On wara marha kekn̂e Moises Ixaw Yana komo ya, Amn̂e mîîcexe arowon komo pona, Aporin komo Kaan nîmyas awya so aweken komo me ero pona. Iina awtoche so awekenî ro komo tak mahsîyaxe. Iitono ro me tak maxe.

2 Iito awexitaw so anatîrî komo miir̂axe amararîn komo pona, Aporin komo Kaan nîmîtho pona. Ero yepetache tak yihcirî me epetaxapu xa enkacoko een yaka. Aacoko tak ewto pona, Aporin komo Kaan nahsîyasî tosotî yekenî ro me ero pona.

3 Kaan yaka cewomsom yaka xa aacoko, ero yimaw ciiso nasî ero pokono ro me, noro yaka aacoko. On wara kasko yîwya, Pahxa Kporin komo kekn̂e kporin pen komo ya on wara, On arowon komo me wîmyas amn̂e awya so, kekn̂e. Ero pona tak kmokye okre, kasko yîwya.

4 Ero wa kache awya so Kaan yaka cewomsom tak nahsîyasî an̂ekîthîrî komo. Ero n̂ir̂mikyasî Aporin komo Kaan ya tîmsom yakn̂itopo mîtkoso.

5 Ero yinhîrî on wara kacoko hara Aporin komo Kaan n̂entarî me, Aramew me xakn̂e oporin pen twaihsom me thakwa. Exitu pona tak cekn̂e hara asak makî ka exitaw so epamrî komo. Iito tak tî n̂epamtîkekn̂e mer̂pora ro mak. Karitî me so xatken̂e.

6 Kemetanmekyatken̂e so tko Exipsiu komo. Iyopo ro mak kapicketken̂e so okwe.

7 Ero ke tak tîmtapowatken̂e Kporin komo yakro. Ponaro xatken̂e kporin pen komo noro yakro tîmtapowakn̂e. Cerewre xa tîtketken̂e yîwya. Kîmtapotarî komo n̂encekn̂e. Kemetanmetopo komo n̂een̂akn̂e, kapickacho komo marha n̂een̂akn̂e kyopo ro mak kapickacho kom ha, kîhyotopo komo marha n̂een̂akn̂e.

8 Ero ke Exitu poi kekyatken̂e so Kporin komo. N̂ekaricekn̂e xa tamorî ke kowtome so. Etapoyankaxapu wara xakn̂e kowrî komo poko. Cirihnî komo n̂iir̂akn̂e kowtome so, eraspetono ro mak.

9-10 Ero yinhîrî tak oona kekyatken̂e so. On roowo tak nîmyakn̂e kîwya so. Paaka mown pen nasî tan mer̂pora ro mak, ween pen marha okre. Ero ke on ha Apa, onatîrî yeperîrî wîmyas awya, kacoko. Yihcirî me epetaxapu on wîmyas anmîthîrî po epetaxapu ha, kacoko Aporin komo ya. Ero wa kache yir̂micoko Aporin komo Kaan yeepataka. Iina ciriche awya so atupentacoko tak, Oporin Amoro Apa Kaan, kacoko marha.

11 Ahwotacoko marha Aporin komo Kaan ya awakretopo komo poko, ahyawno komo wakretopo poko marha. Repita komo marha nahwotacowpe awakro so, achewno komo marha. Ero wa ahwotacoko Aporin komo Kaan nîmîtho poko.

12 On wara marha ehcoko, osorwaw yicimn̂ipuntache anatîrî komo yeperîrî yîraconkacoko. Ero wa ehcoko roro osorwaw yicimn̂ipuntache roro. Cisimu wicakî xa yîraconkacoko roro ero po so. Ero tak tîmcoko Repita komo ya, achewno komo ya, yîmîhnî komo ya, iin̂o waixapu komo ya. Noro yipu komo ya tîmcoko awewton komo po eseresmachome so tmaxmitaxi ro.

13 Ero yipu tîmîche on wara kacoko Aporin komo Kaan ya, Apa, omîn yai waare onatîrî yeperîrî raconho. Awya tîmsom me waare ha. Wîmye tak Repita komo ya, amna chewno komo ya, yîmîhnî komo ya, iin̂o waixapu komo ya, noro yipu komo ya wîmye amtapotachonhîrî yaw roro rma. Ahnoro amtapotachonhîrî wewehcasî watohnî me ro mak. Yîhcamnopîra ro mak wasî.

14 Awya tîmsom yapupra ro mak wîxakn̂e owracetaw waixa pen pînîn yaw, ero pokohra ro mak wîxakn̂e kicicme ehxapu me oyexitaw hara. Ero raconho tîmîhra ro mak wîxakn̂e waixa pen komo nahrî me. Oporin Amoro Apa, ponaro oyehtopo ro mak. Ahnoro amtapotachonhîrî wewetîkai, Ero wa men ehcoko, kachonho awya.

15 Ero ke en̂exa kah yai amna enko Apa, aweken poi kir̂wanî ro poi. Ayanan komo akronomakî, Ixaw yana kom ha. Amna rowon marha kir̂wan̂he cirko, anmîthîrî amna ya. Pahxa mîîkekn̂e amna porin pen komo ya, On wîmyas amn̂e awepamthîrî komo ya, mîîkekn̂e. Yaaro tan wîîkesî, cemaro pîn me ro mak, mîîkekn̂e, ero rma tak mîmye Apa. Kir̂wan on amna rowon anmîthîrî. Paaka mownu pen nasî tan mer̂pora ro mak, weenu pen marha okre, kacoko. Ero wa kacoko Aporin komo ya.

16 On wara marha wîîkes awya so, ero yipu poko apanatanmekyaxe so Aporin komo Kaan. Ero ke ero ponaro men ehcoko. Ewetîn̂e me roro ehcoko. Wara kyam mak ewetîra ehcoko.

17 On wara mîîkacow oroto, Ponaro xa amna yehtopo Mîk Kporin komo, mîîkacow. Noro yehtopo yaw roro nas amna. Yîmtapotarî marha amna n̂ewehcasî kpanatanmetopo. Noro xa amna n̂ewehcasî, mîîkacow oroto.

18 On wara marha Kporin komo nîîka hara awya so oroto, Oyanan komo amyamro. Tîpîn̂em me xa keen̂axe so. Omtapotachonho yaw roro rma ero wara keen̂axe so. Ero ke men owya apanatanmetopo komo ewetîcoko watohnî me ro mak, nîîka awya so.

19 On wara marha nîîka Aporin komo Kaan awya so oroto, Kir̂wan mîkyam, kacho me kiir̂axe so, cekacaxmu me xa kiir̂axe so ahnoro mîk hakî rowon pono komo yopono me. Takîhsom xa mîkyam, kacho me kiir̂axe so. Oponarono me marha kiir̂axe so. Ero wa kiir̂axe so omtapotachonho yaw roro rma, nîîka oroto awya so, kekn̂e. Ero wa kekn̂e Moises Ixaw Yana komo ya.