîra awexirî ke so mak okwe. Apanatanmekyaxe so rma re Noro. Apanatanmetopo komo tko ewetîra mak maxe okwe.

46 Ero ke mesemetanmekyaxe ro mak okwe. Ero wa xa marha naxe awepamthîrî komo amn̂e miya roro. Ero wa maxe anarî komo weronomachome, apoko so eserepokachome so marha.

47 Ero wa maxe Aporin komo Kaan yewetîra awexirî ke so, tahwore ewetîra awexirî ke so ha. Yînahpen̂e cma re ka maxe, cemyawnoye xa ka. Wara rma Noro poko ahwotara maxe okwe. Tahwore exihra ro mak maxe kica Noro poko. Ero wa awexirî ke so wa awemetanmecho komo awepor̂axe so okwe.

48 Ero yanme marha aaxatî komo yanton me thakwa maxe okwe. Awapickexe so tîroman̂e awexitaw so rma, wokumra awexitaw so marha, ponomra awexitaw so. Awesemetanmekyataw so ro mak awapickexe okwe. Noro yipu komo n̂ekmexpesî Aporin komo awahsîn̂e komo me. Noro rma n̂iir̂asî kuripara apîmtari so. Ero wa tak awir̂axe so awaikachome so tak okwe.

49-50 Meyeno komo tak n̂ekyasî Kporin komo awaparî komo me roowo yenatîtopo n̂ixa. N̂examro mokyaxe kar̂pe ro mak wikoko wara ro mak. N̂examro mtapotarî yentara thakwa maxe okwe. Tmayan̂em wara nasî n̂examro yewru. Poritomo komo pînîn yawno pîn mîkyam, nocwakomo me cehsom komo pînîn yawno pîn marha, rikomo komo pînîn yawno pîn marha.

51 Awoh komo xîkrî non̂etîkexe okwe. Anatîrî komo yeperîrî marha nahtîkexe okwe. Ero ke mîwaiyaxe tak okwe rooma yaka. Exihra tak nasî ahyaw so amn̂e puruma yeperîrî, uupa yukun, aseci. Ero yipu exihra nasî anahrî komo. Awoh komo xîkrî exihra marha nasî paaka xîkrî, oper̂a xîkrî marha. Ero ke mîwaiyaxe tak okwe aroman komo yaka.

52 Awewton komo wamcexe awaparî komo. Awewton komo wacan ponaro maxe awecen̂an komo me exirî ke. Kaw so rma re nasî awewton komo wacan. Ero pona meen̂axe akurunpetopo komo me. Ero yipu rma macakexe awaparî komo. Ahnoro awewton komo potaw so n̂ecececexe awahkoton̂e komo me. Ero wa naxe ewto potaw so, arowon poko hakno komo potaw so, Aporin komo Kaan nîmyas awya so ero potaw so ha.

53 Rooma poko ro mak maxe ero yimaw. Ero wa maxe awaparî komo ya awamtorî ke so. Ero ke amxîkîthîrî pen komo punu rma tak mon̂exe okwe, Aporin komo Kaan nîmîtho pun okwe.

54-55 Kîpînîn yawno me cma re naxe anarî komo kîrkomo, apoyino kom ha. Ockon̂e, kan̂e me marha cma re naxe rikomo poko ciki. Noro yipu komo rma tak naxe amn̂e takno komo pînîn yawra hara okwe, cipici komo pînîn yawra marha, cenawno komo pînîn yawra rma. Tîmxîkrî komo pînîn yawra marha naxe okwe waipîn komo pînîn yawra. Ero ke noro yipu komo iyotmara naxe okwe tîmxîkîthîrî pun ke ero mak exirî ke iyotî okwe. N̂erewasî ro mak aroman komo awewton komo wamtorî ke awaparî komo ya.

