Ero yinhîrî nîmtapowakn̂e xa hara Moises. Ixaw Yana poritomon komo marha nîmtapowatken̂e. On wara ketken̂e tpoyino komo ya, Apanatanmetopo komo men ewetîcoko oroto amna n̂ekatîmyas awya so ero.

2 Xotaw mîwacexe amn̂e arowon komo pona, Aporin komo Kaan nîmyasî awya so ero pona. Iina awepatakache so toopu enmecoko porin komo. Kaw ke yumuturecoko.

3 Ero pona tak mewrecoko apanatanmetopo komo ahnoro, awya so wentamexpesî ero. Ero wa ehcoko Xotaw watoche, arowon komo pona awtoche so. Aporin komo Kaan nîmyas awya so ero pona mîîcexe. Paaka mownu nas iito mer̂pora ro mak, ween pen marha okre. Pahxa Aporin komo Kaan kekn̂e awya so, Ero wîmyas awya so, kekn̂e. Ero wa kachonho yaw roro rma tak nîmyas awya so. Iina awtoche so apanatanmetopo komo mewrecoko toh poko.

4 Xotaw watoche awya so toopu ciicoko. Ebaw Yîpîn pona ciicoko. Ciriche yumuturecoko kaw ke.

5 Iina marha Aporin komo Kaan ya tîmsom yakn̂itopo akîhtocoko. Toopu xa hara enmecoko ero me. Kuripara ke enporira ehcoko toopu. Ero wara rma enmecoko.

6-7 Enporin mak akîhtocoko toopu, Aporin komo Kaan ya tîmsom yakn̂itopo me. Ero pona tak akn̂icoko Noro ya tîmsom, takn̂itîkaxmu tîmcoko, Aaxe xa wasî, kacho me tîmsom marha. Ero yipu akn̂icoko ero pona. Iito marha eseresmacoko, ahwotacoko marha Aporin komo Kaan n̂enîrî me. Ero wa ahwotacoko Noro poko.

8 Kir̂wan̂he men mewrecoko apanatanmetopo komo wekatîmyas awya so ero. Toh poko mewrecoko, ketken̂e. Ero wa ketken̂e Moises komo Ixaw Yana komo ya, poritomo komo ya rma ketken̂e.

9-10 On wara marha ketken̂e Moises komo tîmsom pokono komo yakro tak. Repita komo mîkyam n̂examro yakro ketken̂e Ixaw Yana komo ya. On wara ketken̂e, Awero ro so xa amna mtapotarî entacoko. Oroto tak tîyanan me awicow so Aporin komo Kaan. Ero ke Noro mtapotarî ponaro xa ehcoko. Apanatanmetopo komo ewetîcoko awya so wekatîmyasî oroto ero, ketken̂e. Ero wa ketken̂e Moises komo, Kporin komo ya tîmsom pokono komo yakro.

11-12 On wara marha kekn̂e Moises Ixaw Yana komo ya, ero kaamo po rma kekn̂e, Xotaw watoche awya so on wara tak ehcoko, etocoko Xeresin Yîpîn pona Kaan ya awakronomacho komo yekatîmso. Yîraco me mak etocoko iina, anarî komo mak. On warai komo tocowpe iina, Simeaw komo, Repita komo, Xuta komo, Isaka komo, Xose komo, Benxamin komo. Ero warai komo tocowpe iina, Xeresin Yîpîn pona.

13 Taa, Ebaw Yîpîn pona tocowpe anarî kom hara Kporin komo ya awîrîmacho komo yekatîmso hara. On warai komo tocowpe iina, Huben komo, Kace komo, Ase komo, Seburon komo, Taan komo, Nahtari komo. Ero warai komo tocowpe iina, Ebaw Yîpîn pona hara.

14-15 Iina awtoche so Repita komo tak nîmtapotacowpe. Kar̂pe men kacowpe Ixaw Yana komo n̂entarî me. On wara kacowpe, Kporin komo nîwîrîmarî me n̂ehcowpe mîk hak warai ciin̂e komo, kuripara na n̂iir̂atu anarimaw, weewe na n̂enpor̂atu anarimaw. Kicicme ro mak nasî ero yipu Kporin komo ya. Ciin̂e ro komo na n̂iir̂a anarimaw. Noro yipu ciriche en̂epa me n̂iir̂atu tîmîn yaw so ponaro cehtopo me. Ero yipu ciin̂e komo men n̂ehcowpe Kporin komo nîwîrîmarî me, kacowpe. Ero wa kache on wara eyuhcoko ahnoro, Taa, ero wa ham, kacoko tak.

16 Kporin komo nîwîrîmarî me marha n̂ehcowpe noro pîntho me tîîm yenîn̂e komo, ero wa xa marha n̂ehcowpe tînocwan yenîn̂e komo hara, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

17 Kporin komo nîwîrîmarî me marha n̂ehcowpe tpoyino rowon wokpan yetakan̂e komo, anana ciin̂e kom ha, kacowpe. Ero wa kache eyuhcoko hara ahnoro, Taa, ero wa ham, kacoko tak.

18 Kporin komo nîwîrîmarî me marha n̂expe ewuhnî tacinmekn̂e esama yai, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

19 Kporin komo nîwîrîmarî me marha n̂ehcowpe kîchewno komo yemetanmekn̂e komo, yîmîhnî yemetanmekn̂e komo marha, iin̂o waixapu yemetanmekn̂e komo marha, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

20 Kporin komo nîwîrîmarî me marha n̂ehcowpe tîîm pici pokono komo. Ero wa cehsom komo naxe tîîm komo yetakritopo yenpon̂e me rma kica, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

21 Kporin komo nîwîrîmarî me marha n̂ehcowpe okno pokono komo, wooxam yukukmacho wara rma kica, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

22 Kporin komo nîwîrîmarî me marha n̂ehcowpe cepeka pokono komo. Ero wa naxe tîîm yemsîrî pokono komo, tînocwan yemsîrî pokono komo marha, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

23 Kporin komo nîwîrîmarî me marha n̂ehcowpe cipici nocwan pokono komo, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

24 Kporin komo nîwîrîmarî me marha n̂ehcowpe tpoyino yetapan̂e komo, en̂epa me etapan̂e kom ha, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

25 Kporin komo nîwîrîmarî me marha n̂ehcowpe kicicitho pîn waihkan̂e komo epethîrî pona, kacowpe. Ero wa kache eyuhcoko xa hara ahnoro, Taa, ero wa ham, kacoko tak.

26 Kporin komo nîwîrîmarî me marha n̂ehcowpe on wara kan̂e pîn komo, Taa, ahnoro on amna panatanmetopo wewehcasî, kan̂e pîn komo, kacowpe. Ero wa kache eyuhcoko xa hara ahnoro, Taa, ero wa ham, kacoko tak, kekn̂e. Ero wa kekn̂e Moises Ixaw Yana komo ya.