Taa, on wara xakn̂e Moises, Ixaw Yana komo panatanmekyakn̂e xa hara axawa po exitaw so, Xotaw xehxa exitaw so. Woskara po xatken̂e Supu yecento. Mehxa xakn̂e Paran, xehxa xakn̂e Topew. Iito marha xakn̂e Rabaw, Aseroce, Cisabe. Iito exitaw so n̂examro panatanmekyakn̂e Moises.

2 On wicakî mooxe nasî iina kîwcetaw, 11 ro cetakriyaxe Orebe Yîpîn poi kîwcetaw Kates Bahn̂eia pona. Ero wicakî kîwtotopo nasî Sei Yîpîn pore kîwcetaw.

3 Ero yimaw 40 cimn̂ipu tak xakn̂e Ixaw Yana komo mohtoponho Exitu poi. Ero cimn̂ipu po tak Moises nîmtapowakn̂e 11-nhîrî nuun̂i po, yihcirî kaamo po. Ixaw Yana komo ya n̂ekatîmyakn̂e Kporin komo mtapotachonho ahnoro, Ero wa Ixaw Yana komo panatanmeko, kachonho yîwya.

4 Pahxa n̂he ka Sion pen nar̂metken̂e Amohew komo kayaritomon pen, Esbon pononho pen ha. Oki pen marha nar̂metken̂e pahxa n̂he Astaroce pononho pen. Basan pono komo kayaritomon pen mîk xakn̂e. Etîrei po exitaw nar̂metken̂e. N̂examro yar̂mache tak panatanmekno n̂iir̂akn̂e Moises.

5 Xotaw xehxa xatken̂e Ixaw Yana komo Moabe rowon po rma. Iito exitaw so on wara kekn̂e Moises,

6 Ai okopuci komo, on wara kekn̂e Kporin komo Kaan kîwya so, Orebe Yîpîn yamrinaw kexitaw so ka, Pahkî tan mehcow îîpî yamrinaw ha.

7 Ero ke etocoko tak Amohew komo rowon pona, îîpî ken̂arî pona. Woskara pona marha etocoko. Mehxan pona marha etocoko îh pona, suu n̂ixan pona marha etocoko. Kananew komo yewton pona roro etocoko. Ribanu pona roro marha, eepu yecihtaka roro marha etocoko, Ewpratesî yecihtaka ha. Iina so etocoko.

8 Enko xe, Kanan wîmye awya so arowon komo me. Ero ke ero pona etocoko. Aweken komo me ahsîtatko. Ero men wîmyas awya so, wîîkekn̂e aporin pen komo ya. Abraaw ya wîîkekn̂e, Isake ya marha, Xako ya marha. Ero wîmyas amn̂e awya so, awepamthîrî komo ya marha, wîîkekn̂e. Yaaro tan wîîkesî cemaro pîn me ro mak, wîîkekn̂e yîwya so, kekn̂e. Ero wara kekn̂e Kporin komo kîwya so.

9 Taa, iito rma kexitaw so on wara wîîkekn̂e awya so, kekn̂e Moises, entatîkarî yopo ro mak maxe okwe owya cewn̂e thakwa oyexirî ke, wîîkekn̂e.

10 Awepamnoce so Aporin komo Kaan. Mer̂pora ro mak tak maxe xir̂ko wara ro mak tak, kah yawno wara.

11 Awepamnopu xe so rma tko wasî Kporin komo ya, ponaro aporin pen komo yehtopo ya. Mer̂pora ro mak awepamnopu xe so wasî yîwya. 1-înhîrî yepam xe wasî 1.000 me cehso ro. Ero wicakî awepamno xe so wasî Kporin komo ya.

12 On wara tko wîîkekn̂e awya so, Ahce na poko meserepoketu anarimaw so, ahwora marha na matu anarimaw so, ahce wa na awehtopo komo mîwîrîyaketu na anarimaw so. Ero wa awehtopo komo nasî yînîmrî yopo owya cewn̂e oyexirî ke thakwa.

13 Ero ke kîrkomo men̂ekacoko, takîhsom komo mak, yuhnari yîhtînon̂e komo, mîn hak poko ehcamhokaxapu komo. Mîk hak tribun poyino komo men̂ekacoko. Men̂ekache awya so n̂examro marha tak wiir̂asî awenîn̂e komo me, wîîkekn̂e awya so.

14-15 Taa, ero wa ham. Kir̂wan̂he amna n̂encesî amtapotarî, mîîketken̂e owya. Ero ke tak awan̂e komo wan̂ikyakn̂e, takîhso cesehtînosom komo, mîn hak poko ehcamhokaxapu komo. N̂examro tak wiir̂akn̂e awenîn̂e komo me. Anarî komo wiir̂akn̂e 1.000 komo yenîn̂e me, anarî komo wiir̂akn̂e 100 komo yenîn̂e me, anarî komo wiir̂akn̂e 50 komo yenîn̂e me, anarî komo wiir̂akn̂e 10 komo yenîn̂e me. Ero wa ciino wiir̂akn̂e awenîn̂e komo me, atribun komo yenîn̂e me so ha.