56-57 On wara marha nai anarî wooxam hara, kîpînîn yawno me xa nai anarî komo yopo. Roowo yapikî xera ro mak na nai cukmape exirî ke yîhtarî. Noro yipu komo rma ciin̂o iyotmara naxe tîmxîkrî mînpontho ke ewruxapu ke rma. Tîmxîkîthîrî pun ke marha iyotmara naxe ewruxan pun ke ha. Ero wa nasî ciin̂o poko cenawno poko rma. Tîmrerî marha iyotmara nasî, cemsîrî marha iyotmara. En̂epa me mak non̂esî noro rma cerewre exirî ke aroman komo awamtorî komo ke awaparî komo ya. Awewton komo wacan metatan komo yecen̂e xa naxe awaparî komo awahkoton̂e me so.

58 Apanatanmetopo komo yewetîtîkara na mat okwe. On karita yaka mewrexapu yewetîra na matu. Kir̂wanî ro mîn Aporin komo Kaan yosotî, eraspetono marha mîn ha. Ero poko epohkara matu, twerîhra marha na metahcat okwe apanatanmetopo komo yewetîra awexirî ke so okwe.

59 Ero ke ero wara awexirî ke so awîrîmexe so xa Aporin komo. Awepamthîrî komo marha nîwîrîmesî. Anarmerpan ke nîwîrîmesî pahkîno ke xa okwe. Aweper̂an komo marha nasî cerewrem me xa, pahkîno me marha.

60 Exipsiu komo yeper̂an meen̂atken̂e pahxa. Ero yipu pona meraswatken̂e. Ero yipu ya xa marha awahsîpexe so tak Kporin komo. Etowîn me ro mak nasî eper̂a, yaw maxe, ero.

61 Anarmerpan komo ya awahsîpexe so Kporin komo eper̂a ya, awîrîmacho kom ya xa. On karita yaka emewretîkara nasî ero yipu rma n̂ekmexpesî awaikachome so tak okwe.

62 Mer̂pono pînînhîrî xa amyamro xir̂ko wara rma ehxapunhîrî. Asak mak tak mehtîkexe okwe amn̂e. Ero wa maxe Aporin komo Kaanî mtapotarî yewetîra awexirî ke so okwe.

63 Yihcirî me ka Kporin komo nahwotai awakrerî komo poko, awepamnorî komo poko marha. Amn̂e tak awaikacho komo poko makîrha nahwowas hara, ahcamnotopo komo poko marha. Roowo pona mîîcexe aweken komo me ahsîso, ero poi tko awowyaxe so hara.

64 Ero yimaw awakpayaxe so Kporin komo anarmerpan komo cheka, roowo yakwerî poko hakno komo cheka okwe. Iito tak ponaro anarî komo yehtopo poko tak mahwowaxe okwe. Weewe yenporixapu poko mahwowaxe, toopu yenporixapu poko marha. Ponaro awehtoponhîrî pîn poko mahwowaxe, ponaro aporin pen komo yehtoponho pîn marha.

65 Iitono komo chew awexitaw so awepokaretopo komo exihra ro mak nasî. Ahtarî komo yepokaretopo meero exihra nasî. Mepor̂axe rma re, exihra ro mak nas okwe. Meraswaxe roro iito awexitaw so. Awewru komo marha n̂ekar̂kesî. Ahwora ro mak tak maxe okwe.

66 Kwaihya na oroto, kan̂e me roro maxe okwe. Kosope ero wa mîîkexe, katpanaw marha. Meraswaxe ro mak okwe.

67 Pahxaxaro on wara mîîkexe, Yohno kokmam xe xa was okwe, mîîkexe. Kokmamche tak, Yohno enmapu xe was okwe, mîîkexe hara. Ero wa mîîkexe eraspetono yenîrî ke awya so, awahwokacho komo yenîrî ke marha.

68 Ero yimaw tak awen̂epexe so Kporin komo Exitu pona hara. Kanawa yaw awen̂epexe so. Iina xa hara tohra maxe, wîîkekn̂e cma re ka awya so. Iina xa hara tko ken̂epexe so hara okwe. Iito awexitaw so aaxatî pîn komo warawanwaxe cma re apoko so. Wooxam komo tîmî xe naxe, kîrkomo marha, antonano me tîmî xe so naxe. Awahsîra so tko naxe okwe. Ero wa maxe okwe, kekn̂e. Ero wa kekn̂e Moises Ixaw Yana komo ya.