On wara marha kekn̂e Moises Ixaw Yana komo ya, On wara na natu anarî komo amn̂e, wooxam na nahsîya cipici me. Ero yinhîrî kicicme ehtopo n̂een̂a kica. Ero poyero yiixera tak nai hara. Ero wa enîrî ke karita tak mewrepe, Ketowyasî tak moso yai, ohcinho yai, kacho mewrepe. Ero wa mewrexapu nîmya yîwya wooxam ya tîmîn yai tak en̂epetome.

2-3 Ero yinhîrî tak ciin̂onhîrî yai tîtoche wooxam, anarî tak na nahsîya ciin̂o xa hara. Yiixera xa marha tko na nai iin̂o xa hara. Ero ke noro xa marha na mewre karita, Ketowyasî tak moso yai, kacho mewre noro makîrha. Ero wa mewrexapu xa hara nîmya wooxam ya tîmîn yai totohme hara. Anarimaw ponanînhîrî pen na waihya okwe iin̂onhîrî pen. Ero ke iin̂omra xa hara nai okwe wooxam.

4 Ero wa exitaw ahsîra xa hara n̂expe iin̂onhîrî, yihcirî me ahsîn̂enhîrî. Anarî xakn̂e iin̂onhîrî hara. Ero ke kicicme xa nasî yihcirî me ahsîn̂enhîrî ya ahsîyataw xa hara. Noro yipu yahsîyataw rma cipici me xa hara kicicme xa nasî Kporin komo ya. Ero wa awehtopo komo ke arowon komo yîwîrîmara ehcoko kica, Aporin komo Kaan nîmyasî aweken komo me ero yîwîrîmara, kekn̂e Moises.

5 On wara marha wîîkes awya so, kekn̂e Kporin komo, kokon̂oro yipitaxapu komo en̂epera ka ehcoko sowtatu me. Ahce na poko marha antomara ehcoko mooxeno poko. Cewn̂e cimn̂ipu ka n̂expe tîmîn yaw mak mooxe etarira. Cipici ka nahworepe, tînahsîthîrî ha.

6 On wara na mat anarimaw, apurantan komo na mîmyatu apoyino yemyaka. Ero yimaw noro yemyawno yahsî xe na mai, Yaaro xa, opurantantho nîramanîyas hara amn̂e, kacho yahsî xe na mai. Ero yipu yahsîyataw awya so puruma yakihtopo ahsîra ehcoko. Makatawno ahsîra ehcoko toopu, kanahtawno marha ahsîra ehcoko. Noro nahrî ciitopo thakwa mîn mahsîyaxe kica.

7 On wara na nai apoyino komo anarimaw, tpoyino nahsîya Ixaw Yana rma. Ahsîche epethîmnî me ro mak napicke. Anarimaw anarî komo ya nîmya epethîrî pona. Yihcirî me ahsîn̂enhîrî yîhtînopuche awya so noro men waihkacoko kicicitho ke yîchewnomra awehtome so.

8 On wara wîîkesî repra poko hara, ero ken̂e exitaw apoyino komo, noro ciicoko Kporin komo mîn yenîn̂e komo mtapotarî yaw roro rma. Repita komo mîkyam n̂examro mtapotarî yaw roro ciicoko. Owî rma n̂examro panatanmekyakn̂e ero yipu poko. Ero ke yîmtapotarî komo yaw roro xa ciicoko.

9 Aaci Mirian yehtoponho ponaro rma ehcoko. Noro pen panarekn̂e Aporin komo Kaan esama yaw amokyataw so Exitu poi. Ero ke noro panaretoponho yîhcamnopîra men ehcoko.

10 Anarimaw ahce na mîmyatu apoyino ya tîramansom me hara. Tîmyataw on wara exihra ehcoko, Yaaro xa oyemyawnonho nîramanîyas hara amn̂e, kacho yahsîso tohra ro mak ehcoko yîmîn yaka.