16 Ero yimaw marha awen̂ekan̂e komo panatanmekyakn̂e ow ero yimaw. On wara wîîkekn̂e yîwya so, Awakno komo yeseseyukyataw so n̂examro yehtopo entacoko amyamro. Yaaro xa etacicoko ehtopo komo. Ero wa etacicoko Ixaw Yana komo re yeseseyukyataw so. Ero wa xa marha etacicoko Ixaw Yana yeseseyukyataw so achewno komo yakro hara.

17 Cemyawnoyem komo yentan̂e me mak exihra ehcoko. Emyawnomnî komo marha entacoko. Erasîra ro mak ehcoko tooto pona. Kaan xa nasî ken̂ekan̂e me. Camkî awexitaw so tko anarî komo yehtopo poko n̂examro ehcoko ohyaka. Ow tak wencesî noro yipu komo yehtopo. Ero wa wencesî.

18 Taa, ero yimaw kpanatanmekyatken̂e so miyan poko rma takîhso awehtopo komo poko, kekn̂e. Ero wa kekn̂e Moises yîwya so.

19 On wara marha kekn̂e Moises yîwya so, Ero yinhîrî Orebe poi tîtmokyatken̂e Kporin komo yanme, ponaro kehtopo komo yanme rma. Îh pono komo wece tîtmokyatken̂e Amohew komo wece. Axawa pore rma tîtmokyatken̂e. Porinî ro mak mîn xakn̂e axawa, eraspetono ro mak kopi. Ero rma meen̂atken̂e amyamro. Ero yinhîrî Kates Bahneia pona cepataketken̂e hara.

20-21 Iito kexitaw so on wara wîîkekn̂e awya so, Taa, tanî tak taxe îîpî chew, Amohew komo rowon po ha. Onî rma tî nîmya Kporin komo Kaan kîwya so. Enko xe, yînîmrî on awya so. Ero ke ahsîtatko tak ha aweken komo me. Ero wara rma kekn̂e Kporin komo, ponaro aporin pen komo yehtopo. Erasîra ro mak ehcoko. Ahwokara marha ehcoko, wîîkekn̂e awya so.

22 Ero yinhîrî ohyaka mîmokyatken̂e ahnoro. On wara mîîketken̂e owya, Kîrkomo cokorî ka cen̂epecerî kîywapu so roowo yenîn̂e komo. Taixa tîtopore nasî, kexe amn̂e tmokuche so hara, ero wa nai ha ewto komo iitono, kexe marha kîwya so, mîîketken̂e.

23 Kir̂wan̂he wencekn̂e amtapotarî komo. Ero ke 12 kîrkomo men̂ekekn̂e. Cewn̂e so mak men̂ekekn̂e atribun komo poko hakî so.

24 Ero ke cetken̂e tak on̂etacitho komo îîpî chere. Eskoro Woskaran yari tî cetken̂e. Iitono komo tî n̂een̂atken̂e ahnoro.

25 Uupa yeperîrî marha pohcatken̂e. N̂ekyatken̂e kunkukmarî komo. Tîn̂enîthîrî komo marha n̂ekatîmyatken̂e. On wara ketken̂e ero poko, Kir̂wanî rma re mîn Kanan, Kporin komo Kaan nîmrî kîwya so, ketken̂e. Ero wa ketken̂e enîn̂e komo.

26 Ahsîso tko awto xera so mîxatken̂e kica. Kporin komo mtapotarî manwekyatken̂e kica, ponaro awehtopo komo mtapotarî ha.

27 Kicicme so mîmtapowatken̂e kica amîn komo yaw so. Kîîxera so mak nai ham Kporin komo kica, mîîketken̂e mak okwe. Amohew komo nar̂marî me mak kehce so xiya. N̂examro ke mak kwaihkexe so okwe, mîîketken̂e mak kica.

28 Ahna ma re tîhcet ha ke okwe? Kahwokacow so mak okwe kakno komo. On wara kexe kîwya so, Karitî komo mîkyam kopi iitono komo, kawno komo ro mak kopi. Kyopo so men naxe okwe, kexe kîwya so. Porin marha ewton komo. Kah yaka rorono mîn ewton komo wacan. Enake yepamtho komo meero amna n̂een̂e iito kopi, kacow kîwya so. Ero wa kacow kakno komo kîwya so, mîîketken̂e.

