On wara marha kekn̂e Moises Ixaw Yana komo ya, Anarimaw on wara na natu kîrkomo, n̂emtayeyukyatu. Ero wa exitaw so cesen̂ekaxmu yentan̂e ro yaka na cetu. Ehtoponhîrî komo yentatîkache kicicme cehsom tak nîhtînoya cesen̂ekaxmu yentan̂e ro. Kicicme mîxakn̂e amoro, kesî emetanmekno rin̂enho ya. Kir̂wan̂he reha mîxakn̂e amoro, kesî emetanmexapunhîrî ya hara.

2 Anarimaw tîhyosom me na nîhtînoya kicicme ehxapunhîrî. Ero wa yîhtînoyataw noro nîrapocowpe iina rma cesen̂ekaxmu yentan̂e ro wero ro rma. Nîhyocowpe kicicme ehtoponhîrî yecenarî mak. Tukuknomaxi mak nîhyocowpe.

3 40 ro yîhyotopo iyoponkara ehcoko. Ero yopo yîhyokyataw noro pîntho me xa tak noro mentîkexe okwe, apoyino komo rma.

4 On wara marha wîîkes awya so, awoh komo ewnamira ehcoko apicketaw anatîrî komo yeperîrî potutopo poko.

5 On wara marha wîîkes awya so, anarimaw 2 na natu kîrkomo etmîtwo re. Noro re rma na mîkyam n̂examro. Ero wa exitaw so anarînhîrî pen na waihya okwe yumumumnî me rma okwe. Ero wa waipuche on wara tak n̂expe yihcinhîrî, tîyanan pîn ahsîra n̂expe. Cin̂onhîrî pen yaknonho xa noro nahsîpe cipici me. Ero wa nahsîpe waixa pen yaknonho.

6 Ero yinhîrî tak yihcirî me yîmxîkwataw kîîrî cik ha, noro tak ciicoko aknonhîrî pen xîkîtho me. Noro pen yosotîtho yaw rma osohtocoko. Ero wa ciicoko waixapu pen yosotî yîhcamnopîra ehtome Ixaw Yana komo ya.

7 Anarimaw on wara tko na nai waixa pen yaknonho, taknonhîrî pen cinho yahsî xera na nai cipici me. Ero wa exitaw wooxam tak tompe poritomo komo yaka, ewto potaw cesentaxmu komo yaka ha. On wara tak kape yîwya so, On̂iyonho pen yaknonho oyahsî xera nai okwe cipici me taknonhîrî pen mumuru me omxîtachome. Awaknonhîrî pen cinho men tahsîpore nasî, kachonho yaw roro cexi xera nai okwe, kape yîwya so.

8 Ero wa entache tak wooxam yahsî xatî pîn tak nan̂ikpocowpe poritomo komo. Mokuche yîmtapotarî ka n̂entacowpe. Pîra, moso yahsî xera ro mak wasî opici me, nîîke rma na yîwya so.

9 Ero wa ketaw rma aknonhîrî pen cinho tompe yîhyaka. Poritomo komo wero ro rma tompe. Yîhtarî mohkape eeco mak. Mohkache kucpi kape ewru pore. On wara kape yîwya, Ero wara men cirpore nasî kîîrî, taknonhîrî pen mumuru me ciri xatî pîn, kape. Ero wa kape wooxam.

10 Ero yinhîrî on wara kacho me tak n̂ehcowpe noro xîkrî komo, Yîhtakaxapu xîkrî komo mîkyam, kacho me tak n̂ehcowpe noro yipu komo.

11-12 Taa, anarimaw kîrkomo n̂etar̂metu asak ha. Etar̂metaw so anarî pici mokya ciin̂o yepanso. Ciin̂o yar̂man̂e yemru na nahsîya oko ciin̂o yahsîpînkapochome tak yîwya. Ero yipu ahsîyataw ahsîn̂enhîrî yamotho yîhkotocoko kr̂a. Yîpînîn yaw exihra ehcoko.

13 Akumixin komo yaka cirihra ehcoko asakî awemyawno komo yawsîn yukuknomacho. Tawsîn̂em, taponukyem hara, ero warai cirihra ehcoko akumixin yaka ececenarîno wara rma kica.

14 Ero wa xa marha ehcoko ahce na yeen poko hara, asakî cirihra ehcoko amîn komo yaka, yukuknomacho ha. Porinî n̂he, wahrai n̂he, ero warai cirihra ehcoko amîn komo yaka ececenarîno wara rma kica.

15 Yaarono ke mak awsîn yukuknomacoko. Yaarono ke marha porin me ehtopo yukuknomacoko. Ero warai ke yukuknomacoko awemyawno komo pahkî awehtome so waipîra arowon komo po, Aporin komo Kaan nîmyas awya so ero po ha.

16 Kicicme ro mak Aporin komo Kaan n̂een̂asî cemaro wara yukuknoman̂e komo. Ero wa n̂een̂asî ahnoro kicicme kiin̂e komo.

17 On wara marha wîîkes awya so, Amarekita komo yehtoponho yîhcamnopîra ehcoko. Exitu poi amokyataw so awemetanmekyatken̂e so kica.

18 Cekar̂kaxi ro mak awexitaw so mokyatken̂e esama yaw amapitaka so. Amapitawnonhîrî pen komo n̂etapetken̂e oko. Kaan poko twerîhra ro mak xatken̂e kica.

19 Ero ke kr̂a Amarekita komo waihkatîkacoko amn̂e. Osotîthîrî komo meero yîhcamnocoko ero yentara ro mak tak ehtome so kah yakwerî poko hakno komo. Ero wa n̂examro waihkatîkacoko arowon komo pona awtoche so, Aporin komo Kaan nîmrî pona awtoche so ha. Iito awexitaw so tîtken̂e tak aaxatî pîn komo n̂iir̂asî Noro. Ero yimaw tak Amarekita komo waihkacoko. Omtapotarî men yîhcamnopîra ehcoko, kekn̂e. Ero wa kekn̂e Moises Ixaw Yana komo ya.