On wara marha kekn̂e Moises Ixaw Yana komo ya, On wara na matu amn̂e tooto yokoputho na meen̂atu mararî po, woskara po ha na. Ero warai na meen̂atu arowon komo po awexitaw so, Aporin komo Kaan nîmyasî aweken komo me ero po awexitaw so ha. Noro pen waihkan̂enho tko na yîhtînopîra matu.

2 Ero yipu yeen̂ataw awya so aporitomon komo tocowpe okoputhîrî yenso. Cesen̂ekaxmu yentan̂e ro komo yakro tocowpe. En̂exa nukuknomacowpe ewto komo moxenon.

3-4 Meyeno pîn me yîhtînopuche ewto iitono komo tak paaka nahsîcowpe wos ha. Apickanî ro mak nahsîcowpe, yîpîmtawno yukukman̂enho pînî ro mak. Ahsîche naacowpe woskara pona, tuuna yaporî kwaka. Mararî me pomohnî ro pona naacowpe naatî me cirihnî ro pona. Iito tak paaka pîmîrî naxikwocowpe aporî yecihtaw rma.

5 Ero yimaw tak Kporin komo mîn yenîn̂e komo tak mohcowpe paaka yokoputho mîtkoso. Repita komo mîkyam mohcowpe, Aporin komo mîn yawno pokono me ciixapu komo. Wakreno ritopo yekatîmn̂e me ciixapu marha mîkyam. Cesen̂ekaxmu komo yentan̂e komo mîkyam, cesetapaxmu komo yehtopo komo yentan̂e komo marha. Ero pokono me ciixapu mîkyam Repita komo. Noro yipu komo mohcowpe.

6-7 Ero yimaw ewto pono komo n̂esemokacowpe meyeno pîn pono kom ha. Poritomo komo mîkyam n̂esemokacowpe. Paaka pun yepoi kacowpe, yîpîmîrî yaxikwoxapu pun yepoi ha. On wara kacowpe n̂examro, Apa kah yawno, moso pen wapatho pînî ro mak amna. Waihkarî yenîn̂enho pîn marha amna.

8 Apa kah yawno, moso paaka pen kamxukutho cma re mahsîyasî ayanan komo yehtoponho yahruru me, Ixaw Yana komo yehtoponho yahruru me ha. Kicicitho yai anowthîrî amna Apa. Ayanan komo pona cma re cirihra masî moso pen waihkachonho, kicicme exihnî waihkachonho ha, kacowpe marha. Ero wa kache wîhcamnoyasî tak noro pen waihkachonho.

9 Kir̂wan̂he maxe Kporin komo ya ero wa ciriche. Ponanîmton me tak maxe kicicme exihnî waihkachonho poyero, kekn̂e Moises yîwya so.

10-11 On wara marha kekn̂e Moises yîwya so, On wara na mat amn̂e aaxatî pîn komo yar̂maxi awcetaw so, Aporin komo Kaan nar̂mape awya so. Ero ke iitono komo mahsîyatu. Anarimaw ahsîxapu komo chew na meen̂atu wooxam cenporem. Noro xe tak na mai apici me. Ero wa een̂ataw awya ahsîcoko rma apici me.

12-13 Amîn yaka arko. On wara noro ya kasko, ekanamurinkakî, awamoxoxon marha yîhkotoko. Apononthîrî kr̂a ar̂makî, yaw mîxakn̂e awahsîyataw erotho, kasko yîwya. Ero wa exitaw tak amîn yaw rma n̂expe cewn̂e nuun̂i ha ka. Ero yimaw nîwratape tîîmînhîrî pen pînîn yaw, tînocwanînhîrî pen pînîn yaw marha. Ero yinhîrî noro tak mahsîyasî. Iin̂o me tak masî, apici me marha nasî noro hara.

14 Aamexan pîn me tko een̂ataw awya en̂epeko ahyai tanme ro mak totohme. Puranta pona tîmîhra ro mak cexpore nasî. Awanton me cirihra marha esko. Mîwîrîmai thakwa okwe. Ero ke awanton me cirihra esko, kekn̂e. Ero wa kekn̂e Moises yîwya so.

15 On wara marha kekn̂e Moises yîwya so, On wara na natu apoyino komo, asak na natu yipici komo. Anarî xatî me na nai iin̂o, anarînhîrî xatî pîn me n̂he na nai okwe. Noro yipu komo na n̂ewruyatu kîîrî me ciin̂o mumuru me ciki. Poturme me tko na n̂ewruya yiixera ehtopo mrerî.

16 Ero yinhîrî pahkî n̂he exiche cemyawnonhîrî n̂ekamya yîîm tumumuru komo ya. Ero wa ekamyataw yiixe cehtopo mrerî cirihra n̂expe potuthîrî warai me. Mahyaw ewruxapu wakrera ro mak n̂expe yîîm poturme ewruxapu yopo, yiixera cehtopo mrerî yopo ha. Ero wa men cirihra n̂expe.

17 Poturme thakwa n̂ewruyakn̂e noro yiixera ehtopo mrerî. Ero ke noro xa wakrepe anarî komo yopo. Ahce na yekamyataw tumumuru komo ya cewn̂e so asakî rma nîmpe potuthîrî ya. Ero wa potuthîrî wakrepe yîîm yihcirî me kar̂pe cehtopo yenpon̂e me exirî ke. Ero ke twakresom me thakwa nasî noro anarî komo yopo, yumumuru komo yopo, kekn̂e Moises.

18 On wara marha kekn̂e Moises yîwya so, Anarimaw on wara na nai anarî amumuru komo, yîrwonpontho me mak na nai kica. Tîîm nanwekya, tînocwan marha. Panaretaw yîwya so entara rma na nai yîmtapotarî komo.

19 Ero wa exitaw noro tak nahsîcowpe yîîm, yînocwan yakro. Poritomo komo yaka tak naacowpe ewto potawno komo yaka.

20 Arîche on wara kacowpe yîwya so, Yîrwonpontho mak moso okwe amna xîkrî. Amna yanwekn̂e me mak nas okwe, amna yewetîra ro mak nas okwe. Wara ro mak, kan̂e me nasî, wenasî marha kica, kacowpe.

21 Ero yentache iitono komo ya kîrkomo ya, yumumuthîrî pen tak waihkacowpe toh ke. Ero wa cetakir̂wamapore nasî amyamro kicicitho ke tîchewnoyemînhîrî. Waihkachonhîrî tak n̂encexe Ixaw Yana komo. Ero ke twerî tak naxe ero yipu yentarî ke.

22-23 Anarimaw iito na nai kicicme ehxapu apoyino komo. Twaihkaxmu moso, kacho me na nai. Ero ke noro yipu tak na mîwaiketu, okoputhîrî na mamposocetu weewe pona. Iito rma tko tînomra ehcoko okoputhîrî weewe po rma tamhosokye. Cenmaxmu me tînomra ehcoko. Ero kaamo po rma ahrucoko roowo cheka. Kaan nîwîrîmarî me thakwa nasî tooto weewe pona amhosotoxapu. Ero ke tînomra ehcoko iito. Ero yipu ke arowon komo yîwîrîmara ehcoko kica. Aporin komo Kaan nîmrî mîn aweken komo me. Ero ke yîwîrîmara ehcoko, kekn̂e. Ero wa kekn̂e Moises Ixaw Yana komo ya.