On wara marha kekn̂e Moises Ixaw Yana komo ya, Ero yinhîrî yaw xa marha tîhcetken̂e hara, axawa yesamarî yaw xa marha, Cucurem Yewku yesamarî yaw ha. Kporin komo kekn̂e owya ero yaw roro rma tîhcetken̂e. Pahkî tîxatken̂e Sei Yîpîn mamrikrî poko.

2-3 Ero yinhîrî on wara kekn̂e hara Kporin komo owya, Pahkî tan mehce on îîpî mamrikrî poko. Oroto nohce yaw roro tak etocoko hara.

4-6 On wara Ixaw Yana komo yîtwermakî, Ayanan komo mîkyam Sei pono komo. N̂examro rowon pore tak mîîcexe. Esau pen yepamtho mîkyam iitono komo. N̂examro n̂eraswaxe apona so. Ero ke twerî mak etocoko yîchere so. Yîrwonmekno cirihra ro mak men ehcoko. Yîrowon komo tîmîhra ro mak was awya so. Ahtarî komo wicakno meero tîmîhra wasî. Sei Yîpîn wîmye Esau yepamtho ya reha eken me so. Puranta ke n̂examro epemacoko anahrî komo, tuuna marha epemacoko awokru kom ha, kekn̂e Kporin komo owya. Ero wa kekn̂e Noro owya.

7 Awakretken̂e so Kporin komo Kaan. Ehn̂an me ro mak awir̂atken̂e so ahce na poko awexitaw so. On axawa pore awaimamtoponhîrî komo ponaro wa nai ha. 40 cimn̂ipu xakn̂e Noro awakro so. Esemetanmekîra ro mak mîxatken̂e. Ero wara awir̂atken̂e Kporin komo.

8 Ero yinhîrî kyanan komo yeken tak tîtmamrikyatken̂e, Esau yepamtho komo yeken, Sei pono kom ha. Woskara yesamarî yaw toxapunhîrî tak cetowyatken̂e hara, Erace yesamarî yai marha, Esion-Xebe yesamarî yai marha. Moabe yaxawan yesamarî yaw tak tîtmokyatken̂e hara.

9 Ero yimaw on wara kekn̂e hara Kporin komo owya, Moabita komo emetanmekîra ehcoko. N̂examro yakro etar̂mara ro mak ehcoko. Yîrowon komo tîmîhra ro mak was awya so. Ahî wîmye Roo yepamtho komo ya eken me so, kekn̂e Kporin komo.

10-11 (Pahxa Emin komo tî xatken̂e iito Ahî po. Mer̂pono pîn komo tî mîkyam xatken̂e Emin komo. Karitî komo tî mîkyam xatken̂e, kawno kom ha. Mer̂pono pîn komo mîkyam xatken̂e. Enake yepamtho komo wara so rma xatken̂e. Tooto mîkyam xatken̂e Anakin komo wara xa marha. Emîn, kacho me tko tî xatken̂e Moabita komo ya hara.

12 Pahxa reha ka Orew komo tî xatken̂e iito Sei Yîpîn po. Esau yepamtho komo reha tî n̂examro pen n̂en̂epetken̂e. Waihketken̂e ro makî tî. Ekenhîrî komo pona takî tî n̂esekenmetken̂e hara. Ero wa so tî xatken̂e Esau komo, Ixaw Yana komo wara xa marha. Kanan pononho pen komo waihketken̂e n̂examro hara. Ekenhîrî komo tak nahsîyatken̂e ceken komo me. Kporin komo nîmyakn̂e yîwya so ekenhîrî komo me.)

13 Ero yinhîrî on wara kekn̂e hara Kporin komo, Taa, etocoko hara, On tak watocoko tuuna yaporî, Serece ha, kekn̂e. Ero ke Serece tîtwacetken̂e.

14 38 cimn̂ipu xakn̂e Kates Bahneia poi kmohtoponhîrî komo Sereci yaporî watotopo pona roro ha. Ero wacetaw twaihtîkaxi tak xatken̂e ahnoro kîrkomo pen, sowtatu me ehxapunhîrî pen kom ha. Achew so exihra tak xatken̂e ero yimaw. Kporin komo kekn̂e yîwya so ero wara rma xatken̂e twaihtîkaxi.

15 N̂examro pen waihkekn̂e Kporin komo achew so exihnî me cehso ro tak okwe.

16-18 Taa, sowtatu pen komo waihtîkache on wara kekn̂e hara Kporin komo owya, Oroto tak Ahî watocoko Moabe rowon wokpamacho.

19 Amonita komo pahnoke awexitaw so n̂examro emetanmekîra marha ehcoko. Ahc3e na cirihra ro mak ehcoko. Yîrowon komo tîmîhra was awya so. Roo yepamtho komo yeken me makî reha wîmyakn̂e ero yîrowon komo me, kekn̂e owya Kporin komo.

20-21 Pahxa rma anarî komo rowon me xakn̂e iitono. Sansumin me tko tî ka n̂examro pen n̂etahcatken̂e Amonita komo. Karitî pen komo marha mîkyam pen xatken̂e, mer̂pono pîn komo. Kawno komo marha mîkyam xatken̂e Enakin komo yecenarî so. N̂examro pen waihkapekn̂e Kporin komo Amonita komo ya. Ekenhîrî pona takî tî n̂esekenmetken̂e n̂examro hara.