29 On wara tko wîîkekn̂e ow hara awya so, Erasîra rma tko ehcoko. Ahce wa tatu kopi? kahra ehcoko.

30 Aporin komo Kaan xa wa cesî aywapo so. Noro rma ar̂mapono n̂iir̂asî. Yîwîrîmano n̂iir̂akn̂e awero ro so pahxa ha ka Exitu po kexitaw so, ar̂mapono marha n̂iir̂akn̂e. Ero wa xa marha Kanan pono komo nar̂mapes hara, wîîkekn̂e awya so.

31 Axawa po kexitaw so Kporin komo yehtopo wa meen̂atken̂e, ponaro awehtopo komo yehtopo. Awar̂atken̂e so Noro tumumuru naar̂asî yîîm ero wara rma. Esama yaw awekyatken̂e so oona roro.

32-33 Wara rma Kporin komo pona enîhra rma mîxatken̂e, ponaro awehtopo komo pona. Apoturme so cekn̂e awetakritopo komo yenpotome awya so, awesamarî komo yenpotome marha awya so. Wehto chew cekn̂e kosope. Kaweresî chew cekn̂e katpanaw hara. Noro pona enîhra mîxatken̂e.

34-35 Amtapotarî komo yentache tak Kporin komo nîrwonakn̂e apoko so. On wara kekn̂e, Kicicitho komo ro mak moxam ewrutoponhîrî komo n̂ixa ro kica. Kir̂wanî ro mak mîn Kanan. Ero poko cma re wîîkekn̂e aporin pen komo ya, Kanan xa wîmyas awya so, wîîkekn̂e. Yaaro xa tan wîîkesî cemaro pîn me ro mak, wîîkekn̂e yîwya so. Enîhra rma tko naxe moxam okwe. Yaaro xa marha tan wîîkesî cemaro pîn me ro mak, kekn̂e owya apoko so.

36 Karebe mak n̂een̂asî, Xepon̂e mumuru. Yînapikîthîrî rma wîmyasî yîwya. Noro yepamtho komo ya marha wîmyasî. Ero wîmyasî yîwya so oyewetîtîkan̂e me exirî ke noro reha, kekn̂e Kporin komo owya.

37-38 Opoko marha nîrwonakn̂e Kporin komo apoyero so rma. On wara kekn̂e owya, Amoro meero tohra masî Kanan pona. Awakrononhîrî xa yo ces iina Xoswe, Nun mumuru. Ero ke noro ahworeko Ixaw Yana komo yaatopo poko. Noro xa Kanan nahsîpesî Ixaw Yana komo ya.

39 Amxîkîthîrî komo xa matko cexe iina amn̂e. Wahrai komo mîkyam, kicicitho yîhtînon̂e pîn ka mîkyam, kir̂wan yîhtînon̂e pîn marha mîkyam. Moxam cik mak nahsîyaxe okwe Kanan pono komo, mîîketken̂e amxîkrî komo poko. N̂examro rma tko cexe Kanan pona amn̂e. Ero wîmyasî yîwya so eken komo me.

40 Amyamro reha yaw xa marha etocoko hara. Cucurem yesamarî yaw etocoko hara axawa poreno yaw ha, kekn̂e. Ero wa kekn̂e Kporin komo owya.

41 On wara tko mîîketken̂e hara owya, Kicicme amna n̂eexi kica. Kporin komo amna nanwekî kica. Amna rma tko wa ces ha Kanan pona iitono komo yar̂maxi. Kporin komo Kaanî mtapotarî yaw roro rma amna cesî, mîîketken̂e tak owya. Akaciparan komo mahsîyatken̂e, arahnu kom ha. Îh pona kaikatko, mîîketken̂e.

42 On wara tko kekn̂e Kporin komo owya, On wara kasko yîwya so, Tohra tak men ehcoko etar̂maxi. Awakro so men tohra ro mak wasî. Aaxatî pîn komo men awar̂metu so okwe, kasko yîwya so, kekn̂e owya.

43 Ero ke yîmtapotachonhîrî wekatîmyakn̂e awya so. Entara rma tko mîxatken̂e. Kporin komo mtapotarî manwekyatken̂e xa hara kica. Awanme ro so rma tko mîîcetken̂e okwe îh pona.

44 Amohew komo tko mokyatken̂e awar̂maxi so îh pono kom ha. Aweken̂emekyatken̂e so weenu kweken̂emekyaxe so ero wara. Sei poi tak awen̂epetken̂e so. Miya roro awen̂epetken̂e so Ohma pona roro.

45-46 Ero ke mîmokyatken̂e hara awetarî komo yaka. Kporin komo n̂entarî me cma re mîwracetken̂e. Awratarî komo ponarora ro makî tko tî xakn̂e Kporin komo. Awentan̂e pîn komo wara ro mak xakn̂e. Ero ke Kates po mîxatken̂e pahkî. Yaake ro menmayatken̂e iito, kekn̂e. Ero wa kekn̂e Moises Ixaw Yana komo ya.