On wara marha kekn̂e Moises Ixaw Yana komo ya, Anarimaw apoyino komo yoku na meen̂atu mooxe waimamxapu. Bui na meen̂atu, oper̂a ha na. Noro yipu yenîche, Tanme ro mak tompe hara, kahra ro mak ehcoko. Apoyino komo yaka xa matko aacoko hara.

2 Anarimaw mooxe na nai apoyino komo, okno yosom. Anarimaw osom yîhtînopîra ro mak na matu. Ero wa awexitaw so waimamxapu arko amîn yaka mak. Iina mak cirko apoyino momokrî poko. Mokya rma na eposo. Mokuche tîmko hara yîwya.

3 Ero wa xa marha aacoko buhu hara waimamxapu yenîche, apoyino komo yok hara. Ero wa xa marha apoyino ya tîmcoko hara ahce na noro yemyawno yenîche ar̂maxapu. Noro ponontho na meen̂atu, ahce na meen̂atu ar̂maxapu. Ero yipu yenîche, N̂expe mak, kahra ehcoko.

4 Anarimaw apoyino yoku na meen̂atu esama yaw epokunkaxapu. Buhu na meen̂atu, bui ha na anarimaw. Noro yipu yenîche, N̂expe mak, kahra ehcoko. Anîmcoko rma.

5 Taa, on wara ehcoko amyamro wooxam komo, kîîrî ponon yamrura ro mak ehcoko. Ero wa xa marha ehcoko amyamro hara kîrkomo, wooxam ponon yamrura marha ehcoko. Kicicme ro mak nasî ero yipu yamrutopo Aporin komo Kaan ya.

6-7 On wara marha wîîkes awya so, anarimaw torowo yakowerî na meen̂atu esama yakumyaw. Weewe pono rma na meen̂atu, roowo pono anarimaw. Iito rma na meen̂atu yîson tîmxîkrî po eremaxapu, tuhme po eremaxapu ha na. Yîmxîkrî yaar̂ataw awya so yîson meero arîhra ehcoko. En̂epecoko noro. Ero wa ehcoko kir̂wan̂he awehtome so, pahkî awehtome so marha waipîra.

8 Anarimaw amîn na miir̂atu yaxan. Ero yipu ciir̂ataw tmeretwacaye ciicoko. Meretwacamra ciir̂ataw tooto men n̂epîrke amîn meretîn̂i okwe. Waihya men okwe. Ero wa waihyataw waihkano rin̂e wara rma maxe okwe meretwacamra exirî ke okwe amîn komo.

9 Taa, anarî poko hara kpanatanmekyaxe so, anatîrî komo na miir̂atu amn̂e uupa yatho. Anarmerpan cirihra ehcoko yathîrî ero re pona, ewtî pona. Anarmerpan ciriche rma n̂etwîrîmesî tak anatîrî komo yeperîrî okwe.

10 Anarimaw amararîn komo na mîpometu pomotopo ke, cihxisom ke. Ero yihxikn̂e me cirihra ehcoko bui buhu yakro.

11 Anarimaw poono na nai anamerpa kahxapu. Oper̂a poci kahxapu na mîn, riin̂u yakro kahxapu rma na mîn etîche re. Ero yipu amrura ehcoko aponon komo anarmerpa kahxapu ha.

12 Tmamcoye ciicoko aponon komo, yîmkarino ha. Eknutai so mamcon ciicoko 4 ha, kekn̂e. Ero wa kekn̂e Moises yîwya so.

13-14 On wara marha wîîkes awya so, kekn̂e Kporin komo, Anarimaw on wara na nai apoyino komo, cipici na nahsîya. Enaka toche yiixera tak nai kica. Noro poko na nîmtapowa kica kicicme. Kicicitho mîkro kica, nîîke na cipici poko. Moso wahsîye opici me. Enaka oyetakriche kîîrî pokonho me tak wîhtînoye kica, nîîke na.

15 Ero yipu yentache yîîm tak narpe cemsîrî yemyawno poritomo komo yaka, ewto potawno komo yaka. Yîson yakro rma naacowpe. Kîîrî pokono pînî ro mak moso, kacho naacowpe.

