On wara marha kekn̂e Moises Ixaw Yana komo ya, On wara na nai kîîrî anarimaw, tapikmoso na nai emuthîrî. Tîhkotoso na nai yîpîtînthîrî. Ero wa exitaw tpoyino komo yakro esenmekîra n̂expe Kporin komo poko awahwowataw so.

2 Anarimaw na amxîkrî komo n̂ewruya kicicme awehtoponhîrî komo. Ero wa ewruxapu marha esenmekîra n̂expe tpoyino komo yakro Kporin komo poko awahwowataw so. Noro yepamtho meero marha esenmekîra n̂expe. 10 me rma ehretawnomaxapu komo pona roro esenmekîra n̂ehcowpe Kporin komo poko ahwowataw so.

3 Amonita komo marha esenmekîra n̂ehcowpe Ixaw Yana komo yakro Kporin komo poko awahwowataw so. Epamthîrî meero marha esenmekîra n̂ehcowpe. 10 me ehretawnomaxapu pona roro xa marha esenmekîra n̂ehcowpe Kporin komo poko awahwowataw so. Ero wa xa marha esenmekîra n̂ehcowpe Moabita kom hara, epamthîrî komo marha.

4 Exitu poi amokyataw so awokpaxi so mokuhra xatken̂e okwe esama yaw. Ero wa xatken̂e Moabita komo, Amonita komo marha. Awru yarîhra marha xatken̂e. Baraw xa matko nan̂ikyatken̂e Beo mumuru, Peto pono, Mesopotamya pono ha. Aweremkachome so noro nan̂ikyatken̂e okwe.

5 Baraw mtapotarî yentara tko tî xakn̂e Aporin komo Kaan. Aweremkacho komo tî naknamekn̂e awakretopo komo me xa matko. Ero wa naknamekn̂e Aporin komo Kaan aaxe so cexirî ke.

6 Ero ke Moabita komo poko tawake exihra ehcoko miya roro. Akronoman̂e komo me marha exihra ehcoko.

7 On wara reha ehcoko Etomeu komo poko, yiixatî pîn me xa exihra ehcoko ayanan komo me exirî ke so. Exitu pono komo xatîmnokara marha ehcoko. N̂examro rowon pononho amyamro, n̂examro chewno me ha.

8 On wara n̂ehcowpe noro yipu komo yepamtho, 3 me ehretawnomache so tak mohcowpe cesenmesom me Kporin komo poko awahwowataw so.

9 On wara ehcoko sowtatu me awcetaw so ahce wa na kicicme kehtopo komo pokohra ro mak men ehcoko, kekn̂e.

10-11 Anarimaw so na on wara matu kîrkomo, mekuketu na kosope. Ero wa awexitaw eeta yai etoko. Iito esko kokmamso ro. Kokmamyataw xa eyehko. Ero yimaw tak amok hara awetarî yaka hara.

12-13 On wara marha ehcoko, awetî komo yewtî yukuknomacoko iina xa awtotome so ar̂maxi. Caarapa yosom me ehcoko ero ke ahtotome awya so awekacho komo. Ar̂mache awetîthîrî ahrucoko roowo ke.

14 Aporin komo Kaan xa n̂etar̂asî awetarî komo yari akurunpechome so. Aaxatî pîn komo yar̂mapotome awya so n̂etar̂asî achere so. Ero ke kir̂wan̂he men ciicoko awetarî komo. Kicicitho yenî xera men nasî Noro achere so cetar̂ataw. Kicicitho yenîche ahyai so men n̂etakname okwe.

15-16 Anarimaw tooto yantonînho na n̂emahciya tosomînhîrî yai. Etkurunpeso na mokya ahyaka so. Ero wa exitaw osomînhîrî ya tîmîhra ehcoko hara. Ahyaw so rma n̂expe. Tanme ro mak nîhtînope cewton. Noro yipu apickara ro mak ehcoko epethîmnî me kica.

17 On wara naxe anarî komo wooxam komo, kîrkomo pokono ro me natu. Ponaro anarî yana komo yehtopo yanme tî ero wara naxe kica. Noro yipu komo yanme marha naxe kîrkom hara wooxam pokono ro me hara kica. Noro yipu komo exihra ro mak men n̂ehcowpe achew so Ixaw Yana komo chew.

18 Anarimaw puranta na maar̂atu Aporin komo mîn yaka, ponaro awehtopo ro komo mîn yaka. Ero wicakî men wîmyas amn̂e Kaan ya, kachonho rma awya. Ero yipu yarî xe awexitaw so kîrkomo poko cehtoponhîrî yepetho arîhra ro mak n̂ehcowpe wooxam komo Kporin komo ya tîmsom me. Wooxam poko cehtoponhîrî yepetho marha arîhra n̂ehcowpe kîîrî kom hara iina. Kicicme ro mak nasî Aporin komo Kaan ya ero wa awehtopo komo.

19 On wara na matu anarimaw, apoyino komo ya na mîmyatu ahce ha na, puranta ha na, yînahrî kom ha na anarimaw. Emyaka so mak na mîmyatu. Ero wicakî xa marha wîramanîyas hara awya amn̂e, nîîke na awya so. Ero wa ketaw awya so, Ero poko awehtoponhîrî yepetho xe meero was amn̂e onmîtho yîhreru xa hara, kahra ehcoko yîwya so.

20 Anarî yana komo ya ero wa mîîketu rma na, Onmîtho yîramanîyataw hara ero poko awehtoponhîrî yepetho xe men wasî yîhreru xa hara, mîîketu rma yiixe awexitaw so. Apoyino komo ya reha ero wa kahra ehcoko, Ixaw Yana ya kahra awakronomachome so Aporin komo Kaan ya. Arowon komo pona awtoche so esekenmaxi ehn̂an me mak awiri xe so nasî Noro ahce na poko awexitaw so. Ero wa awakronoma xe so nasî.

21 On wara na mîîketu anarimaw, Ero wicakî men wîmyas amn̂e Kporin komo Kaan ya, mîîketu. Yaaro xa na mîîketu esemîknopîn me ro mak. Ero wa kache awya so ecmamnopîra men tîmcoko. Ecmamnopuche rma awya so, Ahce kacho epemara matu? nîîke ha men Noro awya so. Kicicme awehtopo me men nas okwe amtapotachonhîrî yaw roro tîmîhra awexitaw so. Ero wa men nas okwe.

22 Anarimaw, Ero wicakî men wîmyas amn̂e, kahra rma na matu Kaan ya. Ero wa kahra awexitaw so kicicme awehtopo komo mera rma nasî tîmîhra awehtopo komo.

23 Amtapotachonhîrî komo yaw roro xa men ehcoko. Awanme ro so mak mîmtapowaxe ahce na tîmtopo poko. Aporin komo Kaan n̂entarî me rma tko mîmtapowatu. Ero ke ero yaw roro rma ehcoko.

24 Anarimaw apoyino komo natîrî yewtî pona mîîcetu uupa yewtî pona. Iito awexitaw so awanme ro so ahcoko uupa yeperîrî. Een yaka tko enkapîra ehcoko anarîrî komo.

25 Anarimaw na puruma yewtî pona na mîîcetu, apoyino komo natîrî yewtî pona. Iito awexitaw so yathîrî na mîpohcatu awamorî ke so mak. Maria ke tko eepu yîhkotora ehcoko, kekn̂e. Ero wa kekn̂e Moises Ixaw Yana komo ya.