22 Ero wa xa marha Esau yepamtho komo nakronomekn̂e hara Kporin komo. Sei pono komo mîkyam nakronomekn̂e. Orew pen komo waihkapekn̂e Esau yepamtho komo ya. Ekenhîrî komo pona takî tî n̂examro n̂esekenmetken̂e hara. Iito rma tak naxe oroto rma.

23 Apin pen komo marha tî xatken̂e pahxa. Mehxa tî xakn̂e n̂examro pen yewtontho Kasa pona roro. Kahtorin komo tko tî mokyatken̂e Kahtorî poi Apin pen komo waparî me. Ekenhîrî komo pona takî tî n̂esekenmetken̂e hara. Ero wa xatken̂e Kahtorin komo.

24 Taa, on wara kekn̂e hara Kporin komo owya, Ahnon Yepu tak watocoko. Enko xe, anar̂marî komo me wiirî Sion pen, Amohew komo kayaritomon pen, Esbon pono pen ha. Yîrowonthîrî marha nasî onîmrî me awya so aweken komo me. Ero ke noro waparî me tak etocoko. Yîrowonthîrî tak ahsîcoko aweken komo me.

25 Oroto wihciyasî cerahsom me apona so ciino ritopo. Ero wa so wiir̂asî mîk hak rowon pono komo, kah yakwerî mamawno kom ha. Awekaci komo tak n̂encexe ahnoro. Entache tatanaxe mak apona so cerahtîmrî ke so ha, nahwokexe ro mak okwe, kekn̂e. Ero wa kekn̂e Kporin komo owya, kekn̂e Moises.

26-27 Ero yinhîrî on wara kekn̂e hara Moises yîwya so, Ketemoci yaxawan po kexitaw so kîrkomo wen̂epekn̂e Sionî mtapotarî yentaxi, Esbon pono komo kayaritomonî mtapotarî yentaxi. Tawake mak amtapotacoko noro yakro, wîîkekn̂e yîwya so. On wara kacoko yîwya, Ai apa, arowon pore cma re ces amna. Esama yaw mak amna cesî etowîn me ro mak. Poowa me etowra nas amna, kari me etowra marha.

28-29 Tînahrî amna naponukyasî ahyai so puranta pona. Tutunarî marha amna n̂epemes hara. Tîhtarî po mak amna cesî. Esau yepamtho amna wahkotora xatken̂e, Sei pono kom ha. Ero wa marha xatken̂e Moabita kom hara Ahî pono kom ha. Amna wahkotora marha xatken̂e n̂examro. Ero ke ero wa xa marha cma re amna men̂epesî arowon pore amoro hara. Arowon watoche Xotaw yepu tak amna waces hara Kanan pona. Ero tî nîmya amna ya Kporin komo ponaro amna yehtopo. Ero ke iina tîto xe nas amna, kacoko yîwya, wîîkekn̂e yîwya so.

30 Anarî me tko tî kekn̂e Sion, Esbon pono komo kayaritomon. Pîra ro mak, orowon pore tohra ro mak men ehcoko, kekn̂e tî kica. Kaanî rma tko ero wa n̂iir̂akn̂e yîropotarî, Aporin kom ha. Kanwekn̂e me n̂iir̂akn̂e awya so anar̂marî komo me ciitome. Enko xe, nar̂mapekn̂e awya so.

31 Ero yinhîrî on wara kekn̂e hara Kporin komo owya, Enko xe, Sion tîmtopo wihciye rma, awya so tîmtopo. Yîrowonthîrî tîmtopo marha wihciye. Ero ke yîrowonthîrî pona tak etocoko ahsîtome tak awya so, kekn̂e owya. Ero wa kekn̂e Kporin komo owya.

32-33 Ero yinhîrî tak mokyakn̂e Sion kwaparî komo me. Maywen komo marha mokyatken̂e ahnoro sowtatu pen kom ha. Xasa pona tak kepor̂atken̂e so. Kporin komo Kaanî tko n̂examro pen nar̂mapekn̂e kîwya so. Kayaritomo pen tar̂metken̂e, yumumuthîrî pen komo marha, maywenînhîrî pen komo marha ahnoro.

34 Noro pen yewtontho komo marha tahsîyatken̂e ahnoro. Iipononhîrî pen komo tîtwaiketken̂e. Kîrkomo pen, wooxam pen komo, rikomo pen komo, ahnoro tîtwaiketîketken̂e. Waipîn komo yîmtora ro mak tîxatken̂e.

35 Iyokuthîrî komo taar̂atken̂e koh komo me. Emyawnonhîrî komo marha tahsîyatken̂e n̂examro pen yewtontho pononho.

36 Mehxa nasî Aroetho n̂examro pen yewtontho, Ahnon Yepu yecihtaw nasî. Ero tahsîyatken̂e kewton komo me. Tuuna yecihtawno marha tahsîyatken̂e hara ewto komo. Ahnoro ewtotho komo tahsîyatken̂e Xireace pona rorono komo. Kyopono komo exihra ro mak xakn̂e ewto pono komo. N̂examro pen nar̂mapekn̂e Kporin komo Kaan ahnoro kîwya so.

37 Amon yepamtho komo rowon pona tohra ro mak mîxatken̂e Kporin komo Kaanî mtapotachonho yaw roro rma. Xaboke yecihtarino pona tohra ro mak mîxatken̂e. Îh pona so marha tohra mîxatken̂e iitono pona so ewto pona. Kporin komo n̂ewyomarî komo yar̂maxi tohra ro mak tîxatken̂e, kekn̂e. Ero wa kekn̂e Moises Ixaw Yana komo ya.