16-17 On wara nîîke yîîm poritomo komo ya, Oyemsîrî wîmye noro ya yipici me. Nahsîye rma ha re. Yiixera tko nai ham kica. Poko marha nîmtapowasî kica tohnaw ro mak. Kîîrî pokononho me mak wîhtînoye awemsîrî, kesî kica owya. Onî rma tko kîîrî pokono pîn me ehtopo kuknon poono, nîîke poritomo komo ya. Ero wa kache yîîm tak n̂enpope poritomo komo ya poono ha.

18 Ero yipu yenîche iin̂o tak nahsîcowpe poritomo komo, panarecowpe.

19 On wara kacowpe iin̂o ya, Amna ya tîmko prata 100 sikru ha, ketu marha yîwya. Ero tîmîche yîwya so nîmcowpe tak yîîm ya hara. Ero wa noro panarecowpe Ixaw Yana wosîn poko yîmtapotarî poyero, kîîrî pokono pîn poko yîmtapotarî poyero ha. Etowra ro mak n̂expe, yipici me rma n̂expe waihtopo pona roro.

20 Anarimaw yaaro rma na nîîke iin̂o. Kîîrî pokono pîn me yipici ehtopo kuknon exihra ro mak nai.

21 Ero wa exitaw yipici aacoko yîîm mîn potaka. Iina arîche noro pen tak waihkacowpe kîrkomo toh ke. Iitono komo rma waihkacowpe ewto pono komo rma Ixaw Yana komo yîwîrîman̂e me exirî ke. Kîîrî poko xakn̂e tîîm yaw rma ka cexitaw. Ero wa exirî poyero twaihkapore nasî. Ero wa metakir̂wamexe kicicitho ke yîchewnomra tak awehtome so.

22 Anarimaw kîîrî na meen̂atu anarî pici yenaw rma kica. Ero wa een̂ataw asakno roro rma waihkacoko, wooxam, kîîrî marha enawnonhîrî ha. Ero wa Ixaw Yana komo makir̂wamexe kicicitho ke yîchewnomra tak awehtome so.

23 Anarimaw on wara na nai kîîrî, emasî na n̂een̂a kîîrî pokono pînî ro mak. Anarî kîîrî npokonomatho mak mîk wooxam. Noro yipu yenaka na n̂etakriya kica.

24 Ero wa ehtopo komo yentache awya so asakno roro rma aacoko ewto potaka. Iina tak waihkacoko toh ke. Emasî waihkacoko emtarakara exirî ke. Ewto po rma re xakn̂e, emtarakara tko xakn̂e. Kîîrî marha waihkacoko anarî pici yîwîrîmarî ke. Ero wa metakir̂wamexe kicicitho ke yîchewnomra tak awehtome so.

25 Anarimaw on wara na nai kîîrî, ewto pohra na emasî n̂een̂a anarî npokonomatho rma. Noro yipu na nahsîya karpe, enaka marha na n̂etakriya kica. Ero wa ehtopo yîhtînopuche awya so kîîrî makî reha waihkacoko.

26 Emasî panarera ro mak ehcoko. Kicicme exihra rma nasî, twaihkaxmu me exihra. Tîmîtwono waihkan̂enho poko mîîketu, ero wa xa marha kapore nasî emasî poko hara ewto pohra ahsîxapu poko.

27 Ewto pohra emasî n̂een̂akn̂e kîîrî. N̂emtarakekn̂e rma na re wooxam. Yukurunpen̂e exihra thakwa xakn̂e okwe. Ero ke, Kicicitho mîkro kica, kahra cexpore nasî noro yipu poko emasî poko.

28-29 Anarimaw wooxam na n̂een̂a kîîrî, pokonomanî ro makî. Enaka n̂etakriya. Ero wa ehtoponhîrî komo tak na mencetu. Ero yipu yentache on wara kacoko kîîrî ya, Wooxam yîîm men epemakî. Prata tîmko yîwya 50 sikru. Noro wooxam tak ahsîko apici me. Mîwîrîmai thakwa okwe. Ero ke ahsîko etowîn me ro mak. Miya roro etowra ro mak esko awaitopo pona roro, kacoko yîwya.

30 Aamo pici ahsîra ro mak ehcoko. Poko aamo komo yehtopo yenaka tohra ro mak ehcoko, kekn̂e. Ero wa kekn̂e Moises Ixaw Yana komo ya.