11 Yîmînî mkai mak ececetocoko. Apurantan yahsîn̂e mak tompe ehso ahyaka ha, apurantan yîramantopo yîhtînomexpotopo yehso.

12-13 Anarimaw yupurantamra ro mak nai mîk apurantan yahsîn̂e. Wara rma noro ponontho na mahsîya apurantanthîrî yîramantopo yîhtînotome awya so. Ero yipu yahsîyataw rma awya so yîwînkîra ehcoko ahyaw so rma exitaw. Tîmcoko hara yîwya kokmamyataw tponon yaw rma yîwîntome. Ero wa tîmyataw awya so, Owî cma mîwakrew okre, nîîke na awya so. Kir̂wan me marha awen̂axe so Aporin komo Kaan.

14 On wara marha wîîkesî yupurantamnî komo poko hara, cesemetanmesom poko ha, anarimaw noro yipu na mapicketu cepemaxmu me. Ixaw Yana rma na mîk mapicketu, achewno komo tko na anarimaw.

15 Noro yipu yapicketaw awya so epemacoko roro enmar̂atîxera, kokmamra rma ka exitaw. Ero wa epemacoko yupurantamnî me exirî ke thakwa. Cepemacho ponaro thakwa nas ha. Yohno epemara awexitaw so Kporin komo yakro na nîmtapowa. Awîrîyake na yîn̂entarî me kopi. Kicicme tak na awen̂a Noro hara Aporin komo Kaan yohno epemara awexirî komo ke, kekn̂e Moises yîwya so.

16 Taa, waihkano ritopo poko marha kîmtapowasî, kekn̂e hara Moises. Yîîm komo waihkara ehcoko yîmxîkrî komo yehtoponho yanme. Yîmxîkrî komo marha waihkara ehcoko yîîm yehtoponho yanme hara. Kicicme ehxapunhîrî komo mak waihkacoko.

17-18 On wara marha ehcoko, achewno komo yemetanmekn̂e en̂ekacoko rma yaaro rma. Ero wa xa marha rikomo komo yemetanmekn̂e komo en̂ekacoko, yîmîhnî komo yemetanmekn̂e komo. Iin̂o waixapu ponontho ahsîra ehcoko, Apurantanthîrî wîramanîyas hara amn̂e, kacho me. Exitu po awehtoponhîrî komo ponaro rma ehcoko. Iitono komo yanton me mîxatken̂e epeman me thakwa okwe. Awowyatken̂e so tko Aporin komo Kaan xiya awehtome so. Ero ke wa ero yipu poko kpanatanmekyaxe so,

19 Anarimaw anatîrî komo na mîhkocetu puruma, sepata na. Ero yipu yîhkocetaw yîhkotoxapu ciki na mînomyatu awen̂ekarî so, awrutamixapu ciki na mînomyatu. Iika tohra tko ehcoko. N̂expe mak achewno komo nahrî me, yîmîhnî komo nahrî me anarimaw, iin̂o waixapu komo nahrî me. Ero wa n̂expe awakretome so Aporin komo Kaan ya. Ero yanme ehn̂an me awir̂axe so Noro ahce na poko awexitaw so.

20 Anarimaw oripera yeperîrî na metapetu amoi ke potutome. Potuche tak etapara xa hara ehcoko. Etîmtoxapu rma cik n̂expe achewno komo nahrî me, yîmîhnî komo nahrî me marha, iin̂o waixapu komo nahrî me marha.

21 Anarimaw uupa yeperîrî na mîpohcatu anatîrî komo. Potuche potuhra xa hara ehcoko. Iito rma n̂expe etîmtoxapu achewno komo nahrî, yîmîhnî komo nahrî marha, iin̂o waixapu komo nahrî marha.

22 Exitu po awehtoponhîrî komo ponaro rma ehcoko. Iitono komo yanton me thakwa mîxatken̂e. Epeman me awantometken̂e so okwe. Ero ke ero yipu poko kpanatanmekyaxe so, kekn̂e Moises Ixaw Yana komo ya.